ثلج نيويورك وجنة الأطفال اورلاندو

أبو سعود Q8
ثلج نيويورك وجنة الأطفال اورلاندو

17-12-2014 - 06:29 am

السلام عليكم جميعا

الحمد الله رب العالمين رجعنا من سفرة الولايات المتحدة الأمريكية بعد ما قضينا فيها أجمل الأيام واللحظات والمغامرات

كانت سفرة موفقة ولله الحمد ، وهذا كله بفضل الله سبحانه وبفضل أعضاء المنتدى الكرام والي أحب إني أشكرهم كلهم ، خصوصا الأخ أبوعبدالعزيز
aziz20012001
والأخ
wkjowkjo

الي ردو على استفساراتي قبل السفر ، ولا يهونون باقي أعضاء القروب ومشرفينه

شكرا جزيلا لكم والله يسهل أموركم دنيا وآخره

وإن شاء الله ببدي معاكم تقرير عن رحلتنا إلى الولايات المتحدة وهو مقسم إلى جزئين ، الأول عن نيويورك والثاني عن اورلاندو

بس قبل ما أبدي التقرير عندي شوية ملاحظات هامة :

1- ودي يكون التقرير متكامل ومفيد للسائح والباحث عن المعلومة لذلك أتمنى وأرجوا عدم الرد أوالسؤال أو الاستفسار لحين الإنتهاء من جزء نيويورك بالكامل ، والي عنده سؤال مستعجل يقدر يراسلني على الخاص أو الايميل .

2- كل الكلام المكتوب يعبر عن وجهة نظري شخصيا ورأيي الشخصي !!! وأكيد أكيد وجهات النظرتختلف من شخص لآخر ، فليس كل ما يعجبني سيعجبكم والعكس صحيح ، فلاتقولون هذا المكان حلو ليش تقول عنه مو حلو ! أو هذا الشي مو حلو شلون عجبك ؟؟؟ ...........هذي وجهة نظري شخصيا وأكيد سيختلف معي البعض .....

3- جميع المواقف والأحداث الي بالتقرير صارت معاي شخصيا ..... ولكن ... مو شرط تصير معاكم، يمكن تروحون نفس المكان وما يصير معاكم الي صار معاي ، فلا تعتمدون بشكل أكيدعلى الأحداث والمواقف الموجودة بالتقرير لأنها تجربتي الشخصية وكل واحد وظروفه .

4- بحاول أكتب التقرير بشكل مفصل أكثر من تقاريري السابقة ، بس إن شاء الله ما تملون منه أو تزهقون من الكلام المكتوب .

5- طبعاهذي أول مره أسافر إلى أمريكا فالتقرير راح يكون من شخص مو خبير بأمريكا ولا يعرفلها ، وأكيد كلام وتقارير الخبرا والمشرفين بتكون أكثر دقه وشمول من تقريري اليبكتبه .

والحين ببتدي معاكم التقرير وهو بعنوان

الثلج في نيويورك وجنة الأطفال اورلاندو
USA 2013
New York & Orlando

الرجاء عدم الرد أو السؤال أو الاستفسار لحين الإنتهاء من جزء نيويورك بالكاااااااامل ، والي عنده أي سؤال يقدر يراسلني على الخاص

المشاركات

أبو سعود Q8

ثلج نيويورك وجنة الأطفال اورلاندو

المسافرين :

السفرة عائلية بحت ، انا وزوجتي وعيالي الله يحفظهم ، سعود وسلمان وياسين ويوسف ، يعني 6 أشخاص .

الولايات المختارة :

بعد ما قرأت أغلب التقارير الموجودة في بوابة الولايات المتحدة الأمريكية قررت نسافر إلى ولاية فلوريدا وبالتحديد إلى مدينة اورلاندو لأن الكل يقول انها سياحية وعائلية من الدرجة الأولى وتصلح للأطفال ، وكان ودي أروح ميامي لقربها من اورلاندو بس بعد التفكير قررت اني أروح نيويورك جم يوم وبعدين أروح اورلاندو ، ان شاء الله ميامي بسفرة ثانية تكون شبابية مو عائلية

وقت السفر :

كانت السفرة بإجازة نص السنة بشهر فبراير سنة 2013 ميلادية .

