نشر في الكويت

أحتاج رأيكم في هذه المطاعم والمقاهي

ميونخ 2010

26-10-2022 - 04:01 am

المطاعم :

1 مطعم الصفدي رأيكم في مستوى أكله وأسعاره

2- مطعم قصر البردوني رأيكم بمستوا أكله وأسعاره
=====================
المقاهي :
1- مقهى ليالي الحلمية وهل ينفع للعوايل ؟ وماهي الاصناف المميزة لديه من الحلوى والقهوة
2- مقهى الصخرة هل ينفع للعوايل ؟؟ وماهي الأصناف المميزة لديه من الحلوى والقهوة
وشكرا جزيلاً لكم

التعليقات (9)

ميونخ 2010

26-10-2022 - 06:34 am

معقولة ولا رد !!

fab u lus

26-10-2022 - 07:35 am

هذه المطاعم مو مشهورة وايد..........اذا في واحد يعرفهم اكيد بيرد عليك

اصول2

26-10-2022 - 08:36 am

هلا بأخوي ميونخ بالنسبة لمطعم الصفدي ماعندي فكرة عنه اما قصر البردوني ان ماخاب ظني في الشعب البحري وايد اكله حلو وهو مطعم لبناني واسعاره معقوله بالنسبه لاكله ,اما مقهى ليالي الحلمية سمعت عنه وهو لايصلح للعوائل الافضل للشباب نصيحة من اختك اما نوع الاكل ماعندي فكره اسمحلي ومطعم الصخرة ماسمعت فيه ياليت الاخوة والاخوات يفيدونك وسامحنى على القصور
اختك اصول

ميونخ 2010

26-10-2022 - 09:37 am

fab u lus
بالعكس يالغالي المطاعم اللي ذكرتهم مشهورين والكويت صغيره يعني معروفه
البردوني بالشعب البحري والثاني مطعم الصفدي كبيير جدا وقريب من مجمع المارينا أستغرب منكم ما تعرفونهم !!
أما ليالي الحلمية كبيرة جدا على شارع الخليج العربي شلوون ماتعرفونه !!
وكذلك الصخرة قريب من المرينا ومكانه بارز جداً !!!!!!!
انتظر اضافه من باقي الأخوان عن رأيهم فيه لازلت انتظر

bint elQ8

26-10-2022 - 10:38 am

اعذرني اخي .. ما اعتقد انهم معروفين .. ما سمعت فيهم ..و سألت اهلي محد عرفهم و صح كلامك الكويت صغيرة ربي يحفظها بس مليانه مطاعم .. لكن مو شرط نعرف كل المطاعم ...
اما بالنسبه للمقاهي اللي ذكرتها سامعه في الحلميه بس كمان ما عندي فكرة .. لان اللي اعرفه انها شبابيه ... اكيد في ناس عندها فكره و إن شاء الله يفيدونك

fab u lus

26-10-2022 - 11:39 am

السلام عليكم اخوي ...........الصفدي اللي تقول عنه عند المارينا هذه كلها مطاعم لبنانية تقدر تقول عنهم قهاوي للشيشة للشباب....والحلمية كان على البحر والبردوني كانه في الفحيحل وكلها نفس الصفدي ......بس الصخرة ما سمعت عنه ابد ....وهم مو معروفين للعوائل لانها تبع المدخنين والشيشة ما تصلح للعوائل المحترمة وهي للشباب بس ما ادري اذا في عوائل يروحون هناك ................اختك فابيولس

ميونخ 2010

26-10-2022 - 12:40 pm

bint elq8
الحلمية انا برضو سمعت انها لاتصلح لعوائل وحبيت اتأكد .. شاكر لك اختي
بس تر كل المطاعم المذكورة قريبه جدا من شارع الخليج وايضا المارينا وكبيرة وواضحة للعيان
خلاص الحلمية حطيت عليه اكس
انتتظر افادتكم اكثر

ميونخ 2010

26-10-2022 - 01:41 pm

fab u lus
يعني أختي الصفدي مايصلح للعوائل ؟؟ مع اني سمعت انه للعوائل مناسب!!
البردوني أختي مو بالفحيحيل بالشعب البحري قريب من شارع الخليج يعني .. ولازلت انتظر رأي الأخوان بمستوى أكله وجلساته وأسعاره
وشكرا لك

Q8i_Cute

26-10-2022 - 02:42 pm

باختصار مطعم القصر البردوني ما انصح فيه للعوايل ،، ومقهى ليالي الحلمية ما انصح فيه ابدا ابدا للعوايل ،، اثنينهم ما ينفعون للعوايل ،، اما الباقي ما عندي خبر وحياك الله

الكويت المسافرون العرب

أحتاج رأيكم في هذه المطاعم والمقاهي