بشرى سارة
لكافة اعضاء ورواد منتدى العرب المسافرون
حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب
وقد تم نشر
400,000
ألف موضوع
3,500,000
مليون مشاركة وأكثر من
10,000,000
مليون صورة ما يقرب من
30,000
ألف GB من المرفقات
وهي إجمالي محتويات العرب المسافرون
للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.
في صيف عام ١٩٨٥ شهر ٧ كنت في اول شبابي وكانو اصحابي الشباب نجتمع يوميا بالدوانيه لاكنا متزوجين ولا حتى موظفين كانت مرحله بين الدراسه وبين التوظيف وكنا متفرغين للآخر ماعندنا الا جمعه الدوانيه الحلوه ولا مسؤليه بيت ولا مسؤليه زوجه ولا مسؤليه عيال ولا طلبات ولا دوام ولا التزامات ولاشي
المهم جلسنا بالدوانيه انا والشباب وكانت فكرتي التوجه لتايلند وبالتحديد بتايا
وافقو الربع على فكرتي بعد مانقلت لهم اخبار الديره من وناسه وسهر وحريه وطلعات بحريه وكل شي ... طبعا اخبار بتايا نقلتها لهم من واحد اعرفه كان توه واصل منها
بعد اتفاقنا بالدوانيه قررنا نحجز من بكره وبالفعل حجزنا وصرفنا دولارات في اقرب طياره وكانت وقتها الطيران قليل والرحلات قليله وشركات الطيران مو مثل الحين
وكانت الفرحه من ساعه حجزنا وصرفنا للدولارات وللسوق لشراء البنطلونات والبلايز واستعدينا للرحله واذكر قبل الرحله بساعات ذهبت للصالون ورتبت شعري وشواربي وبعدها للبيت اخذت دوش ولبست احلى الملابس اللي اشتريتها للتوجه للمطار وكانت الرحله من البيت للدوانيه ومن الدوانيه للمطار وكانت ممتعه جدا وفرحه ماتوصف في حياتي
صعدنا على الخطوط الجويه الكويتيه وكانت وقتها جديده وفرشها نظيف وخدمتها ممتازه ولافيها اي مشاكل
كانت الرحله سبع ساعات من مطار الكويت الى مطار بانكوك
بكمل معاكم انشاءالله بكره لان الحين الساعه ٢ ليلا وماقدر اكمل واوعدكم بتنزيل الصور بكره انشاءالله
اشكركم على المتابعه واعتذر عن التأخير
وردا على الاخ حسن الحمادي1 اقول احتمالك صحيح في اننا تقابلنا في هذيج الايام في مقهى السعاده اللي في فندق داون تاون مع اخواننا الاماراتيين والقطريين والسعوديين والعمانيين والبحرينيين
معهم صحبه طيبه وتبادل الاحترام بيننا الله لايفرقنا
وقبل هبوط الطائره شاهدنا الارض مغطاه بالخضره والجبال الخضراء وصلنا مطار بانكوك تقريبا الظهر وكانت السماء مغطاه بالغيوم وتمطر وارض المطار مبلله بالماي اللي زادنا بالفرحه لهذا المنظر الجميل
تمت اجراءات الدخول بالابتسامه اللي كانو معتادين عليها طبعا في هذاك الوقت مو الحين وكنا مبتسمين وفرحانيين فرحه ماتوصف للغايه
خلصنا اجراءات الجوازات وكنا نفكر بيغثوننا بتفتيش الجمارك كالعاده اللي تصير مع الدول العربيه على العلم مافيه شي معانا
ركبنا 3 سيارات من التاكسي لان عددنا 8 اشخاص وتوجهنا من بانكوك الى بتايا
وصلنا الى بتايا متجهيين الى فندق كان اسمه داون تاون ( فندق vc حاليا )
وصلنا للفندق وكأننا في حلم ماودنا نصحى منه ونسينا تعب السفر وحجزنا غرف وكانت وقتها بالغرفه 250 بات
وكل شخصين بغرفه وحده مو علشان التوفير لكن نظامنا كان جذي
اخذنا غرف جنب بعض وكان صيحات الشباب بالضحك والغشمره والوناسه عاليه
اخذنا موظف من موظفين الفندق الى مقهى السعاده وكانت حقا سعاده وفتح لنا باب المقهى وهو يبتسم ويقول هذولا اصحابكم من الخليج
انصدمنا بالوناسه لما شفنا خليجيين جالسين يشربون الشيشه ودندنه العود على الاغاني الخليجيه
بعد ماجلسنا معاهم شوي وتعرفنا عليهم قلنا بناخذ جوله في بتايا
اخذنا الجوله بين فندق مارينا بلازا والشوارع الضيقه اللي مقابله الى البحر وكان اما البحر سوق بسطات كبير عباره عن سقف بس والسوق مكشوف
بكمل معاكم بكره انشاءالله واتمنى اذا عجبكم هذا الجزء من تقرير التجاوب معي واذا ماعجبكم أعتذر لكم
الله يعافيك يا حسن الحمادي1 واشكرك على المتابعه
اخذنا جوله على شواطيء بتايا وتمشينا بالسوق القديم اللي مقابل البحر وهو عباره عن سوق البعض مغطى والبعض مفتوح على الهواء الطلق ( جدا رائع ووناسه )
الى ان دخلنا بالليل وتوجهنا للفندق واخذنا شاور والبعض على حمام السباحه واستعدنا نشاطنا وغيرنا ملابسنا وعليها لمطعم زهره الخليج
ويلا هات بالمجابيس الطيبه والدقوس وكنا نتلذذ من الفرحه والوناسه والسوالف الحلوه والضحك استعدادا للتوجه الى ديسكو بلازا
بكمل معاكم بكره انشاءالله واسمحولي لتقصير هذا اليوم
