بريطانيا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
المرام
16-12-2022 - 09:48 pm
  1. صاروا موقفين خرعوني منهم ...


لعيونكم ... تقريري و برنامج لندن الحبيبه ...
السلام عليكم و رحمة الله و بركاته
ادري اني متأخره حيل بطرح الموضوع بس والله انشغلت و للحين منشغله بس قلت لازم افيدكم نفس ما استفدت منكم
طبعا تدرون اني كنت بلندن السنه اللي طافت للعلاج والحمدلله .. الله رزقني ب عمر .. الله يحفظه و يحميه
قعدنا هناك تقريبا 4 شهور من 18-4-2009 الى 24-8-2009
كنت اتمنى انزل لكم الصور بس الصراحه ما اقدر ... راح اكتفي ب الجدول وانا تحت امركم باي استفسار
و اعذوني ان نسيت شي ... لانه فيه اشياء ناسيتها ... عمر ما خلى فيني عقل ههه
اول شهرين كنا نتسلى و كأنها سفرة سياحه لكن بعدين انحبسنا بالبيت للعلاج والحمدلله ...
و اشكر اخوي القطري على رده على استفساراتي ... المسكين ازعجته بكثرة الاسئله بس ما قصر .. جزاه الله خير هو وكل الاعضاء اللي ردوا على مواضيعي
يالله نبدأ التقرير ....
برأيي انه لندن يكفيها أسبوع لزيارة الاماكن الحلوه اللي فيها
راح احط لكم احسن الاماكن اللي فيها و عناوينها
بس بالاول أبي اقولكم ... اللي يجون لندن لاول مره و مو مطولين يسكنون ب الاجورود أو شارع العرب
لانه متوفره فيها المطاعم الحلال و فيه عرب كثيرين .. ( وفيها نصب أكثر ... ف ديروا بالكم )
أما اللي مطولين .. يسكنون في الكوينزواي او كرومويل رود او عند الرجنت بارك .. هذول احسن شي
و بالنسبه للمواصلات .. الاحسن تأخذون بطاقة الاويستر .. تشترونها من محطات الاندرجراوند
لركوب الاندرجراوند و الباصات .. الاسبوع ب 24 باوند
اما لركوب الباصات فقط .. الاسبوع ب 12 باوند تقريبا
==============
برنامج سياحي لمدة أسبوع :
==============
اليوم الاول :
ما راح نكثر الطلعات فيه بسبب تعب السفر ...
الهايد بارك Hyde Park
معروفه .. حديقة كبيره فيها بحيرة و سناجب و بط
و يوم الاحد تروحون السبيكر كورنر تشوفون الناس يتكلمون عن قضايا منوعه
بالاندرجراوند : محطة ماربل ارش
و خطوتين راح تلقون :
شارع اكسفورد Oxford Street
شارع روعه
يمينكم و يسارك محلات تسوق لكل شي ... رجالي و نسائي و للاطفال
اكثر شي يعجبني فيه محل ديزني و محل بريمارك ( حبيب امي ههه )
الاكسفورد شارع طويل تلقون متفرع منه بوند ستريت و رجينت ستريت
و اذا لكم خلق تكملون تمشي .. تمشوا في الاجورود
edgware_road
احسن شي بالاجورود المطاعم ....
من المطاعم اللي يمدحونها .. منقله و كلبه : مطاعم عراقيه
احنا جربنا مطعم محل : هندي كان روعه
و مطاعم الشورما .. من رنوش + هيلين
و ماله داعي اقولكم انه اسعار المطاعم نار
اللي حاب يوفر .. يروح لاي مطعم اجنبي و يقول أبي فيجيتريان : يعني نباتي .. تضمن انه حلال و طبعا قول ما ابي كحول
  • - -

اليوم الثاني :
لندن اي London Eye
روعه و ما تخوف .. لانها تمشي بطيء .. توريكم لندن من فوق
ترى فيها كاميرا ... رزوا وجيهكم عندها ههه
تروحون لها عن طريق محطة : وترلو
و انتوا ب اللندن اي راح تشوفون ..
بيق بين Big Bin
هي ساعه كبيره
و جنبها تلقون ..
اكوريوم
حلو .. فيه الحياه البحريه
و بعدين روحوا لمحطة لندن بريدج و ادخلوا :
لندن دونقيون The London Dungeons
روعه لا يطوفكم
هو نفس قلعة الرعب ... وناسه
كل شوي يخرعونكم و تركبون داخل مركبه
بس اللي فيهم القلب لا يدشونها
ترى فيها كاميرا ... اول ما تدخلون يصورونكم و لما تركبون لعبه تخرع نفس طلقة الدبوس يصورونكم
  • - -

