بشرى سارة لكافة اعضاء ورواد منتدى العرب المسافرون حيث تعود إليكم من جديد بعد التوقف من قبل منتديات ياهوو مكتوب ، ونود ان نعلمكم اننا قد انتقلنا على نطاق arTravelers.com
وهو النطاق الوحيد الذي يمتلك حق نشر كافة المشاركات والمواضيع السابقة على منتديات ياهوو مكتوب وقد تم نشر 400,000 ألف موضوع 3,500,000 مليون مشاركة وأكثر من 10,000,000 مليون صورة ما يقرب من 30,000 ألف GB من المرفقات وهي إجمالي محتويات العرب المسافرون للاستفادة منها والتفاعل معها كحق اساسي لكل عضو قام بتأسيس هذا المحتوى على الانترنت العربي بغرض الفائدة.

لمزيد من التفاصيل يمكنكم مراسلتنا من خلال نموذح الاتصال, العرب المسافرون على Facebook



أبو يزيدالسعودي أبو يزيدالسعودي
أنا رحت لصلالة أقولكم السالفة
08-12-2014 - 02:27 pm

في عام 1422هـ <<<<< وقف ياالخبل سلم حط مقدمة تدخل على طول بعدين التاريخ خطاء

يارجال خربت علي المقدمة

طيب آسف
السلام عليكم ورحمة الله وبركاته
أتشرف بان أكتب لكم تقريري عن رحلتي الأولى للسلطنة والأولى لصلالة <<< من جد الأولى لصلالة أكيد إذا كانت الأولى لسلطنة بتكون الأولى لصلالة والله شكلك ما تعرف تكتب تقرير

يا ابن الناس خلنا نكمل الناس <<< خلاص بخليك تكمل بس أعقل

أقول في عام 1422 هـ كنت أفكر أروح لصلالة لكن ما حان الوقت <<< أما حانا الوقت هذي متعوب عليها

معاد أرد عليك <<<< أحلى يا قوي

وكل سنة السنة الي بعدها لكن ما يسر الله إلا هذه السنة والحمد الله

كان عندي مؤتمر في صلالة ( منظم عن طريق مركز التحكيم الخليجي )

كانت رحلتي في 10 / 9 / 2011م العودة 15/9 /2011م

على الخطوط العمانية <<<< إيه صح لأنك رايح لعمان رحت على العمانية

أقول أقعد لا يا الخبل إلا هي أرخص شيء لقيته

كان السعر 2000 ريال سعودي <<<< أيه أشوا قلت لا يكون عماني كان بقول عنك خبل

وكان مسار الرحلة الرياض – مسقط – صلالة <<<< كم قعدت في صلالة

أصبر خلنا نكمل لناس العاقلة <<<< طيب طيب طيب

كان انطلاق الرحلة يوم السبت 10 / 9 من الرياض الساعة 9.15 في الليل هذ المفروض لكن تأخرت ما طلعت إلا الساعة 9.25 <<< والله تأخرت واجد أنت وخشمك أقول كمل كمل كمل أجل تأخرت ما شفت بعض الخطوط الي تعتز بخدمتك تلطعك ست ساعات ولا تعرف تقول لو نأسف لأننا أخرناكم كمل كمل

طيب لا تعصب <<< قهرتني يوم تقول تأخرت كل الدعوى عشر دقايق

طلعنا من الرياض وكان أكثر الركاب هنود وكان بجانبي هندي يقول ما بعد طلع على الطيارة إلا مرة وحده هذي هي المرة الثانية شكله يضحك متحزب <<<< وقف وش معنى متحزب

متحزب من تحزب يتحزب تحزباً أي تحنقط <<<< والله من صدق فهمت ها لحين ما فهمنا وش معنى تحزب فتجيب تحنقط أنت وخشمك

متحزب يعني مهتم ومتضايق من الرحلة ومن الطيارة فهمت <<< أيه كذا فهمنا كمل كمل

طبعاً كان هناك وجبة في الطيارة وكان فيها أكل حار ( فلفل ) <<<<<خخخخخخخخخخخخخخخخخ داري ما قدرت تاكله تذكر يوم تاكل السمبوسه الي فيها فلفل وتدخل المستشفى خخخخخخخخخخخ

