امريكا US المسافرون العرب

أكتشف العالم بين يديك المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة. artravelers.com ..
mazenff
21-12-2022 - 05:16 am
مساكم الله بكل خير يالغالين...
الله يووفقكم ويجزاكم كل خير على هالروعه الى جامعينها هنا.. ماقصرتوا بصرااحه..
اذا ممكن عندي استفسار...؟؟؟
انا كنت ناي اسافر لتركيا هالصيف لكن بعد الى قريته عن فانكوفر غيرت مشوار رحلتي جذرياً..
نويت باذن الله اني بسافر لكندا ..وبتكون رحلتي على فانكوفر ومنتريال وتورنتو...؟؟؟
والمده بتكون اسبوعين تتوقعون كافيه..؟؟
البعض قالوا لي لاتروح لمونتريال ماتستاهل مقارنة بفانكوفر...؟؟؟؟؟
وش برايكم المده الى تستاهلها كل منطقه...؟؟؟
وسمعت ان الموتيلات هناك راقييه واسعارها حلووه ...؟؟
في احد مجرب لي موتيلات حلووه يعطيني اسمئها..؟؟
خصوصا اني بروح بعايله وخايف اجازف بهذي..؟؟
وانا ناوي استاجر سياره وين احصل مكاتب التأجير..؟؟
هل أستأجر من المطار او من مكاتب خارج المطار؟؟
لاتحرموني من نصايحكم...
اخوكم ..مازن


التعليقات (9)
Esperanza
Esperanza
اخي : mazenff
اسئلتك هي نفس اسئلة الاخ NaHar ، مدري هو انت نفسة ولا واحد ثاني ، وفي كال الاحوال حياك الله في العرب المسافرون.
فانكوفير تغنيك بجماله و طبيعتها و ناسها عن جميع المدن الكندية.
اسبوعين الحقيقة ما تكفي فانكوفير ولكن على الاقل تقدر تشوف جزء منها.
الموتيلات حلوه ، لو تحدد للي السعر اليومي اللي في بالك ممكن افيدك.
انت ممكن تستاجر سيارة من المطار بس بتكون اغلي بشوي من المدينة.
لو تركز للي اسئلتك شوي ممكن افيدك اكثر.
و اذا عندك زود استفسارات انا في الخدمة.

mazenff
mazenff
يعطيك العافيه Esperanza... ماقصرت ..
قريت موضوع NaHar وانا شخص ثاني ..وتسلم لان الموضوع فادني ..
اما بالنسبه لاسئلتي اللى انتظر ردك عليها باحر من الجمر..
1/ انا مسافر للسياحه ومعي زوجتي..وباجلس اسبوعين هناك..اذا كنت تعرف اسماء موتيلات مناسبه للعوائل ممكن تفيدني فيها ؟؟ لاني محتاج لها مع اسعارها..وكيف خدماتها؟؟..انا حاسب حسابي اني بجلس اسبوعين بحساب ان الاوتيل بيكلفني بالليله الوحده 80$ لكن اذا لقيت موتيل اقل سعر وخدمه مناسبه للعوائل كأمن .. ممكن ازيد مدة جلوسي هناك..اتمنى يكون سعر الموتيل بحدود 40$ ويكون آمن بالنسبه للعوائل إذا ممكن...؟؟؟؟؟؟؟
2/ كيف وضع الحجاب هناك ؟؟ هل بالامكان زوجتي انها تلبس نفس عبايتها اللى بالسعوديه ((يعني سوداء مع غطاء الوجه؟؟)) او لون غير الاسود مع غطاء الوجه ؟؟
3/ كمصروف يومي للفردين كم يكون..بصفتي سائح..؟؟(( المطاعم الفخمه..الفاست فود))
4/ واكثر سياره يكون سعرها معقول..؟؟وتكاليف البنزين

Esperanza
Esperanza
  1. فنادق فانكوفير http://www.travel.bc.ca/accommodations/index.php


اخي : mazenff
الله يحييك.
وتراك شوقتني لفانكوفير و بدت سعابيلي تقاطر ، لكن فانكوفير كانت في الماضي ولا اعتقد اني بقدر اروح الها مره ثانية الا اذا اقتنعت المدام.
الرابط هذا استخدمة للبحث عن فنادق المدينة اللي ترغب تسكن فيها. الفتره هذي في فانكوفير هي قمة السياحة ، عشان كذا اغلب الفنادق بتكون اغلى من العاده:

