الخبر المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
رحال عاشق
12-10-2022 - 04:40 pm
  1. الله يعينكم يا بنات

  2. بقلم : فتحي حلواني


الله يعينكم يا بنات

بقلم : فتحي حلواني

دحين أنا أبغى أفهم انتي جالسة وسط هادي الكتب كلها ليه يا بنتي يا فتوو ؟ لأنه يبويا الاختبارات باقيلها أسبوعين ولا تبغاني أجيب العيد ؟ عشان كده لازم أذاكر .. وتذاكري ليه ؟ عشان أنجح .. وتنجحي ليه ؟ عشان أدخل الجامعة .. وتدخلي الجامعة ليه ؟ عشان أتخرج من الجامعة وأشوف وظيفة واشتغل زي بقية البنات .. طيب يا بنتي الله يعينك ويساعدك
خرجت من غرفتها وأنا أضرب أخماس في أسداس وأنا أقول في نفسي شكلك حتغني طول عمرك يا ليل ما أطولك ، إذا كان في بنات لهم سنين وسنين متخرجين من الجامعات والكليات والمعاهد ومن كل التخصصات اللي تخطر في بالكم ومو لاقين وظائف ، وجا كمّل الناقص الخبر اللي يرفع الضغط ويوجع القلب ويفقع المرارة واللي كان منشور في عكاظ يوم التلوت اللي فات واللي بيقول نائب وزير العمل : إرتفاع بطالة السعوديات إلى 24.8% كارثي .. ونائب وزيرالخدمة بيقول : نعم العاطلات 10 أضعاف حاجة سوق العمل .. ياعيني شفتو كيف ؟ عشان كده بقولكم قولي معايا يا ليل مطولك ، إذا كان ده الاعتراف جا من الجهة الرسمية اللي المفروض إنها تشوف حل لهادي المصيبة اللي بتحصل لبناتنا بتقول كده ، أجل بناتنا يسوو إيه بعد هدا الكلام ! بنات يا كترهم بيتخرجوا من جميع التخصصات ومولاقين وظايف ولهم سنيين وسنين وهما عايشين في هم وغم ، حياتهم صارت مملة من كتر السهر والنوم والطفش واللفلفة في المولات ، هدا غير الشفط والنفخ في المعسلات اللي دمرت حياتهم وقلوبهم ، نهارهم ليل وليلهم نهار ، طول الليل وهما متقنبرين على النت والمسن حتى عريس مو لاقين وكيف حيلاقوا عريس وشبابنا عايشين نفس المعاناة ؟ لا وظيفة ولا غيرو ، واذا لقي الوظيفة تلاقي الراتب ما يكفيه حتى مصروف جيبه ، وبعدين إذا كان حال هادول البنات كدة من سنوات طويلة إيش حنسوي بعد شهرين لما يتخرجوا من الجامعات والكليات والمعاهد الآلاف من البنات ؟ فين حيروحوا بعد التخرج ؟ إيش هيه المخرجات اللي بعد التعليم ؟ ليش ما نفتح وظائف في كل الإدارات الحكومية عشان تخدم بنات جنسها ؟ ليش ما نوظفهم في المستشفيات والمستوصفات والشركات الخاصة ولّا حلال على الغريبة وحرام على بنت البلد رغم أنه عندها الشهادة اللي تعبت وسهرت عليها عشان تتحصل عليها ! ليش ما نفتح فصول اللغة الإنجليزية في المدارس الابتدائية ونعين بناتنا المتخرجات من هادي الكليات ؟ فيها طلابنا وطالباتنا مستواهم (نيلة في الإنجليزي) .. يا ناس يا هوه .. تخيلوا معايا لما يكون في عيلة كل اللي موجودين فيها بنات وهادول بنات متخرجين من الجامعات والكليات ورب الاسرة حقتهم متوفي وراتبه التقاعدي ما يكفيهم حتى لنص الشهر ، كيف حيكون حال هادي العيلة في هدا الزمن اللي الأسعار صارت فيه نار ! وانتو عارفين طلبات البنات وحاجاتهم كيف حيعيشوا ويستروا نفسهم من هادي المغريات والبلاوي والابتزاز اللي بنقرأ ونسمع عنها كل يوم ! يا مجلس الشورى ويا مسؤولين ويا مختصين ويا علماء الدين ويا رجال وسيدات الأعمال في هدا البلد الكريم ... شوفوا حل لهادي المصيبة اللي بيعاني منها كل بنات بلدكم وارحموا من في الأرض يرحمكم من في السماء
وعيشوا كتير تشوفوا كتير.
منقول
بغض النظر عن موضوع المقالة ، بس أنا اخترتها لحلاوة وطعامة اللهجة الحجازية الجميلة ، مع أن المقالة تطرقت لظاهرة إجتماعية خطيرة جدا


التعليقات (9)
مسلمة لله
مسلمة لله
اللهجة الحجازية حلوة.....بس المقالة مؤلمة و معبرة
الف شكر مشرفنا رحال

رحال عاشق
رحال عاشق
مسلمة لله
العفو
طيب .. كلمينا شوية حجازي

ام عزيـــز
ام عزيـــز
فعلاَ حلاوة اللهجه الحجازيه ,, خففت مرارة واقع المقال
الله يصلح الحال
و يعطيك العافيه عالمقال
,,

ام عزيـــز
ام عزيـــز
بصراحه انا هالايام ما اشوف ناس تتكلم بنفس هذي اللهجه الجازيه الحلوه و الناعمه
احس دخلت كلمات كثير على كل اللهجات الحجازيه او النجديه او الجنوبيه
مثلاَ الكل صار يقول : بلشت = يعني بدأت
و شو = يعني شنو او ايش
شكل مع الايام بتطلع لهجة موحده جديد
,,

رحال عاشق
رحال عاشق
ام عزيز7
الله يعافيك
سرّني مرورك أختي أم عزيز

رحال عاشق
رحال عاشق
ام عزيز7
البركة في الفضائيات والمسلسلات التركية المدبلجة

مسلمة لله
مسلمة لله
رحال عاشق
طيب .. كلمينا شوية حجازي
مع اني حجازية ابا عن جد الا اني مو شاطرة في اللهجة الحجازية لاني مواليد وتربية الرياض

مازن جده
مازن جده
رحال عاشق
المقاله حلوه مره
لغويا ولا نقديا
كل كلامو ميه ميه
الله يعين البنات
والشباب كمان
شكرا رحال

رحال عاشق
رحال عاشق
مازن جده
يا هلا وغلا
مرحبمبك يا مازن جدة
فين الغيبة يا رجل ؟ وحشتنا بجد


خصم يصل إلى 25%