أقول بلى تريقه خلنا نكمل السالفة للجماعة <<<< طيب طيب خهخههخخههخخههخهخهخخ

وكان فيه شيء ما فيه فلفل وكلنا والحمد الله وجا وقت الشاهي والقهوة ما كان في خاطري لا شاهي ولا قهوة مسكت معي على عصير <<< والله المسكة الي مالها سنع وين يجيبون عصير منه

خويك ذيب أقول لك وش سويت أول ما دخلت الطيارة لقيت مضيف عماني قلت له في مقاعد فاضي لأني شفت الناس واقفين <<< يقالك تنكنت

إيه ومنها أشبك معه

لا وأزيدك من الشعر بيت <<<< وش بعد لا تقول رحت للكبتن وقلتله بسوق عنك

لا مناب دبشه مثلك <<< لا تسب لا أجيك وأجلدك

خلاص خلاص خلاص بكمل

ويوم جاب العشاء ( الوجبة ) قالي لحم أو دجاج قلت له أي شيء من يدينك حلو انبسط الرجال وعطاني وقال لي لو تبي ثاني علمني <<<< أقول لا تشلخ علينا وتقوم تأرنب أتحداك إن كان قالك إن كانك تبي ثانيه علمني


من صدق ما قالي إن كانك تبي ثانيه علمني

وهنا يوم قلت أبي عصير قال أبشر وراح الرجال وجابلي عصير وشربته <<<<< لا من صدق شربته أحسبك تروشت به

وجا دور القهوة والشاهي

طلبت شاهي وبديت أشربه <<<< من صدق تشرب الشاهي والله غريبه تفاجئت بهذا الخبر

مناب راد عليك

وكان الي يصب القهوة مظيفة وكانت رفلى <<<<< وقف وش معنى رفلى

رفلى <<<< لا تفلفس علمنا بسرعة

الرفلى هي الي ودها تزين كل شيء بس ما تعرف ولا يمكن تعلم وهي تحسب نفسها تعرف فهمت يا الد<<< وقف لا تغلط

طيب طيب طيب طيب

كانت تصب القهوة والثلاجة الي معها كانت تصب على الفرشه وعلى أي واحد من الركاب والركاب هنود ضعوف ما يسوون شيء <<< وأنت طلعت اسبايدر مان وطرت و

أقول لا تسوي فاهم وقف خلني أكمل

لا ما قلت شيء ولا سويت شيء


بس كانت عيوني على الثلاجة وخايف تكب علي

وصلنا بحمد الله تعالى إلى مسقط وكان الترانزليت عشر ساعات <<< عشششششرساعات

وش نسوي ما لنا إلا هذه الرحلة

أول ما شفت المطار تذكرت مطار المدينة النبوية على ساكنها أفضل الصلاة والسلام ( لا تكونون بخيلين صلوا على النبي )

مطار صغير وعندي أنه غير مرتب /// رأي شخصي

مشيت مع الناس راحوا للدور الثاني سألتي واحد قلت أنا ترانزليت عشر ساعات وعندي رحلة لصلالة <<< لا تشلخ ما قلت له إنك ترانزليت

إيه صح ذكرتني لا ما قلت له إني ترانزليت قلت له إن عندي رحلة لصلالة قال رح مع المسافرين لتغير الرحلة طلعت فوق وقلت لواحد القصة كاملة قال أنت بتدخل في مسقط أو بتقعد في المطار قمت أتشاور مع نفسي قلت عشر ساعات في مطار مثل هذا // أنا ما اقتنعت به صعبة

قال خلاص تروح تختم وتدخل مسقط قلت خلاص

ونسيت أقولكم إني في الرياض طلعت بالبطاقة لأني سألت موظف الجوازات قلت ممكن الجواز أو البطاقة قال الي تبي

