للطالبات والطلاب المبتعثين والخاصين (بريطانيا)

q8ya metnaqla
للطالبات والطلاب المبتعثين والخاصين (بريطانيا)

18-12-2014 - 01:20 pm

بسم الله الرحمن الرحيم

السلام عليكم ورحمة الله وبركاته ، شلونكم وشخباركم يا شباب ان شاء الله الكل بصحه وعافيه ...

اليوم ان شاء الله ناويه اكتب لكم عدة نقاط ممكن تكون مهمه للطلبه اللي ناويين يدرسون في بريطانيا او دول اخرى بس انا بأخص اهني بريطانيا لاني كنت طالبه فيها وان شاء الله تستفيدون منها ..

ابتدي معاكم النقاط :

1- قبل كل شي والاهم ( اللغة الانجليزيه ):

أ- للطلبه اللي لغتهم زينه وما يحتاجون كورس لغه هذيل ماعليهم كلام كل اللي عليهم يكون معاهم قبول الجامعه ويبدون دراسه .
ب - للطلبه اللي لغتهم نص ونص ومحتاجين كورس لغه نصيحه الاولى يدخلون المعهد البريطاني في منطقه المنصوريه ويقوون روحهم وبعدها يمتحنون IELTS وتاخذون درجه زينه وتبدون دراسه على طول.
ج - للطلبه اللي يبون كورس لغه في الكويت يبتدون دراسه في المعهد البريطاني وبعدها يروحون بريطانيا ويكملون 3 اشهر اهناك ويمتحنون IELTS وياخذون درجه زينه ويكملون امورهم .

د- للطلبه اللي يبون يدرسون في بريطانيا اللغه انصحهم يروحون اول شي المعهد البريطاني وياخذون منه ليست بأحسن المعاهد او الجامعات ويختارون اللي مافيها وايد عرب ويمتحنون.

الدرجه اغلب الجامعات اقل شي 5.5 وهذي الدرجه تختلف من جامعه لي جامعه ومن تخصص لي تخصص ..

2- مراسله معاهد اللغه او الجامعات واخذ القبول :

الطلبه اللي بيدرسون في بريطانيا لغه لازم يراسلون المعهد اللي اختاروه او الجامعه واهم يفيدونكم بالمده اللي تبونها وتكلفتها 3 شهور او 6 اشهر او سنه وتختلف التكلفه من معهد عن الثاني ، بعد ماترسون على المده اللي تبونها تختارون السكن اذا مع عايله او مع زملاء طبعا انا انصح عايله لانكم راح اتقون اكثر اتسولفون ويصححون لكم اذا في اخطاء وشي مهم لازم تحتكون في طلبه الاجانب اي كانت جنسيتهم على شان اتكلمون انجليزي حتى لو غلط لازم ولا اشلون بتعلمون وبعدوا عن العرب حتى لو كنتوا عرب حاولوا انكم اتكلمون بعض بالانجليزي لا تستحوووووون..

تقريبا تكاليف الدراسه اسبوعيا 200 باوند تقريبا و 120 باوند اسبوعي سكن مع عايله ..

3- الفيزا :

بعد ماخذيتوا القبول وامنتوا السكن تروحون المكتب اللي بالديره الخاص للسفاره البرطانيه وتطلعون الفيزا الدراسيه .
الاوراق المطلوبه:
أ- كشف حساب لاخر 6 اشهر وفيه مبلغ بحدود 3000 دينار او اكثر ، لدراسه الجامعات اقل شي يكون 5000 دينار للطلبه الخاصيين،المبتعثين كتاب من وزاره التعليم العالي .
ب- صوره شخصيه خلفيه بيضه 45MM*35MM واضحه من غير نظاره شمسيه مكشوفه الراس

لوول ..
ج - الجواز .
د- رسوم الفيزا 70 دينار لدراسه اللغه والمده تعتمد على المده الموجود في القبول واكثر شي سنه.
ه - رسوم الفيزا للجامعه تقريبا 200 دينار مده اطول ، دراسه الماجستير 70 دينار او اقل .
- نفس الطلبات بالنسبه لدراسه الجامعات.
خلصنا من الفيزا ان كانت لغه او دراسه جامعيه ..

