الطيران

قبل الحجز لازم مقارنه خذينا فره على مواقع الطيران وقارنه بينهم وتم حصر اللسته بين شركتين طيران هم طيران الخليج و KLM
الاثنين كان عندهم عرض مميز جدا ، الطيران الهولندي كان ب 188 دينار وطيران الخليج ب 211 دينار بس لانه الرحله طويله ومعانه الاطفال فاخترنا طيران الخليج ( رغم تجاربي السيئه معاه) عشان انه الرحله تكون مباشره و حجزنا من تاريخ 22 مارس الى 31 مارس فترة اجازة عيالي .
السفر كان الساعه 2 الليل , الطائئره كانت صغيره نظام 3 -3 استغربت انها تخصص لاوروبا وما كانت كبيره وتقريبا مليانه . اهم شي ما كان فيها تاخير والحمد لله ما صادتنا مطبات هوائيه . اول ما ركبنا كان البطانيات موزعه على كل كرسي واول ما طرنا وزعوا السماعات .نظام التسليه جيد فيه افلام ومسلسلات وافلام كارتون والعاب واذاعه .
بعد الاقلاع بنص ساعه وزعوا علينا سندويج قبل لا نهبط بساعه ونص وزعوا وجبه رئيسيه . الاطفال كان لهم وجبات خاصه وعطوهم هدايا شنطه وداخلها ستكرز وقبعه ولعبه صغيره .

رحلة العوده للبحرين كانت الساعه 11 وثلث صباحا بس طبعا التاخير المعروف لطيران الخليج لازم يصيدنا تاخرت الطائره حوالي 30 او 45 دقيقه والطائره نفس الروحه نظام 3-3 بس اصغر بعد يعني 25 صفه بس ، ما صادتني مطبات والتجهيز نفس سفرنا بطانيات وسماعات ونظام التسليه بس هالمره عطونا وجبه وحده بس

تقيمي للطيران 8,5 واعتربه تقييم عالي لانه اخر سفراتي على الخليج كنت اعطيها 6

ترتيب الرحله

مدة الرحلة كانت 9 ليالي قسمناها كالتالي :
3 ليالي باريس
ليله في بروكسل ( ما راح اتكلم عنها في هذا التقرير)
ليلتين ديزني لاند
العوده 3 ليالي باريس

طبعا طرحت البرنامج لاخذ اراء الاعضاء وكانت الاراء متفاوته بين مؤيد ومعارض بس في النهاية استقريت عليه والحمد لله مشت الامور بسهوله وما لاقينه صعوبه في التنقل لانه تركنا شناطنا في فندق باريس وخذيت معانا شنطه وحده حجمها وسط وسهل الحركه بيها خليت بيها لبسنا ولعيالي خذيت لهم لبس يوم وبانطلونات لاني كنت مقرره اشتري لهم تيشرتات ديزني يلبسونها طول ما احنا هناك

لو تنعاد السفره اخلي ديزني اخر شي وعلى طول عالمطار بس لانه في ترتيبنا الحالي اخر الايام كانت ويك اند جمعه وسبت فخفت من لكيوز والزحمه الي ما سلمنا منها نهائي

الله يسلمك
نعم واجهتنا زحمه كبيره في ديزني طوابير في كل مكان مع انه احنا كنا هناك وسط الاسبوع ثلاثاء اربعاء وخميس
كان في افواج كبيره من الاسيويين الضاهر عندهم اجازه

الف شكر لك
ايش رأيك هل تستحق هالمده باريس

جميل جدا ومتابعين معاك ..

