حمدا لله على سلامتكم أخي الفاضل ، وتستمتعون ان شاء الله في رحلتكم يارب
وأطلعونا على الأخبار عندكم قدر استطاعتكم ...
ولا تنسونا من دعواتكم ، دمتم دائما بخير ..

وعليكم السلام ورحمه الله وبركاته
والحمد لله على سلامة الوصول
وماشاء الله النشرة ممتازة ويسعدنا تواصلك وبلغنا عنك وعن علوم السكن معاك
أعتبرك أسرع مخطط ومسافر لبلاد العمه الله يوفقك وتمنياتي لك برحله سعيده وموفقه

الحمد لله على سلامتك
ولا تحرمنى من المعلومات
المهمه.

1. تحياتي لك ... ودمت بود


2. ملاحظات عالماشي

الاخ
حسام 2000
الله يسلمك ويسلم كل غالي على قلبك ان شاء الله
يحاول ان شاء الله اتواصل معاكم يوميا وانقل لكم الواقع كما اراه من هنا
تحياتي لك ودمت بود
الاخ الكوكب الطائر
الله يسلمك ويسلم غاليك ومغليك ان شاء الله
علومي على ما يرام الحمد لله
الجو رائع ... والمناظر الحمد لله تسر الناظرين
بخصوص السكن ... بما اني لحالي ومب ملتزم بعائله كنت ابحث عن سكن رخيص
مريت احد الفنادق مب ذاكر شو اسمه بس قريب على مطعم كماننا ... كان سعر الغرفه 650 الف
مشيت عنه والحمد لله حصلت غرفه في بيت بسعر 175 الف لليله
صح مستوى الغرفه مب ذاك الزود لكن لها مطل حلو وموقعها قريب من المطاعم العربيه
وانا واحد بطيني حظني عدال المطاعم واموري تكون بخير
بخصوص التخطيط للرحلة
بعد رب العالمين سبحانه وتعالى يعود الفضل لك وللاخوان لي جاوبتوني على امور كانت تخفى علي وسهلتوا تخطيطي للرحله
وان شاء الله يوم الاثنين بغادر الجبل في طريجي الى باندونج
وبقعد لي يومين هناك ومنها اذا الله راد بروح بالي وبشوف الوضع في بالي اذا ناسبني بطول مدة القعده فيها واذا الوضع ما ناسب بروح جاكرتا
تحياتي لك ... ودمت بود اخي الكريم
الاخ
شغف المسافر
الله يسلمك ويسلم من يعز عليك ان شاء الله
ان شاء بتكون لي نشرة اخبار يوميه بتفاصيل كل مكان اروح له

تحياتي لك ... ودمت بود

ملاحظات عالماشي

@ الشلالات لازم تمشي لها مسافه طويله لين توصلها ... يعني لي عنده عياله صغار لا يتعبهم ... ولي عندي ياهل ما يمشي لا يفكر يشيله ويمشي فيه لين هناك ... وكبار السن صعب يوصلون للشلال ... وقوم بو كروش لي مثلي يحاولون يسوون رياضه قبل يوصلون بونشاك ويفكرون يروحون الشلالات
@ لي وزنهم فوق التسعين لا يحلمون يركبون البرشوت ... تراهم بيتحطمون مثل ما تحطمت اليوم لانهم ما بيخلونهم يركبون .... يعني لي يحب المغامره خل يخف كرشه قبل
@ رحلة عيون الماء ما استلطفتها وايد ... احسها عاديه .. مجرد بحيرة ماء تحفها الاشجار من جوانبها
@ يمكن لاني شفت شلالات وايد وايد وايد في رحلتي شهر مايو الى سيريلانكا ففكرت ان الشلالات لي شفتها اليوم لا تستحق عناء المشي ... مع ان الشلالات منظرها حلو وارتفاعها كبير .... بس الوصول لها متعب ... وتدفع فلوس كل شوي عشان توصلها ... عكس سيريلانكا تشوف الشلالات كل مكان وببلاش
@ التقيت بشباب والنعم فيهم من السعوديه واثناء تحاذب اطراف الحديث خبروني انهم ساكنين في فله غرفتين وصاله بسعر 500 الف لليله
@ الشي لي ما عجبني في اندونيسيا .... كل شي مسوين له تذاكر ودفع وفلوس ... وانا سالفة الفلوس هاي موول ما احبها ههه
هذا لي مر على بالي حاليا .... واذا في شي يديد بخبركم فيه ان شاء الله
تحياتي للجميع ودمتم بود

رحلة سعيدة ان شاء الله ؛_؛

مشكور وجزاك الله خير
تجي بالسلامة وبأنتظار نشرتك اليومية

عطنا تقيمك وانطباعك للي بيسافر لوحده هل تنصح للشخص بروحه يسافر
ودمت بالف خير

الاخ
Oceanus
تسلم اخي الكريم
وربي يسعدك دنيا وآخره ان شاء الله
تحياتي لك ... ودمت بود
الاخ
كابتن مسافر
اجمعين ان شاء الله
وربي يسلمك ويسلم غاليك
تحياتي لك ... ودمت بود
الاخ
فهد
اخي الكريم
من الصبح لين المغرب تقدر تشغل نفسك برحلات وبرامج سياحيه
تبقى الفتره من بعد المغرب لين وقت العشاء والفترة لي من بعد وقت العشا لين وقت النوم
في هالفترات تحتاج اي شي يسليك او تقضي وقتك فيه
عن نفسي ... شاغل هالوقت عن طريق البلاك بيري ... والانترنت
واشوف الوضع عادي ... قاضي وقتي بين هالطبيعه ومستانس
تحياتي لك ... ودمت بود