البحرين المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
ترانس
09-12-2022 - 05:33 am
صباح الخير
اليوم جاي في بالي اكتب موضوع
من فتره وانا ودي اكتبه
لكن ماجتني الجرأه الا اليوم الصبح
بعد ما قمت من النوم
وسويت لي ذيك الشكشوكه
اللي ولا اعتى اليمنيين ايسوونها
بالعافيه على روحي
على فكره انا نص شايب
لكن الظروف شاءت اني اكون عزوبي ها الويكند
الله يصبرني على الفرقا
المهم لحد يتعاطف معاي
عشان انا ناوي اخربها بعد شوي معاكم
بالذات الناس اللي تبي تعلمنا انها رايحه البحرين
انا بصراحه مدري ليه ها المواضيع اللي طالعة لنا
تقهرونا يعني ولا كيف؟
والا السؤال اللي جاوبه المشرف ستميه مره عن الاحوال الامنيه
يا اخي منهو بيفكر يغتالك مثلا؟ مين حضرتك حتى تخاف على نفسك
عفوا
اذا تبي ارسل معاك دوريه تزفك من جوازات البحرين الى السيف قول لي بس امر
خ
لا لا من جد ودي اشوف اللي يسأل عن الاحوال الامنيه
واخرتها معاه هوندا
من ايش خايف الله يصلحك
يامعشر العرب المسافرين
خلونا نرجع ذيك الايام اللي كنا نروح فيها
سكتم بكتم
لامن شاف ولامن دري
خلونا نرجع الايام الخوالي
اللي كنا ننكر روحتنا للبحرين
خ
كنا نغير نغمة الجوال مره
ومره نخليه في البيت
والا نحوله على خدمه موجود
الله على ذيك الايام الحلوة
كنا نروح يوم
ونندم بعدها اسبوع
نروح يومين
ونتهاوش شهر بعدها
كنا نروح الثلاثاء بالدس
محد يدري
مسوين خطط تمويه
وزحمه
والى جا الخميس
نودي الاهل معانا
يزعم تعويض
ورومانسيه
رومنسيه طل
ما انسى ذاك الموقف المحرج اللي حطني فيه بحريني اصلي
والنعم والله
موظف التأمين اللي بالجسر
اخر كاونتر عرفتوه؟ عفيه
ماقصر فضحني
جايب المدام معاي من زمان ما مشيتها
والا يطلع لي ذا الشريف مسوي يبي يوفر علي 15 ريال حق التأمين
مسامحه تقدر تدش تو ما انتهى تأمينك , انته مو ياي قبل يومين؟
لا غلطان اخوي يمكن مشبه علي
بلا , السيستم يقول انت داش الثلاثاء الساعه 9:30 بالليل
باجي لك ساعه
وانا تقلب عيوني غمازات اسكت فضحتنا
عاد شوفني وقتها ودي الارض تنشق وتبلعني
الاهل يناظرون فيني
بحقد
الله يقلعه نسف اوم الرومنسيه
يا حبيبي خذ الفلوس وانت ساكت
خ
طول الطريق وانا ارقع على الاهل
واحلف بكل ماهو غالي ورخيص عندي
اني ما جيت هنا قبل امس
هذا وانا مقطع ورقه التأمين اول ما وصلت الجوازات السعوديه
مافي
صايدينك يعني صايدينك
وش غير الدنيا؟
الحين اللي يروح يعلن في المنتدى
انني قادم
افسحو الطريق
يوبا روح محد درى عنك
الله واكبر اقتصاد البحرين واقف عليك انت والهوندا حقتك خ
مسامحه ياخوان وياخوات
حتى الخوات لهم عتب
خاصة المتزوجات
انا اللي اعرفه ان اكره ديرة عندكم بها الدنيا
طبعا لانها صد رد
سهل التزويغ لها
من ابو الشباب
بس اشوف مواضيع شوق ووله وحنين
باقلام نسائيه شرقاويه
ما ادري وش يضرب المخ اكثر
مثل ها المواضيع
او
صحن شكشوكه
على الريق
وسلامتها ام حسن
وعلى فكره انا رايح على الساعه 11 ونص رجاء ما ابي زحمة على الجسر


التعليقات (9)
Discover Bahrain
Discover Bahrain
ههه فديتك يا الغالي ترانس , ذبحتني من الضحك على موقف التأمين ههه
يا الغلا هذي ديرتكم وترى البحرين ما لها غنا عنكم في كل الأحوال ,
والحمدلله اليوم نشوف ونرى مرأى العين أعداد كبيرة من الأخوة الخليجيين وعلى راسهم السعوديين مليانه شوارع البحرين فيهم خاصة في أيام الويكند ,
حياك الرحمن ونتمنى لك قضاء أحلى الأوقات ,

fahadad
fahadad
ههه
اما سالفة التأمين يبيلها مشهد درامي مع اكشن
تروح وترجع بالسلامه

روز 2010
روز 2010
ههه
اجل صادق موظف الجوازات ههه
يبغى يوفر عليك جزاه الله خير
والله يحفظك تروح وترجع بالسلامه
ولاتنسى حلوى البحرين الملكيه خاطري فيها خ

hash3300
hash3300
ههه
حياك الله يا اخوي في ديرتك و اتمنى انك تستانس في زيارتك بس حاسب من الغبار، و اي خدمة لا يردك الا كيبوردك

عشقي البحرين
عشقي البحرين
ههه والله صادق .... خاايفين والله محد درى عنكم ههه
بس باين انك غشيم ... ماتعرف تتصرف .. هع هع هع
ياخي في كان انتضرت هالساعه ... مسوى رومنسي مع وجهك ههه انتبه بس ع الهوندا لا يفجرونك ههه تروح وتجي بالسلامه ههه
تحياتي

ksa.lord
ksa.lord
ههه خ
من أجمل القصص الواقعية الدرامية اللي قريتها
يالله تروح وترجع بالسلامة

منوله
منوله
ههه الله يوسع صدرك بالعافية
أنا العصر بكون هناك ان شاء الله وحشتناالبحرين وأهلها

ترانس
ترانس
حبايبي تو راجع من البحرين والظاهر اني راجع لها خلال كم ساعه
الوضع حلو حلو حلو لسا ماشبعت منها
والردود بعدين ارد عليكم واحدواحد شايف حش مو طبيعي فيني
بس اوريكم شغلكم بعدين
سلام بروح انام

ترانس
ترانس
discover bahrain
ياسلام عليك ديسكفر
تصدق اشوفك واستحضر كلماتك في عين كل بحريني قابلته
الله الله بديرتكم حافظوا عليها هاذي مملكة الحب مانستغني عنها
والخليج كله وراكم يدعمكم


خصم يصل إلى 25%