اليوم الثالث :
متحف الشمع madame tussaudsمدام توسو
روعه هو متحف فيه تماثيل للمشاهير من الشمع
روحوا لها على محطة البيكر ستريت
و بعدين ..
regent park ريجنت بارك
أحلى حديقه شفتها بلندن
فيها بحيره و حدائق منوعه داخلها و حديقة حيوانات ..
London zoo لندن زوو
تروحون لها على محطة : الرجنت بارك
  • - -

اليوم الرابع :
فيه متحفين .. برأيي انهم من احلى متاحف لندن ..هم
Natural History Museum متحف الطبيعة
و جنبه ..
Science museum المتحف العلمي
و طبعا احلى شي بالمتحف العلمي هو سينما ثري دي وناسه
المتحفين بشارع كرومويل رود
تروحون لهم عن طريق محطة ساوث كنزينقتون
south kensington
و قريب منه ..
هارودز Harrods
ممكن تروحون له في باص او على محطة :
knights bridge
هو مركز تسوق معروف و كله ماركات
ثم تروحون لمحطة بيكاديلي سيركس ..
يكاديلي سيركس Piccadilly Circus
تتمشون و بعدين
تلقون متحف صدق او لا تصدق
و مجمع التروكاديروTrocadero
المجمع فيه محلات للتسوق و العاب كمبيوتر
و من بالمجمع من ورى تلقون مقهى رين فوريست ... مقهى يحسسك انك بالغابه
ثم التمشي في ..
ترافلجار سكوير Trafalgar Square
و فيه النافورة
و بعدين تتمشون في ..
الحي الصيني CHINA TOWN
هو عباره عن شارع كله مطاعم و محلات صينيه
و بعدين ..
التمشي في ليستر سكوير
و بعدين ..
سوق كوفنت جاردنCovent Garden
أدري انكم راح تقولون اليوم الرابع طويل و ما يمدي ... بس عشان اوريكم انهم قريبين من بعض
و اللي ما يمديه يشوف كل الاماكن .. يخلي الاماكن اللي ما شافها لليوم الخامس و السادس
  • - -

اليوم الخامس :
للي يحبون الطبيعه و الزهور ..
كيو جاردنز Kew Gard
موجوده بالزون رقم 3
حديقه حلوه و فيها نباتات غريبه
ترى بعيده شوي بس تستاهل
ولا تسون نفسنا ... مشينا لما تكسرت رجولنا ... كبيره حيل ... بالاخير اكتشفنا انه فيها قطار تقدر تركبه و تنزل عند المكان اللي تبيه
شوفوا خريطة الحديقه و اعرفوا وين تبون تنزلون
نسيت اقولكم ... أحلى شي انه اي مكان له خريطه .... قبل تدخلون اي مكان شوفوا الخريطه و لا تضيعونها
  • - -

اليوم السادس :
Greenwich Park
مرصد جرينتش الملكي
موجوده بالزون رقم 2
هي حديقه فيها خط جرنتش
عاديه بس اللي يبي يشوف الخط يروح .. بس يبيلها مشي .. متعبه شوي
و بعدين ..
سوق جرينتش Greenwich Market
و بعدين ترجعون الزون الاول ..
سوق شبرد بوش ماركت Shepherd’s Bush Market
هو سوق شعبي حلو .. الناس تأخذ منه البضايع .. ساعات .. شالات .. مكياج .. و غيره
تلقونه في محطة شبردبوش
========
ولا تنسون سوق الاحد و سوق السبت
سوق السبت اسمه بورتبلو رود ماركيت
في محطة نوتنج هيل
سوق الاحد فيه اثنين..
واحد اسمه..
بريك لين ماركيت
في محطة ليفربول ستريت
و الثاني في كامدن تاون
اسمه كامدن تاون ماركيت
و طبعا اليوم السابع للسفر ..
انصحكم تقعدون في بريطانيا اسبوعين او اكثر
اسبوع تقضونه في لندن و الاسبوع الباقي توزعونه على اماكن خارج لندن ...
مثلا:
  • - -

