بريطانيا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
q8ya metnaqla
16-12-2022 - 09:05 pm
بسم الله الرحمن الرحيم اسعد الله صباحكم ومسائكم ياحلوين بعد انقطاع طويل عن بوابتي المفضله رجعت لكم بالتقرير البطيني العنوان باين شنو نوع التقرير انا وحده من محبين الاكل وشبه متذوقه يعني اعرف ثلاث ارباع المكونات من التذواقه مو من نوع يترس البطن ويقول اي الاكل لذيذ لا كلش من النوع اللي يميز من اول اللقمه ما اطول عليكم الاغلبيه يعرفون شيف رامسي صاحب عده برامج يتنافسون عليها افضل الشيفات منها ( hell's kitchen - kitchen nightmares-ramsay's kitchen nightmares والاشهر MasterChef وهو من اصل اسكوتلندي مواليد 1966 حائز على 15 نجمه 3 منهم نجمه ميشلان وتعد نجمه ميشلان من اهم نجمات التقييم في العالم للشيفات وهو يعد واحد من اربع طهاه يحصل على 3 نجمات من غير Heston Blumenthal, Alain Ducasse and Alain Roux ويقع موقع مطعم غوردن رامسي في مستشفى رويال رود في منطقه تشيلسي ويعتبر المطعم الاول له افتتح عام 1998 .. ماابي اطول عليكم ونبتدي بسم الله الموقع الالكتروني لمطاعم الشيف المطعم من الداخل وتقريبا 15 طاوله فيه وعلى العدد بالضبط يعني انا كنت حاجزه لي بروحي بس حاطين طاوله وكرسي واحد لي وطبعا بالتايم انا كان حجزي الساعه 12 الظهر طاولتي الطاولات اللي يمي ومثل ما انتوا شايفيين جوج وماجوج المنيو نسيت اصوره من داخل الزبده المملحه من صنع المطعم مو لورباك وربعها والشوربه الحذيه بالدياي انطر الطبق اللي بعده طبعا كل طبق له عده قفاش وانا ماادري وين الله قاطني هذا واحد من الاطباق عباره عن قطعه رافيولي داخلها لوبستر بصلصه القرع والبيستو وماادري شنو مع كافيار اسود ويعتبر من اغلى كافيار الاسود تابع الرافيولي الطبق اللي بعده والالذ عباره عن ( كسكس - سمج ماادري شنو نوعه بس من طقت الهامور - لوبستر - كافيار ابيض ) الصوص كانت شي خطيير ( ورد - ياسمين وفل ) مع ماادري شنو يخلوطونها جدامكم الاكل لذيذ للناس الذويقه واللي تحب اتجرب اللي حدهم مجابيس وعيوش لايتعنون ويروحون اهني ضيفوني بالمانجا والباشن فروت وهذا سيجار شوكلت ( برواني دارك شوكلت - شي حامض اللي لونه احمر - فانيلا-هيل ) نكهات مميزه في طبق واحد شنو سويت يا شيف والطبق الثاني من الحلو ( شيزكيك بطعم الليمون واشويه زعفران وكرسبي السكر وفانيلا ايس كريم) وجان توصلني هالمغريات اللي يطلع منه دخان راح تعرفون شنو اهو بالصوره اللي بعدها قطعتين الحلو وحده دارك جوكلت بس ماعمري راح اجرب مثلها والثانيه ماعرفت شنو شي نفس الجلي بس لذيذ والحين نيي حق اللي في دخان طلع كرات برد ايس كريم وهذي الورده لكم يا اعضاء العرب المسافرون قبل الفاتوره وهذي الفاتوره يمكن بعضكم او الاغلب يقول وايد غالي وشدعوه هالسعر بس انا عن نفسي اقول يستاهل وزود صح انه الكميه شويه بس كان لذيذ وماحسيت انه ماشبعني وعن نفسي راح ارد اجربه بعد باطباق ثانيه ملاحظه هامه : للناس البطينيه وتحب العيوش اقولها للمره الالف مايصلح لكم والكلام لج امون للي خبري خبرج يعني اللي يحب يجرب ويتذوق في الاكل يروح اما اللي مايعجبه جذي لايتعب عمره ويروح طبعا ام حسين والايمان ونمارق كانوا معاي عالخط بالواتس اب مباشرتهم اول بأول وشجعتهم عليه وهذي الفاتوره والمطبخ من الداخل المطبخ اللي عاليسار بروحهم يطبخون سي فود واللي بالويه ورا اللحوم وجهه اليمين ماصورتها طفى تليفوني دياي وصوب المقبلات والحلو تقيمي للمطعم المكان :9/10 بعيد عن زحمتنا الخليجين والسياح العيب في شارع داخلي مو عام النظافه : 10/10 الاستقبال : 10/10 الاكل : 100/100 السعر : 10/10 انا اشوف يستاهل اتمنى ينال على اعجابكم وسامحوني على اي تقصير ولحد ياخذ على تقيمي للي ما ايوزله المطعم اختكم كويتيه متنقله = ابرار


