اخوى من وجهة نظرى السيارة افضل بالنسبه للديزل ارخص وهو نوعان اسود وذهبى الاسود هو الرخيص
بالنسبه للمواقف فيه مجانى لون الخط يكون ابيض واللى لونه ازرق يكون بفلوس حسب الوقت
(1.5 يورو للساعه).
و فيه مواقف بفلوس وتكون سفليه .(بالنسبه لبعض الفنادق تكون للنزلا مجانا او15 يورو لليوم )
اذا كانت السيارة صغيرة كل 3 ايام او اليوم الرابع تعبى (40/50 يورو)
بالتوفيق .

أخي الكريم أنا دائما أنبه على دخول هذا الموضوع لكن لا أحد يستجيب
https://artravelers.com/p/re/69508

ما قصرت أخوي ثامر
ولا قصر أخونا الشاب، وتراني راجع للموضوع، ولم أجد فيه إلا أن الوقود غالي وأنه بحوالي 90 سنت، وسؤالي: كم يكفيني الديزل أو البنزين من كيلو تقريبا؟ والمواقف؟ هل هي غالية؟
باختصار: تنصحونني بالسيارة أو بالباصات؟
ويا ليت مَن عنده تجربة يفيدنا ولو كانت قليلة!

حبيبي أنا توني راجع من رحلة للنمسا وألمانيا وفرنسا بالسيارة وواصل قبل أمس .... بالنسبة للبنزين أسعاره يويرو ونص للتر أقل سعر لقيته ويصل لليورو وستين سنت وهو أنواع وكلها في هاللحدود .... أما الديزل فهو من يويرو وثلاثين سنت وهذا نادر ما تلقى هالسعر ويصل في ألمانيا وفرنسا الى اليورو وستين سنت ..... بالعربي يبيلك كوقود مية وعشرين ريال باليوم اذا انت راعي روحات وجيات وسفر بين المدن .... أما المواقف فلازم تحط في بالك ان اكثرها بفلوس الفندق يمكن ياخذ على موقفه فلوس ويمكن ما يكون عنده موقف فتضطر توقف بموقف قريب بفلوس ... أكثر المواقف اللي على الشارع تكون بفلوس ولمدة محدودة مثلا نص ساعه بنص يويرو وساعه بيورو وأكثر شي ساعتين بيوروين وممنوع توقف اكثر من ساعتين ولازم تحط الورقة اللي اخذتها من مكينة المواقف على الطبلون عشان يشوف المرور كم ساعة لك واقف ... أنا كنت حاط ميزانية 70 ريال للمواقف يوميا وكفت .... عموما السفرة بدون سيارة راح تفقدك ثمانين بالمية من المتعة ... توكل على الله تراها أوفر من الباصات أو القطارات

هذي صور اخذتها لاسعار احدى المحطات الرخيصة ولم اجد هالاسعار الا في النمسا

طبعا البنزين ارخص هنا بس الديزل يمشيك اكثر يعني هي هي يمكن الديزل اوفر بشي بسيط

ما شاء الله عليك يا أخ (صغيرون) كفيت ووفيت، ويا ليت كل المسافرين يفيدوننا مثلك، لكن بقي سؤال لك (صغيرون): وهو: كم تعبّي السيارة من لتر في المرة الواحدة؟ وكم يمشيك من كيلو تقريبا؟ سواء البنزين أو الديزل
(أنت ماشاء الله عليك دقيق وجوابك نافع في هذه المسائل)
وسؤال آخر لك ولغيرك: هل أسبانيا أيضا بمثل هذا الغلاء؟؟؟
ويظهر أن الأسعار تغيرت وارتفعت بعد الارتفاع الشديد لسعار البترول؟

هلابك اخوي وأنا في الخدمة دايماً.............. بالنسبة للنمسا كنت أعبي السيارة والتانكي فاضي بستين يورو أو أكثر شي بسيط ويمشيك تقريبا الديزل 700 كيلو ........ أما البنزين فأكيد يمشيك أقل ويمكن يكون أرخص سعر .......... أما في ألمانيا وفرنسا أغلى شوي يمكن تعبي فل اذا السيارة فاضية بسبعين يورو ... أما أسبانيا فأكيد ما راح تفرق كثير ولا عندي خلفية عن أسعار الوقود هناك.

صحيح نسيت أقول شي مهم جدا لازم تعمل حسابه .... ترا الخطوط السريعة عليها رسوم ... مثلا في النمسا لازم تشتري استكر وتلصقه على الزجاج الأمامي للسيارة وله مدة معينة (اسبوع ، عشرة أيام ، شهر) أما المانيا ما شفت هالشي ... وفي فرنسا فيه زي نقاط التفتيش ياخذون منك فلوس من شباك ........ مثلا أنا سافرت من سترازبيرغ على حدود فرنسا والمانيا الى باريس وكانت المسافة اكثر من 400 كيلو دفعت خلالها 46 يورو .. كل شوي فيه نقطة وتدفعلهم فلوس .. بصراحة ما أدري عن النظام في أسبانيا وفيه بديل طبعا انك تروح من الطرق الريفية ويمكن تكون اقرب مسافة بس صدقني اذا مشيت فيها بسرعة ثمانين اعتبر نفسك محظوظ لانها ضيقة وتمر بقرى كثيرة تمنعك من السرعة يعني المشوار اللي بتاخذه باربع ساعات في الخط السريع راح تاخذه بالريفي بست ساعات.

الله يبيض وجهك ويرحم والديك، تحب الخير للناس، نورتنا الله ينور عليك، أشوف الأمور تلاحقت!!!!
بنزين غالي!!
ومواقف غالية!!!
والآن رسوم طرق!!!،
وكل هذي ما خطرت ببالي! فشكرا جزيلا جزيلا جزيلا لك!!! ويمكن أفاجأ هناك بضرائب من هنا أو من هنا!!!
شكلي والله أعلم سأصرف النظر عن استئجار السيارة، خاصة أني لحالي! وبيعيني الله على الباصات!
إلاّ كم اسعارها تقريبا بين المدن؟ وهل مواعيدها منضبطة؟ ومراكبها مريحة؟؟
أرجو منك الجواب بما تعرفه عن أوروبا، وأرجو من أصحاب أسبانيا المشاركة.