منطقة برمنجهام :
فيها
عالم الكادبري www. cadburyworld.co.uk
في منطقة بورنفيل
و لازم تحجزون بالتلفون قبل تروحون
رقم المصنع: 08454503599
الصراحه عاديه
و السي لايف
بس الاكواريوم اللي بلندن احلى منهم
الحلو بالسي لايف سينما فور دي روعه
السفاري بارك في منطقة كدمنستر
تروحون لها بالقطار ارخص و احسن من التاكسي
روعه السفاري خصوصا للاطفال
  • - -

Bicester village
العنوان
0pingle Drive Oxo26
تلفون 01869323200
تبعد ساعه عن لندن
ما شفتها
  • - -

و مناطق ثانيه مثل بلاك بول و مانشستر و ليك دستريك و برايتون
و غيرهم
كنت اتمنى اشوفهم
  • - -

و الالعاب الترفيهيه مثل :
ملاهي التون تورز Alton towers
تبعد ساعتين عن لندن
او
ملاهي ثورب بارك Thorp Park
تبعد نص ساعه عن لندن
او
مدينة العاب تشزنقتن ورلد أوف ادفنشر chessington world of adventure
مره قررنا نروح للثورب لقينا الدنيا تمطر وللاسف ما رحنا ل ولا وحده من الالعاب الترفيهيه
====
طريقة الوصول لهم من كتاب باي باي لندن ..
التون تاورز:
تأخذين قطار من محطة ايستون EUSTON الى ستافورد STAFFORD .. بعدين باص للملاهي
أو الاقرب :
Euston إلى Stoke-on-Trent Rail Station
اسعار الدخول .. للكبار: 32 باوند .. الاطفال : 22 باوند
التون تاورز اتروحون لها كالتالي :
تطلعون عن طريق محطة واترلوو waterloo إلى محطة ALton ومدة الرحله ساعه وثلث وكل ساعه يطلع قطار ..
ثورب بارك :
من محطة وترلو WATERLOO الى محطة ستاين STAINES
then take the 950 SHUTTLE LINK STAINES TO THORPE PARK.
أسعار الدخول .. للكبار: 28 باوند .. الاطفال: 16 باوند
مدينة العاب تشزنقتن ورلد أوف ادفنشر :
من محطة وترلو waterloo الى chessington south station ثم تمشون عشر دقايق للملاهي
اسعار الدخول .. للكبار: 25 باوند .. الاطفال : 18 باوند
وليغو لاند الوصول لها بالقطار من محطة بادنغتون إلى محطة windsor central
المده حوالي نص ساعه ..
=
الحين نصايح للمسافرين للندن :
1 الشعب البريطاني شعب محترم و حبوب ... بس يا ويلك ان تعديت عليه و ما احترمت النظام ... والله ما يرحمونك ...

صاروا موقفين خرعوني منهم ...

