1. { بسم الله الرحمن الرحيم }


2. الأخوات و الإخوان أعضاء المنتدى الطيب .......


3. التاريخ : 10 / 7 / - 4/8


4. حطينا العنوان في الجهاز و كان

{ بسم الله الرحمن الرحيم }

الأخوات و الإخوان أعضاء المنتدى الطيب .......

هالسنة للأسف ما راح يكون لي تقرير مطول مثل كل سنة .... و لعدة أسباب منها كثرة التقارير الرائعة و الثريه بالمعلومات أو الصور . يعني صكيتوا علينا لول ... ماشاء الله الله يعطي الجميع ألف عافية .. و ين نوصل مواصيلكم . و السبب الثاني .... صعوبة التصوير بوجود أطفال مثل كل سنة بس هالسنة أصعب ... يعني يا دوب أراقب عشان لا يضيعون ( لا سمح الله ) أو أفاجج ( اذا في هوشه ) لول ... بس هم راح أنزل تقرير صغيرون حتى لا تنقطع هالعادة ... و الصراحة ما حبيت أرد و كاميرتي فاضيه صور لكم و بعد تكونونUpdated لهذي الأماكن أو المناطق الي سبق و ذكروهم أعضاء المنتدى.
اعذروني على قلة الصور ... صوري كلها خطافية صاروخية ... يعني و أنا أمشي أصور و السيارة تمشي و أنا أصور ...
نبتدي ؟ يلا ( بسم الله الرحمن الرحيم )الطيران : الإماراتية – اليونايتد – الكونتيننتال

التاريخ : 10 / 7 / - 4/8

مسار الرحلة : الكويت – دبي – لوس أنجلوس و بعدها إلى أورلاندو على اليونايتد و العودة على الكونتيننتال إلى هيوستن و منها إلى دبي مباشرة و من ثم إلى الكويت
طلعنا من الكويت الساعة 3 الفجر إلى دبي و انتظرنا في مطار دبي حوالي ساعتين و على الساعة 8 و نص صباحا ً إنطلقنا إلى لوس أنجلوس و استغرقت الرحلة مباشرة 16 ساعة ... ( و يا طولها ) و مثل ما وضحت بالأول ... الطيران مو مثل ما توقعت .. كان أقل من المستوى المتوقع ... الكراسي ضيجة و هذا عكس الي مصرحين فيه بالإعلام و بالتحديد بموقعهم بالأنترنت ... الكراسي حدها متراصصه بعضها !! أهم شي عندهم يملون الطيارة ناس ! بس وين راحة الناس ؟ و يمكن من قبل أنا و بعض الأعضاء حددنا جنسية معينة كونها هي الغالبية بالطيارة ... الصراحة ما تهمني هالنقطة لأن كل واحد بروحه و عارف حدوده ... بس المشكلة الوحيدة في الإماراتية هي ضيق الكراسي خاصة إنهم صرحوا و أعلنوا عن كراسي كبيرة و مريحة للمسافات البعيدة ..إحتمال نفسيا ً إحنا تحضرنا و توقعنا شي جديد و لهذا السبب انصدمت .... عموما ً ... خيرها بغيرها و تأكدوا من نوعية الطيارة قبل لا تدفعون البيزات .... الشغلة الوحيدة الي قصرت المسافة و خففت عنا طول الدرب النظام الترفيهي ... ممتاز ... الأفلام متنوعة حسب الأعمار و الفئات و المسلسلات و البرامج و الجيمز للأطفال أو حتى الكبار ....
وصلنا مطار لوس أنجلوس و الحمد الله الأمور كانت سهلة و توجهنا لشركة دولار لتأجير السيارات .. كنا حاجزين من النت ميني فان .. عطيناهم رقم الحجز و أخذنا سياراتنا و ركبنا جهاز ال GPS الخاص فينا و توكلنا على الله ....

حطينا العنوان في الجهاز و كان

و بالتحديد ( آيرفاين ) فندق The Residence Inn by Marriott Irvine John Wayne Airport/Orange County Hotel الفندق عائلي و موقعه جيد جدا ً و وايد من نزلاء الفندق كانوا من المملكة
طبعاً الي يميز الفندق إنه عنده أجنحة بو غرفة نوم وحدة أو غرفتين نوم .... و الصراحة صعب نلقى شقق نظيفة و بمكان آمن و راقي و فيه تنظيف يومي بكاليفورنيا و بسعر معقول .... لان معظم اذا مو كل الشقق في كاليفورنيا عندهم شرط التأجير لمدة 30 يوم و فوق .... و للأسف كانت إقامتنا أقل من 30 يوم .
و كالعادة ما مداني أصور الغرف لأن من دخلنا عفسنا المكان ... لكن راح أنزل صورهم من الموقع .
قررنا إن تكون كاليفورنيا تمشي على الراحة و تسوق و بس ( من كثر ما حنيت على السوق لول ما شريت شي يسوى ) ... يعني ما فيه ديزني و يونيفرسال و سي ورلد و لوية هالأمكان .... ما عدا ليجو لاند لليهال .... يعني لازم شويه أمكان لهم .
في اليوم الأول نمنا و شبعنا نوم بعد الرحلة الطويلة المتعبة .... و قلنا خلينا نروح السوبر ماركات و نشتري الأغراض الي ناقصتنا و هم بعد نشتري خطوط للنقال .... و خذيناهم من at & t ... كان يبعد عن الفندق حوالي 3 دقايق بالسيارة Ralphs وCorner Bakery و at & t و غيرها من الكافيهات و الخدمات مثل المصبغة

هذا فندقنا المجكنم يعني الصغير .... طبعا ً أقول صغير لأنه مقارنة بالفندق الي راح نشوفه بفلوريدا ... يعتبر هذا مبنى صغير من مبانيهم

و هذا الريسبشن ... و كانت وحدة من الموظفات من أصل تركي اسمها ( بينار )

مسبحنا المتواضع .. و الي ما استخدمنا أبدا ً

هذا المطبخ ... وايد فادنا ... مع إنه كله مطاعم ... بس الميكروييف ضروري ... وهو مجهز بالكامل من الأواني .. يمكن أكثر وجبة ناكلها بالمطبخ هي الريوق أو الفطور

هالصورتين بس ... الي قدرت أصورهم للفندق

و ما ننساه جارنا AT & T ...