وكذا بعد في مسقط دخلت بالبطاقة <<< خابرك ما خذ جوازك معك ليه دخلت بالبطاقة

والله هكذا ماهنا سبب إلا سبب واحد هو لو جاني واحد مهايطي مثلك وقال ما يمكن تدخل في عمان بالبطاقة أقوله أنا داخل بنفسي فهمت <<< إيه فهمت

خويكم ما يدري عن الفنادق الي في مسقط <<<<< دبشه مثل العادة

أقول حسن ألفاظك <<< خلاص أنكت معك

سألت كم واحد قالي فيه فندق قريب بس الليلة ب60 ريال عماني <<<<<< يوه ستيييين ريال والله قوية

قلت لا أبي أقل حاولت أدخل النت اللاب توب ما فيه شحن شغلته شوي حاولت أشبك نت ما عرفت شوي خلصت البطارية وقعدت أفكر <<<< والله شكلك ورطت ورحت فيها

لا خويك ذيب قلت أطلع وآخذ تكسي وأزيده شوي وأشرط عليه أدور فندق يعجبني وأنام فيه <<<والله ذيب

وأنا أمشي في المطار <<<< إلي ما أعجبك

إيه خلنا نكمل للجماعة لا تقطع السالفة بشيء ما له سنع <<< طيب

جاني واحد وهو يتكلم بشوي شوي وقال تبي تكسي قلت إيه كم قال أطلع عشان لو شفنا الشرطي أو حقين تكاسي المطار يخالفونا قلت مني طالع إلا لين أتفق معك <<<<< ياوالله الغثه أنت نشبه تبي تورط الرجال

لا إلا ما بي أطلع إلا على بينة <<<< أقعد يا الذهين

إيه أطلع وأنا متفقت معه ثم نختلف على شيء يسوى أو ما يسوى خلك واضح من أولها وبعدين لا زم <<<<< أقول كمل بلى فلفسه

لا تقول فلفسه قل فلسفة <<<<< إيه طيب كمل بس

اتفقت أنا وهو عل 6 ريال بس بشرط ندور فندق زين قال أنا بوديك لفندق ممتاز ورخيص سعره ما يتعدى 15 ريال <<<< تعال خابرك ما تفقه شيء في الحساب وشلون عرفت تفهم إن فلوسهم واجد

أقولك خويك ذيب مناب سهل معي (الرقم صفر ) في مخي أول ما اسمع أي مبلغ أنطل قدامه صفر وأعرف كم يساوي بالريال السعودي <<<< أقعد الي مهوب سهل

إيه نيوتن <<<< وشدخله في السالفه أقول كمل كمل

اتفقت مع الرجال ورحنا من شقق مفروشه لشقق مفروشه وهذي مليانه وهذي غالية إلى أن وصلنا الريف للشقق المفروشة قال فيه غرفة بحمام مشترك ب15 ريال قلت خلني أشوفها أعجبتني الغرفة وقلت حمام مشترك مني مطول كلها 8 أ و 7 ساعات وخلاص قلت خلاص أبيها رحت مع سواق التكسي وشريت لي شيء آكله كنت جايع رجعت للفندق ونمت


أذن الفجر طلعت ورحت للمسجد وصليت طامع في بشارة الحبيب صلى الله عليه وسلم ( من صلى الفجر في جماعة فهو في ذمة الله حتى يصبح ) <<<أسأل الله العظيم من فضله

رجعت للفندق ونمت إلى الساعة 7.30 تقريباً طلعت رحت كويت شماغي
إيه نسيت أقولكم كنت مرسم مره شماغ وعقال وثوب

إلي معجبني في العمانيين إنهم متمسكين بالزي الرسمي حقهم يعني نوادر تشوف شباب لابسين بنطلون أو أي لبس غير اللبس العماني <<< إي والله صادق

بعد ما كويت شماغي أخذت تكسي ب5 ريال ورحت للمطار <<<إلي ما أعجبك ولا اقتنعت به

خلاص فهمو الشباب لا تكرر <<<< طيب بس أعلمك إني متابع معك

رحت للمطار وكان باقي على الطيارة تقريباً ساعة أو ساعة ونص شبكت النت وقمت أطقطق شوي طبعاً ما جالي نفس آكل أي شيء ما أدري ليه ومن صدق انتظرت سألت وين الرحلة الي رايحة لصلالة قالو في الصالاة رقم 2 رحت للصالة رقم 2 لقيتها مسكره فتحتها <<< ياولله الملقوف

