1. شكر خاص :


2. تكلفة التذكره بالريال السعودي 605.83 ريال


3. بالنسبه للترانزيت والمصاريف الشخصيه التي تخللت الفتره لكم الآتي :


4. + مويه ب 6 ريال الحبه

السلام عليكم ,,, وكل عام وانت بخير ... وعساكم من عوادهم ..
طبعاً ليس عندي من البلاغة العربية شيء يذكر لذا سأدخل بالموضوع دايريكت :0z9rx:
طبعا ماراح اقولك لكم سبب الأختيار لنيوزلاندا أو نابير بالذات فكل شخص له حرية الاختيار بين المدن والدوله لدراسة اللغه وهذا يعتمد على الشخص نفسه والميزانيه الدوليه للرحله .

شكر خاص :

للعضو ( Kooogak ) , سميني بنفسك , أحمد , والاخوان الي مسوين تقارير عن نيوزلاندا برضوا ماقصروا بالتقارير واله استفدت منها كثير و كل عضو شارك او كتب معلومه او تقرير ... واتمنى مايزعلون مني يجيني واحد يقول ترى ماكتبت اسمي ترى ماانلام الارض تغيرت والزمن تغير علينا حتى نومي تغير وكل شيء احسه مقلوب :1ns60:
نوع الخطوط :
الرحلة الدولية
الخطوط السنغافوريه ( حسب رأي الاغلبيه انها رائعه )
خط الطيران ( الرياض - دبي - سنغافوره - أوكلاند )
تكلفة التذكرة 6549 ريال عن طريق مكتب الخطوط بالرياض
مدة الرحله : مايقارب 27 ساعة طيران أصابني بعض الملل من خلال رحلة دبي - سنغافوره بسبب سوء مقاعد الطائره.
الرحلة الداخليه :
الطيران النيوزلندي وتم الحجز مسبقا واخذت التذكره والبوردينق الكترونيا من نفس موقعهم طبعاً لازم يكون معاك فيزا

تكلفة التذكره بالريال السعودي 605.83 ريال

المعهد تم الحجز مسبقاً عن طريق العضو ( Kooogak ) الله يجزاه الف خير ولايهون بعد سميني بنفسك والمشرف أحمد كلهم ماقصروا الاخوان وتم الاتفاق على دفع مبلغ اسبوعين إجمالي المبلغ لدراسة فل تايم مع العائله هو 3713 ريال ( 1386 دولار نيوزلندي ) يتخللها رسوم تسجيل وتأمين صحي ورسوم بحث عن العائله طبعا المبلغ يتغير حسب الدولار النيوزلاندي وايضا تم استقبالي بالمطار الداخلي ل نابير من قبل الهوم ستي ( العائلة المستضيفه )

بالنسبه للترانزيت والمصاريف الشخصيه التي تخللت الفتره لكم الآتي :

الترانزيت بمطار سنغافوره تم الحجز مسبقا بفندق لمدة 6 ساعات دون دفع الرسوم حتى الوصول الى المطار ولكن بشرط من وصول الطائره لك 60 دقيقه للوصل الى الفندق او يلغى الحجز علماً اني تعرفت على سعودي هناك ماحجز ولاسوى شيء واخذ غرفه من عندهم يعني شكله ماعندهم زحمه بالنسبه للسعر بالريال السعودي 187 ريال لمدة 6 ساعات... وهذا موقع الفندق وانصح فيه لانه نظيف ورخيص http://www.athmg.com/
تكلفة وجبة الغداء بمطار سنغافوره عند برقر كنق ل شخصين انا والسعودي الي تعرفت عليه هي 41.85 ريال

