عزيزي الغالي مرحبا بك ،، وياليت تعطينا تفاصيل عنك أكثر لكي نستطيع خدمتك !!
الحقيقة يبدوا أنك جديد جدا على المنطقة الشرقية ولكن لابأس الطريق من الرياض للخبر لايحتاج إلا وصف طريق
مستقيم طويل 400 كلم حتى تصل الشرقية وتتبع اللوحات إلى الخبر ...
أما شقق بإطلالة على الكورنيش فهذي للأسف محدودة جدا فالشرقية متخلفة كمدينة تقع على البحر مقارنة بكثير
من المدن الواقعة على البحر مثل جدة ودبي وابو ظبي وغيرها ..
فلايوجد لدينا شيء يطل إطلالة بمعنى إطلالة على البحر سوى بعض الفنادق المحدودة والليلة للغرفة لاتقل عن
0ريال ....
بالنسبة إلى أين تذهب فبحكم الجو لدينا فالأماكن محدودة ولاأنصحك بالذهاب إلا لمكانين فقط:
الراشد مول والظهران مول !! ولاتفكر تروح لغيرهم لأن غير هالأثنين مثل جمعة سنتر والشاطيء مول وفينيسيا
والخبر مول وفؤاد سنتر كلها قمة في الملحجة...
والمطاعم ماشاء الله متنوعة والبوابة مليانة بوصف مفصل عن انواع المطاعم وانت وذوقك..
ونصيحتي لكم تعملون البرنامج التالي:
تحجزون لكم في أي شقة مفروشة قريبة للراشد مول تكون فخمة وتفتح النفس وتحولون تتمشون في الراشد
وتتقهون وبعدها تمشون على الطريق الساحلي كتمشية في السيارة وتتوجهون للدمام حتى توصلون القرية
الشعبية وفعلا تستاهل وترى فيها متحف فوق لايفوتكم وتراه دورين وجدا يسوى يعني احسن شي احجزوا
الغرفة اللي تبون وحددوا طلباتكم وقولوا نبيها بعد ساعة واطلعوا فوق تمشوا وارجعوا تعشوا وروحوا للخبر ومروا
على محل اسكريم وعصير وقضوها تمشية بالسيارة لأن الجو جدا بارد وماعندنا مسارح او سينما او اي مكان للسهر
وبعدين روحوا شقتكم ناموا ومن الصبح من الساعة 7 وانتم متوجهين على البحرين وحاجزين لكم في فندق ميركيور
الي جنب السيف واقعدوا في البحرين وانبسطوا وتمشو سينما وسهرات ووناسة لين تدوخون وارقدوا في البحرين ومن
بكرة ارجعوا للخبر وجربوا غاندولا او السنبوك للغدا مثلا او غيرهن وتغدوا والله يستر عليك توجهوا للرياض وربي يحفظكم
واي مساعده انا حاضر

مشكور فارس تميم على الرد الوافي والكافي ..
انا قريت عن شقق الرايه يقولون فيها اطلالة بس المشكله انها للعوائل الكبيرة .. يعني مو شرط اطلاله كامله ابي بس نافذة اشوف فيها البحر ,, لانه برد وما راح نقدر نجلس على البحر ..
واذا مافي طيب وين الشقق الزينه اللي جنب الراشد عطني لو اسمين مع ارقامهم ..
وبالنسبه للاسواق تعرف احنا حريم نموت على الاسواق وكنت ناويه الف عليهم كلهم بس انت خوفتني ايش قصدك بقمة الملحجه .؟؟؟
والقريه الشعبيه انا حاطتها ببالي بس ما اعرف عنوانها ..
ومشكور اخوي
وياليت الاعضاء اذا عندهم اضافه ما يبخلون علينا ,,

في توقيعي موضوع عن الخبر فيه راح تلقى الإجابة بإذن الله..