التعليقات (9)
ارمـــ ARMANI ـــاني
ارمـــ ARMANI ـــاني
يعطيك العافيه مشرفتنا q8ya metnaqla
وماقصرتي على هذا التقرير الراقي والمميز
وكلنا نعرف الشيف رمزي او رامسي
وكنت اتابعه على قناه الكويت
وعليكم 1000 عافيه
وان شاء الله راح ازور احد مطاعمه
شكراً لك
اخوك : https://artravelers.com

Dr Haz
Dr Haz
الشيف رامسي محترم جدا قابلتة مره وحدة ببيته في لندن في دعوه عمل خاصة
راقي جدا بتعامله و يحترم الوقت و كلامة موزون بس كانت الدعوه بكوفي بدون اكل للاسف ههه
شكرا على التقرير و اول مره اعرف ان السالفة محتاجة 3 شهور
يعني انا عندي واسطة اروح بنفس اليوم ( q8ya metnaqla ) احرك شوي ههه
صحتين و عافية
بس اجمالا احس اكله بارد و بدون طعم و ما تملكني الفضول للزياره
بس من بعد التقرير تحمست اجرب
شكرا جزيلا ..

توبليرون
توبليرون
عليج بألف الف عافية ابرار
وناسه وفي صور ما شفناهم بالواتس اب يمكن قبل لا تقعدين ههه
شوقتينا عليه ويستاهل الاكل دام انه عجبج انا شوقني طبق السمك وطبق البريد
اما قوم يأجوج ومأجوج بكل مكان تلاقينهم ما شاءالله

الايماان
الايماان
عوافي ابرارهني وعافيه
اللي خبري خبرج للحين مصمم على رايه مايبي يغير
اشرايج تاخذيني معاج وتكسبين فيني اجر
راح ادعيلج

fatoOoni
fatoOoni
روعه ورايقعليك بالصحه والعافيه
نفسي ازوره بس معاي اطفالي وماراح يعجبهم

فيصل
فيصل
زين يالذويقه هل ذائقتك صابت مع طباخ الشيف ام لا
انا مع حزب العيوش
شكرا مشرفتنا

q8ya metnaqla
q8ya metnaqla
ارم ARMANI اني
الله يعافيك أرماني
وان ايوزلك مثل ما يازلي

q8ya metnaqla
q8ya metnaqla
Dr Haz
يا حظك كان ودي أشوفه
حسافه مجربت أكله لا بالعكس أكله مو بارد واذا عالطعم الطعم لذيذ ونكهات اول مره اجربها
ههه اي شعليك واسطتك قويه ولا مساحلتهم بال إيميل بعد
ان شاءالله اتجربه وتعطينا رايك

q8ya metnaqla
q8ya metnaqla
توبليرون
الله يعافيج ام حسين
ههه اي شكلي - طبق السمج وايد لذيذ خصوصا صوص الورد
ههه اي والله شكثرهم


خصم يصل إلى 25%