1. بسم الله الرحمن الرحيم


2. السلام عليكم جميعا


3. البداية


4. التاريخ من 5 -9 الى 15 – 9


5. مطار هيثرو

بسم الله الرحمن الرحيم

السلام عليكم جميعا

في البداية أحب الشكر كل من استفدت منه في هذا الصرح العريق ولا أريد أخص أحد بأسمه عشان ما أنسى أحد الكل ما قصروا ولهم دعوة في ظهر الغيب مني ومني زوجتي ويعلم الله كم دعينا لكم ونحن هناك في كل خطوة تذكرنا أن لها الفضل بعد الله في نجاح سفرتنا اللي أطلقت عليها سفرت العمر
طبعا الكلام راح يكون بالعامي احسن واسهل مع احترامي لكم لاانسى ان الصلاة والاذكار لها فضل بعد توفيق الله في الحفظ من السرقة والمشاكل في السفر او في الحضر لاتنسى ذكر الله اخي المسافر

البداية

كل المعتاد ليش لندن : في الحقيقة ما أدري كنت أبي أسافر مكان غير عن كل مكان رحت له قبل وبعد البحث الطويل والتنقل بين الدول وقع اختياري على لندن لاعتبارات كثيرة واعتبرها مهما جدا بالنسبة لي واللي هي الامن – الامان – تعامل مع العرب ((الخليجين خصوصا من ناحية الحجاب الاسلامي – الاكل من حيث الحلال ))
والكثير من الاشياء الشخصية خصوصا انا والدي عاش فترة طويلة هناك بعد مارجعنا من امريكا طبعا لما رجعنا من امريكا كان عمري خمس سنوات بس وكل شخص وله ذوقه في اختيار المكان وفي كثير قريت انهم يقولون لندن ممله وما ادري وش يعجبكم فيها انا شخصيا عشقتها
بعد التوكل على الله نزلت موضوع جس النبض في هالمنتدى الرائع و وجدت اجوبه لكل استفساراتي وخصوصا الاخت الكويتية بيض الله وجهها هي اكثر من شجعني انا وام العيال ان نتوكل على الله والى عاصمة الضباب
لا أحد يزعل ياجماعة من ذكر الاسامي الشكر موصول للكل والله
والمشرفين اسمحو لي عجزت ارفع الصور عن طريق المنتدى
الفيزا
ماقصر الاخ ابوعبدالله في موضوعه والاخت دارة الخير في الرد على كل ما يتعلق بالفيزا كان عن طريق مكتب الخبر والاجراءات سهله جدا والحمدلله
التذاكر
بعد الاحداث اللي صارت في لندن برمضان خفت شوي وترددت وماحجزت تذاكر مع اني حصلت اسعار بسعر منافس ولكن قدر الله وماشاء فعل انتظرت حتى هدت الاوضاع وبعدين حجزت على القطريه دمام – دوحة ((فديتها)) – هيثرو
التذاكر ب 8400 ريال على الدرجة الاقتصادية
الرحلة
كانت المدة عشرة أيام موب كاملة طبعا يعني عشرة أيام بأيام السفر الروحة والردة

التاريخ من 5 -9 الى 15 – 9

راح يكون سردي للموضوع كما هو معتاد مثل اخواني اللي سبقوني يعني سرد مثل اخواني اللي سبقوني واتمنى احد يستفيد ولو شئ بسيط مثل ما استفدت انا الكثير والكثير جدا
يوم الرحلة من الدمام الى الدوحة الصباح الساعه 11 صباحا والى الدوحة الساعة 12 وعلى طول على التحويل الى لندن مدة الرحلة 7 ساعات تقريبا ولكن ماحسيت فيها كان جنبي واحد مبتعث سعودي ماشاء الله خبره وانا اسولف وياه يقولي ما اصدق انت اول مره تجي من كثر ما سمع المعلومات اللي عندي وفي وحدة طول الرحلة المدام تتكلم عنها من هي ؟؟؟
هي الاخت ام عيسى هداوه صراحة طول الوقت نذكرها بالخير لان تقريرها كان المفضل عن المدام

مطار هيثرو

وصلنا هيثرو وهو اكثر شئ كنت خايف منه بصراحة المطار كلش متعقد سمعت عنه قصص بوليسية واكشن فكنت خايف ولكن زي ما يقولون التجربة خير برهان الوضع ابسط بكثير واكثر من مما كنت اتصور تنظيم رغم الزحام الرهيب وعدد المسافرين اللي ماعمري شفت زية في حياتي ولافي مطارات العالم والدول اللي زرتها ((طبعا بالنسبة لاوربا هذه اول ديره))
وصلنا عند الجوزات وحده كبيره في العمر سؤال اول مره نعم كم بتقعد 10 ايام ليش جاي سياحة والجواب اللي سمعته وايد في لندن enjoy
قلت في خاطري بس راح ربع الخوف والباقي على التفتيش خذت الشنط وين exit وعلى طول ولاكأني في مطار هع ولا تفتيش ولاشئ قاعد امشي ومستغرب
افتح جوالي الا مسج واتصال من وين ؟؟ من سواق التاكسي اللي طلبته بفضل الله ثم الاخ موادع ماقصر في موضوعه شرح وافي وبسيط رديت على الجوال وينك سير بالعربي يمه ؟؟ انا في لندن والا الدمام قلت بالانجليزي طبعا ههه انا خذت الشنط قالي انا عن كوستا واجيه وخذ الشنط وعلى الفندق المونتكالم وصلنا الفندق بتوقيت لندن الساعة تسع بالليل
الفندق
ماشاء الله خمس نجوم علامة 9 من 10 والسبب بس صغر الغرف وارجع واشكر الاخت كويتية كان اقتراحها المونتكالم مع اني كان لي نية على كمبرلاند بس ما حصلت حجز كان فل وحجزت في هالفندق
استقبال بدون مبالغة vip جلسونا في اللوبي وبعدين كيف الدفع كاش او فيزاوكيف كانت الرحلة وبعدين كرت الغرفة والكلمة المعتادة enjoy
حبيت هالكلمة وصرت اقولها من اول الرحلة الى اليوم
الانطباع الاول دشينا الغرفة ما تفجأت من الحجم الصغير لاني قرأت الكثير عن حجم الغرف في لندن اول ما دشينا صحن فواكة ضيافة وماء مجاني من الفندق وشوكلاته رهيب
والتفاح ياويلي على التفاح بس تصدقون كل ما اشوف التفاح والله مايطري علي الا سالفة ام عيسى ويا هالتفاح بس ما الومها صج صج الحمدلله على النعمة شئ تاكله وتقول سبحان الله والحمدلله
الليلة الاولى من تعب الرحلة خصوصا اني ما نمت طول الرحلة وسهران يعني مواصل اكثر من يوم استسلمنا للنوم بعد الصلاة