Navigator
26-03-2022 - 04:31 pm
السلام عليكم ……
في شهر جولاي الماضي 2003 …. رحت مع اثنين من الزملاء في رحلة عمل للشركة الى انجلترا….في مدينة شيفيلد.
بداية ما شلت هم الفيزا لان الشركة تكفلت بكل شئ ….واسطة طلعت الفيزا في يومين …عادة 14 يوم…احسن ياقوي…وحجزنا على الخطوط البريطانية…لان السعودية توصل لندن بس…واحنا نبي شيفيلد.
ضفيت هدومي وشريت بدل (اول مرة البس بدلة عادة جنز ويالله الستيرة بس لزوم العمل) ….رحنا لمطار الملك خالد …ولقيت الشباب..شوي الا انا في الطيارة …والله يالبريطانية عندها درجه اولى…شئ…الله يكثر الفلوس.
جلست انا وواحد من الشباب جمب بعض …ويلف علي ويقول (اذا جابوا العشاء قومني…انا مواصل ما بعد نمت)…..والله سلمكم الله وانا اتفل في وجهة….انا لين سافرت احب اشوف كل شئ ما انوم …وهذا جاي ينوم …قلت ارقد رقدة اهل الكهف وان جاء الغداء ما نيب مقومك.
الرحلة كانت في الليل..طرنا وتعشينا ثم على طول طفوا اللمبات..قضيتها افلام…لين وصلنا ….
والله يا مطار هيثرو زحمه وعالم وكبر ….نبي نخلص ورانا طيارة ثانية لمانشستر….بعد التختيم والركض من بعد المسافة…خلصنا ووصلنا للبوابة بعد حمد الله وشكره….وركبناها ..صغيرة واختفوا العرب…كلهم يبون لندن..المهميوم وصلنا وخذينا الشناط.. واستاجرنا فان يودينا لشيفيلد…حوالي 90 كيلو عن مانشستر….والله يالطريق جنة يالله الجنة لي ولوالدي والمسلمين قولو امين (امين)…شاطرين.
سلمكم الله …موقع اروع من كذا ما اعتقد فيه …من امام الفندق (مطل الغرفة حقتي) تشوف جزء كبير من شيفيلد ..والجامعة قبال الفنق على طول ..ومحطة القطارات اربع دقائق مشي…وخلف الفندق …اكبر بيت زجاجي في العالم ..فية نباتات واماكن للقراءة…والساحة العامة في شيفيلد ومبنى البلدية وشوارع مخصصة للمشاة…واماكن شرب القهوة ومطاعم على طول هالشوارع …..صراحة حبيت الديرة من اول يوم.
رحت للاستقبال وعطيتهم عنوان العمل قلت وينه بعيد ولا قريب …قالت لي الي في الاستقبال سبع دقائق مشي توصل …وخذيت الوصف ..وخذيت خريطة وسالتها عن اهم الاماكن الي يروح لها الواحد…نتمشى.
قعدنا اسبوعين …ممتعة جدا في شيفيلد …فيه سوق نروح له بالعربات (التروماي) قالوا لنا انه اكبر سوق في اوروبا …صراحة قعدت اضحك عليهم ما صدقت …بس يوم رحت له …والله ياهو كبير ما فيه ماركه ما فيه سوبر ماركت كبير الا فيه.ومطاعم وسينما ومواقف على مد النظر ….ضخم بمعنى الكلمة.
الريف الانجليزي وما ادراك ما الريف الانجليزي ….كنت اسمع عنه ….بس يوم شفته ما فيه كلام يوصفة سبحان الخالق فيه جمال غريب…وترتيب الاراضي والشوارع تخترق هالمزارع ةالاشجار الخضراء…..جنة.