حياك الله أخوي ابن الحرمين
بصفتي توني جاي من صلالة فأبشر باللي أعرفه واهنيك على اختيارك لصلالة لأنك راح تشوف جنة الله في أرضه.
الجواب الأول والثاني : أنت في الرياض وش يوديك للنعيرية مناك؟! الطريق المتعارف عليه من حرض وأنا الحقيقة رحت بالطيارة يعني ما اقدر افيدك أكثر لكن شف موضوع ابو فهد ما قصر فيه.
.
.
.
الجواب الثالث : إذا مايهمك السعر شف منتجع كراون بلازا خمس نجوم وموقعه رائع على البحر بس عساك تلقى حجز.
.
.
.
الجواب الرابع : بيعطونك خريطة سياحية في المنفذ فيها اسماء كل الأماكن السياحية وماراح تحتاجها قبل كذا.
.
.
.
الجواب الخامس : ما أظن أنها تستاهل لأنها حر وما فيها ألا مراكز وأسواق اللي ما كثر الله عندنا في الرياض ألا هي.
.
.
.
الجواب السادس : اسكن في الشارقة وتمش في دبي ، ما بينهم ألا 5 كلم تقريباً وأبو ظبي ما تستاهل العنوه.
.
.
.
الجواب السابع : تنفع وتنفع وتنفع كل الطرق مسفلته وبتلقاك تسابق الجيوب ...
وان بغيت زود معلومات فأبشر بالخير.
تحياتي ...
.
.
.
هيدروجين

1. هلا بك أخوي أبن الحرمين وإنشالله أمورك متيسرة بإذن الله ..

هلا بك أخوي أبن الحرمين وإنشالله أمورك متيسرة بإذن الله ..

الجواب الأول : طبعا طريق حرض أقرب ولكن ستواجهك بعض الرمال الزاحفة في منتصف الطريق ولكن لايوجد ضغط على الطريق خاصة في الليل فلذلك أنصحك توكل على الله وتفتح عيونك زين وتروح مع حرض ..
الجواب الثاني : طبعا من وجهة نظري لأنك عائلة ولا يوجد غيرك يسوق أنصحك بالتوجه للعين فيها فنادق حلوة خذلك غرفة وريح فيها يوم ثم كمل مشوارك حتى إذا سلكت طريق النعيرية توجه للعين لأنك ماراح تتحمل إلى عبري (( حنا شباب قبل شهر كنا في هالطريق ولاقدرنا نتحمل وشلون عاد العائلة ))..
الجواب الثالث : يوجد الفنادق فيها غرف على 450 إلى 800 ريال سعودي ويوجد عندك شقق نظيفة توها مبنية وتبي تلاحظها عند دخولك لمركز المدينة أو وسط المدينة وهذي أسعارها حلوة من 200 إلى 350 على حسب أحجامها ويوجد عندك مكاتب السمسرة اللي يأجرون البيوت لكن نادر تحصل شيء نظيف هذي زينه لشباب تكون رخيصة من 120 إلى 180 وتكون شقه حليله وأنا أنصحك أخيراً بالشقق لأنها واسعه ونظيفة وموعد روحتك حلو يكون بعض السياح رجعوا وتحصل شيء فاضي إنشالله ..
الجواب الرابع : طبعا عند دخولك لصلالة يبي يعطونك كتيبات وخرائط وكل شيء عن المواقع السياحية وماشفت أوضح من خريطتهم أمش عليها سهله بالمره أما عن المناطق اللي زرتها أنا وأنصحك مو أنصحك بس إلا لازم تمرها ألا وهي سهل إيتين وشاطئ المغيسيل وشاطئ المدينة صلالة نفسها وأذا جيت شاطئ المدينة طول لمين ينتهي بك الخط بعدين أدخل مع التراب لمين تجيك نخل جوز الهند هناك أفضل للجلسه من على الرصيف وعندك وادي دربات بس نصيحة لا تفتح الدرايش إذا نزلت تحت للوادي علشان النامس وأنزل لحالك صور كم صورة بالوادي وأرجع لكن أهم شي المدام والبنية لاينزلون لأن النامس يبي يغزيهم غزي ..
الجواب الخامس : والله إذا تبي تتحمل الطريق وعندك مدة كافية سير عليها مع أني مارحت لها لكن شي جميل أنك تتطلع على دول الخليج وتشوف ثقافتهم وإلخ وهي عموما عاصمة زي كل العواصم ..
الجواب السادس : أنا رأيي من رأيهم أسكن بالشارقة أوعجمان لأنها أرخص من دبي وأخف زحمة والفرق بينهم مايجي ولا 10 كيلو يعني أنت بالشارقة تمشي ماتدرى إلا وأنت بدبي يفصلها طريق عام واحد تقريبا ..
الجواب السابع : أما عن الكامري فهي تنفع أنشالله وكل المواتر تنفع وأنت عاد لاتقعد تبزع بعمرك وأنا أخوك وتدخل بين هالجبال أكثر الأماكن والطرق كل السيارات تنفع لو تجي بسيكل تمشي ماهنا خوف إنشالله أهم شيء إذا شفت طريق وفيه طين رابص من الماء هج عنه لأنك تبي تقعدبه إذا دخلت ..
أتمنى أني أفدتك بعض المعلومات اللي تستفيد منه وأي خدمه جاهزين إنشالله والمعذرة ثم المعذرة على بعض الكلمات العامية وكل ذلك للمصلحة العامة وتروح وترجع بالسلامة ياأبن الحرمين