+ مويه ب 6 ريال الحبه

وانا عند البوابه A3 وانا انتظر طيارتي المغادره الى اوكلاندا فتحت الاب توب ولقيت شبكات انترنت بس بفلوس طبعا اشتريت حق ساعه عن طريق الفيزا وكانت ب 23.41 ريال طبعا ماشاء الله وقتها كان قدامي وجنبي تقريباً 6 شباب سعوديين
طبعا وصلت اوكلاندا على الساعه 10:45 دقيقه وكل شيء كان سهل قدامي مع اني ماأعرف اتكلم انجليزي بس كل شيء سهل بصراحه لدرجه رحت ادور البطاقه مترجمه الي نعبيها ولا لقيتها رحت اسأل الموظف الي قبل الدخول للجمارك وجات معي موظفه بس صدق مالقينا العرب ملصق على اللوح حق الترجمات المهم قالت لي ادخل واذا وصلت للموظف قل له قل اوكي ودخلت صفيت سر مع العالم اول ماوصلت له قلت آي نيد سيم ذز عربي طلع لي دفتر و طلب مني اروح الطاوله واعبيه وارجع رحت اعبيه وتأخرت عليه شوي فجأه لقيت فوق راسي وشاق ابتسامه وش كبرها المهم قال اساعدك قلت لا خلصت >>> نصاب مايعرف انجليزي ههه المهم عطيته بعد ماخلصت وقال تعالي معي رجع لنفسه الكاونتر حقه وقال لي عطني التذكره واعطيته البوردنق قال نو طبعا التذكره بشنطه الظهر ومتعيجز انا المهم قز معاي اوراق المعهد واعطيته هي وشافها قلت له يو نيد تيكت قال نو قلت اوكي المهم ختم لي وقال تفضل واروح الاقي الناس تستلم الشناط والاقي شنطي واخذها واصف سرا ثاني عشان تفتيش العش وصلت ذااك الانسان الضخم واعطيه الورقه الي عبيتها بعد الترجمه قال لي كلام قلت له اي دونت سبيك انجلس قال لي طيب وشلون عبيت هذي قلت له اي ترانزليشن يعني ترجمتها وعبيتها قال اندر استاند ذس يعني فاهم هذي قلت يس قال معاك اطعمه والا شيء قلت نو قال اوكي تفضل على رقم واحد المهم اشوف يميني السرا الي يقولون عليه شكله مررمطه والناس زحمه فيه عاد رحت على مكان الكشف واحد وحطيت شنطتي بالجهاز واستلمتها وطلعت من المطار وكل ماشفت واحد ظليت اسأئله وين المطار الداخلي ياليله يفهمون علي طبعا انا لقيت الخط الازرق بس الجو كان مطر والناس تنتظر الباص رحت انتظر معاهم وكل ماجاء باص اسأله اذا هذا الباص حق المطار الداخلي اور نو طبعا يادوب يفهمون علي وبصراحه تعامله راقي حتى لو ماتفهم انت ^_^ اخيرا لقيت الباص وركبت معاهم ورحنا المطار الداخلي اول ماوصلت المطار جلست افر فيه ادور الخطوط ولقيتها وعلى طول واساله ابي اغير الرحله لاني حاجز على السساعه 3:45 والحين الساعه 12 تقريبا يعني باقي وقت وانا مسبقا شايف رحله تروح الساعه 12 وشوي رحلت لها قالت لي مشكلته حاجز التذكره بدون استرجاع او تغيير وجلست تتعذر مني لدرجه شوي وتصيح ههه المهم قلت لها اوكي وجلست افر بالمطار واطالع العالم وطلعت برا المطار كان الجوو خيالي بشكل مو طبيعي .... وحسيت اني جوعان رحت لماكدونالدز بنفس المطار الداخلي وخذيت تيكن الله يستر شكلها مو حلال بس الجوع كاد ان يقتلني خصوصا ان وجبات الطياره ماجازت لي أبد وايضاً الضروره تبيح المحضورات.
عاد جاء وقت الرحله او قرب رحت اسأل اي بوابه والا اشوفها باللوحه واروح لم البوابه وانتظر هناك وقال لي الموظف شف هالشاشه اذا شفت فيها نابير بوكينق على طول رح للبوابه قلت اوكي ... اول ماطلعت نابير بوكينق وادز للطياره وعلى طول الموظفه تاخذني للطياره يوم قربت للباب ويذكر علي اني نسيت الكاميرا وارجع اقول قالت بسرعه بسرعه وشف قوة الركض ويادوب اجيبها وارجع ركض صراحه غريبه محد سرقها ههه يوم ركبت الطياره لقيت العالم كلهم راكبين والمقعد حقي المفروض يكون جنب النافذه لكن الشايب الله يهديه جالس فيه قلت اوكي وقبل يقلعون غيروا مكاني جنب النافذه ولا جنبي احد يعني خذ راحتك ... الرحله من اوكلاندا الى نابير لمدة 50 دقيقه بالزبط
ملاحظه هذا التقرير لمعرفة تفاصيل الرحله وتفاصيل المصارف علماً انه متبقي الوصول الى نابير وبعض المصاريف الأوليه ... مع العلم انه الآن تقريباً أكملت يوم كامل بنابير لاني واصل امس العصر والحين احنا الساعه 10 مساءً من يوم الأحد وبكره أول يوم لي بالمعهد ... دعواتكم
بالمناسبه وقت الرحله ماكان معاي ولا دولار بسبب ان مطار الملك خالد مالقيت فيه دولارات يقول خلصت ورجعت الفلوس واعطيتها اخوي وقلت له حولها على حسابي انا معاي الصرافه والفيزا والحمد لله كلها اشتغلت هنا وبسنغافوره وكلووا تمام ..
بعض الصور
صور الغرفه بفندق سنغافوره :
في الانتظار داخل مطار اوكلاندا المحلي
بعض الصور من الرحله من مطار اوكلاند المحلي الى مطار مدينة نابير
ومن بكره نبدأ دراسه وآي ثنك ماراح ادخل المنتدى الا قليل عشان كذا استغليت الليله ونزلت لكم هالتقرير البسيط.... تحياتي لكم
الساعة الآن 10:55 مساءً من يوم الأحد
محدثكم من نابير - نيوزلاندا :2s1jz: