- و تمرون علي قصر الملك فاروق الي كان فيه قبل لا ينخلع أيام الثوره
السلام عليكم
أي أحد ممكن يزور أي بلد و يحبها و يتمني يزورها مرة ثانية الا مصر , هذا البلد الوحيد الي ما تقدر تحبها و ما تحب تزورها مرة ثانيه
هل البلد تعشقها و تحس أنك عشت طول عمرك بلا وطن و لما تزور مصر تعرف أنك أخيرا وصلت وطنك و ما تبي تفارقها , الزيارة ما تكفي حق مصر , الصح أنك تعيش فيها للأبد
حلاوتها في الليل نفس حلاوتها بالنهار , الشعب الطيب الي ما تفارقه البسمه و يحب الضحك و يكره الزعل.
مشكله السياح أنهم يمرون علي القشره ما يشوفون مصر الأصل , الأحتكاك بالشعب المصري و تروح معاهم تشاركهم أفراحهم و سمراتهم علي القهاوي و ضحكهم , هذا الي يخليك تموت علي مصر.
أنا أقولك أشلون تعيش مصر
أول شي تقعد الصبح و تروح تشتري فول و طعميه من مطعم طعمه و تضحك أشوي مع الي يجيبلك الطلب , طبعا الصبح مافي مكان واحد في القاهره ما تسمع فيه القرأن طبعا هذا يحسسك اب راحه عجيبه
تاخذ الطلب و ترجع الشقه الي مأجرها أو تمليك زي حلاتي و تقعد تاكل و تشرب شاي و تسمع الباعه من البلكون روبابيكيا
بعدها تطلع و تروح تتمشي في القاهره لي العصر , فيرست مول , مول هيلتون رمسيس , جنينة مول , سيتي ستار , تشوف فيلم في سينما شيراتون القاهره
تطلع و تروح تتغدي في كبابجي في شارع عباس العقاد أو أكل بحري في شارع جامعه الدول أو تمر علي الشباب في أبل بيز ( أعرفهم كلهم من أيام الدراسه ) و المدير أسمه سامح , محترم جدا و كل يشتغل جرسون قبل لا يصير مدير و كنا نطلع معاهم ناكل رز بالخلطه في أمبابه الساعه 3 الصبح
بعدها تروح تشرب شاي الضحي في فيرست مول بالكافيه الي تحت و تشوف الجرسون مصطفي أصلع و يقولك انا مش أصلع بس انا مريح شعري اليومين دول
تطلع علي المغرب و تتمشي في شارع جامعه الدول و تمر علي المكتبه مدبولي الصغير و تشوف أخر كتب نزلت
بعدها تروح تتمشي علي كوبري قصر النيل و تسمع صوت أم كلثوم من مكان قريب : يا ما ليالي و انا و خيالي أفضل أصبر روحي بكلمه يوم قلتهالي و أبات أفكر بالجرالك و الي جرالي و أقول ما شافش الحيره بعنيه و انا بسلم و لا شافش الشوق بعنيه راح يتكلم و أرجع أسامحك تاني
و بعدها الله يسلمكم تاخذ تاكسي و تقوله القهاوي الي علي طريق أسكندريه الصحراوي و تقعد هناك مع ربعك أو أهلك تتسامرون و بعدها ترجعون و تروحون الحسين طبعا لي الصبح و تشترون من طعمه فول و طعميه
طبعا تقدر تغير كل يوم , مثلا تمر علي أسطبل محمد زغلول و تلقي رافع علمين مصر و الكويت , بعد ما تركب خيل تقدر تقعد عنده و تشرب شاي من ناصر الي ما عنده غير الشاي بس تقدر تقول جيب كابشينو و راح يجيبلك شاي كوشري و يقولك ده الكابشينو بتاعنا
و تقدر تمر علي الاهرامات و أبو الهول و تشوف العرض اليومي الي بيعملوه كل يوم
و تقدر تروح قهوه و مطعم راقي في المهندسين أسمه : بلاتوه , و تقعد علي السطح و الأكل عندهم عجيب.
بعدها بكم يوم تنزلون أسكندريه , أنا أفضل تأجرون سياره لانه أحسن , تمرون تصبون بنزين من أخر محطه قبل البوابه القاهره و تشربون شاي و تتوكلون علي الله , و بعدها بساعتين علي الراحه توصلون أحلي بلد في مصر : الأسكندرية
تمرون علي المنتزه , القهاوي علي البحر , تاكلون كبده أسكندراني من شارع 45 , تشترون أغراض من شارع جمال عبد الناصر , تمرون علي محطه الرمل ( في سينما هناك عمرها فوق 50 سنه بس مجدده )
و تمرون علي قصر الملك فاروق الي كان فيه قبل لا ينخلع أيام الثوره
هم و تمرون علي المعموره طبعا و أذا حبيتوا تقعدون في أسكندريه كم يوم أنصح بالسكن هناك , و تمرون علي جرين بلازا , و قبل لا تمشون من أسكندريه تمرون علي سيتي سنتر كارفور الي علي الطريق الصحراوي و تقعدون بالقهاوي الي هناك..و لو كانت زيارتكم بالشتا بتكون أحلا..
هذي مصر الي أعرفها و لو كان في تفاصيل ممكن نسيتها أو ما ذكرتها فا هذي خاصه فيني و ما أعتقد غيري راح يستمتع فيها مثلي
و قبل لا ترجع بلدك تتمني أنك ما يمر وقت طويل ما ترجع لهذا البلد الوطن
أخي الفاضل / بوخويلد
أحلى وصف ، وأغلى وصف لمصر
المختصر المفيد .. يعني
البلد الوطن
هي بلادنا .. ووطننا الكبير
مهما كانت جنسيتنا ..
مهما اختلفنا معها .. أو اختلفنا عنها
تظل هي .. البلد الوطن
شكراً لذكرياتك .. لكن في المرة القادمة
جرب الفول والطعمية من التابعي الدمياطي
أو من عند "الجحش" بالسيدة زينب ..!!
تحياتي ومحبتي للجميع