سايت الفيزا من السفاره البريطانيه:
http://www.ukvisas.gov.uk/en/howtoap...pbsstudent#Top

4 - ملف وزارة التعليم العالي:

- للطلبه الخاصين تقدرون تفتحون ملف في الوزاره للمتابعه مع الملحق الثقافي في بريطانيا كشف درجات وكل شي لفتح الملف لازم تحطون فيه اقل مبلغ 9000 دينار ما ادري اذا قل المبلغ او مثل ما اهو وهذا المبلغ يشمل مصاريف دراسه والمصروف الشخصي ،، ويعتمد على حسب الجامعه والمده الدراسيه هذا المبلغ للماجستير ممكن يكون اكثر مثل ماقلت لكم يعتمد مده الدراسه والجامعه..
- للطلبه المبتعثين مايحتاجون لان اساسا عندهم ملف في الوزاره بس ..

5 - الاعتـــــــــــرااااف بالجــــــامعه:

- اهم شي اتأكدون من اعتراف الوزاره من الجامعه اللي اتبونها لان وزارتنا الميمونه كل يوم لهم اعتراف والغاء اعتراف واهم شي الطلبه الخاصين المبتعثين ماعليهم كلاام

لما تاخذون القبول والجامعه معترف فيها تاخذون من التعليم العالي كتاب بالاعتراف على شان لا سمح الله والغوا الاعتراف الا انتوا عندكم كتاب منهم ومايلغون دراستكم . وقبل ماتبدون دراسه لازم تعتمدون قبولكم وتسجلون في الملحق الثقافي في لندن .

* مواقع للجامعات المعترف فيها للبكالريوس undergraduate :

UCAS course search

هذا الموقع المعتمد لدى التعليم العالي وملحقنا الثقافي ..

* للدراسات العاليا postgraduate:
Kuwait Cultural Office - Announcements

تختارون التخصص على حسب الحرف من الليسته

وهذا سايت ملحقنا الثقافي :

Kuwait Cultural Office - Welcome

6- التجهيزات للغربـــــــــه وياويلكم وياحلوها من الغــــربـــــــه

- اتجهزون الاغراض الضروريه اللي تحتاجونها انا بالنسبه اللي اهو شي يمكن مايطري على البال بس مهم لان اكيد الكل عارف بيوت وشقق لندن وفنادقها ( عزكم الله الحمام مافيه هوز او البربيش لازم تاخذون معاكم ابريييييج )

واغراضكم الضروريه ( سيادتكم - قرآنكم - لاب توب ، ادوات خياطه ، تمر ، قهوه ، ملابسكم شتوي وصيفي ، .. الخ ) طبعا امهاتنا مساكين والله يخليهم لنا مايبقى شي مايحطونه من اكل تقولون رايحين افريقيا مجاعه مايدرون بريطانيا ام الاكل

اانا امي الله يسلمها حتى فيمتو حطت لي

فنصيحه اخذوا الاشياء الضروريه لان كل شي متوفر في بريطانيا ...

7 - السكن بعد فتره :

- عقب ال 3 اشهر نقول اللي خذيتوها او حسب المده اللي قعدتوها والحين تبون بروحكم او مجموعه تبتدون تختارون شقه او بيت في مكان زين وجريب من الجامعه والسنتر وامـــــــان ، انا اللي سويته عقب ما ثبت وعرفت منطقتي ودليت بديت ادور لي شقه زينه وامـــان وسيكيورتي وبعد ماخلصت المده نقلت للشقه ..
-ايجارات تختلف من منطقه لي منطقه يعني انا ايجار شقتي 600 باوند غرفتين وصاله عزكم الله حمامين ومطبخ وجريبه من السنتر في كارديف ، ورفيجتي في ليفربول 450 ونفس مواصفات شقتي .. العقود للايجار اقل شي 6 اشهر ..