أغلب ومعظم الناس خصوصا أهل الخليج يسافرون أمريكا بإجازة الصيف ، بس السفر بالصيف له عيوب كثيره وخصوصا في مدينة اورلاندو لأن مثل ما قريت بالتقارير انها تكون حاااااااره ورطووووووبه وزحححححححححمه بسبب كثرة السياح من كل مكان وأيضا لأن أهل أمريكا يصيفون بفلوريدا وتكون المدارس عندهم عطله ، فالزحمه تكون كبييييييييره وأكيد بتكون أسعار التذاكر والسكن غالية ، أما بالوقت الي رحنا فيه فكانت الأجواء براااااااااد مع رشات مطر وجو دافي بعض الأيام ومافي زحمه مقارنة بالصيف ، ان شاء الله راح أحط لكم الصور وانتوا تحكمون بنفسكم ، أما نيويورك فكانت .......... ثـــلـــــج
وهذا هو المطلوب

مدة السفر :

ثلاث أسابيع تقريبا ، من تاريخ 8/2/2013 إلى تاريخ 28/2/2013

الفيزا :

أخذت متطلبات التقديم للفيزا الأمريكية من المنتدى ورحنا صورنا ودفعنا فلوس ببنك برقان ودشيت على موقع السفارة وأخذنا موعد ، أذكر ان الموعد كان قريب
وصار يوم المقابلة رحت انا وأم سعود فقط من الصبح وكان يومها زححححححمة مادري ليش ، المهم ....... فتشونا يمكن 3 مرات ! ونطرنا دورنا بالمقابلة أكثر من ساعتين ونص على ما وصل دورنا ..... وآخر شي لما طلع رقمنا رحنا للبنت الي تقابلنا ضحكت بويهنا وسألتنا
ليش بتروحون أمريكا ؟
قلتلها سياحة ......
جان تقول أوكي حط جوازاتك عند مكتب الدي اش أل وخلاص راح توصلكم خلال هذا الأسبوع !

ساعتين ونص ناطرين دور والمقابلة ما طولت دقيقتين ونص والله !!

وما خذو منا الصور ولا شهادة الراتب ولا شي أبد غير الوصل مال الفلوس الي حطيناهم ببنك برقان فقط لا غير !
وبعد 4 أيام وصلوا جوازاتنا كلنا وفيها الفيزا لمدة 10 سنوات

الحمد الله إن إجراءات الفيزا سهله ومافيها تعقيد ولا تأخير ولا شي بس حروني لما قابلتنا لمدة دقيقتين وخلاص ، انا عبالي مقابلة وسين جيم وقاعد أفكر قبلها شنو بيسألوني وشنو بقولهم وآخر شي طلع مجرد سؤال واحد وكان الله غفور رحيم .

ملاحظة :

بالنسبة للكويتيين ، المبلغ الي ندفعه ببنك برقان صار 48 دينار وليس 40 دينار مثل ما هو مذكور بقسم الفيزا بالمنتدى

الظاهر انهم رفعوا الأسعار توهم

تكلفة الفيزا :

48 دينار للشخص + دينارين للتوصيل = 50 دينار كويتي

واحنا 6 أشخاص فكانت تكلفة الفيزا تساوي 300 دينار كويتي

التذاكر :
الطيران الدولي :

قبل ما أطلع الفيزا كنت أدخل على مواقع الخطوط وأشوف الأسعار وحصلت أسعار حلوه وكتبت استفسار بالمنتدى عن هذي الأسعار ، ونصحوني الأعضاء اني أطلع الفيزا أول شي وبعدين أحجز وهذا الي سويته ، بعد ما خلصنا مقابلة حجزت التذاكر على طيراني المفضل وهو طيران الإتحاد .

خط السير : الكويت – أبوظبي ( ترانزيت ) – نيويورك

طبعا طيران الإتحاد غني عن التعريف ، راقي جدا وحلو وكشخه وفيه كل أنواع الترفيه من شاشه كبيرة الحجم وأفلام والعاب وراديو ، وثلاث وجبات طعام رئيسية هذا غير المشروبات مثل الشاي والقهوه والبيبسي و ....... بس عيبه الترانزيت 4 ساعات بالمطار

أخذت التذاكر بسعر حلو الحمد الله وحتى لما سألت بالمنتدى عن هذي الأسعار قالولي ان السعر مناسب

2 كبار + 3 صغار + 1 رضيع = 1217 دينار كويتي

أبو سعود Q8

ثلج نيويورك وجنة الأطفال اورلاندو

الطيران :

آآآآآآآآه وما أدراك ما الطيران ...... كنت أدري ان السالفة فيها تعب بس مادري ان الملل لي هذي الدرجه !

