وعليكم السلام ورحمة الله وبركاته ::
هلا والله اخوي .
بالنسبة للمخطط يبيله اكيد تعديل .
بس ياليت توضح لنا ..مثلا ..كم يوم في جنيف ودك تقعد؟ يوم ولا يومين؟
ماهي مدينة المغادرة ..هل هي جنيف؟
ما هو توقيت السفر..يعني في اي شهر؟
زيارة شلال الراين من انترلكن ..تقريبا 180 كم ..ومن انترلكن الى بيت هايدي حوالي الساعتين .
ولو سكنت في ضواحي زيورخ اقولك اوكيه .
النقطة المهمة الحين ..الطفل الرضيع ..هل راح يسمحون له بالصعود الى القمم الثلجية ..حيث تقل نسبة الاكسجين ؟؟
بصراحة انا ما مريت بهذا الموقف ..بس اخاف يردوكم .
بادن بادن الالمانية ..اللي فيها المنتجعات والمصحات العلاجية ..ممكن تزورها مع زيارة مدية الالعاب اليوروب بارك .
يكون مخططك مثلا
جنيف يوم واحد.
انترلكن خمسة ايام
مرورا على لوزيرن و شلالات الراين والسكن في قرية رست اللي فيها مدينة الالعاب لمدة ثلاثة ايام (يوم زيارة الشلال + يوم لمدينة الالعاب + يوم لبادن بادن)
جنيف يوم واحد والعودة .
واذا كنسلت بادن بادن ومدينة الالعاب يكون المخطط :
جنيف يوم واحد
انترلكن خمسة ايام
مرورا بلوزيرن ..والسكن في كونستانس يومين (ومنها تزور هايدي وتزور الراين وجزيرة الورود ومتحف الحياة المائية وغيرها )
جنيف يومين .
=========
بالنسبة لتخطيط انترلكن ..اليوم الاول يوم الوصول ..ويا دوب تلحق تسوي نشاط ..وخلينا نقول انك تمر على مصنع الشوكولاتة في قرية بروك ..ثم توصل انترلكن وتزور مطل الهاردر كلم.
اليوم الثاني:
زيارة شلال التروميل باخ وقمة اوروبا الينفيرواخ (تأكد من موضوع الطفل الله يخليك)
اليوم الثالث:
زيارة كهوف ساينت بيتس + بحيرة الاوشن سي (وفيها زحليقة) + بحيرة البلاوسيه .
اليوم الرابع :
زيارة شلال الجس باخ وقمة روثورن (القطار البخاري) >>> هذه الرحلة ممكن تسويها بالعبارة في بحيرة برينز ..تزور الشلال بالاول ثم توصل مدينة برينز وتطلع القمة .
اليوم الخامس:
زيارة خوانق نهر الار + شلال الريخن باخ + قرية جريندلوالد ومطل بفنستيج (فيها زحليقة).
===========
طال عمرك الانشطة هذه تأكد من انها مفتوحة خلال سفرك بمشاهدة الرابط الموجود في (من مواضيع العضو) عمل الانشطة في انترلكن .
============
بالنسبة لفندق او شقة انترلكن ..انصحك في موقع بوكنج ..فهي خيارات واسعة ..ومو شرط وسط انترلكن ..ممكن في القرى المتناثرة حولها
اهم شي لا تكون على مرتفع جبلي.
==========
شاور واستخير ..والله يكتب لك اللي فيه الخير .
وفي انتظارك اخوي.