مقدمه
ترددت في كتابة تقرير عن رحلتي للندن ، خفت انه ماعندي الكثير من الاماكن اليديده اللي اضيفها
ولكن من تشجيع حبايبي قلت بنزله وان شاءالله يفيدكم لو بالقليل ...
مناسبة هاي السفره
سفرتي هاي كان لها سببين :
الأول ...
هي مهمة انا توليتها لما وعدت عيال أخويه اني أوديهم في الاجازه عند أمهم وابوهم في لندن
( دعواتكم لزوجة أخويي بالشفاء )
والسبب الثاني ..
اني من سنتين واعده بناتي انه بسفرهم لندن سياحه
ولأنه العيال بيكون عندهم اجازه في شهر 3 فقررت انه سفرتنا بتكون طول مدة اجازتهم
وهي اسبوعين وحجزت التذاكر من شهر 1 ، ولكن
توفي الوالد في شهر 3 الله يرحمه ويغفرله يارب
وكنت بكنسل السفره ولكن عيال أخويي كسروا خاطري وخصوصا محد بيوديهم واحترت شو أسوي
وصادف انه بوعيسى سافر عني في مهمة عمل وانا في أصعب الأوقات
ضاقت الدنيا عليه
اللي حواليي كلهم ييشجعوني أسافر
وقررت أسافر
والحمدالله اني سافرت
لأنه نفسيتي كانت وايد تعبانه والسفره هاي ساعدتني اني أطلع من الاكتئاب والحزن اللي فيني ...
والصراحه كانت من أجمل السفرات
خلوني أخبركم تفاصيلها ...
تاريخ رحلتنا
من 29 / 3 الى 12 / 4
الطيران
حجزت ع طيران الامارات
حصلت التذكره ب 2800 ع السياحيه في شهر 1 وعقبها بأسبوع أرتفعت التذاكر وصارت 4200
( حركات بعد طيران الامارات )
والمشكله الوحيده اللي صادفتني اني ماحصلت ترفيع ع البزنس ولا حتى شراء تذكره
لا في السيره ولا في الرده
وطول الوقت وانا أحاتي لأني متعوده اسافر ع البزنس وهالشي ضايقني
وكان عندي أمل أحصل وانا في المطار
لأنه عندي البطاقه الفضيه من سكاي وورد فأقدر أترفع من المطار ولكن
ماحصلت والبزنس فل
استخلفت الله وقلت خلاص هذا نصيبي ، وكانت طيارتنا 380 الايرباص
والحمدالله انه هاي الطياره كراسي السياحيه فيها مريحه وابدا ماتضايقت...
اما في الرده فهاي لها قصه بخبركم عنها في نهاية التقرير
الفيزا
عيال أخويي مسويتلهم فيزا من سفرتهم الأولى فماكان عندنا مشكله
وانا وعيالي ماكنا نحتاج فيزا
(( مبروك مقدما لأهل الأمارات من السنه اليايه دخولكم لندن بدون فيزا ان شاءالله ))
http://www.emaratalyoum.com/local-section/other/2013-04-30-1.570528
بالنسبه للسكن
كانت هاي أصعب مهمه
لأنه كنا نحتاج شقه تكون قريبه من سكن أخويه يعني نبا في الأجوررود
في البدايه كنت ناويه بسكن في فندق ثيستل أنا وبناتي كوكي وتوتو الله يحفظهم
وعيال أخويي بيسكنون ويا أهلهم
ولكن انضمت معانا في الرحله بنت عمي فوفو
وشفنا لازم ناخذ شقه لأنها أوفر وبعد عشان اذا بغينا نطبخ
وبدأت عمليه البحث
وهنيه أشكر أخويي موادع والقطري اللي ماقصروا ويايي جزاهم الله خير
عقب بخبركم تفاصيل بحثي عن السكن والمقالب اللي صارتلي والشقه اللي حصلناها
الجو
في الفتره اللي سافرنا فيها كان الجو وايد بارد وحتى هم مستغربين انه السنه طول الشتاء عندهم
وطبعا كنا ماخذين ثياب غليظه وهاي ماتاخذ وزن ولكن تاخذ مكان
وانتوا تعرفون كيف نحن نحتاج المكان ورانا سوق لندن مب أي سوق
استعدادات السفر
لأنه بنسكن في شقه في الأجوررود فكان أهم شي ناخذ معانا ...
1- مخدات يديده ( طبعا انا هنيه أقصد حقي وحق بناتي وبنت عمي )
وشراشف ولحافات ولبس الكفرات والمخدات وفوط كبيره وصغيره
وكلهم هاذيل خذيتهم مستعمل وقديم عندي عشان اتركهم هناك وما أرجعهم
ماعدا المخدات فخذيتهم من كارفور وهم مضغوطات ومشفوط عنهم الهواء مجرد نقص البلاستيك بالمقص وينتفخون ...
2- خذيت عزكم الله نعله للحمام ومن غير نعله حق الشقه ( سليبرات )
3- خذيت 2 قوز ما أعرف شو تسمونه المهم اللي نستعمله حق الغسول في الحمام
ولكن ما استعملناهم لأنه حصلنا هناك 2 الظاهر حد من الخليجين تركهم ، وكان فيه شطاف وماكان لهم لازمه
4- خذيت بعض الأكل حق الطبخ
عيش + علب تونه + علب جبن كرافت + كاسات جبن كرافت وبوك + بهارات + حليب رينبو وشاي وزعتر وزنجبيل مطحون
الصراحه ماكثرت لأني عارفه انه كل شي هناك متوفر
ولأني عارفه انه مابنطبخ وايد أكثر شي بيكون اعتمادنا ع المطاعم
5- غير شنطنا الكبار انا خذيت معاي 3 هاندباك وهاذيل بنحتاجهم حق مشترياتنا وحق السوق
لأنه لما نسير السوق لازم ناخذ هاندباك عشان نحط مشترياتنا فيها وندزها ماعنثرنا ع الشل ...
بنت عمي من غير شنطتها يابت هاندباكتين ..
ع فكره أضطريت أشتري من غير شنطه وهاندباك
دي لندن ياجماعه
تقريبا هاي اهم الاشياء اللي حسيت انه لازم أخبركم عنها والباقي عادي ...
تابعوني ...
في تفاصيل اليوم الأول في رحلتي اللندنيه 2013
واللي ماتابعني في يتفضل ع هذا الرابط ...
https://artravelers.com/p/re/506034