كانت رحلتنا من الكويت الساعة 4 الفجر فلازم نكون بالمطار قبلها بساعتين يعني 2 الفجرفمن الطبيعي ان بنكون سهرانين ! رحنا وطرنا من الكويت بدون أي مشاكل ولا تأخيرالحمد الله وكنا دايخين بس ما نمنا ، وصلنا مطار أبوظبي وقعدنا فيه 4 ساعات نفتربالسوق الحره ونتريق ونشرب قهوه وناكل برد المهم نبي الوقت يضيع ولما رحنا للقيت (بوابة الدخول للطائرة ) تأخرنا هناك ساعة و50 دقيقة !!!!!! ..... ليش ؟؟؟

لأن مدينة نيويورك حاشتها عاصفة ثلجية ومنعوا الطيارات من الاقلاع من مطار JFK ... الاقلاع فقط أما الهبوط فعادي مسموح الهبوط ( شنو الحكمة مادري ) ، بس احنا أخرونا لأن كان بينا مسافرين عندهم رحلات ثانية متصله من مطار JFK ( يعني مثلا واحد حاجز أبوظبي – لاس فيغاس فكان يروح معانا من أبوظبي إلى نيويورك وبعدين من نيويورك يروح لاس فيغاس ) هذيله المسافرين نادو عليهم بالأسم وخلوهم يروحوون حق طياره ثانية تروح إلى شيكاغو دايركت ومن شيكاغو يواصلون رحلاتهم ... فكل واحد يفهمونه هذي القصه وبعدين كل واحدعنده جم جنطه وعلى ما يطلعون الجناط من الطيارة ومادري شنو ...... أخرونا ساعتين تقريبا

وبعدها أخيرا ركبنا الطياره وكنا تعبانين وفينا نووووووووووووم ، زمن الرحله كان 14 ساعة وشوي !!

بعد الاقلاع نمت .... قعدت.... أكلت ..... شفت فلم ..... رجعت نمت ..... وبعدين قعدت .... مسكت يوسف ....لعبت مع اليهال ..... سألت المظيفه شكثر باقي على الوصول ؟
قالت باقي 8 ساعات

آآآآآآآآآآآآآآآآآآآه

كل هذا الي سويته وباقي 8 ساعات !!!! صج صج ملل ما ندري شنو نسوي عشان يضيع الوقت ، بس الحمد الله ......... عدت على خير.

ولماوصلنا مطار نيويورك كانت المفاجأه بانتظارنا ! الرن وي كله ثلج ولازم نتأخر شوي بالجو على ما يشيلون الثلج أو يذوبونه .... واحنا على أعصابنا يالله نبي نوصل بس ملينا من الطياره

وآخر شي هبطنا ونزلنا بمطار نيويورك الدولي

JFK

المطار مستواه ضعييييييييييييييييييييف جدا !هذاالي نسمع عنه مطار JFK ؟؟؟ مو حلو ولا راقي ولا شي ، أقل من العادي ، يمكن والله اعلم ان هذا التيرمنال مخصص للشرق الأوسط أما اوروبا وآسيا لهم تيرمنال آخر ، مادري بس كنت متوقع إني بشوف أمريكا من مطارها لكن تفاجأت ان المطار مستواه ضعييييييييييف جدا وقديم و شبه مكسر..... ما علينا بالمستوى انا بالي مشغول الحين مع الطابور والتفتيش والأسئلة والأكل الي معاي !!

كنا ماخذين معانا جنطتين أكل !! 6 علب حليب حق يوسف وأكله ، ويايبين معانا كورنفلكس حق اليهال وكرتونين بطاط شبس حقهم بعد وحلويات وعلوج وكاكاو وحلاو وجبن قلاص وجبن مثلث ولبنه وتونه وأندومي وملح وسكر و و و شغلات وايد يايبها معاي ....... نزلنامن الطياره ومشينا مع الناس حق ختم الجوازات وتعالوا شوفوا الزحمه

واااااااااااااااااو ........ يمكن 3 آلاف شخص جدامنا ناطرين دورهم أو أكثر والله!!