فنادق فانكوفير http://www.travel.bc.ca/accommodations/index.php

حاول طبعاً تبعد عن منطقة الداون تاون عندما تختار الفندق لانها غالية و مزعجة.
انا عن تجربة بنصحك بفندقين الاول بنضام الموتيل ( غرف خارجية تطل على الشارع مباشره) حلوه ، نضيفة و المنطقة امنة ، البيست ويسترن (Best Western Inn ) وهو موجود في برنبي على شارع كنقز واي . ان كانك قريت موضوع ( اشتقت لك يا فانكوفير ) منتزه دير ليك و منتزه برنبي بالقرب من الفندق هذا ، و عند الفندق مجموعة من المطاعم الحلوه .
و هذا رابط الفندق:
فندق البيست ويسترن http://book.bestwestern.com/bestwestern/productInfo.do?propertyCode=62024
و فية فندق الكوالتي ان (Quality Inn ) وهو بنضام الهوتيل (غرف داخلية) ، الحقيقة ما قدرت احصل لة رابط على النت ولا اذكر عنوانة ، لكنة في فانكوفير على شارع كنقز واي جمب سيفوي.
وهذا رابط لدليل التجاره في كندا ، وممكن عن طريقة تبحث عن اي شي تحتاج لة.
http://yp.superpages.ca/sform.phtml?STYPE=S&SRC=411
اما بالنسبة للحجاب و العباية ، فتعفيني من الرد ، او اعطاك نصيحتي الشخصية.
مطاعم الفاست فود رخيصة ، يعني وجبة وحده لثنين في حدود 10 الي 15 دولار.
المطاعم الزينة ، الوجبة لثنين في حدود 30 دولار.
المطاعم الفخمة ، وجبة لثنين غالية و خلك منها , لان كل مطاعمهم زينة.
الرابط هذا فية مشاركة كتبتها ان شاء الله بتعطيك زود معلومات عن المطاعم و اشيا اخرا:
موضوع عن فانكوفير https://artravelers.com
مصروفك اليومي اتوقع بيكون في حدود 150 دولار اذا كنت من النوع اللي ما يصرف.
اذا بغيت تستاجر سياره اطلب من محل التاجير يعطيك سيارة اقتصادية (Economical car) ، بتكلفك في اليوم حدود 50 دولار ، و اذا اخذتها بالاسبوع بتكون ارخص.
ولازم تمر على موضوع (اشتقت لك يا فانكوفير) و تقراء النصايح العامة المتعلقة بستاجار و قيادة السياره في فانكوفير ، اعتقد انها كانت في الجزء الرابع او الخامس.
انت حاول تستاجر الغرفة ، زي ما انت قلت لمدة على الاقل يومين ، و اذا ما قدرت راح بدون حجز و ان شاء الله تيسر.
و قبل ما تروح ارسل للي على الخاص عشان اعطيك رقم جوالي ، عشان اذا انزنقت ولا احتجت شي ممكن افزع معك.
اتمني لك رحلة سعيده.
و تراك احسنت الاختيار يوم اخترت فانكوفير.

عماش
عماش
هلا اخوي nazenff
والله انا لي وجهه نظر مختلفه مع احترامي الشديد للاستاذ اسبرانزا .
ياخي صحيح فانكوفير جميله لكن يوجد بعض الاشياء لابد تحطها في بالك .
اولها واهمها هل اخذت بالحسبان مشقه السفر؟؟؟ هل تتحمل العائله رحله لمده يوم كامل او اكثر؟؟
ياخي ساروي لك حادثه حصلت امامي عند قدومي الى فانكوفير :
عند قدومي من السعوديه الى فانكوفير عن طريق لندن لاحظت طفله تبكي من اقلاعنا من لندن حتى وصولنا لفانكوفير تقريبا 10 ساعات مابين بكاء ونوم بسيط المهم بعد وصولنا الى فانكوفير سألت الاخ طبعا سعودي عسى ماشر لاتكون الطفله مريضه قال لا بس من التعب مو بس هي حتى حنا متنا من التعب وقال والله لو ادري ان الرحله تعب الى هالدرجه والله ماجيبهم معي ياخي انا عندي دوره لمده سنه عن طريق العمل وقلت اخذهم معي والله اني شايل هم العوده!!!!
فياخي العزيز اذا انك حاسب حساب الرحله وتعبها هذا شي ثاني فتوكل على الله .
انا معك لوانك عزوبي صحيح تستحق التعب اما عائله فما اتوقع ..... تصدق رحلتي 22 ساعه احسب اني دخلت كتاب جنس للارقام القياسيه وبعد ماقابلت الشباب اللي يقول 28 ساعه واللي يقول 30 ساعه .. وهانت علي ...
رايي عين خير وابلع العافيه وخلك حولك حواليك
والسلام