فتحتها ودخلت وجلست وشغلت الاب توب <<< وين شحنته

من الشقق المفروشة ما تبيلها فهم <<< إيه صح

شوي ألا موظفة الخطوط تقول تفضلوا <<< تفضلوا وشلون

إيه حنا كنا واجد حول عشرة <<< يعني منت لحالك

لا بس أنت مسوي فاهم <<< آسف

مسكنا لسرى وتأكدو من البوردنق <<< وين بوردقن منه

بوردقن بوردقن<<<<<<< خهخهخهخهخهخهخههههخهخهه والله إنك دلخ

البو ردنق قطعته من الرياض بوردنق الرياض مسقط مسقط صلالة

طلعنا للطيارة وكانت متأخرة حواي نص ساعة وقف لا تقول شيء بس ودي أعلم الموجودين وش السالفة <<<< وش سبب التأخير


قال لنا الكابتن إنهم ينتظرون بعض الركاب <<<<< خهخهخهخهخهخ من صدقك ينتظرون ركاب

والله هذا الي هم قالو <<<<<<<خ هعخهعخهعخهعهخعخهعخهعخهع

وصلنا لصلالة وكان وصولي الساعة 11.30صباحاً وكان افتتاح المؤتمر الساعة 9صباحا طلعت جاني واحد قال تبي تكسي قلت شوي دورت لعلي ألقى أحد مثل ما لقيت في مسقط <<<<<<< حلى هي

لا أدور الرخيص

رحت للي قالي تبي تكسي قلت وين التكسي قال يالله ياأحمد طلعت مع شاب عمره 25 سنة <<<< كم طلعت به

قال بسته قلت خلاص بس أنا ابي فندق الجبل <<<< وش عرفك فندق الجبل

النت ما يخلي شيء ياالدلخ <<< إيه لا تسب
حجزت 4 أيام دفعت الحساب كان 24.57 ريال عماني وطلعت <<< طيب عطنا فكرة عن الفندق

يا رجال خلني أروح ألحق على المؤتمر لو ألحق على طرف حفل الافتتاح

كان المؤتمر في فندق الهيلتون صلالة رحت لهم <<<<< ها بشر لحقت





المشاركات

omani_engr omani_engr
أنا رحت لصلالة أقولكم السالفة


هههههههههههههههههههههههههههههههههههههههههههههههههه هههه

الحين انت مخلصك تكتب السالفه وتعلق على نفسك؟ والله عندك طووولة بال

المهم لا تطول متابعين وين اخرتها ههههههههه


سالم بن سيف سالم بن سيف
أنا رحت لصلالة أقولكم السالفة


وعليكم السلام ورحمة الله وبركاته


أضحك الله سنك يا غالي ... ضحكت كثيراً على تعليقاتك المرحة واسلوبك الرائع .


منتظر ومتابع يا غالي ... تحياتي .


alambr alambr
أنا رحت لصلالة أقولكم السالفة


أسلوبك رهيب يا بو يزيد

( عجبتني حركة <<< يعني هو يسألني !!! )

عسى لحقت المؤتمر ؟؟

وين الصور ؟؟ ( يا عيني على صلالة )


متابعين التقرير اللي ماخذ راحته عالآخر .


nanaabuabed nanaabuabed
أنا رحت لصلالة أقولكم السالفة


يسعد صباحك وتقريرك الفكاهي للمدينة الرائعة
بس لا تطول علينا.. والصور الحلوة .. متابعين


أبو يزيدالسعودي أبو يزيدالسعودي
أنا رحت لصلالة أقولكم السالفة


المشاركة الأصلية كتبت بواسطة omani_engr
هههههههههههههههههههههههههههههههههههههههههههههههههه هههه
المشاركة الأصلية كتبت بواسطة omani_engr