انا توقعت هذا الشي لأني قريت بالمنتدى من أكثر من عضو ان في تأخير وطابور أول ما نوصل مطار JFK ..... بس الحمد الله الحمد الله ، الله سهل أمورنا بدون ما نتوقع .... أول ما صفينا بالدور شافتنا وحده ( شرطية ) ويوسف كنا شايلينه فقالتلي تعال انت لا تصف بالدور ويابتنا عند الكاونتر على طوووووووووووووووووووووول بدون طابور بدور دور بدوي أي شي

أذكر أول ما عطيت الريال جوازاتنا سألني ليش ياي نيويورك بالبرد قلتله بروح اورلاندو ، وشاف عيالي معاي جان يقول 4 بويز ؟؟؟ قود جووب

وعطانا جوازاتنا بعد ما ختمهم وبصمنا ورحنا لإستلام الجنط ، والحمد الله ربنا مسهل الأمور بعد ما أخذنا الجنط رحنا مكان التفتيش شافنا الريال و كنت ذاكر بوقت الدخول ان معاي أكل وأدويه و و و كل شي ، فسألني شنو معاك من أكل قلتله حق اليهال .... قالي خلاص روح دربك خضر

بدون تفتيش بدون طابور بدون تأخير بدون اسئلة بدون أي شي الحمد الله تسهلت أمورنا بعد ما كانت متعقدة

ملاحظة :

لاحظت ان الأمريكان يعاملون الأطفال وأهلهمم عاملة خاصة ! ترى بكل مكان جذي مو بس بالمطار وراح أذكر لكم بالتقرير الشي هذا والمواقف الي صارت معانا بسبب الأطفال

نرجع لمحور حديثنا ..... بعد ما عدينا مكان التفتيش طلعنا بره إلى صالة الاستقبال وشفت محل AT&T للهواتف والي نصحني الأخ بو عزيز اني آخذ الخط منهم ، وبالفعل شرينا خطين للتليفون مع الانترنت بسعر 152 دولار للخط الواحد وهذا السعر شامل مكالمات ومسجات غير محدوده !!! يعني تكلم على راحتك ما راح تدفع ولا فلس ودز مسجات على كيف كيفك ، أما الانترنت فكان 2 قيقا بايت بالشهر .

رحت مكاتب التاكسي وطلبت فان عشان يشيل أغراضنا وطلع سعره 145 دولار مع الضريبه والبخشيش وكل شي ، التاكسي كان سعره 62 دولار بدون ضريبة وانا يبيلي سيارتين لأن أغراضنا وايد وعددنا 6 ما يركبونا بسيارة وحده ، فأخذت الفان أحسن من التاكسي وأتوقع ان أوفر من سعر التاكسيين .

الرجاء عدم الرد أو السؤال أو الاستفسار لحين الإنتهاءمن جزء نيويورك بالكاااااااامل ، والي عنده أي سؤال يقدر يراسلني على الخاص

Impact

ثلج نيويورك وجنة الأطفال اورلاندو

الحمد لله على السلامة

ومتشوقين لباقي التفاصيل :)

أبو سعود Q8

ثلج نيويورك وجنة الأطفال اورلاندو

الطريج من المطار إلى المدينه كان كئيييييييييب !
مطر + ظلمه + عاصفة ثلجية + ازدحام + الشوارع غير متساويه وكلها مطبات وحفر و و و ..... يعني كلش مو حلو الطريج ، بعض الدول السياحية الثانية الي تهتم بالطريق من المطار إلى المدينة ومنها سنغافورة !! بسنغافورة الطريج يسر الناظرين وكله اعلانات وورود وأشجار وجسور ملونه وإضائات و و و و .... شي حلو عكس نيويورك ، والله حتى بالكويت عندنا طريج المطار شحلاته ! أما أمريكا الظاهر ما يهتمون بهذي الأمور ، إهتمامهم بالمدن أكثر
المهم ، مدينة نيويورك سكنا فيها بفندقين ، أول فندق سكناه بأول ما وصلنا من الكويت ، وبعدين رحنا اورلاندو ، والفندق الثاني سكنا فيه بعد ما رجعنا من اورلاندو

أول فندق في نيويورك :

بعد الاستشارات بالمنتدى قررت نسكن في فندق دبل تري باي هيلتون

DoubleTree Suites by Hilton Hotel New York City - Times Square

موقعه مثالي بمنتصف التايم سكوير ، مقابل الكراسي الحمر الي يقعدون عليها الناس ، حجزت سويت غرفة وصالة وحمام تكرمون .
غرفة النوم فيها سريرين دبل ( سريرين أبو نفرين ) تكفي لعدد 4 أشخاص والصالة فيها أريكه تصير سرير يكفي لشخصين ، فكان السويت مكفينا عالآخر ، ما حسينا بالضيج أو الفقصه ، وطبعا السويت فيه كل المستلزمات الي تحتاجونها