8- اهم 5 اشياء اتسونها لما توصلون :

أ - التسجيل في قسم الشرطه اتطلعون بطاقه مثل بطاقه المدنيه فيها كل شي عنكم اسم العمر كل التفاصيل المهمه ..
- المطلوب منكم : قبول الجامعه ، صوره شخصيه ، الجواز ، رسوم 34 باوند ،، اذا بتغيرون العنوان لازم تروحون مره ثانيه وتغيرون العنوان ..

ب - NHS -GP- التأمين الصحي :
تاخذون من الجامعه اقرب العيادات الطبيه اللي يم بيتكم وتروحون اتسجلون فيها ( تاخذون معاكم : قبول الجامعه وعنوان السكن ) وبس اتسجلون . ترا واايد مهم انكم اتسجلون والله واحد من الشباب تعب علينا وماكان مسجل عيزنا انسااحلهم اتخيلوا مو راضين يعالجونه الا بالتأمين متنا في هاليووم .. نصيحتي اتطلعونه مبجر ..
- هذا من ملحقنا :
Kuwait Cultural Office - Medical Insurance Registration Form
واللي حاب يقرا وياخذ معلومات من هالسيات :
NHS Choices - Your health, your choices

ج - اتطلعون لكم بطاقه young person للقطارات هذي من محطات القطار الرئيسيه ليش هذي يطلعونها بس للي ساكنين في بريطانيا والطلبه فيها خصم للتنقل وخصمها واايد حلو مثلا انا اروح من كارديف لي لندن من غير خصم البطاقه من 55 باوند الى 60 رايح راد اما مع البطاقه تطلع على 37 باوند تقريبا .. طلباتها ( اتعبون الفورم ، صوره شخصيه رسوم لمد سنه 26 باوند ) وهذا سايتهم :

16-25 Railcard - Make Epic Savings on rail fares

- واذا تبون ارخص من القطارات عندكم national express coach هذي باصات ارخص من القطار بس مسافه اطول ( نفس الطلبات ، بس الرسوم ارخص يمكن 11 باوند لمده سنه) وهذا سايتهم:

http://www.nationalexpress.com/coach...s/students.cfm

د - فتح حساب بنكي : عندكم البنوك HSBC , BARCLAYS, NATWEST وبنوك غيرهم واايد تفتحون حساب جاري عادي ويحولون عليه بيزاتكم مافي عموله غير فرق العمله اما اذا حولوا بالباوند مافي فرق العمله .
ه- بطاقه الباص ممكن تطلعون من الجامعه هذي البطاقه سنويه تقريبا 25 باوند او من محطه الباص ..

9- للسيارات للطلبه اللي حابين يسوقون اهناك القوانين واايد صعبه ولازم تلتزمون فيهم السياقه صعبه نوعا ما لان على اليمين والبانزين غـــالي..

10- الاكل الحلال والاكل لرمضان متوفر في كل مناطق بريطانيا لاتحاتون ..

11- لايجوز لاي طالبه او طالب كويتيه بالعمل PART TIME OR FULL TIME ..

اشتغلنا انا ورفيجتي بس ماراح اقول اشلووون

وبس جذي انتهي معاكم تقريبا في اهم النقاط اللي يحتاجها كل الطلبه وان شاء اكون غطيت الاهم وموناسيه شي ،، واذا كنت ناسيه سامحوني ومن اذكر اي شي راح اضيفه لكم ..

ممكن هذي النقاط تفيد الكل يعني مو بس خاصه في دوله الكويت لكل الدول بس تغير يمكن في الرسوم مواقع الهيئات والوزرات الحكوميه اما الباجي كله نفس الشي ..

واتمنى التوفيج والنجاح للكل