حياك ياأبن الحرمين
أذا رغبت في شقة مكونه من:
ثلاثة غرف:
1_غرفة نوم مؤثثه أثاث عرسان,مع حمام خاص
2_غرفة نوم للطفال مع وجود حمام ثاني (عام)
3_مكتب مرفق به جهاز حاسوب مع خط انترنت
بالاضافة طبعا لمطبخ كامل التجهيز وصالة مكيفه مع طقم كراسي
بالاضافه لوجود خادم ينظف البيت كل يوم
راسلني على الرسائل الخاصة اذا اعجبك العرض

هيدروجين جزاك الله خير وماقصرت والله ان اجاباتك جميله ورائعه وافادتني كثيراً مشكور يالغالي وريحتني من ناحية الكامري وان بغيت شئ او سؤال انا عارف انك ماتقصر ربي يسلمك ويعافيك
المنسي830 اسلوبك جدا راقي وممتاز بالعكس يازين الكلام العامي وماقصرت شرح مفصل مابعد هالتفصيل تفصيل
بس حبيت اسألك عن المسافه من حرض للعين ؟ وماهي افضل الفنادق الممتازه في العين وشكرا لك مره اخرى على تفصيلك الجميل
جبل مايهتز انا اشهد انك جبل ماتهتز بإذن الله واشكرك على هالخدمه وانا ارسلتك على الخاص مااريد بالضبط وجزاك الله الف خير

عفوا ياجبل مايهتز
اردت ان ارسل لك رساله خاصه بس بماانني مشارك جديد
الاداره جزاهم الله خير مانعين عني الرسائل الخاصة وردودي للمواضيع تتأخر في اخراجها يحبون يشيكون على الواحد وموضوعاته واذا فكت القيود عني سوف ارسل لك رساله على الخاص فورا وشكرا

اخوي أبن الحرمين أنا الصراحه حرض هذي ما أدري وينها لكن اللي أعرفه أن الطريق أسمه طريق الخرج حرض لكن المدينة نفسها مادري وينها وخذ هالمعلومات :
من بدايه طريق الخرج حتى منفذ البطحاء اللي هو حدود السعودية مع الامارات 450كم تقريبا
ومن منفذ البطحاء إلى العين 440كم تقريبا ..
أما عن أفضل الفنادق فصراحه لا أعلم ما أسمائها لكن العين مدينة صغيرة جداً وأنت أتجه مع اللوحات إلى مركز المدينة وأذكر شفنا كم فندق ودخلنا نسأل لكن غالي علينا وتبي تشوف الفنادق اللي حلوة مبينه من واجهة العمارة على مايقولون الكتاب مبين من عنوانه ..
وأنصحك إذا جيت تستعمل بطاقة الصراف إذا بطاقتك الراجحي أو الأهي في الأمارات أو عمان أنك تصرف كل اللي تحتاجه لأنه ياخذون على كل عملية حسب اللي تصرفه
مثلا تصرف 100 ياخذون 117 ريال
ولما تصرف 1000 ريال ياخذون 1012
وتختلف من بنك لبنك بس أنت حاول تصرف كل اللي تحتاجه مره وحده سواء في الأمارات أو عمان
علما أن الريال العماني = 10 ريال سعودي