هذا الرسبشن ويكون بالدور الثالث

السويت بالدور العشرين

هذي غرفة النوم

هذا الصندوق فيه مخاد وشرشف حق سرير الأريكة

وهذي الصالة

السويت فيه ثلاجتين ، هذي أول ثلاجه وتعتبر الميني بار

وهذي الثلاجة الثانية

مغسلة بالصالة

ماكينة عمل القهوه

وهذا المايكرويف والخزنه

وهذي الأريكة بعد الفتح

وهذا الحمام وانتم بكرامة

وهذي محطة السب وي وهي ملاصقة للفندق

حجزت الفندق من الموقع الرسمي للفندق بسعر 892 $ لعدد 3 ليالي ( 4 أيام ) وطلع علي 253 دينار كويتي

مميزات الفندق :

1- موقعة المميز بمنتصف التايم سكوير

2- السويت حجمه كبير ومكفينا وزيادة

3- انترنت مجاني

4- سعره مناسب جدا بالنسبة لباقي الفنادق الموجودة بالتايم سكوير

5- مشروب ترحيبي + كوكيز + فاكهه عند الوصول

عيوب الفندق :

1- لازم نركب مرتين المصعد ! أول مره المصعد ياخذنا من الشارع إلى الدور الثالث وبعدين نغير المصاعد وناخذ مصعد آخر من الدور الثالث إلى غرفتنا

2- خدمة التنظيف ليست يومية !! إنما حسب الطلب

الرجاء عدم الرد أو السؤال أو الاستفسار لحين الإنتهاءمن جزء نيويورك بالكاااااااامل ، والي عنده أي سؤال يقدر يراسلني على الخاص

أبو سعود Q8

ثلج نيويورك وجنة الأطفال اورلاندو

New York Pass

من قبل ما أسافر إلى أمريكا كنت أبحث بالمواقع الألكترونية عن الأماكن السياحية وبالمنتدى أيضا ، وجمعت أسامي عدد لابأس فيه من المواقع والأماكن السياحية الي عجبتنا ومناسبة لنا كعائلة أول مرة تزور نيويورك ، وبالصدفة لقيت موقع سياحي ممتااااااااااااااااااااااااز ، يجمعلك تذاكر أكثر من 70 مكان سياحي في نيويورك بتذكرة وحده !!
اسمها نيويورك باس

هذا هو عنوان الموقع السياحي على الانترنت
New York Pass | 70+ NY City Attractions | Easy Sightseeing in NYC

فكرة التذكرة :

فكرتها بسيطة جدا ومفيده جدا جدا ورخييييييييييييصه جدا جدا جدا

باختصار ، تشتري التذكره من الموقع ( كل شخص له تذكره بروحه )وبهذي التذكرة تقدر تدخل أغلب الأماكن السياحية في مدينة نيويورك ، التذكرة تقدر تشتريها لمدة يوم واحد ( يعني تستعملها يوم واحد فقط لا غير وتدخل فيها عدد لا محدود من الأماكن السياحية ) وفي تذكرة ليومين وفي تذكرة لمدة ثلاثة أيام وفي لمدة سبع أيام ، طبعا كل ما زادة المدة راح يزيد السعر .

الأماكن السياحية الي تقدر تزورها :

أغلب مواقع نيويورك السياحية تدخلون فيها بهذي التذكرة ، مثلا تمثال الحرية ، امباير ستيت ، متحف الشمع ، متحف صدق أو لا تصدق ، مكان البرجين التوأمين ، السكاي رايد ، محطة NBC الاعلامية ، التاكسي البحري ، متحف التاريخ الأمريكي ............ وغيرها الكثير والكثير والكثييييييييييييييير من الأماكن السياحية المعروفة والمشهورة لدى الجميع

ولمعرفة المزيد من الأماكن السياحية تقدرون تدخلون على هذا الموقع وفيه كل الأماكن السياحية الي تقدرون تزورونها بهذي التذكرة

70+ New York City Attractions - Free Entry Pass to New York Attractions

الباص السياحي والتذكرة :

