عبوودي
الحياة هناك ولا أروع
والامن و لله الحمد مستتب لكن مرات تصير بعض الامور .. و الواحد يحاسب لكن حاول انك ما تقرب من منطقة كامبتن
بالنسبة للسكن ... على حسب الميزانية و بعض الشباب كانوا ساكنين في كوستا ميسا و ارفاين
السكن شوي غالي لكن العادة انك تشوفلك روميت اصرفلك ...
أنا سكنت في كومبليكس اسمة بيكسبي جاردين في اللونج بيتش ... بعيد عن الحامعة شوي لكن مرتب و على مستوى ... بس دامك جديد ما اتصور انه بيصلحلك
فيه سكن طيب عند دوار ال PCH ممكن ادليك عليه بس لازم تعرف المنطقة أول .. و أنا شخصيا أنصحك بالسكن فيه
بعض الشباب كانوا ساكنين في بيفيرلي بلازا ... قريب جدا من الجامعة و الغرفة الماستر في التو بيدروم ابارتمينت كبيرة و حلوه ... و اكثر اللى ساكنين فيه طلاب الجامعة .. بس المواقف لك عليها شوي خاصة اخر الليل اذا جيت تدور باركن صعبة شوي .. بس في الوقت نفسة ما اشوف هذى معضلة
اذا ما عندك مشكلة في الميزانية اسكن في ocean long beach 1900
http://www.lyon1900ocean.com/
Lexury بمعنى الكلمة و مطل على البحر
اذخل على View our panoramic pictures و شوف الصور
عندك سكن اسمه Hathaway بعض الشباب كانوا يسكنون فيه
فيه أكثر من مطعم عربي في المنطقة أشهرهم اوبن سيسامي في السكند سترتيت .. شارع حلو و مرتب .. بالنسبة للترفية في المنطقة فيه مكان اسمة ذا بايك
و كل فترة يصير سباق للفورمبلا 1 و ال ناس كار قرب الاوشن افينيو
منطقة اللونج بيتش موقعها استراتيجي لدرجة ما تتصورها .. في الوسط
بعنى هنتيجتون بيتش و انهايم و ارفابن و كوستا ميسا تبعد 25 - 30 دقيقة و على حسب الزحمة
و على فكرة انهايم فيها بقالات و مطاعم عربية ؟؟ بعني اللى موجود عدنا أكثريته موجود هناك .. و لا تحاتي في مسالة الاكل .. المطاعم العربية و الهندية و الايرانية على أفا من يشيل هناك ..
عندك لوس انجلوس و سانتا مونبكا بعد تبعد حوالي النصف ساعة من اللونج بيتش ..
طبعا الدنيا هناك غير .. و أعطيك Guarantee أنك بتبسط
و الشباب هناك ما بيقصرون معاك
كل التوفيق ان شاء الله في الدراسة
ما خبرتنا شو التخصص
و نصيحة أخيرة
روح شوف السكن بعينك .. هذا احسن شي لان اللى يجوز لك يمكن ما يجوز لغيرك و العكس صحيح

الزميل العزيز/ no nick
يعطيك الف عافية على الإفادة العظيمة اللي قدمتها في مشاركتك...
انا طول الله عمرك ابحث عن سكن مايكون غالي مره طبعا مايخلوا من الامان- الوناسة- الراحة النفسية. لان فيه مساكن والله رغم امانها الا انها مملة لا ابعد حد.
افضل ان اسكن بالقرب جنب الجامعة خصوصاً اني لا املك سيارة الان ولن اقوم بشرائها قبل اربع شهور من الان.
يبدوا ان السكن بيفيرلي بلازا من وصفك انه رائع ولكن احب ان استفسر بخصوص اسعار السكن الشهرية؟.
مارايك بالسكن الجامعي مع الطلاب او السكن مع عائلة سمعت ان تكاليف السكن مع عائلة بحوالي 600 دولار شهري.
طبعا الدنيا هناك غير .. و أعطيك Guarantee أنك بتبسط
انا سعيد جداً بوصفك ان المدينة جميلة احد اسباب انتقالي لها هو البحث عن مدينة رائعة ومريحة ولا اشعر بالملل فيها.
اخيرا وليس اخراً.
تخصصي ياغالي هندسة للبكالوريوس على الرغم من دراستي هنا لسنتين وسأعمل معادلة ولا اعلم كم مادة ستعادل وان شاء الله نتوفق فيها ونتخرج منها يارب.
الف تحية لك ماقصرت والله شكراً لك.

هلا اخوي
بالنسبة للسكن
طبعا هو عادي لكن يميزة موقعة الجغرافي .. 5دقايق من الجامعة و قدام السكن يمر باص .. أتوقع كل ريع او نص ساعة
و السكن اغلب سكناه طلاب الجامعة بس ما عليك تراه قديم و قضى عليه الدهر ... و سعره سنة 2005 كان 1400 دولاد لشقة غرفتين .. يعنى اذا بيزيد الحين المفروض انه ما يتعدى سقف ال 2000 دولار .. الحياة لك عليها شوي هناك غالية .. بس يعد ارحم من لوس انجلوس و نيوبورت و ارفاين و لازم يكون عندك روميت
السكن الجامعي و العوائل
بصراحة ما مر علي حد سكن في الدورم .. و اغلب الشباب اللي سكنوا مع عوائل ما كملوا .. بس بالنسبة لك انصحك تسكن مع حد من الشباب فترة أو مع عائلة لفترة لين ما تعرف المنطقة عدل
بالنسبة لنحويل الساعات
على ايامنا كان لازم يكون عندك 56 ساعة عشان تنقبل في الجامعة .. و بعد القبول .. طبعا لازم يشيكون على الديسكريشن للمواد .. اذا نفس الوصف اعتمدوها و اذا غير هالكلام .. لازم ترجع تاخذ المادة
اذا كانت دراستك هندسة كهريائية .. سلملي على نور و وجدي و الله يعينك على شهيان
كل التوفيق عزيزي
واي استفسار انا حاضر