بشرى سارة لكافة اعضاء ورواد منتدى العرب المسافرون حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وقد تم نشر 400,000 ألف موضوع 3,500,000 مليون مشاركة وأكثر من 10,000,000 مليون صورة ما يقرب من 30,000 ألف GB من المرفقات وهي إجمالي محتويات العرب المسافرون للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال, العرب المسافرون على Facebook



O-Murad85 O-Murad85
فيزت بريطانية من الكويت + موقع نصابين + رسوم الخدمه و حجز موعد مسبق
09-12-2014 - 11:58 am

السلام عليكم

بحكم خبرتي المتواضعه في السفر الى بريطانيا عرفت طريقة الحجز و التقديم على الفيزا
عندي نقطتين حبيت انقلها لكم من موقفين واجهتهم اسبوع الي طاف:
1- تقديم على فيزا و طلع نصب و احتيال
2- رسوم الخدمه 21 دك + حجز موعد مسبق ( بالسفارة البريطانيه- مركز التاشيرات)

حبيت اوضحلكم شغله بخصوص الفيزا و حصلت معاي للمرة الاولى مع العلم اني في 5 سنوات الاخيره دايم السفر الى بريطانيا

المهم العاده كنت اطبع استمارة الفيزا عن طريق الموقع

http://www.vfs-uk-kw.com/

بس هالمرة جنه مسوين شغله يديده واهي اني اعبي البيانات عن طريق الموقع و عقب اطبع و تطلع الاستمارة مطبوعه و جاهزه عن طريق

http://www.visa4uk.fco.gov.uk/ApplyNow.aspx

الموقع ماكنت حافظه عندي لان سهل اني القا عن طريق جوجل.

اولا: الفيزا و النصب و الاحتيال
هالمره الظاهر اني دشيت بالغلط و ان صار عندي لبس بالموقع و دخلت على موقع بالغلط و هو

https://www.migrationexpert.co.uk/visa_uk/

الشاهد اني عبيت البيانات و جاوبت على الاسئله و كل شي و اخر شي طلب مني بيانات الاتصال و الوقت المناسب للاتصال و ماطلعلي اي امر طباعه و كان هالموقع لتقديم عالفيزا اونلاين
يعني كل شي عن طريق الانترنت و انا ماستبعدت هالشغله لان كل شي قاعد يصير اونلاين

عقب ماجاوبت عالاسئله رديت من يديد ابحث عن استمارة الفيزا و طبعا حصلت الموقع الي ذكرته اول شي

المهم عقب ماقدمت عالفيزا بيومين اتصلو علي من بريطانيا و قالولي ان مقدم على فيزا و سالوني نفس الاسئله الي جاوبت عليهم بالموقع و قالولي انهم يخلصون معاملتي و انا بالبيت و تحصل على امتيازات و و و الخ

و اخر طلب مني رقم بطاقة الائتمان قلتلهم انا ما اثق فيكم و براجع السفارة و اقدم عالفيزا رفض و لزم ان ياخذ رقم البطاقه بس ماعطيته و سالته عن الرسوم ولا يقولي رسوم الفيزا 750 باوند ( 323 دك)
قلتله اسف مادفع عالفيزا هالمبلغ لان السفارة ياخذون حول 80 باوند ( 35 دك) و لزم و حاول باي طريقة ان ياخذ الرقم بس اخر قلتله كنسل المعامله لاني مو واثق فيكم
و حاول يمين يسار بس سكرتها بويها كل كلمه والثانيه اقوله الغي المعامله و بعد محاولات عديده شافني مصر على رايي تعذر عالازعاج و انهى المكالمه

و سالت السفارة عنهم قالولي ان ماعندهم اي مواقع غير الي ذكرتهم اول شي اما باجي المواقع كلها عصابات و حراميه

فا ديرو بالكم من هالشغله

ثانيا: حجز موعد مسبق و تفادي رسوم الخدمه 21 دك للجواز
العاده اعبي الطلب و اروح و اخذ رقم و انطر دوري
بس هالمرة رحتلهم قالولي اذا كويتي تقدر تروح الجهه الثانيه و تخلص اسرع
الجهه الثانيه عباره عن مكتب و صالة انتظار و على قولتهم خدمة في اي بي
و طالعين بشغله يديده انك اذا رايح تقدم بدون موعد تروح حق في اي بي و تنطر رقمك

