هلا والله يا الوافي 2011
نترك للاخ ابو يوسف ( بلاوي ) المتميز الاجابة على سؤال الفندق وبصراحة وضع الفندق يوجد فيه شباك مقابل المحيط بالنسبة
وفعلا الاخ ابو يوسف كان خطط للرحلة لمدة ليست بقصيرة ونشهد بانه خططها صح 100%
تقدر تستفيد من عضوية الفندق لو انت حجزت مباشرة من موقع الفندق لكن لوحجزت عن طريق الشركات فالاستفادة تكون في ترقية بالغرف او اضافة نقاط لك على البطاقة
اما حجز التذاكر فيوجد كثير من اماكن حجز التذاكر والرحلات السياحية اكشاك في الشارع والمراكز كذلك يمكنك حجزها عن طريق موقع اي من المنتزهات او لاين وهناك وستلاقي تخفيض كما يفضل اخذ لفة ومقارنة الاسعار لان بعض الاكشاك تخفض في السعر ويمكن كذلك حجز المواصلات من عندهم
يبعد الفندق عن شارع كافييل افينيو حوالي 200 متر تقطع في 5 دقائق مشي
مع اعتذاري لابو يوسف ( بلاوي ) لتطفلي بالدخول والاجابة
مع تحياتي

1. وكل ما حطيتة بالحمام اجلكم الله جا التنظيف واخذه

الوافي2011
بسم الله الرحمن الرحيم ..
اولا .. عزيزي الوافي .. اعتذر منك بشده لعدم ردي على استفسارك .. مع انني كل يوم ادش على المنتدى من الكمبيوتر والايفون ..
ولكنني لم أُلاحظ هذا الموضوع الا الان ..
.. وان شاء الله سأجيب عليك بكل دقه وإن شاء الله ان اكون قد افدتك ..

• الف شكر على التهنئه .. والحقيقة استراليا كبلد بعيد .. ومستقل .. وعلى قولة الشياب ( مافيه وجيه معرفه )

لازم اخططلها بشكل دقيقة جداً .. مع ان في اشياء كثيره سهيت عنها وان شاء الله ابذكرك فيها وبتدعيلي ..

• اي نعم كنت من فترة طويلة ارتب لرحلتي ..

طبعا التخطيط يكون بداية من التقارير في العرب المسافرون .. خصوصا قسم التقارير ..
ثانيا من قوقل ايرث .. وشوف الاماكن بالملي ..
ثالثا المواقع السياحية الاستراليه ..
رابعا .. تواصلي الدائم مع مكتب لاوند في الكويت وأسئلتي المتكرره لهم ..
خامسا .. مالك الا استفساراتك المباشره مع الاخوه اعضاء المنتدى .. خصوصا المهاجر و hml وغيرهم الكثير من الاخوه اللي لو يطولون بالرد ولكن ثق بالله العلي العظيم ان مشورتهم مفيده لأقصى الحدود

• بالنسبة لفندق هوليدي ان .. انا حجزته نفس ما قلت انت من بورتي كلب .. واختياري للغرفه .. تكون مطلة على المحيط .. وبدون افطار .. واخترت من اول لسته اللي يكون فيها المبلغ غير مسترد .. لانها ارخص .. طبعا

وبالنسبة للغرفه .. وسعتها .. الحقيقة انا حجزت ل 6 فنادق .. في سنغافورا - الجولدكوست - سدني - الكوينزستاون - اوكلاند - مالبورن ..
وكانت غرفة الهوليدي ان اوسعهم من ناحية العرض والطول .. واجملهم من ناحية المنظر من البلكونة طبعا المطلة على المحيط ولكن من الجهه الشمالية الغربية .. للفندق ..
وبالنسبة للنظافه .. مايحتاج .. الفرش لونه احمر وجديد .. والتنظيف شغال على طول .. ولكن تراهم يجون من 10 صباحا الى 12 ظهرا ..
واذا كنت موجود وما نظفوا الغرفه .. تقدر تتصل على الرسبشن ويرسلون لك الهاوس كييبنق ..
والرسبشن ايضا رائع ومتعاون ..
وبالنسبة للإفطار .. لازم تعرف من اي ساعة الى اي ساعة الافطار موجود .. لان اذا رحت رحلة البالون ماراح تلحق على الافطار ..
واذا بتقعد على الساعة 10 بتروح مثلا عالم البحار .. ماراح تلحق على الافطار ..
ف حرام تاخذ الافطار لشخصين .. وانت احتمال ماتتفطر كل يوم .. .. مع ان فطورهم لذيذ ونظيف .. ويقع في الطابق الاول .. او من الرسبشن على الدرج ..
والحقيقة .. انا افطاري اليومي .. اشترية من السوبر ماركت .. عصير برتقال طبيعي اللي عليه لزقة سودة وفيه برتقالة .. وجبن كرفت واجبان اخرى وتفاح وفواكة .. والخ
الغرفة جميلة جدا وانا اخذت سرير مزدوج لشخصين .. والجميل والمحرج والغريب ان الحمام اكرمكم الله تستطيع مشاهدة اللي بداخلة وانت جالس بالغرفه .. وهذا نوع من الرومانسية .. ولكن رومانسية محببين .. ولكن في شتر تقدر تصكره ..
في شغله اتمنى انك ما تنساها وانا تحسفت مليون مره ما اخذتها واهي وانت بكرامة البربيش .. مال الحمام ..
وطبعا بطبيعة الحال نحن كمسلمين نغتسل .. ولا نستخدم الكلينكس مثلهم ..
وهذا الشطاف اة البربيش تحصلة عند السنيدي .. ببريدة او فروعهم ..
وهذي صورته
او اي نوعية ثانية .. المهم .. ماتصير مثلي .. اشتري الماي اللي اسمة Pump

وكل ما حطيتة بالحمام اجلكم الله جا التنظيف واخذه

• بالنسبة لرحلات الدريم وورد والموفي وورد والسي وورد ..

