1. نصيحتي لك

نصيحتي لك

• محطة الوصول تكون ميونخ وتاخذون سيارة من المطار وارشح اليوروب كار ( شركة محترمه وتعاملهم جدا راقي ) .
• الإتجاه مباشرة الى سالسبورغ 100كيلو وشوي عن ميونخ والسكن فيها لمدة يومين الى ثلاثة ايام فقط .
• الإتجاه الى زيلامسي والسكن في منطقة كابرون لمدة 5-7 أيام ولا تنسون وانتم طالعين من سالسبورغ تطلعون بدري وتعدون على المناطق اللي بين سالسبورغ وزيلامسي علشان ما ترجعون لهم ثاني مره وتكون المسافه وقتها بعيده عليكم ومن الأماكن اللي بين المدينتين ( الكهف الجليدي - مصنع الملح اتوقع اسمه كذا اذا ما خانتني الذاكره ) .
• المسافه من زيلامسي الى انترلاكن من 530 - 600 كيلو حسب الطريق اللي راح تسلكونه ( فيه اكثر من طريق).
• بعد انترلكن ممكن تطلعون لمنطقة الغابه السوداء وراح تكون المسافة في حدود 350 الى سنتر منطقة الغابه السوداء .
• انصحكم بمدينة رست في الغابه السوداء لوجود مدينة الوروب بارك فيها وتقدرون تخلونها منطقة التقاط انفاس قبل ما تطلعون ميونخ .
• اقرب مدينه فرنسيه تبعد عن مدينة رست 41 كيلو تقدرون تزورونها وترجعون في نفس اليوم .
• من وجهت نظري ماراح تشوفون في منطقة الغابه السوداء أفضل مما شفتو في زيلامسي وانترلاكن .
• من رست الى ميونخ تقريبا في حدود 300 كيلو ويبدو لي ان الطريق ليس بجيد فعندكم خيار ترجعون مية كيلو الى حدود كاليسرو وتطلعون منها الى ميونخ وتقدرون تعدون في طريقكم على شتوتقارت .
• فرانكفورت تبعد عن كاليسرو بحدود 110 كيلو تقدرون تزورونها لوحبيتوا وترجعون في نفس اليوم .
• ميونخ المحطه الأخيره راح تكون محطة تسوق من وجهة نظري مع وجود بعض الاماكن السياحيه اللتي تستحق الزياره .
• طبعا خط السير تقدرون تقلبونه بمعنى يكون ( ميونخ - الغابة السوداء (رست ) - انترلاكن - زيلامسي - سالسبورغ - ميونخ ) فينا ما تطرقت لها لأني ماجيتها بصراحه بس اتوقع لو حبيتوا تروحون لها تقدرون تزورونها بعد زيلامسي وتبعد عنها بحدود 200-300 كيلو .
• نصيحتي لكم لا تكثرون المناطق اللي راح تزورونها علشان ما ترهقون انفسكم خصوصا اذا انتم عائلة .
• بالنسبه لإستفسارك عن وجود اليوروب كار في سالسبورغ نعم لهم فرع في سالسبورغ ( ما انصحكم تاخذون سيارة من سالسبورغ السعر راح يرتفع عليكم ) وانا جيته وكان في المطار وما ادري اذا فيه غيره او لا واليوروب كار فروعها راح تشوفونها في كل المدن اللي راح تزورونها .
• نصيحتي لكم اول ما توصلون ميونخ تسلمون السيارة ( ولا تنسون تعبون السيارة فل قبل تسلمونها علشان ما يدفعونكم مبلغ زيادة) وتستخدمون الأندرقراوند أفضل واوفر كثير ويوصلكم لكل الأماكن اللي تحتاجونها بما فيها المطار .