نبذة عن الباص السياحي : طبعا كل زوار نيويورك يعرفون عن الباص السياحي الشهير ، وهو باص يفر معالم نيويورك السياحية وتقدر تنزل بأي معلم أو مكان سياحي تبيه وتقعد فيه وبعدين تركب الباص مرة أخرى( كل 15 دقيقة يوصل باص جديد ) ، وفي عدة خطوط سير لهذا الباص السياحي مثلا داون تاون Downtown Tour أو أب تاون Uptown Treasures & Harlem Tour أو نايت تور Night Tour أو بروكلين تور Brooklyn Tour وطبعا كل وحده ولها سعرها

هذا موقع شركة من شركات الباص السياحي وفيه كل التفاصيل والأسعار وغيره
New York City Tours and Sightseeing Cruises

أما إذا شريت التذكرة ( نيويورك باس ) فراح يكون معاها هذا الباص السياحي مع جميع التور الي فيه ، يعني تقدر تركب الباص السياحي وتروح أي مكان تبي سواء كان الصبح أو بالليل ، سواء كان في بروكلين أو مانهاتن أو عند تمثال الحرية ، سوار أب تاون أو داون تاون ، على كيف كيفك أي مكان تقدر تروحله بهذا الباص السياحي

مميزات التذكرة :

1- توفير المال : الأماكن السياحية عددها تقريبا 70 مكان سياحي ، لو شرت التذكرة وزرت فقط 10 أماكن سياحية راح توفر على نفسك 300 دولار !! فتخيل لو تزور أكثر من 10 أماكن سياحية كم راح توفر ؟؟؟

2- توفير الوقت : التذكرة من مميزاتها انك تتجاوز الطابور وتدخل على طول بدون ما تصف بالدور ، حتى في بعض الأماكن يكون لكم مدخل خاص لحاملين هذي التذكرة

3- توفير الجهد : لأنك ما تحتاج تروح تشتري تذاكر لكل مكان سياحي بتزورة ! خلاص عندك التذكرة ادخل فيها على طول من البوابة بدون ما تدفع ولا تشتري تذاكر ولا تصف بالطابور ولا شي

4- الراحة بالتنقل : لأن التنقلات بتكون عن طريق الباص السياحي فراح تكون مرتاح ! الباص يوديك للمكان السياحي الي تبيه وانت تنزل وتدخل المكان الي تبيه بالتذكرة ولما تخلص وتطلع تركب باص ثاني وتروح مكان سياحي ثاني

سعر التذكرة :

الأسعار موجودة بالموقع الي ذكرته سابقا ، مثلا إذا كانت تذكرة لمدة يوم واحد للشخص البالغ فيكون سعرها 85 دولار ! يعني تدفع 85 دولار وتدخل عدد لا محدود من الأماكن السياحية في نيويورك

مثال بسيط :

تذكرة دخول متحف الشمع = 39 دولار
تذكرة دخول السكاي رايد = 42 دولار
تذكرة دخول توب أوف ذ روك = 25 دولار

تذكرة دخول تمثال الحرية = 24 دولار

هذي الأسعار الرسمية لعدد 4 أماكن سياحية في نيويورك ، لو تجمعون أسعار هذي الأماكن الأربعة فقط بيكون سعرهم 130 دولار !! هذي أربع أماكن سياحية فقط فما بالكم لو تدخلون أكثر من أربع أماكن سياحية كم راح تكون التكلفة ؟ وطبعا هذي الأسعار بدون المواصلات يعني لو تظيف عليها سعر التاكسي أو الباص الي بيوديك لهذي الأماكن كم بيكون السعر ؟؟؟

أما مع التذكرة الي قلتلكم عنها ( نيويورك باس ) فالسعر يساوي 85 دولار فقط وتدخل كثر ما تبي من أماكن سياحية وتتنقل بينهم على كيف كيفك بالباص السياحي .

تجربتي مع التذكرة :

انا شريت تذاكر لنا كلنا ( 2 كبار + 3 صغار ) لمدة يومين مع الباص السياحي وكان سعرهم الإجمالي = 665 دولار أمريكي ( طلعوا علي 189 دينار كويتي حسب ما خصموا من بطاقة الماستر كارد ) ، كنت مخطط إني أروح أستلم التذاكر بأول يوم اوصل فيه نيويورك لأني بوصل بالليل وأبتدي استخدم التذكرة ثاني وثالث يوم من الصبح لي بالليل وأدخل أكبر عدد من الأماكن السياحية المشهورة ، ورابع يوم لنا في نيويورك بيكون موعد سفرنا إلى اورلاندو عشان جذي اكتفيت بيومين فقط للأماكن السياحية عن طريق التذكرة ( نيويورك باس ) ..... هذا كان مخططي من الكويت ، وبعد ما شريت التذاكر عطوني رقم المرجع أو الحجز وعطوني عنوان المكتب عشان استلم منه التذاكر ، فسألت الأخ أبو عزيز عن موقع المكتب وأكد لي ان مكانة قريب جدا من فندقنا ...... وطلع كلامه صحيح 100 % ، موقع المكتب يبعد 4 دقايق مشي على الأقدام من فندقنا .