الي حصل معاي اني رحت و نطرت و طلع رقمي و طبعا رديت الصاله الاولى حق الكاونتر و انا عامل حسابي 70 دينار حق جوازين و اتفاجأ من الموظف يقولي 112 دك

ليش؟؟
زايدين رسومكم؟ لا بس 21 دك رسوم خدمه
نعم؟؟ اي خدمه؟؟ شغله يديده مسوينها انتو ولا شنو؟؟
لا لانك ياي بدون موعد نستقبلك و ناخذ منك رسوم الخدمه 21 دينار على كل جواز

انا معاي جوازين يعني ادفع 42 دينار رسوم خدمه و الخدمه عبارة عن استلام طلب الفيزا يدون موعد مسبق
قلتله اسف ما ادفع رسوم الخدمه و الغي المعامله اخذ موعد و ايي عالموعد ولا ادفعلكم 42 دينار على شي مايستاهل
و الصراحه تحسفت و ضاق خلقي لما شفت وايد من اخوانه و خواتنه قاعدين يدفعون هالرسوم

المهم و انا طالع رحت حق موظف الاستقبال سالته عن رسوم الفيزا قالي 35 دك
بس اذا ياي بدون موعد تدفع 21 دك رسوم خدمه ( الخدمه عبارة عن استلام طلب بدون موعد + على قولتهم ضيافه في صالة الانتظار عبارة عن ماي و جاي و مو كل واحد ياخذها بعد و الصاله تسع لي 10 اشخاص تقريبا)

فا الافضل انكم تاخذون موعد قبل لاتروحون و هي برايي شغله حلوه و فيها نظام

و هذا رابط للمواعيد

https://www.vfs.firm.in/kw-apptsystem/appscheduling/appwelcome.aspx

و السموحه عالاستطاله بس الصراحه احتريت من الموقف و الرسوم و حبيت انقل لكم تجربتي للفائدة و اتمنى انها تكون فادتكم

و اي استفسار انا حاضر

و يعطيكم العافيه و رحله موفقه :))





المشاركات

ماكنتوش ماكنتوش
فيزت بريطانية من الكويت + موقع نصابين + رسوم الخدمه و حجز موعد مسبق


ما شاء الله عليك اخوي

احي فيك حرصك وفطانتك اللي ما تسمح فيها لاي احد يستغفلك

شكرا ونصائحك غاليه مشكور


O-Murad85 O-Murad85
فيزت بريطانية من الكويت + موقع نصابين + رسوم الخدمه و حجز موعد مسبق


المشاركة الأصلية كتبت بواسطة ماكنتوش
ما شاء الله عليك اخوي

احي فيك حرصك وفطانتك اللي ما تسمح فيها لاي احد يستغفلك

شكرا ونصائحك غاليه مشكور

جزاك الله خير اخوي ماكنتوش

بهالامور انا دايما احرص و افتح عيوني على كل كبيره و صغيره
و هالموقف بالذات وايد احتريت منه لان حرام اخوانه و اهلنه يدفعون 21 دينار زياده على كل جواز مقابل شي مايسوا
و هم في ناس يطبعون طلب الفيزا من الطباعين الي عنده مكتب التاشيرات و يدفعون عالطلب 3 او 5 دنانير والله حرام

تره كل شي سهل و مايبيله شي بس الله يكون بعون الجميع

و تحياتي :))


Bubyan Bubyan
فيزت بريطانية من الكويت + موقع نصابين + رسوم الخدمه و حجز موعد مسبق


تسلم علي التنبيه*

لكن المشكلة بمكتب الفيز بالكويت. فهم يتعمدون يرفضون طلبك المطبوع بالنت لاجل تطبع بالمكتب المجاور لهم، كأنه مو لهم علي قولت حسين عبدالرضاالخباز جنب مطعم الباجة. *وكله لاجل تدفع خمس دنانير قيمة الطباعة. وهذا بالفعل حصل معي. ويحاولون يأخرونك للتتجه لخدمة الفي اي بي.


abo jaber abo jaber
فيزت بريطانية من الكويت + موقع نصابين + رسوم الخدمه و حجز موعد مسبق


جزاك الله خير أخوي علي هالنصائح

ونا قد صارت علي دقوا علي من بريطانيا وقالي التأشيرة تكلفك أعتقد 540 باوند
قلت له انا ماعندي فلوس الأن بالفيزا بكلمكم بعدين ولا عد دقيت عليهم جلس يدقق علي اخوي هناك ببريطانيا واخوي قاله أنه غير رايه بالسفر لبريطانيا


q8ya metnaqla q8ya metnaqla
فيزت بريطانية من الكويت + موقع نصابين + رسوم الخدمه و حجز موعد مسبق


