نيوزيلندا المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
أعترف لك
15-12-2022 - 07:08 pm
بسم الله الرحمن الرحيم
السلام عليكم ورحمة الله وبركاته
أخباركم .. أن شاء الله طيبين وبخير ؟
لقد عدت بالأمس من رحلة ممتعة الى نيوزلندا وقبل أن أبدأ بكتابة تقريري أحقاقا للحق
أحب أن أشكر كل القائمين على هذا المنتدى وخاصة بوابة نيوزلندا لأني بجد أستفدت منهم ومن خبراتهم
فألف شكر لكم من أعماق قلبي
والله يوفقكم ويسعدكم
السابق كان مقدمة لابد منها لشكر الجميع والثناء عليهم
والحين نجي لتقريري ..
وراح أتكلم فيه بكل النفاصيل اللي مريت فيها وبتحربتي
البداية .. كانت رحلتي لنيوزلندا غير مخطط لها ولا هي بالحسبان ولكن لما جاتني الرحلة هدية
طالعت بالمدة إلا ماعندي وقت أسبوعين ولازم أكون بالطيارة
وأنا ماعندي أدنى فكرة عن البلد
عشت أيام من التخبط والحيرة .. خاصة أنها أول مره بحياتي بسافر بدون الأهل ومع أخوي اللي أصغر مني
وكنت أبي أستمتع بالرحلة لأقصى درجة
حجزي كان في 24 /7 ولمدة 10 أيام فقط
أول صدمة تلقيتها أن الجو بنيوزلندا بارد وبيكون شتاء
قلت أكيد مارح القى فعاليات والجد أني ترددت بالسفر ..
عقدت العزم وقلت بأدور بالنت عن البلد واسأل وأستفسر
وبالفعل دخلت هالقسم وهاتك ياقرأه بتقارير الأخوان ونزلت موضوعين أستفسار
وكنت محتارة 10 أيام وين أروح ووش أسوي فيها
ابي ازور كل مكان حلو
وبصراحة من كثر ماتعبت وأحترت خليتها على باب الكريم
وقلت بأروح ومثل ماتجي تجي
طبعا أنا سافرت عن طريق خطوط الكاثي باسيفيك والجد هذي أول مره وأخر مره أسافر على هالخطوط
طياراتهم مو مريحة أبد وتعامل مضيفينهم شين يعني نادر مايبتسم الواحد بوجهك
والجد مو بس أنا اللي لاحظ هذا الشئ أغلب اللي تعرفت عليهم كانوا يقولون نفس الكلام عن هالخطوط
الرحلة من الرياض الى هونج كونج أستغرقت 8 ساعات
وهذي صور لهونج كونج من الطيارة
وصلنا المطار وبالفعل كان مطار هونج كونج جدا جدا رائع وكبير
وأنهينا أجراءتنا بكل سهولة
وللأسف أني ماصورت المطار من الداخل لأني كنت لاهية أتفرج بالمحلات ( حريم وش تقولون من يشوفون السوق تطير عيونهم ) خاصة أن الوقت اللي عندي ساعتين بس
بعدها ركبنا الطيارة المتجهه لأوكلند وأستغرقت الرحلة 11 ساعة مملة
وبالأخير وصلنا لمطار أوكلند
والمطار كان جدا متواضع والإجراءات ايضا كانت سهلة ويسيرة
مع اني كنت متخوفة منهم
لاني كنت احمل معي ادوية وبسكوت
لكن على قولة الأخوان اهم شئ اننا نسجل كل شئ
وهذي صورة من البروشور اللي معطينا اياه بالطيارة وعبيناه
هذا بالإنجليزي
http://www.customs.govt.nz/nr/rdonlyres/368694a5-39dd-4dcb-a840-ff3cb6184e0e/0/arrivalcard.pdf
وهذا مترجم بالعربي
http://www.customs.govt.nz/nr/rdonlyres/62139753-9078-43f2-ae1a-ec2e0222fbff/0/arabic.pdf
طبعا هالبروشور ماخذته من واحد من الأخوان بهالمنتدى والله نسيت اسمه
كان حاطه الله يعطيه العافية وانا استفدت منه
وحبيت الكل يستفيد منه بعد
وطبعا طلعنا من المطار بكل سهولة ويسر مثل ماقلت وأخذت تاكسي على الفندق
بقية الموضوع أنتظروه قريبا جداً
وأي سؤال عن هذا الجزء أنا حاضرة
تحياتي لكم


رحلتي الى نيوزيلندا
التعليقات (9)
HAAAAD
HAAAAD
السلام عليكم و رحمة الله و بركاته
الحمد لله على السلامة
و عودا حميدا
بداية موفقة و أنا اول المتابعين
تقبل مروري
دمت بود

الموسيقار88
الموسيقار88
مساء الورود اختي
سجليني ثاني المتابعين
بس ياليت ياليت تقولينلنا الرحله كم يوم وكم كلفتكم تقريبا
تحياتي

ahmad
ahmad
ماشاء الله ,,
حمدلله ع السلامة ,,
إن شاء الله الرحلة تكون تمام , وكل شئ مشي على مايرام ..
بإنتظار البقية ,,
خالص تحايا ,,
ملحوظة : الصور جداً جداً جداً صغيرة أتمنى لو ترفع على الموقع هجري هنا على الرابط التالي ..
https://artravelers.com
وياليت الصور السابقة تُرفع من جديد على شكل أكبر , وأنا س أقوم بإعادة تنسيقها ..
وشكراً ..