المنسي830 بيض الله وجهك اشهد انك كفيت ووفيت
وماتقصر يالغالي
نسأل الله ان يوفقك وييسر امرك لكل خير

اللهم آمين وإياك أخوي ابن الحرمين وماسوينا إلا الواجب

بدايةً أخي ابن الحرمين أسأل الله أن يحفظك ويسهل عليك سفرك
وإن شاء الله عندما تصل صلالة ستنسى مشقة ووعثاء السفر
بصراحة الطريق طويل ويهد الحيل لكن صلالة تستاهل
نعود لأسئلتك والتي تذكرني بأسئلة اختبار الجغرافيا
س1/ انا تحيرت اي طريق اسلكه هل طريق حرض افضل ام طريق الدمام مع مفرق النعيريه ؟
ج1/ ألحين وش يوديك للدمام مع مفرق النعيرية ؟؟ لا تمر للدمام أبد اطلع لمنفذ البطحاء عن طريق الخرج حرض أحسن وأخف زحمة وأسرع ومختصر
لكن انتبه لا تمشي في خط حرض بالليل نصيحة لوجه الله الطريق
فيه رمال متحركة وأوقات بالليل تلقى نصف الطريق مليان رمل وبالليل ما تشوفه إلا إذا وصلت وهذا سبب لكثير من الحوادث كفانا الله وإياكم كل شر
بعدين نصيحة فصل برقع ( لا تفهمني غلط ) برقع للسيارة لأن العج على الطريق سبحان الله مثل الرصاص
س2/ اذا سلكت طريق حرض اين اقصد بالضبط للراحه في نهاية اليوم ؟ هل عبري او العين ؟
واذا كانت سالك طريق النعيريه نفس السؤال ؟
ج2/ والله يعتمد عليك وبرنامجك العين حلوة وفرصة تسكن في فندق جبل حفيت (5نجوم) ورخيص
وتقدر تواصل السير وتسكن في نزوى بس نزوى فنادقهم ( مش حالك ) أغلبها استراحات في محطات بانزين وبعض الشقق
س3/ اذا وصلنا صلاله بإذن الله هل تنصحونني اسكن في غرفه في فندق ام شقه صغيره ؟ وماهو المتوفر ؟ لايهم المبلغ بقدر مااسكن في فندق او شقه نظيفه وخياليه ؟
ج3/ والله إذا أنتم بتطبخون وبتفلونها الأفضل لكم شقة وإذا كل أكلكم بالمطاعم أنصحك بفندق
س4/ارجوا ذكر اسماء المناطق السياحيه هناك باختصار ؟ وان تيسر هناك خارطه لها فياسلالالالالالالالام ؟
ج4/المغسيل - ضلكوت - ميناء ريسوت - رخيوت - العيون (حمران , جرزيز, آآتوم,,...... الخ ) مخيم البلدية- سهل أتين ( وفرصة تروح ترز وجهك وقت تصوير برنامج الخريف والناس بس أهم شيء تطلع صورتك وأنت تكلم بالجوال:biggrin:
س5/هل تستاهل مسقط للزياره ؟ والجلوس فيها لمدة يومان ؟
ج5/مسقط تستاهل الزيارة بلد نظيف ومرتب وفيه بعض الأماكن التي تستحق الزيارة مثل فندق البستان والأسواق الشعبية والكورنيش ومطرح وروي
لكن
الجو حار ورطوبة وبتدوخ لأنك ما تقدر تنزل من السيارة
وإذا بتمر مسقط خلها بطريق العودة وأنت راجع من صلالة وبعدين اطلع من مسقط إلى دبي دايركت فيه طريق
س6/هل اذا رجعت الافضل المكوث في ابوظبي او دبي ؟ انا ماعرف عن الامارات اي شئ اطلاقاً ؟ مع ان الاكثريه يقول اسكن في الشارقه ؟ انا ابي رايكم مشكورين
ج6/ دبي --- السكن في دبي أحسن وأريح لك من ناحية المشاوير بين دبي والشارقة الطريق بينهم يوميا زحمة وممل ومقرف وبالذات في فصل الصيف:111:
س7/هل سيارة الكامري تنفع في صلاله ؟ سمعت في اماكن هناك مايوصلها الا جيوب ؟
ج7/ تنفع
أرجو أنك تصحح ورقة الاختبار وتكتب الدرجة
أتمنى لك سفراً سعيدا
مع السلامة