انا معاك في كل اللي قلته وصراحه شي يحر .. والاكثر خدمه ال في اي بي وتعبئة الابليكيشن على شنو ماخذين 21 دينار على كل جواز جان زين بتعطوني الرد باموافقه عالفيزا على طول ولا بيخلصونها بنفس اليوم والله بنت خالتي من شهر راحت وبتسويها بالفي اي بي قلت اذا بعطونج الفيزا بنفس اليوم وموافقين عليها اوكي اما بس كلام فاضي لا والله عطتهم وبعد 3 اسابيع ردوا عليها وقالوا مرفوضه واختها بعد 3 اسابيع عطوها ..

انا نصيحتي للكل يعبي الابيلكيشن بروحه من غير مكتب مايبيلها شي وتروحون تاخذون موعد وبلا خرابيطهم ال في اي بي ..
واتمنى لكم سفره حلووه


O-Murad85 O-Murad85
فيزت بريطانية من الكويت + موقع نصابين + رسوم الخدمه و حجز موعد مسبق


السلام عليكم

شاكرلكم مروركم و تفاعلكم معاي و اتمنى ان تعم الفائدة للجميع

اخوي بوبيان
بخصوص تعبئة الطلب سواء كنت معبي بنفسك او تعبي من المكتب المجاور لمكتب التاشيرات اعقتد ان السفارة مالهم شغل لان اهم الي يبونه ان المعلومات تكون كامله و صحيحه و المكتب صحيح ان تابع للسفاره بس الموافقه مو من المكتب و هو مجرد همزة وصل بين المسافر و السفاره

اخوي ابو جابر
وبخصوص انهم اتصلو و قالولك 540 باوند زين سوولك خصم انا صلخوني ب750 باوند و لزّم ان ياخذ رقم الفيزا عشان يحجز عالمبلغ و قالي ان المكالمة مسجله و انت معانه بامان و لاتخاف من شي و و و بس يوم رحت اقدم عالفيزا قلتلهم عنه و قالولي مالك شغل فيهم و احنه اساسا ماعندنه شي اسمه فيزا اونلاين بس الي دقو عليك نصابين و في اكثر من موقع جذي ياخذون فلوسك و مع السلامه و زين انك مادفعتلهم

اختي كويتية متنقله
بخصوص الفي اي بي الصراحه انا اشوفها استغلال مو اكثر ولا اقل و مثل ماقلتلي الواحد يعبي الابليكيشن بالنت و يطبعه و ياخذ موعد و يروح على حسب موعده ولا يدش عالفي اي بي و الحجي الفاضي و عقب 4 ايام عمل من التقديم يدخل على نفس الموقع الي خذا منه الموعد و يشوف حالة الجواز و اذا كان جاهز يروح يستلمه و اذا مو جاهز ينطر لان عادة ياخذون بين 5 و 7 ايام عمل
اما اذا صار تاخير اكثر فا يكون على تقرير البصمات لان مرات يتاخر على مايوصل و هذا نادر يصير معاهم

و شاكرلكم و اتمنى للجميع سفره سعيده و موفقه و جزاكم الله خير


βνĹĂĢŔĨ-Q8 βνĹĂĢŔĨ-Q8
فيزت بريطانية من الكويت + موقع نصابين + رسوم الخدمه و حجز موعد مسبق


الله يرحم ايااام زمان الى اقدمها الصبح واخّذها الظهر اما اللحين اللهم يا كافى استغلالين لابعد حددد ولقووو اللى يساعده


ابو عبدالله 135 ابو عبدالله 135
فيزت بريطانية من الكويت + موقع نصابين + رسوم الخدمه و حجز موعد مسبق


الله يعطيكم العافيه


فيصل فيصل
فيزت بريطانية من الكويت + موقع نصابين + رسوم الخدمه و حجز موعد مسبق


شكرا لك علي ذكر التجربه



يمكنك فتح موضوع جديد للمناقشة او الاستفسار والمشاركة.

احجز الفندق بأعلى خصم:
خصم يصل إلى 25%

Share

فيزت بريطانية من الكويت + موقع نصابين + رسوم الخدمه و حجز موعد مسبق