ملاحظة هامة جدا جدا جدا : ترى مو عبالكم مسوي دعاية حق التذكرة أو المكان السياحي

لا والله بس لأن عجبتني فكرة التذكرة ولأن للأسف ما شفت ولا أحد بالمنتدى تكلم عنها !!! فحبيت انقل لكم هذي الفكرة عشان الكل يستفيد
وأنتم حرين بتطبيق هذي الفكرة أو لأ

أبو سعود Q8

ثلج نيويورك وجنة الأطفال اورلاندو

New York City

طبعا بعد الرحلة بالطيارة كنا هلكانين من التعب والارهاق ، مافينا نوم بس جسمنا يحتاج راحه واسترخاء

بس كان الوقت يمكن 7 المغرب يعني تو الناس على النوم ، فقلت خل نتمشى بالتايم سكوير شوي ونكتشف المكان المحيط فينا , وبنفس الوقت أروح للمكتب السياحي عشان استلم منه التذكرة السياحية ( نيويورك باس ) ونشتري اغراض من السوبر ماركت مثل الماي و نتعشى ونرجع بعدين عشان نرتاح وننام

بس لما طلعنا بره الفندق انصدمنا بالجو !!

مثل ما قلتلكم ببداية التقرير ان كان في عاصفة ثلجية مجتاحه الولايات المتحدة الأمريكية ، وقالولي الشباب بالمنتدى ان في 5 ولايات اعلنوا حالة الطوارئ وتسكرت المطارات وبعض الشوارع و و و ........ احنا وصلنا هناك ونشوف الدنيا معفوسه ، أجواء أول مره نشوفها ونعيشها !
هوا باااااااااارد والسنو يتساقط علينا بالبداية بعدين صار مثل الصخر يعور الراس !

المهم ، سألت بواب الفندق عن اتجاه موقع المكتب السياحي ودلاني عليه ، موقعه مثل ما قلتلكم قريب جدا من فندقنا على بعد بلوك واحد ، ورحنا للمكان المطلوب .......... بس للأسف
لقيناه مغلق

سألت المحلات الي يمه قالولي ان المحل مغلق صارله يومين بسبب العاصفة الثلجية وأغلب المحلات والأماكن السياحية مغلقة أصلا فماراح تستفيد منه

طبعا ضاق خلقي وتحبطت عدل
لا من التذكرة ولا من الأماكن السياحية وحتى المحل مغلق ماقدر أكلم أحد !!
الحمد الله على كل حال قدر الله وماشاء فعل ، رجعنا للتايم سكوير وقلنا نصور جم لقطة تحت الثلج والسنو لأن الجو كان رهييييييييييييييييييب

طبعا السنو والثلج ما كان يتوقف لكن بالصور ما يبين واضح مادري ليش ، بعض الصور يظهر فيها السنو وبعضها ما يبين لكن السنو كان شغاااااااااااال مثل القطن يطيح من السما والهوا بااااااااااارد مثل الفريزر

اليهال كانوا حدهم مستانسين

وانا وأمهم أكثر منهم

مع ان الجو كان عاصفة وباااارد جدا والهوا قوي بس الشعور كان رووووعة ، أول مره نجرب هذي التجربة ونعيشها ، تساقط الثلوج علينا شي ممتع بالنسبة لنا

هذا فندقنا الي فيه خط أحمر
دبل تري باي هيلتون
مثل ما قلت موقعه ممتاز بالتايم سكوير مقابل الكراسي الحمر الي يصورون فيهم الناس ، وعلى يمينا ماكدونالدز وعلى يسارنا سوبارو

وهذي صورة ثانية للفندق

وشوي شوي صار الثلج يتساقط بقوة ويعور الراس والجو يزداد بروده ، فقلنا خل نروح مكان دافي ونتعشى فيه
شفنا مطعم سوبارو وهو قريب من فندقا ( ملاصق فيه ) فقررنا نتعشى فيه لتوافر الأكل النباتي فيه لأن احنا ما ناكل لحم مو مذبوح بالطريقه الاسلامية ، فكان سوبارو أفضل وأسرع اختيار لنا