لو تاخذها من مكتب لاوند افضل لأني اذكر ان عندهم عرض كل سنه .. اذا اخذت هالرحلات الثلاث مع التوصيل .. بيعطونك رحلة مجانية رابعة .. واعتقد انها تروبيكال فروت .. حديقة الفواكة الاستوائية .. وبسعر اقل طبعا من اسعار الحدائق الثلاث اذا بتاخذهم على حدة .. وللأمانة مكتب لاوند رائع ومتعاون .. يكفي انك لو ضيعت تذكرتك او اسم باص رحلتك او طافك الباص او غيره .. تقدر تكلملك عرب يفهمونك ويحسون فيك .. وطبعا كله بإدارة السيدة ليلى او مدام ليلى .. وموظفينها واللي اكثرهم طلبة سعوديين دارسين في استراليا ..
وترى عندهم رحلات اعتقد ان الاخوه في المنتدى ما تكلموا عنها وانا بنفسي ما لقيت الوقت اني اجربهم نظرا لضيق الوقت واللي اهو 9 ايام
بالنسبة للمشي من الفندق الى جادة كافيل افنيو .. تقريبا .. 10 الى 5 دقايق ..
والطريق رائع والاسواق من يمينك ويسارك ..

• انا حاظر لجميع استفساراتك .. واتمنى ان الله يسهل عليك سفرتك ويحفظك .. اللهم امين

أخوك / خالد العازمي
اب يوسف و

hml
عزيزي وغالي يا hml
بالعكس
تسهيل رحلتي كان بفضل استشاراتك انت والكثير من الاخوه ..

مشكور أخوي أبو يوسف... والله معلوماتك قيمة ودقيقة جدا
طال عمرك بالنسبة للحمام الله يكرمك ... شي غريب فعلا!!
الحين الي في الغرفة يشوف الي في الحمام بكل وضوح ؟ ولا نوعية الزجاج ماتبين الا معالم الجسم ... هذي نقطه مهمه لأن الطرف الآخر يمكن يتضايق من الشي هذا على أعتبار أنه أحنا تونا في بداية شهر العسل وماتعودنا على بعض...
بالنسبه للشطافه أبو يوسف ... انت تقصد أستخدامها في الرحلات أعتقد...
لا يكون الحمام بعد مافيه شطاف ... قسم بالله مايصير حمام كذا ههه
ماتقصر أبو يوسف... راح اكتب كل أستفساراتي عن رحلتك في هذا الموضوع
الله يحفظك...

يعطيك العافية اخي ابو احمد ... واخي ابو يوسف ...
بارك الله فيكم وجزاك عنا كل خير ...
واما ما يخص استفسار الاخ الوافي ... فهو بالفعل في اغلب الدول الاوربية والغربية بشكل عام بما فيها استراليا ... لايوجد شطاف ولا بدية بالحمام ... وبالتالي ستظطر لاستخدام قارورة ماء فارغة ... او حسب فكرة اخي ابو يوسف ... لكن مادري احس انها تاخذ مكان في العفش ...
تحياتي ...

بلاوي
بالعكس
تسهيل رحلتي كان بفضل استشاراتك انت والكثير من الاخوه ..
عزيزي با ابو يوسف
ما شاء الله عليك فنان وذو ابداع والكل استفاد من تجهيزك وتقريرك
اعزكم الله هذا الشطاف مشكلة ... واصبحت القارورة اللي تضعها في الحمام ايضا مشكلة للمنظفين كل يوم يشيلونها
الحمد لله الذي هدانا للاسلام

الوافي2011
يامرحبابك مره اخره يالوافي ..
الحمام هذا شي اساسي عندهم .. لاننا والحمدلله كمسلمين وعرب .. انظف منهم ولله الحمد ..
اذا كان الشطاف يسببلك مشكلة في النقل .. اول ماتوصل .. ان شاء الله .. اتجه الى اول بقالة .. واشتر ماي اسمة
Pump .. اللي فيه من مزازه ضغط .. وهو انفع لك ..
واذا رحت المطار لا تقطه .. بس فضيه من الماي اللي فيه .. لان سالفة السوائل .. عندهم حساسه ..
ترا حته بالطيارة ينفعك ..
بالنسبة للغرفه ..
هذي صوره من النت ..

النظافة 100%
وهذي صوره للزجاج اللي بيكون بين الحمام اجلكم الله والغرفه اللي بالصوره فوق

عذرا للعفيسه
لاحظ على يسار الصوره .. بالجام العاكس .. شوف الشتر .. هذي اهي النافذه مابين الحمام والغرفه
وارجوا ان لا تعلق على طريقة تغطية النافذه والشتر والمخدات
file:///C:/DOCUME%7E1/Toshiba/LOCALS%7E1/Temp/moz-screenshot.pngfile:///C:/DOCUME%7E1/Toshiba/LOCALS%7E1/Temp/moz-screenshot-1.png

THE IMMIGRANT
عزيز وغالي اخوي المهاجر ..
كلامك صح .. ولكن .. في تلك الحالات يجب ان تجازف قليلا وخصوصا لو اخذ مكان بالعفش
ولكن الماي Pump يمشي الحال

hml
فعلا الحمدلله على نعمة الاسلام