مره كنا واقفين بطابور نحجز تذاكر الاندرجراوند ... ولا يجون اثنين اجانب يتخطون الطابور و يكلمون المره اللي تبيع التذاكر ... بس يسألونها ... طبعا كل اللي بالطابور قاموا عليهم يزفونهم .. المساكين قاموا يعتذرون و يقولون ما شفنا الطابور و ردوا لاخر الطابور يوقفون
انا خفت من صراخهم و زفهم
و مره انا و زوجي اول ما ركبنا الباص قعدنا بالكراسي اللي بالاول على اليسار ...
و كل ما ركبوا شايب او عجوز خزونا من فوق لتحت بنظرات استحقار ههه
بعدين استوعبنا انه هالمكان للناس الكبار بالسن
2 اوصخ شي فيهم انه ما تلقى حمام فيه ماي للغسيل .. ف لازم يكون معاكم ماي صحه او اي شي تحطون فيه ماي
3 دايم يبتسمون بوجهك ... رد لهم الابتسامه
4 بالباص او الاندرجراوند ... ما يقومون من مكانهم عشان يخلون كبير السن يقعد ...
بس انا والله كنت اقوم واقول لهم اقعدوا
5 لا تنسون خريطة المكان اللي راح تدخلون له
خصوصا حديقة الحيوان لانهم يكتبون فيها اوقات استعراضات الحيوانات
6 لا تعطون مجال للشحاتين يتجمعون عليكم ... تراهم نصابين و دايم اشوفهم طالعين من ماكدونالدز اكسفورد
7 اذا تبون تحشون حشوا بصوت واطي ههه
دايم احش و اكتشف انه اللي جنبي عرب مو اجانب ههه
مره زوجي ساعه يشرح للجرسون اللي بقهوة بريت عن قهوه يبيها .. وانا اتطنز على كلامه ... بالاخير طلع الجرسون لبناني
و مره سايق باص لبناني مدري مغربي
و صارت شكثر مو بس مرتين
8 اغراض الاكل و الشرب اشتروها من جمعيه اجنبيه مو عربيه ... تطلع ارخص
بس انتبهوا لا يكون فيها كحول او منتجات خنزير
9 الخضروات و الفواكه امي تشتريها رخيصه من سوق الاحد مدري السبت
0بقالة الوادي الاخضر غاليه بس اللحم عندهم يجنن ... والله مو طبيعي جربوه
اذا تذكرت شي بارد اقوله لكم
ولا تنسون تشوفون مواضيعي القديمه عن لندن ..
ترى رحت لاماكن كثيره مو بس هذي لكن هذول اللي يستاهلون الروحه


رحلتي الى بريطانيا
التعليقات (9)
المرام
المرام
لردي :
اهم الاماكن السياحيه ::::::
لندن اي
جنبها الاكواريوم
جنبهم : لندن داك تاور : و هو عباره عن سياره تمشي توريك أهم معالم المنطقه و تدخل تمشي بالماي
و الاحسن منها : البيق باص لكنه ما يدخل بالماي ... البيق باص يوريك كل الاماكن السياحيه بلندن من غير ماتنزل ... تشوفها و انت قاعد و أنصحك تقعد بالدور اللي فوق عشان تشوف عدل
البيق باص له محطات كثيره تقدر تركب فيه .. منها عند بوابة الماربل ارش و الهايد بارك كورنر
و فيه سجن القلعه السري ... رعب ... بس ما اعتقد انه يعجب الوالد و عمك
تخيل تدخلهم و هم ما يدرون انه رعب ههه
و فيه متحف الطبيعه روعه و جنبه المتحف العلمي فيه سينما ثري دي تجنن : في منطقة كرومويل : بالانجليزي : ناشيونال ميوزيام و ساينتيست ميوزيام
و مدام توسو او متحف الشمع ... فيه مشاهير من شمع ... مدري يعجب الوالاد ولا لا !!!!
الصراحه الشياب تحتار بذوقهم انت قول له و ان عجبه روحوا شوفوه
و للتمشي ... الهايد بارك و الرجنت بارك و بكادلي و ترافلجار
و فيه حديقة جرنتش و كيو جاردن .... بس بعيد و يمكن ما يمديكم الوقت !!
هذي هي اهم الاماكن
أنصحك تخلي كتاب باي باي لندن معاك ... فيه كل الاماكن السياحيه و طريقة الوصول لها
اما بالنسبه لفندق ... دام انكم اول مره تجون لندن ... الاحسن خليكم في الاجورود .. كله عرب و قريب من الاماكن السياحيه و من الهايد بارك
انت قلت ما تبي تتسوق ... بس احتياطي اعرف اماكن التسوق عشان لو حبيت تشتري هدايا للاهل :
شبر بوش ماركيت : سوق شعبي و رخيص
شارع الاكسفورد و الاجورود : جنب بعض

ليالي2005
ليالي2005
تقرير رائع عن الحبيبه / لندن
تسلم يدينك غاليتي / المر ا م
آآآآآآآآآه لا تقلبين المواجع عزيزتي وتذكريني ب لندن ،،وايام لندن الحلوه الي قضيتها هناك ،،
كانت من اجمل رحلاتي ، ويارب نعودها مرات ومراات ..
تابعي وحنا معك متحمسين
ربي يخليلك عمر وأبو عمر ،، وكل عام وأنتي بخير
ليا لي

