- اليوم راح أتكلم عن الاستعدادت قبل السفر.
السلام عليكم ورحمة الله وبركاته
هذي اولى مشاركاتي في هذا المنتدى العزيز على قلبي واللي استفدت منه كثير في كل سفراتي، فصار واجب علي اني انزل تجربتي حتى تعم الفايدة ومثل ما انا استفدت من الاعضاء اتمنى انهم يستفيدون من رحلتي.
اليوم راح أتكلم عن الاستعدادت قبل السفر.
بدأ التفكير في السفر في السنة الماضية بعد ما خلاصنا انا وزوجي دراستنا والحمدلله حسيت انه محتاجين انه نغير جو خاصة اني كنت احس بتأنيب الضمير تجاه اولادي (ابراهيم وعبدالعزيز) اللي عانوا كثير خلال فترة دراستي وتحملوا الغربة عشان خاطر ماماتهم وباباتهم . (وايد تتكلم )
فكان الاساس في اختيار الوجهة هو مكان عائلي يستانسون فيه الصغارية بالدرجة الاولى فكرنا في البداية في هونج كونج ،كوريا واليابان والسبب انه فيها افضل Theme parks لكن الاحداث اللي صارت في كوريا والزلزال اللي صار في اليابان خلانا نغير الوجهة.
انزين وين نروح فكري يا ام ابراهيم ، دايماً اختيار الوجهة وكل تفاصيل السفر والحجوزات من الالف الى الياء اكون انا المسؤولة عنه ، وابو ابراهيم يخرخش مخباته ويدفع ويعطيني الموافقة النهائية على الاختيار.
بعد البحث والتنقيب رسينا على استراليا ، نيوزيلاند و هونج كونج (خلصنا من الوجهة).
بعدين بدينا نتشاور نودي مريومة الصغيرونة (عمرها سنة ونص) وإلا لا.
لا تفكرين مجرد تفكير انه نوديها بتلعوزنا، والا ما في سفر (ابو ابراهيم).
حرام صغيرة وين بنخليها (ام ابراهيم وفي خاطرها ما مصدقه تبغي تفتك من المسؤولية)
نخليها عند أهلي او عند أهلج ومربيتها معاها ما عليها شر. (ابو ابراهيم).
بديت أدور على الطيران المناسب اللي ممكن يودينا هذي الوجهات فكان أنسب طيران من حيث السعر هو:
على الدرجة السياحية
تم الحجز في شهر مارس وسعر التذاكر لاربعة اشخاص اثنين كبار واثنين صغار ب 16000 درهم عن طريق الموقع الرسمي للكاثي باسيفك ومسار الرحلات والتواريخ كالتالي:
8/7/2011 دبي - هونج كونج
9/7/2011 هونج كونج - بريسبن
26/7/2011 اوكلاند - هونج كونج
اوكي شو راح يكون الطيران بين برسبين وأوكلاند، بعد بحث طويل شفت انه ارخص طيران بين بريسبن واوكلاند هو
السعر كان 2800 درهم لاربعة اشخاص اتجاه واحد بتاريخ 23/7/2011
باكر ان شاء الله راح اكمل الموضوع بعد ما أشوف تفاعلكم ، عاد لا تفشلوني اول مرة اشارك في المنتدى
ننتظر تفاصيل رحلتك وكلنا حماس