وعقبها رجعنا الفندق على طول وإلى الراحه والنووووووووم بعد التعب والملل بالطيارة والانتظار بالمطار والرهبه من التفتيش والطابور ..... والإحباط من إغلاق المكتب السياحي والأماكن السياحية

أبو سعود Q8

ثلج نيويورك وجنة الأطفال اورلاندو

بعد ما قعدنا من النوم باليوم الثاني كان جسمنا متكسر ....... يبيله مساج وحمام بخار

طلينا من الدريشه ..... وشفنا هذا المنظر

الثلج كان مغطي أسطح البنايات كلها
الدنيا بيضه من فوق

فعرفنا ان العاصفة راحت وخلفت وراها صقيييييييع بارد وثلج ممتع للناظرين

فتجهزنا للطلعة عدل ، ولبسنا اليهال اندرويرات داخلية عشان البرد مع دسوس وكبابيس وكل مستلزمات البرد ، نزلنا تحت ..... وشفنا أحلى وأجمل مناظر نيويورك على الطبيعة
( بالنسبة لنا طبعا )

منظر أول مره نشوفه بالواقع ، دايما أشوف الثلج بالأفلام أو الصور بس ماشفته بعيني جذي

بصراحه شي وايد حلو واحساس غريب لما تكون بالثلج لأول مره ، يمكن الي متعود على الثلج نسى هذا الاحساس بس انا ليلحين مو ناسيه

المهم رحنا تريقنا بماكدونالدز الي بالتايم سكوير ، وهو ملاصق لفندقنا تقريبا

وعقب الريوق قلت خل نجرب نروح المحل مال التذكرة السياحية ، يمكن فتح اليوم ؟؟؟
ما عندنا شي نسويه فقلنا نتمشى ونشوف الله شنو كاتب لنا
وهذي شوية صور مبعثره للتايم سكوير وفي طريقنا للمكتب السياحي

المهم ، وصلنا عند المحل وكانت المفاجأه الحلوة
المحل مفتووووووووووووووووح

دخلنا المحل وهو كبير وفيه أكثر من نشاط سياحي ، رحت استلمت التذاكر السياحية ( نيويورك باس ) بس الإحباط رجع لنا مره ثانية

الباص السياحي مغلق اليوم ، مافي باصات نهائيا بالشارع
تمثال الحرية مغلق ولا في رحلات بحرية ولا تاكسي بحري
توب اوف روك مغلق
وبعد في شغلات مغلقة نسيت شنو اهي ، انا تحبطت وماعرفت أسمع عدل

طيب والحل ؟
قالي الموظف تبي نرجع لك فلوسك عادي نرجعهم لك بالكامل ، وإذا ما تبي تقدر تستخدم التذاكر وتروح للأماكن السياحية المفتوحة ، القرار لك

وبعد التفكير قلت خلاص مابي أرجع التذاكر الي حجزتهم وبستخدمهم وبروح الأماكن السياحية المفتوحة وإن شاء الله بنستانس ، أما الباص السياحي فقالي ماقدر أعطيك فلوس الباص السياحي فقط ، إما ترجع التذكرة بالكامل أو تستخدمها حتى لو الباص مغلق ، فوافقت على استخدامها حتى لو كان الباص السياحي مغلق ، نروح بتاكسي أو بالاندر قراوند

طبعا مو ذنب الشركة ان الأماكن السياحية مغلقة لأن هذا شي طارئ حصل للولايات المتحدة ككل وليس فقط على الأماكن السياحية ، لكن هذا ما يعيب التذكرة السياحية ( نيويورك باس ) ولا يقلل من قيمتها بالنسبة لي
كنت وما زلت مقتنع فيها 100 % ولولا الظروف الخارجة عن إرادتنا جان استخدمناها بكل الأماكن السياحية وبشكل ممتاز

مع هذا الإحباط والخطة الي كنت راسمها ببالي وما تحققت بالكامل والبرد والعاصفة والثلج ..... مع هذا كله الحمد الله قدرنا نروح لعدد لا بأس به من الأماكن السياحية في يومين شديديييييييين البرودة ، بدون باصات ، بدون تكاسي ومع إغلاق عدد كبير جدا من الأماكن السياحية بسبب العواصف

إن شاء الله بالجزء القادم راح أحط لكم الأماكن السياحية الي زرناها