اخواني واخواتي اعضاء المنتدى الرائع احب ان انقل لكم الصورة الحيه لمدينه نيويورك الساحرة
اولا احب اقول الرحله بالتفصيل الممل اذا سمحتولي حتى لا اترك اي جانب للاسئله كانت الرحله من الكويت الحبيبه الى نيويورك دايركت على متن الخطوط الجويه الكويتيه وكانت الرحله لمده 14 ساعه طيران ( مت من القهر وخصوصا انا مدخن الله يعينا على ترك التدخين) المهم اطياره كانت من سوء حظي فل وخصوصا الهنود ياكثرهم الله رزقنا بمكان رائع صفين ورا بعض انا ويا الزوجه الحبيبه وعيالي الاثنين وهذي اول مره انام بالطياره قضيتها نوم من قلب طول الرحله على عكس العيال اللي كانوا مستانسين من الافلام اللي يعرضونها واخوكم مطنش الدنيا ومعطيها نوم لاني كنت سهران ليلتها وطلعت المطار الساعه 5 الفجر علشان احجز اماكن زينه وبالفعل الله وفقني وقدرت اخذ اماكن ممتازة
المهم طرنا الساعه 9 صباحا بتوقيت الكويت ووصلنا الساعه 3 العصر بتوقيت نيويورك يعني الساعه 11 بالليل بالكويت المعامله كانت في المطار ممتازة بس كان في زحمه والطيارات شغاله عليهم من قلب والمسافرين يتوافدون على كونتر الجوازات تقولون حج مو نيويورك ما طولت عند الكونتر على طول بصمنا ووصورونا ومشينا لا اسئله ولا هم يحزنون لاني مسجل كل شي على حسب الاصول مثل ماقالت الغاليه بنت الصقور ومن بعدها على سير الشنط ورحنا التفتيش وسالوني شنو معاك قلت لهم مثل ماهو مكتوب قهوة وشاي قالولي افتح الشنطه وعلى طول فتحت الشنطه وشاف الشاي والقهوة حاطهم اول شي مثل ماقالت هم الغاليه بنت الصقور شاف الشاي مغلف والقهوة بعد قاللي توكل على الله وعلى طول لا يمين ولا شمال بس ابي اطلع من المطار وادخن
اخذنا التكسي وعلى طول مانهاتن والفندق الرائع امباسي سويت وموقعه جدا رائع واخترته والله وفقني فيه علشان الاحتفالات في الرابع من جولاي وهو عيد التحرير في اميركا راح يكون بالضبط مقابل الفندق اللي ساكن فيه
اوعدكم بالصور اول باول بس هذي اول مرة اشبك وتدرون بعد نيويورك شغاله ليل مع نهار يعني ما يمديك ترجع الا وتطلع مرة ثانيه
بالنسبه للاسواق في سوق اليوم رحتله ا سمه كوينز مول وهو مجمع كبير او مول كبير واسعاره رخيصه وبعد فيه تنزيلات بمناسبه عيد التحرير وبعض المحلات بدون تاكس ( ظريبه)
اي سؤال او استفسار انا موجود ان شاء اله للرد عليه
ودمتم في حفظ الله ورعايته
اخوكم ناصر كويتي النيويوركي