الحين انت مخلصك تكتب السالفه وتعلق على نفسك؟ والله عندك طووولة بال

المهم لا تطول متابعين وين اخرتها ههههههههه



والله يالغالي مهيب طولة بال بقدر ما هي ملينا من طريقة السرد الدائمة للتقارير

والصدق يقال


أخذت هذه الطريقة من واحد من المنتدى هذا العامر


وبعدين أنا قلت سالفة في مجلس وأنقلكم الي صار في المجلس الي أنا سولفت فيه وبعدين <<<<< ياابن الناس الرجال ما انتقدك معجبه اسلوبك

أيه أحسب إنه انتقدني <<< داري إنك دبشه ما تفرق بين النقد والإعجاب

لا نغلط <<<< أقول كمل الرد على omani_engr وخل عنك الهياط

هذي هي القصة أخوي الفاضل omani_engr

وأبشر من عيوني إن شاء الله ما أتأخر

ودمت مسافراً في متعة وفي طاعة دائمة للرحمن


أبو يزيدالسعودي أبو يزيدالسعودي
أنا رحت لصلالة أقولكم السالفة


المشاركة الأصلية كتبت بواسطة سالم بن سيف
وعليكم السلام ورحمة الله وبركاته



أضحك الله سنك يا غالي ... ضحكت كثيراً على تعليقاتك المرحة واسلوبك الرائع .


منتظر ومتابع يا غالي ... تحياتي .

وعليكم السلام والرحمة الله وبركاته

وأضحك الله سنك <<<< ترى الرجال يدعو لك مهوب يدعو عليك

جزاه الله خير


روعة الأسلوب تأتي بطلة مثلك أهل الذوق الرفيع

فدمت في رعاية الرحمن أيها الغالي


أبو يزيدالسعودي أبو يزيدالسعودي
أنا رحت لصلالة أقولكم السالفة


المشاركة الأصلية كتبت بواسطة alambr
أسلوبك رهيب يا بو يزيد

( عجبتني حركة <<< يعني هو يسألني !!! )

عسى لحقت المؤتمر ؟؟

وين الصور ؟؟ ( يا عيني على صلالة )


متابعين التقرير اللي ماخذ راحته عالآخر .


المميزين دخلو علينا يااااااااااااااااااااااااامرحبا والله بالغالين

أما المؤتمر فتابع الخلقه الثانية وتعرف


والله الصور ما كان معي كمرة لكن صورة بالجوال <<<<<< خابرك ما تفقه في التصوير شيء ومسوي فاهم

والتقرير يزداد جمالاً بطلتك الحلوة

دمت في سلامة وإسلام وطاعة للرحمن


أبو يزيدالسعودي أبو يزيدالسعودي
أنا رحت لصلالة أقولكم السالفة


المشاركة الأصلية كتبت بواسطة nanaabuabed
يسعد صباحك وتقريرك الفكاهي للمدينة الرائعة
بس لا تطول علينا.. والصور الحلوة .. متابعين
شف يالغالي التقارير فن وذوق وترتيب أفكار <<<< يقالك جايبهن كلهن أقول والله إن الشباب بس يشجعونك وما قصرو وإلا تقريرك فااااااااااااااااااااااااااااشل

أقول أقعد زين لا أكسر عظامك في هذه الصفحة


لا نتهاوش قدام الأعضاء خل هواشنا لحالنا وكمل رد على الرجال

والله الحلاة يالحبييب nanaabuabed والروعة تزداد بكم وبمشاركتم لأنسان فقير من أي حس فني


فلا حرمت خيري الدنيا والآخرة


الونيس92 الونيس92
أنا رحت لصلالة أقولكم السالفة


هههههههههه والله تقرير فكاهي ابو يزيد السعودي وبدايه قويه ان شاء الله نستمتع بالصور الرائعه



يمكنك فتح موضوع جديد للمناقشة او الاستفسار والمشاركة.

احجز الفندق بأعلى خصم:
خصم يصل إلى 25%

Share

أنا رحت لصلالة أقولكم السالفة