بالخدمه اخ فيصل اهم شي نطلع بشي جديد ومفيد المده كانت كافيه شفنا فيها اهم معالم باريس واعتقد لوالرحله بدون الاطفال كان الوقت سمح بانشطه اكثر

شكرا مشرفتنا على المرور

مخاوف قبل السفر
(1) اللغه

كثير سمعت انه الفرنسيين متعصبين للغتهم وانهم ما يرضون يتكلمون الا فرنسي واذا انته رايح ديره ما تفهم عليهم ولا يفهمون عليك بتروح ثلاثة ارباع الوناسه لانك بتضيع حتى في حركتك
بس الي شفناه غير ... الشعب مثقف ورحب يكلمونك بالفنرسي بس تقول لهم انجلش يتكلمون بانجليزي ... الريسبشن في الفنادق يتكلمون انجليزي والبياعه في المحلات بعد حتى المسؤوله في ديزني ستور فرع الشانز رحبت بينا بالعربي مرحبا ومع السلامه
الوحيده الي تكلمت بالفرنسي هي بياعه في سوبرماركت قرب قصر فيرساي كبيره في السن والي حسيناه انها ما تفهم انجليزي لانه بعد ما تطوعت الي واقفه ورانه في لكيو وصارت مترجم بينه وبينها ولما خلصنا قالت لنا بردون

(2) الشعب الفرنسي
على عكس الانجليز حسيت الشعب الفرنسي متعاون. حصلت لنا مواقف كثيره كانوا يبادرون لمساعدتنا منهم ومن نفسهم منها المره المترجمه الى تكلمت عنها قبل ومره لما رجعنا من ديزني بالرير كان عندنا شنطه وترولي والابواب المخصصه للعبور لاصحاب الاعاقه او الي عندهم اغراض كانت مسكره فواحد اشر علينا انه اوقفوا وراح ضغط على الانتركول وكلم السيكيوريتي بالفرنسي وفتحوا الابواب
مواقف عديده حصلت والي ذكرته بس امثله

(3) الحجاب والنظره للمسلمين
اكبر المخاوف كانت بالنسبه لي سالفة الحجاب من كثر الي قريته وسمعته بس هالسفره بالذات اثبتت لي انه ليس كل ما تسمعه تصدقه
الوصع كان عادي المطار ما فتشوني الحجاب كان عادي ومنتشر بكثره والعبايات بعد سواء السوده او الملونه حتى انه في مول الفصول الاربعه كان في ثنتين لابسين عباة عالراس وفي متحف اللوفر كان في شاب لابس ثوب و" قحفيه " عالراس ومعاه بنت لابسه عباه سوده
بس نقاب ما شفت نهائي اللهم في جاليري لافييت اخت اتوقع سعوديه بس في الشوارع او مطاعم او حتى اماكن سياحه ما شفت

(4) الجو

كان بارد جدا درجات الحراره ما تتعدى 6 درجات وبالمجمل تكون 2-4 درجات . طبعا البرد كان مربك خصوصا انه معاي الاطفال كنت على طول خايفه يمرضون ، كنا نحاول ما نمشي مسافات طويله في الهواء وعلى طول ملبستنهم 6 طبقات ملابس والحمد لله شنطة الدواء مثل ما رحنا بيها رجعنا
ديزني كانت ابرد من باريس واخر يوم واحنا طالعين من ابواب الحديقه طاح علينا ثلج ومطر ( تذكرت جمله قاريتها في تقرير احدى الخوات وللاسف ناسيه من انه كل مره بتسافر عن فرنسا يطيح مطر كانه السماء تودعهم وهذا فعلا الي حسيته )

(5) النشل والسرقات
تحذيرات كثيره في المنتدى من عصابات السرقه خصوصا في المترو والحمد لله مثل ما رحنا رجعنا سالمين غانمين
بس اوقات من حوسة اليهال الواحد يرتبش شوي وهالموقف حصل لي في بروكسل في الاوتوميوم كانوا يبون يوروز عشان المنظار يشوفون فيه وانه الخرادي احطها في بوك صغير بروحها وتوني مطلعته وهذا يسحب وهذي تسحب طاح البوك من يدي وتغصغص في الفتحات وما قدرنا نطلعه داخله كان خرادي يوروز و ميموري احتياط للكاميرا