لمسة ذوق
08-07-2022 - 01:03 am
السلام عليكم ورحمه الله وبركاته
مراحب على اقرب البوابات لقلبي
من زمان وانا ودي ازور الكويت وما حصلت لي فرصه
والحمدلله الحين الفرصه جت وبقدر اروح
وعاد لي يومين اقرأ بتقارير الاعضاء واحاول اجمع اكبر قدر من المعلومات واركز
اول شي السكن احترت صراحه وخربطت ولا قدر اركز
فودي بمسااعدتكم وارائكم ب :
1: ريتز السالميه
2: الكورنيش
3: سارا بلازا
4: هوليدي ان السالميه
5: سفير انترناشينونال
6: بلازا اثيني
7 : فور بوينتس
وش افضلها من حيث القرب من اغلب الاماكن السياحيه والاسواق
ومن حيث جمال اطلاله المكان صراحه ودي بشي يفتح النفس
وودي بسعر لحد 40 او بالكثير 45 دينار
بعدها نجي لافضل القهاوي ومحلات الافطار
وياليت لو احد يساعدني ويعمل لي برنامج كامل
يعني اقوم الصبح اروح افطر بمكان معين وبعدها اتسوق وبعدها ارجع اتغدى والمغرب اروح سوق ثاني
وياليت لو فيه يختات تطلع بعشاء تعلمووني
وودي اعرف بعد عن محلات تسوي مساج للرجال والنساء
وودي اعرف اهم الاسواق الي فيها محلات مو موجوده عندها
وطبعا من اهم الاماكن الي بزورها ابراج الكويت 00
وانتم كريمين وانا استاهل
يا هلا ويا مرحبا فيج بالكويت
بالنسبة للفنادق ما عندي خبرة اترك الاجابة للاخوان.......
الاماكن الي تقدرين تتريقين فيها وايد:
على شارع الخليج العربي في مطعم سلطان الريوق فية رائع جدا جدا... والبحر جدامج....
شارع سالم المبارك في مطعم دجاج تكا (طبعا الاسم لا يوحي ان مكان للريوق ) لكن عندهم ريوق الصبح... عموما اهوا ارخص من سلطان...بس تشكيلة سلطان بالريوق وايد احلى و متنوعة....
عندج الريوق بالفنادق.... فندق مارينا... او الشيراتون......
الريوق بالمطاعم الموجودة بالمجمعات مثل مطعم ليلى لبنان بالافينوز....
تقدرين تتريقين بالابراج بعد.....
وللغدا والعشا المطاعم ترس الديرة
طبعا مطاعم الوجبات السريعة (كنتاكي هارديز برجر كنج و ماكدونالدز و غيرة متوافرين بمعظم المجمعات.... وتلقين بعضهم عالبحر بشارع الخليج......)مطاعم الستايل الامريكي ( جوني كارينوز - فرايديز - تشليز- روبي تيوزدي- ابل بييز- فدركرز....) هذيل كلهم عالخليج تلقينهم ولهم افرع بمجمعات ثانية....مثلا تشيليز وفرايديز موجودين بالافنيوز بعد..... وفرايديز موجود بالمارينا كرسنت بعد..
مطاعم البيتزا موجودة بكل مكان...( بيتزا اكسبرس -بيتزا هت -دومينوز بيتزا- بابا جونز وغيرهم.....)....
مطعم فريج صويلح للاكل الكويتي....وفريج عقاب بعد....
المطاعم الهندية : احلى مطعم وارشحه بقوة مطعم اشاز بالمارينا لا يطوفج... ومطعم مغل محل بعد له فروع وايد بشرق والسالمية اللي يحضروني الحين....
مطاعم ايطالية: سبارو بالسالمية.... ترشيحي له عادي... واذا كنتوا من محبي الاكل الايطالي على اصولة لا يطوفكم مطعم Al Forno بالافنيوز... لذيذ لذيذ لذيذ..... وارشحة بقوة....
مطاعم لبنانية: ميس الغانم.....و فيلا فيروز احلى مطعمين بنظري.... وليلى لبنان بالافنيوز بعد حلو..... زيت و زعتر بعد...
طبعا باغلب المجمعات راح تلقين وايد مطاعم يعني لا تحاتين.....
ام شنو بعد؟ في تشكيلة مطاعم عالبدع راقية وبنفس الوقت غالية شوي...
اذا تحبون الاكل البحري مطعم توتالي فيش حلو....
الكافيهات وغيرة....كل شي موجود....ستاربكس بكل مكان...كوستا....تشوكليت بار بالمارينا والافنيوز موجودين للكاو والفوندو وغيرة....
شكثر كافيهات موجودة بالافنيوز....بكل مكان..مثل كولومبوس وغيرة....
اذا تحبون البرد (الايس كريم) الايطالي الجيلاتو في محل متخصص بالجيلاتو فقط... رائع رائع رائع..... اسمة Gelato Italianoوهذا ارشحة بقوة بعد لانة لذيذ جدا جدا.... موجود بمنطقة شرق , شارع احمد الجابر , برج الجاز , بفتح يوميا من 8 الصبح الى 1 بالليل...كل يوم مطيح عنده عنده تشكيلات حلوة احلى شي ذوقو البسكوتي و المارسي (انواع نكهات)....
سوري عالاطالة هذا الرد كله مطاعم
اخوج
il bambino