الغالية بيبي نت ،،،، البوابة هنا مليانة مواضيع عن شقق وفنادق والأرقام موجودة والعناوين أيضا وأي خدمة كلنا حاضرين
لكن تذكرت إذا اموركم المادية اوكي وماعندكم مشكلة عطينا خبر نقدر نفيدك وين تلقين غرف مطلة على البحر
وياليت لو جربتي الان تدبرين رقم فندق شرفة الخليج واعتقد موجود في البوابة او من الإستعلامات واسألوهم عن غرفة
تطل على البحر (بس ترى من بعيد أهم شي تشوفينه) وأعتقد أسعارهم معقولة ....
بالنسبة للتسوق صدقيني من خبرة اتكلم مافيه شي زي أسواق الرياض للتسوق من ناحية التنوع والسعر والجودة
لكن بما أن خاطركم تتسوقون هنا فأنا أقولكم مافيه سوق يفتح النفس ووسيع صدر وحلو للتمشي والتقهوي غير اثنين
فقط الراشد مول والظهران مول !! الأسواق الثانية تسد النفس وكلها عمالة وملحجة تجيب الهم ...
فكمولات كشخة وحلوة عندك الاثنين ذولي وكأسواق بسيطة وشعبية عندكم سوق الحب ولايفوتكم سوق شعبي
وممرات متشعبة وضيقة وبساطات وجو شعبي قديم وحلو ...
القرية الشعبية سهل جدا توصيفها بس المشكلة انكم ماتدلون شي ولاأدري من وين ابدى لكم وأعتقد ان عندكم حلين
ياخريطة أو تخلون تاكسي يروح قدامكم....
وأي سؤال انا حاضر وحياكم الله

مشكورين على الردود
وانا الان بشقق شام رائعه بمعنى الكلمة ..
كنا على اساس بنمر الواجهة البحريه ونختار بس كنا تعبانين ..وشفنا شام قلنا هي وبس ...
والحمدلله انها مثل ما كتبوا الاعضاء ...
مشكورين الحقيقه استفدت من المنتدى ...
وان شاء الله انزل تقرير قريب عن هذي الرحله ...

فارس بني تميم.. انا عندي اعتراض وتقبله بصدر رحب.. وصفك للمولات الثانية بأنها قمة الملحجة مخالف لطبيعة المولات هذي..
أنا اتسوق في الظهران مول والراشد.. لكن في اغراض خاصة مانقدر نلقاها إلا في الجمعة سنتر والتركي وفنيسيا..
أفخم محلات الأقمشة موجودة في فينيسيا وماراح تلقاها أبداً في الراشد ولا في الظهران
القصد.. إن الظهران والراشد مجمعات توجهها يخدم اللبس الجاهز والماركات الفخمة أما المجمعات الأخرى والتي وصفتها بأنها ملحجة فهي تخدم اغراض خاصة كالمناسبات.. العبايات.. الجلابيات.. إلخ ولو تدخل محلات الجلابيات في فينسيا وماراح اقول ادخل اليشمك لأنه محل عادي تلقى فيه جلابيات تحت الألف ريال وتلقى المبالغ فيها بس ادخل شاكي وشوف اسعار الجلابيات وفخامتها والي تتجاوز اسعار بعضها 25 الف للقطعة صحيح المحل له فرع بالراشد بس فرع فينسيا أحلى وأوسع
وشكراً

فيه شقق اسمها شقق الرايه وفيه فتدق جولدن توليب وشرفه الخليج

Memi
الغالية ميمي بالعكس وحياك الله وماقلتي شي غلط واوافقك 100% كلامك صح جدا
لكن أنا لما أقول قمة الملحجة ترى ما أقصد من ناحية التسوق أبدا!!
أنا أقصد من باب التمشية وسعة الصدر وتغيير الجو في مكان راقي ويفتح النفس وتوقعت
ان هذا هو غرض صاحبة الموضوع لأنهم من أهل الرياض وعندهم أفضل الأسواق للتسوق
وأرخص بكثير من عندنا فتوقعت هدفهم تمشي لأن التسوق عندهم أفضل...
ويعطيك الف عافية