أعترف لك
أعترف لك
haaaad
الله يسلمك أخوي هاد
وتسلم على مرورك ومتابعتك
لاهنت

أعترف لك
أعترف لك
الموسيقار88
ياهلا والله أخوي الموسيقار
مساء الجور
تسلم على متابعتك وابشر بعزك
راح أتكلم عن كل شئ بالرحلة وبسعره بإذن الله
والرحلة كانت لمدة 10 أيام .. كلفتني غير التذاكر طبعا مبلغ بحدود ال 15 ألف ريال
وحياك وأنا أختك

أعترف لك
أعترف لك
ahmad
هلا والله وغلا بأخوي أحمد
الله يسلمك ويسعدك
أبشرك الحمدلله الرحلة كانت أكثر من تمام الحمدلله وكله بفضل الله ثم بفضل نصائحكم ونصائح الأخوان هنا
وأبشرك عدلت الصور ^_^
حياك

أعترف لك
أعترف لك
مرحبا عدنا ^_^
أخذت تاكسي من المطار الى الفندق بمبلغ 70 دولار نيوزلندي وطبعا وقتها أنا كنت جايبه معي1500دولار أمريكي
حولتهم عن طريق المطار الى دولارات نيوزلندية وطلعت لي تقريبا مبلغ 2000 دولار وشئ والله نسيت
وهذي صور من الطريق
وصلنا لفندق الكراون بلازا وبالفعل هذا الفندق جدا رائع وموقعه جدا جدا ممتاز قريب من كل شئ يعني مايحتاج أنك تأخذ مواصلات علشان
تروح لكوين ستريت أو للفيري والسكاي تاور
حجزته لمدة ليلتين فقط وكانت الليلة بمبلغ 200 دولار لغرفة وحده بسريرين بدون الأفطار وطبعا لأننا واصلين بدري
الساعة 8 صباحاً رفض الفندق أنه يدخلنا إلا بعد الساعة 2 ومني ومنهم بالقوة إلين رضوا يدخلوننا الساعة 12
3 ساعات باقي على دخولي الفندق .. حطيت الشنط عندهم وطلعت
ورحت أمشي حول الفندق أستكشف الموقع لقيت كوفي دخلته وأخذنا قهوة وساندوتش وجلسنا فيه قرابة النص ساعة
صورة الكوفي من الداخل
وبعدها طلعت وأنواع اللفلفه حول الفندق وهذي بعض الصور
ويوم صارت الساعة 12 رجعنا الفندق وأخذنا الغرفة
وهذي صوراللوبي و غرفة الفندق
طبعا كانت غرفتنا بالدور 26
ريحنا شوي وأخوي كان تعبان وناام لكن أختكم من الحماس مافيها نوم والساعة 12 وأيامي قليلة وماأبي اضيع دقيقة وحده
طلعت من الفندق ورحت اتمشى بالكوين ستريت ودخلت المترو فيه عندهم هناك مطعم هندي حلو
تغديت هناك ولفيت شوي ورحت للسكاي تاور طبعا أنا ببالي ماأجلس بأكولاند كثير لأن الأغلبية نصحوني بكذا
وكنت أدور مكتب حجز طيران علشان أروح لكوينز تاون لكن للأسف كلها كانت مقفلة علشان كذا أضطريت أقضي يوم بأوكلاند
بعدها رجعت الفندق ورحت لمكتب الرحلات وحجزت عندهم رحلة بعجلات الدفع الرباعي بالغابات ولمدة 3 ساعات
وكلفتني الرحلة مبلغ 350 دولار لشخصين بالنقل
وكان موعدها الساعة 8 صباحا
بعدها طلعت غرفتي ونمت بعد ماعرفت وش بأسوي بكرة وكيف بأقضيه ^_^

BUSHARAF
BUSHARAF
الحمدلله على السلامة ورحلة موفقة ما شاء الله.
بداية حلوة رغم انها سريعة ولكن مستمتعين.
في انتظار الباقي.

هايم بس نايم
هايم بس نايم
السلام عليكم الحمد لله على السلامه اختي ونيوزلندا بلد حلوه مره واهنيك على اختيارها ولكن خطوط الكاثي باسيفك اخس خطوط للطيران لانها صينيه ولكن اختي هل زرتي (روتروا ) اذا زرتيها ابغى رايك فيها واذا مازرتيها ف لابد من زياره ثانيه لنيوزلند لانها ممتعه وكذلك العاصمه ولينغتون كذلك افضل من اوكلاند وشكرا


خصم يصل إلى 25%