لوبكيت
22-10-2022 - 05:58 pm
السلام عليكم ورحمة الله وبركاته
اسعد الله مساكم جميعا اخواني الاعزاء .... اتمنى انكم تطولون بالكم معي وتكفون ساعدوني
اول انا كثير السفر ولكن للاسف دوم خارج حدود الخليج ( اوربا كندا ....) ولم ازر الا دبي 3 مرات عمل والبحرين مره واحده عمل
وهالسنه انا بيني وبينكم توفي والدي رحمة الله عليه واسكنه فسيح جناته واموت المسلمين يارب العالمين . واصبح بعد مرور سنه من فراق اغلى انسان في حياتي اصبح بيتنا جدا تعيس وكائيب للاسف لكن نحمد الله على ماقدر
لدي افراد عائله ( الوالده ) وثلاث بنات يعني في الثانوي والمتوسط
وولد صغير 9 سنوات وطفله عمرها سنه
وانا وزوجتي وولدي الصغير واثنين من اخواني اعمار 20 24
يعني عددا 12 مشا ءئالله
الفكره انا ناوي اوسع صدر امي وهالبنات ولكن لدي مشكله بسيطه الا وهي بان الاهل لاول مره يسافرون خارج المملكه
فانويت يكون اختياري دبي وبعدين لاحظت انها مكلفه والديره متفتحه بزياده فاهونت
ثم قررت البحرين لقربه ثم فكرت بنها لاتفرق عن الشرقيه وهونت
ثم فكرت بدولتي الحبيبه الكويت وقلت وش رياك ياولد تزرق بهم 5 ايام نغي الجو بهم
فالي ابيه منكم الان ياخوان انا طبعا سويت زحمة وقصه حياتي فوق بس الهدف ابي انك تتخيل وضعي بس
لك ترد على بنفس الاحساس الي ابي اوصله الله يجزاكم خير
1: اول احصل على شقه عائلية لافراد اسرتي 12 شخص من هم 2 رضع 2 اطفال
2: اريد ان اكون ساكن بمنطق بعيده عن مواقع الشباب وهجولتهم
يعني بيني وبينك لو تسالني تقول الشارع الرئيسي في دبي وشو قلت لك الشيخ زايد
لكن في الكويت انا مو عارف وين المنطه الي يكون فيها الحركه ومكانه راقي مدري هل هي السالميه ولا الجهراء ولا الفححي
مدري والله طبعا كل الي اقوله عرفته من حبيبي قلبي الممثل طارق العلي ياحبيله ههه
لذلك ارجو تزويد بالمناطق الزينه
الشي الثاني هل تنصحوني اجي بسياره ولا بطياره علما باني ساكن في الرياض ويقلون طريق المجمعه حفر الباطن 6 ساعات
بس مدري عن وضع القياده هناك عادي ولا المور سهله
الشي الاخير واسف على الاطاله بنسبه للحريم تعرفون حريمنا بشت وغطاء وجه واسود باسود
يعني فضيحه واضح انها سعوديه كيف الوضع هناك عندي لايوجد قلق وضحك ومسخره لاني معاليش متحسس شوي من هالموضوع
اتمنى ردكم علي وبعدين نخطط للباقي اذا كان خياري موفق
تحياتي لكم ياملوك بنتظاركم
طبعا ملاحظه لايمنع انك تقولي لا رح لدبي افضل او تقولي رح للبحرين افضل
لاني انا مابعد قررت الي الان محتار وين اروح بس كان احساسي يقول الكويت افضل وانا لااعلم وين اتجه
فارجو يكون وجهة نظرك بحياديه