mazenff
mazenff
مشكور يا Esperanza ..ماقصرت والله..
بالنسبه للموتيل اللي ذكرته سعره اغلى من الفنادق!!..لقيت فنادق سعرها بحدود 75$(امريكي)؟؟
وبكذا بتكون ارخص من الموتيل..
وش المناطق برايك اللى تكون امنه وافضل اني اسكن فيها؟؟ كنق وي .. وغيرها؟؟؟
اكون قريب او بعيد من المطار الافضل؟؟
وبخطوط السفر الداخليه وش الافضل؟؟..tango...westjet
سمعت ان عندهم اسواق تبيع اجهزه الكترونيه بسعر معقول مقارنة بعندنا..؟؟وين احصل هالاسواق؟؟
وبكون شاكر ومقدر لك على خدماتك..
ان شاء الله الفيزا تتسهل وتطلع هالاسبوع واذا ربي سهلها ان شاء الله رايح..
وبرسلك على الخاص بعد ماتطلع الفيزا اذا ماكان عندك اي مانع..
ويعطيك ألف عافيه يالغالي...
الاخ عماش..
ماقصرت يالغالي على هالنصيحه لكن رحلتي انا ان شاء الله مافي معاي صغار بس انا وزوجتي..وان شاء الله تتسهل..
وخط رحلتي بيكون على لندن وبجلس بالمطار حوالي 4 ساعات بعدها على فانكوفر..

Esperanza
Esperanza
  1. المعذره على التاخير في الرد.

  2. المطار في ريشموند ، ابعد عن المطار ، المنطقة ممكن تكون غالية.

  3. الحقيقة ما عمري ركبت خطوط داخلية ، انا كنت احب السفر بالسيارة.


اخي : mazenff

المعذره على التاخير في الرد.

غريبة البيست ويسترن غالية ، انا كنت اسكن فية بحدود 75 دولار كندي ، مدري اذا كان السعر تغير عقبي.
طبعاً فية ارخص منه على نفس شارع كنقز واي و في نفس المنطقة ، ولكن الموتيلات هذي تكون اقل جوده ، يعني عندك الموتيل اللي انا سكنت فية في ثاني روحة لفانكوفير (نسيت اسمة) بس ممكن ترجع لموضوع فانكوفير و تلقا الاسم ، كان سعره الشهري حدود 20 دولار في اليوم ، يمكن الحين يكون بحدود 40 دولار كندي.
عندك كل الفنادق اللي على شارع كنقزوي تعتبر امنة .

المطار في ريشموند ، ابعد عن المطار ، المنطقة ممكن تكون غالية.

الحقيقة ما عمري ركبت خطوط داخلية ، انا كنت احب السفر بالسيارة.

الاجهزه الالكترونية عندهم اسعارها مقاربة لاسعار السعودية ، عندك الفيوشر شوب (Future shop) له فروع عديده على مستوا فانكوفير و اجهزت حلوه ، و عندك ايضاَ الريديو شاك (Radio shack) لهم فروع كثيره ، بالاضافة اللي كل المجمعات التجارية تحصل فيها محل الكترونيات.
السوق اللي بتلقا فية كل شي ، و هو اكبر سوق في فانكوفير موجود في مدينة برنبي على امتداد شارع الكنقز واي ، اسمة ميترو تاون (Metro town)..
الخريطة هذي توضح لك فندق البيست ويسترن و الكواليتي ان و مجمع ميترو تاون و مدينة برنبي و ريشموند.
و اذا عندك زود اسئلة لا يردك الا لسانك.

NaHaR
NaHaR
^
^
مشكور يابطل
أنا رحلتي بعد بكرا إن شاء الله
ونشوفك على خير أخوي مازن
ويالله التساهيل يارب

mazenff
mazenff
السلام عليكم جميعاً،،،
وشكرا على كل المعلومات القيمة، بصراحة انا ماكملت 4 ساعات واصل من كندا زرت فيها
Vancouver and Toronto
بصراحة استفدت كثيرا من معلومات الأخ Esperanza مع ان عندي بعض الملاحظات عنها!
إذا أردتم بعض الملاحظات عن تجربتي المتواضعة عنها، أنا في الخدمة عن اي سؤال ممكن أفيدكم فيه.

CNN 007
CNN 007
السلام عليكم
اتوقع لو وضع كل مسافر تجربته الشخصية التي ستحوي على معلومات ونصائح مفيدة اكثر من اي دليل سفر فسوف تكون مواضيع المنتدى مرجع جيد للمسافرين
الاخ mazenff/
اتمنى ان تضع رحلتك بالتفصيل الممل
لاني بصراحة ناوي على رحلة مماثلة وحتى لو رحت قبل كندا فسكني كان مع عائلة مو في موتيلات او فنادق


خصم يصل إلى 25%