السلام عليكم
الحمد لله يا اخوان توني اليوم قدمت اوراق الفيزا للسفارة التشيكيه في الرياض وتم قبول اوراقي
اول شي قبل ما ابدا خطوات التقدم على الفيزا اتصلت على السفارة النمساويه ورد على الموظف اليماني / علي وقلت له عندي تشنقن فيزا من التشيك اقدر ادخل فيها النمسا .. قالي طبعاً تقدر
واتصلت على السفارة التشيكيه ونفس السؤال سألت وقالو طبعاً تقدر هذي تشنقن تدخلك اي دوله اوربيه ومو شرط تكون وجهتك الأولى للتشيك .. قلت حلو معناتها ضمنت ان ماتفرق اي سفارة اقدر اخذها منها التشنقن واسافر للنمسا
دخلت موقع بوكينق وسويت حجز على فندق alboni في التشيك .. على اساس حجز مؤقت وبلغيه بعد ماتطلع الفيزا لأن موقع بوكينق ماياخذ رسوم في حالة الغاء الحجز وبعدها رحت لمكتب سياحي وطلبت منه تذكره وقلت له اني ابيها علشان اطلع الفيزا بس وبعدين بلغيها قال اوكي بس باخذ منك على التذكره الوحده 50 ريال لأن ممنوع اصدر لك التذكره وانت مادفعت المبلغ وبكذا راح يحملوني المكتب مبلع 50 ريال .. قلت ماهي مشكله خذ 50 وعطيته 100 تذكره لي وتذكره لزوجتي على التشيك
وبعدها تعريف من العمل با الانجليزي وكشف حساب لمدة 3 شهور ومايهم المبلغ الي يكون في الحساب لأني يوم كلمت السفاره التشيكيه عن المطلبات قالو اهم شي كشف حساب ومايهم المبلغ فيه او اذا عندك فيزا او كردت كارد مو لازم تجيب كشف حساب تصورلهم البطاقه وبس .. حتى في السفاره يوم عطيت اوراقي الموضوع مادقق على كشف الحساب ولا شاف المبلغ على ان حسابي فيه اكثر من 20 الف
وتجيب صوره شخصيه وصوره من الجواز
ولازم تطلع تأمين صحي انا اخذت التأمين من مكتب سياحي بقيمة 110 ريال لكل جواز لمدة شهر ولاتنسى تقول للموظف الي بيعطيك التأمين انه يكون تأمين شينقن .. لان التأمين انواع
ويوم كملت اوراقي رحت للسفاره ودخلني هندي وعبالي الأبليكيشن لي ولزوجتي ويوم خلص قالي عطني 100 ريال قلت طيب انتظرني اخلص واعطيك .. وطبعاً سحبت عليه عطيته 20 ريال
وبعدها دخلت صاله لقيت فيها اربعه اشخاص ويوم سألتهم طلعو كلهم مثلي بيسافرون للنمسا
ونص ساعه وجا دوري والموظف مصري عسل تعامله ذوق دقيقتين وخلص اوراقي وعطاني ورقه وقالي با الكثير 14 يوم وجوازاتك خالصه ..!!
التكاليف / السفاره على كل جواز تاخذ 317 ريال + التأمين الصحي 110 + التذكره المؤقته 50 ريال = 470 ريال فقط .. وارخص مكتب سياحي ياخذ منك على الجواز 800 الى 1200 ريال !!!
ملاحظه / يا اخوان الي مايقدر يطلع حجز فنادق للتشيك مؤقته لأستخراج الفيزا عن طريق موقع بوكينق يقدر ياخذها عن طريق اي مكتب سياحي ومجاناً لأني امس كنت عند المكتب الي حجزت فيها فنادقي للنمسا يوم علمته با الموضوع قالي ليش ماعلمتني واعطيك حجز فنادق مؤقته للتشيك مجاناً ..
وسلامتكم واي استفسار حاضر ..
وبا التوفيق