تعتبر مومباي ( بومباي ) سابقاً بوابه الهند التجارية وهي بحق واحدة من أهم المدن الهندية والتي لعبت دوراً مهما في التاريخ الهندي القديم والحديث ( حقبه الاستعمار البريطاني وما بعده ).
وزيارتي للمدينة المذكورة كان في شهر يونيو حيث الجو حرارة ورطوبة يعني مثل جونا .
بدايهً وعند وصولك للمطار تشعر بالهند الحقيقية فعلا –حيث للهند طابع خاص لا ينوجد إلا بها وهذا هو انطباع معظم القادمين لها – وبعد تعبئتك لأوراق القدوم وتقديمها لموظف الجوازات لا تتفاجأ إذا طلب منك اعاده كتابتها وأنت متأكد من صحة كتابتها ليش ؟؟؟؟
عشان انه يبي رشوه وانت بكيفك تبي تعطيه 100 ربيه ولا تعانده وبيمشيك غصبا عنه !!
وهنيه لو بسطت ايدك ترى كل واحد بيمد لك ايده موظف الجمرك حارس البوابه .....
بعد ما تخلص اجراءات المطار تتوجه لمكتب تاكسي المطار على يمينك وانت طالع من بوابه المسافرين والمكتب حكومي والتسعيرة محدده وموضحه في جدول في الأعلى حسب المناطق والأحياء بس انتبه ترا بيحاولو يزيدوا .
في البداية نسيت أقول إن المدينه مدينه المتناقضات يعني تشوف فيها اللي ساكنين القصور وتشوف اللي ساكنين على الشارع واللي ما لاقيين ياكلوا
و المدينه أمان والشعب الهندي بطبيعته مسالم بس بعد النصابين كثار بس متى يظهرون لو انت عطيتهم مجال ( يعني تصدقهم في كل شي تعطيهم الثقه تخلي الامور بيدينهم .... ) حتى حكالي واحد من الشباب انه واحد سرق عليه اكثر من 12الف ربيه ... والسارق من ؟؟؟ سايق التاكسي .. كيف ؟؟ السايق معاه كم يوم يعني مستأمنه صاحبه خلاص ... احتاج للصرف طبعا السايق موجود وتحت الخدمه روح طبعا –اعني السائق - بروحه وفي خبر كان ؟؟؟
طبعا صرف العملات ألخليجيه في الهند أحسن من عندنا والفرق يستاهل بس لا بد انك تشيل على الأقل خمسه الاف لزوم المصاريف وحتى ما تضطر انك ادور على صراف وانت توك واصل ...
اما من ناحية الاتصالات فهناك تقريبا 4 شركات للاتصالات واختار واحده واشترى بطاقة لو كنت بطول ابرك لك من التجوال والبطاقات رخيصة في حدود 300 ربيه مع الضريبة وحط رصيد بكيفك ..
اما من ناحية السكن فاعتقد ( كلابا ) هي المنطقة المفضله للقادمين وخاصة العرب حيث المنطقه نظيفه والخدمات متوفره الاسواق والمطاعم الاسلاميه بكثرة والفنادق كثيرة وأسعارها تتراوح من 800 لغاية 1200 ربيه ومناسبة للسكن بس انسى سالفه بركه السباحه ولا الخدمات اللي الواحد يتوقع يلاقيها في الفندق – هذي في الفنادق الكبيره بس وهي موجوده بكثره بس معظمها بعيدة من كلابا ما عدا فندق تاج محل وفندق اخر نسيت اسمه .. – بل وتوجد فنادق ب 500 و 600 ربيه بس تعبانه ومعظم نزلائها من الأجانب ...
وكثيرون من سكان كلابا يجيدون العربية .. فضلا عن كون المنطقه قريبه من الكورنيش وقريبه من مركز المدينه ..
وفي النهاية معظم من قابلتهم من العرب القادمين إما للتجارة أو للعلاج في المستشفيات الموجودة بكثرة في المدينة وان كان غرضك العلاج فأحب ان اشير الى نقطه مهمه وهي التخطيط قبل القدوم وعدم تغيير مسارك لمجرد كلام سائقي التاكسي أو ممن يدعون مترجمون ترا كل واحد يبي يوديك وين مصلحته يعني الشغله بزنس والضحيه اللي يطيعهم .. فالمصدر الوحيد اللي تحطه في بالك كمستشار هو قنصليه بلدك ومعظم الدول الخليجيه فنصلياتها موجودة في المدينة وهنا انصح بضرورة مراجعه أي فواتير للعلاج في القنصليات ترى سمعت سوالف وايد من تلاعب بالفواتير وهذا ما حصل عندي حيث بعد مراجعه الفواتير تمت اعاده كتابه الفواتير بعد لجوئي للقنصليه وتم ارجاع مبلغ يقارب من 14 الف ربيه من المستشفى !!
سعر صرف الربيه الهنديه تقريبا 4100 ربيه لكل 100 دولار