الكويت المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
المرام
21-09-2022 - 02:45 am
  1. حتى لاحظوا الصور


من أرقى مطاعم الكويت ... مطعم لونوتر الفرنسي يم يم
السلام عليكم و رحمة الله و بركاته
من زمان ودي أجرب مطعم لونوتر الفرنسي ...
لكن مره قريت انه ممنوع الدخول الا ب لبس رسمي
و كنت اضحك على زوجي ... أقوله تخيل نفسك في بدله رسميه
المهم ... راحت الفكره من بالي ...
لكن الاسبوع اللي طاف عزمتنا رفيجة اختي على عيد ميلادها ... رحت مع اختي عشان ما تروح بروحها .. ف قلت وين تعزمنا؟ قالت في لونوتر
استانست و قلت و اخيرا راح اشوفه ... الله يستر لا يطردونا
المهم ... رحنا ... و طبعا الكل مو لابس ملابس رسميه ولا شي
الصراحه المطعم راقي و كشخه
بيوم العيد ميلاد طلبنا بيتزا مرجريتا لكنها كانت عاديه .... و طلبوا كيكه كبيره اسمها dune
طبقات كاكاو و مدري شنو بس والله روعه بعدين شفتها لقيت مكتوب عندها السعر ب 7 أو 8 دنانير
طبعا ما قدرت اصور يوم العيد ميلاد فشله جدام البنات
بعدها بيومين دقت علي امي تقول يالله بأعزمكم ... وين تبون تتغدون؟
بعد مشاورات دامت 3 ساعات تقريبا الكل اختار المطعم اللي يبيه بس اتفقنا على روبي تيوزداي
لكن لما رحنا له ما عجب امي بسبب ريحة الشيشه ... و قالت اختاروا مطعم ثاني ..
عاد هي كان ودها في برج الحمام ... لكن اختي قالت لها اني حبيت لونوتر .. ف قالت خلاص نروح له عشان المرام
رحنا له ... و طبعا خذت راحتي بالتصوير ... و رحنا وقت الغروب

حتى لاحظوا الصور

انصح الكل يروح يجرب المطعم لانه يجنن ... كل شي فيه حلو ... موقعه و المنيو و الاكل و الجرسونات و المدير و كل شي
المنيو ... منيو مصور ... مصورين كل طبق ... و كاتبين مكوناته .. و الورق قوي و نظيف ... لكن أسعار الاكل شوي غاليه .. أمي تقول شافت بالفاتوره انهم رافعين اسعار الاكل غير اسعار المنيو .. لكنها ما كلمتهم .. يعني انتبهوا
الموقع ... عند أبراج الكويت و أبل بيز .. موقعه روعه و على طول على البحر
الاكل ... عجبني حيل لكن البيتزا كانت عاديه
الجرسونات ... كل شوي يمرون من عندك .. حتى اختي من غير ما تدري دزت القلاص و طاح انكسر ..لقينا الجرسونه الفلبينيه جايه تركض و مسحت الطاوله و شالت القزاز و ضحكت معانا ... لو اختي تقرأ الكلام راح تذبحني
و المدير كل شوي يبتسم للي داخل و للي طالع ... و يرحب فيهم
بالاول بأوريكم الطلبات و بعدين صور المنيو ... لان المنيو صوره واجد و حتى ما صورته كله :::::::::
من برى :

اطلالة طاولتنا على البحر :

الطلبات :
سلطة السيزر ... روعه لا تطوفكم

ساندوتش ستيك لحم بالفطر :

من غير فطر :

معكرونه :

ستيك :

كلوب ساندوتش :

المنيو ::
السلطات :

الشوربه :

الاطباق الثانيه :

شرايكم !!!
نسيت اقولكم ... حسابنا طلع ب 27 دينار


التعليقات (9)
fab u lus
fab u lus
لونوتور قعدته وايد حلوة وهاديه .....انا جربته ريوق ولا اهدئ منه وخدمة ممتازة... وعليكم بالعافيه والعوض للوالدة .

بنوتة كويتيه
بنوتة كويتيه
عليكم بالعافية
شوقتيني اروح المطعم ودي اجربه

VALUE
VALUE
مشكورة المرام على التقرير
وانا دائما اروح لة حق الريوق قعدة ممتازة برة خاصة اذا كان الجو معتدل وفية بوفية فطور (ريوق) وايد حلو

كويتية وافتخر
كويتية وافتخر
ماشالله ،،،، عليج يامرام خوش صور مصورتهم من المنيو،،،،
والله انا جربت هذا المطعم فيه غداء عمل للموظفين اللي معانا بالدوام ومرة ريوقة عجيب انصح فية ومرة بعد عشاء ومرة بعد قعدنه باللي بالفنار بعد وايد حلو تتطمشين علي اللي رايح والراد من زوار السوق
ويعطيج الف عافية علي هذي الصور يامشرفتنى

Noura86
Noura86
هالمطعم روعة
من المطاعم المفضله عندي
يعطيج العافيه ومااقصرتي على الصور

دلوعة أجدادي
دلوعة أجدادي
مشاءالله يا مرام عليكم بألف عافية ، وأنا أطالع الصور طقني الجوع صور الاكل بالمنيو
والله شكل القعدة بالخارج ب هالوقت حلو
تحياتي لج

alrashedq8
alrashedq8
مشكورة اختي المرام ابدعتي الصراحة
الستيكات عنده عجيبة والريوق احلى شي عنده
وكل افرعه اللي بالكويت قعداتهم حلوة

زااراا
زااراا
أبدعت يالمرام كالعادة
تسلمين حبوبة وماقصرتي بالصور والمعلومات والسوالف الحلوة مثلج

المرام
المرام
fab u lus
الله يسلمج يالغاليه
مشكوره على مرورج


خصم يصل إلى 25%