1. وبما ان عندي جواز امريكي ، فا مااحتاج فيزا..


2. 2- صورة من بطاقة العائلة.


3. 3- يكفي حضور زوجها للتقديم.

السلام عليكم
انا مقرر اسافر النمسا مع زوجتي على آخر جولاي ..

وبما ان عندي جواز امريكي ، فا مااحتاج فيزا..

المهم ، جمعت طلباتهم عشان اقدم فيزا لزوجتي.. والمعلوم إن تسجيل أسماء الراغبين بالفيزا من الساعة 9 - 11 الصباح .. ومن السبت إلين الأربعاء.
القصة ، إني وصلت عند بوابة حي السفارات الساعة 9 ، وانواع الزحمة ، والناس تساقط عليك بالسيارات:112: (يارب نبطل هالحركة) ، وبغيت أتهاوش مع واحد بس ربك ستر .. المهم بعد ثلث ساعة دخلت الحي.. وتوجهت للسفارة النمساوية..
لقيت حوالي 15 واحد متجمعين عند موظف الاستقبال (هندي ، وقاهرني ابي اكفخه) .. نزلت وتوجهت للإستقبال وقالولي لازم اسجل اسمي .. سجلت اسمي وكان رقمي 43 ..
طبعا مافي كراسي نقعد فيها او مويه او اي شي ، يعني تنطق بالشمس الين يجي دورك..
كان الرقم واقف على ال 25 .. وبعد ساعة ونص جا دوري ودخلت..
داخل بالصالة كان فيه حوالي11 واحد جالسين على الكراسي ما بعد يجي دورهم:112: ..
إنطقيت ساعتين زيادة إلين نادتني وحده نمساوية يمكن عمرها 60 من الشباك الأول ، وجهها يسد النفس والرزق ، والتكشيرة لابد منها.. والظاهر إنها مديرة الصالة.
الصالة عبارة عن 3 شبابيك ، شباكين لتقديم الطلبات (وحدة لبنانية إسمها أماني بالشباك الاول ، وواحد أثيوبي إسمه علي بالشباك الثاني) ، والشباك الثالث تسليم الجوازات المشنجنة وفيه واحد سوداني (اتوقع).
طبعا هم يدورون عليك أي شي عشان يرجعونك .. مثلا الناس إللي رجعوهم اليوم قدامي كانت ملاحظاتهم كالتالي:
واحد يوصل النمسا يوم 27 ، والتامين الطبي حقه يبدا يوم 28.
وواحد ينتهي التامين الطبي حقه يوم 1 ، وهو جالس الين يوم 5.
وواحد بيقعد بالنمسا اسبوع ومسوي حجز بفندق يومين اول مايوصل ، وباقي الايام ماسوى حجز.
وواحد ماجاب كشف حسابه.
وواحد تاريخ سفره ما يتوافق مع تاريخ حجز الفندق اول مايوصل.
وواحد حجز الفنادق حقه وهمي.
المهم ..
طلعت اوراقي وعطيتها العجوز مديرة الصالة (اللبنانية ماكانت فيه) وقامت تفصفص ام ام ام الاوراق ، وقعدت حوالي ربع ساعة تحاول تدور اي شي ، والحمدلله انها مالقت علي ولا حاجه ، ودفعت 352 ريال قيمة التاشيرة.
وجات اللبنانية وعطتني ورقة مراجعة بعد اسبوعين.
المهم يا اخوان ، بكتب لكم هنا الاشياء اللي لازم تكون معكم قبل ما تروحون للسفارة:
1- طلب معبأ بالكامل وموقع من طالب التأشيرة. (ياخذ نموذج الطلب من السفارة).
2- صورتين شمسية ملونة حديثة ، والرجال بدون شماغ والخلفية بيضاء. تكون مثبته بالمشبك على الطلب. ويمنع تثبيت الصور بالدباسه او الصمغ.
3- جواز سفر صالح لمدة 3 أشهر على الأقل بعد إنتهاء صلاحية التأشيرة ويكون موقع من صاحبه.
4- تصوير جميع صفحات الجواز ذات الصلة (مثلا تصوير أختام المطارات والتأشيرات السابقة).
5- خطاب تعريف من العمل موضح فيه مكان العمل والراتب وتاريخ الإلتحاق بالعمل والمسمى الوظيفي ويكون مصدق من الغرفة التجارية.
6- كشف حساب بنكي لل 6 أشهر الماضية موضح فيه المرتب + رصيد لايقل عن 40 ألف ريال ، وتحاولون إن تكون كل الصفحات مختمة من البنك ، ولاتنسون تصورون الكشف نسخة ثانية.
7- تأمين صحي للسفر بتغطية على الأقل 30 ألف يورو ويكون تاريخه يغطي كل فترة السفر. (إللي عندهم تأمين في التعاوية ، يعطونه خطابين ، واحد خاص بالسفارة ، والثاني له. ولازم يصور الخطابات.
8- تذكرة سفر ذهاب وإياب ، الأصل والصورة. (ويفضل إذا كان دافعهم بالشبكة يجيب إيصال الدفع)
9- حجز فندق مؤكد ، الأصل والصورة. (وعلى فكرة ، تراهم يدقون قدامك على كل الفنادق يتأكدون إذا الحجز وهمي أو لأ).
10- إذا عنده فيزا أو ماستر كارد ، يحاول يصورهم ويرفقهم مع الطلب. ولا ينسى يجيب اصل البطاقة معه.
وبالنسبة للزوجة:
1- تعريف من عمل الزوج يفيد فيه بأن زوج المتقدمة متكفل ماديا بجميع تكاليف سفرها ومصدق من الغرفة التجارية.

2- صورة من بطاقة العائلة.

3- يكفي حضور زوجها للتقديم.

ويقدر الواحد يراجع السفارة بالهاتف ويحط تحويلة الإستقبال (الهندي إللي ينطق طق) ويسأله برقم ورقة المراجعة إذا تشنجن جوازه أو لأ ، بدال مايضرب مشوار. لأن الإستقبال يصير عنده لسته بأرقام كروت المراجعة للجوازات إللي تشنجنت.
يحاول الواحد إنه يحافظ على هدوء أعصابه ، لأنهم بصراحة ينرفزون الواحد من يوم يسجل إسمه عند الإستقبال إلين يطلع من باب السفارة. لأن واحد قدامي اليوم إستقعدوله بحجز الفندق وعصب عليهم ورفع صوته (لا آبوكم لا آآآآبو إللي يقدم عليكم) وطلع.
وبس .. وأتمنى إني أكون قدمت شي مفيد.