المرام
المرام
ليالي2005
هلا فيج حبيبتي نورتي الموضوع
اي والله .... الف اه ... انا مشتاقه لها اكثر منج
الله يرزقنا بزياره لها عن قريب يا رب
تسلمين على مرورج

المرام
المرام
نسيت احط لكم روابط مواضيعي عن لندن عشان تفيدكم :
https://artravelers.com/p/re/290662

المرام
المرام
نسيت اقولكم ... فيه خريطه يبيعونها في لندن بريدج ... حلوه تهبل
و كتاب باي باي لندن فادني حيل .. تلقونه ب بلاش بمحلات الاجورود
و من الاشياء المهمه اللي المفروض دايم معاكم ... جنطه صغيره بشكل كروس ... اللي تنحط على الجنب ... حطوا فيها الخرايط و الفلوس ومفتاح الشقه و الضروريات ...
تلقونها بعد تنباع بالاكسفورد اعتقد بخمسه باوند
ما استغنى عنها بلندن و مكه ..
و اللي يحبون يتقهون و يقعدون بالحدايق العامه ... فيه جنطه سحب معروفه بلندن ...
شريناها من شوبربوش ... اعتقد ب 15 باوند .. ما اذكر ...
كان زوجي ياخذها لما يروح يشتري الماي لانه ثقيل
و فيه شي مهم .. لا تقطون اي وصاخه بالشارع ... شوارعهم نظيف تجنن
كنت اذا بغيت اقط شي احطه بالجنطه

المسافر ـآلصغير
المسافر ـآلصغير
شكرا على هذه المعلومات
وان شاء الله يستفيدو منها الاعضاء
بس تعديل سعر بطاقة الاويستر للاندرجراوند والباص لمدة اسبوع ب25.80 باوند ,, والبطاقة ب3 باوند ( 16/7/2010 )

أبــوعبدالله
أبــوعبدالله
الله يعطيج الصحة والعافية أختي المرام علي التقرير
وربي يحفظ لكم عمر ويتربي بعزكم
ولا الومها في محل بريمارك ( حبيب امي ههه ) حبيب الكل وحبيب إلي يحب الرخيص
آأيدج بكل شي وأخص بهذي النقطة
اغراض الاكل و الشرب اشتروها من جمعيه اجنبيه مو عربيه ... تطلع ارخص
وكل ما ابتعدتي عن الاماكن الي فيها عرب تكون ارخص بكل شي من سكن و اكل
وشرب بس الميزة انها قريبه من السكن للامان من الليل عكس الاماكن الثانية تكون موحشة واذا احتجت وصيدلية متوفرة
لوقت طويل
والخضروات والفواكة تكون فرش بسوق الاحد وسوق السبت روعة
ومشكور ما قصرتي

المرام
المرام
المسافر الصغير ...
تسلم على مرورك و على التعديل
المزعج ..
هلا فيك مشرفنا ابو افنان
تسلم على مرورك
امي للحين تتحلم ب بريمارك ههه وكل ماحد راح لندن وصتهم على بدله لعمر منه
والله الاغراض اللي فيه نفس مذركير لكن ارخص بواجد من مذركير
فعلا المفروض نبتعد عن الاماكن اللي فيها عرب للرخص لكن اللي يروح اول مره وما يعرف انجليزي ما راح يقدر يتعامل الا مع العرب
احنا كنا ساكنين ب كوينزواي و قلت مستحيل اسكن ب اجورود بسبة الغلا
لكن لما جت امي رحنا الاجورود
عشان تصير قريبه من السوق و الحريم ( قرايبنا)
ما تقعد بمنطقه بعيده يضيق خلقها
و الحمدلله استانست يوم جت

هندسة 2010
هندسة 2010
شكراً لك أختي ( المرام ) ،،،
وربي يحفظلك عمر وأبوه ،،،
بصراحة شكراً لمعلوماتك الرائعة والقيمة ،،، أنا سفرتي للندن ومانشستر قربت ...
وراح أستفيد كثير من معلوماتك الثرية لأن فيه أشياء كانت غايبه عني ...
شاكر لك مره ثانيه ...


خصم يصل إلى 25%