- الإخوة الأعزاء أعضاء منتديات العرب المسافرون جميعاً بدون استثناء
- السلام عليكم ورحمة الله وبركاته،،،
الإخوة الأعزاء أعضاء منتديات العرب المسافرون جميعاً بدون استثناء
السلام عليكم ورحمة الله وبركاته،،،
معاكم اخوكم أبو لانا يمني مقيم في المملكة العربية السعودية الحبيبة فديتها وفديت اهلها وعضو مشارك في بوابة السفر الى اليمن, وحبيت أنقل لكم تجربتي مع التأشيرة الأمريكية في القنصلية الأمريكية بمدينة الظهران .
في البداية تدرون ان الصيف قرب وان معظم الناس قامو يخططون للسفر وكل واحد قام يتميلح عند مديره علشان يقدم على الاجازة وأخوكم في الله قام يحوس بالمنتدى ومالكم في الطويلة الا وطحت على بوابة امريكا وماشاء الله هيضوني الله يحفظهم الاعضاء والتقارير اللي ترد الروح وأخص بالذكر الأخ IMPACT والأخ أبو سعود اللي ابدع بموضوعه صراحة فقلت يابو لانا لازم تقدم على الفيزا وبعد استشارة زوجتي ام لانا فديتها وفديت اهلها ماقصرت صراحة لقيتها متحمسة وقدام على الاجراءات وحبيت اشارككم تجربتي المنتاازة ويالله اوريكم التفاصيل :
يوم التقديم : 16/4/2013
نوع الفيزا : B1,B2 سياحية
مكان التقديم : القنصلية الأمريكية بالظهران
حالة الطلب : تمت الموافقة و تم اصدار الفيزا خلال يوم واحد فقط ماشاء الله ولله الحمد والشكر وتم استلام الجوازات والصورة تبين أكثر.
ما اخفيكم ياجماعة الخير اني صراحة خفت ان التأشيرة تطول مثل ما اشوف في مشاركات الاعضاء خصوصاً واني يمني لكن الحمد لله تيسرتالأمور وتشققت من الفرحة وبعلمكم كيف بإذن الله تاخذون التأشيرة في أسرع وقت ممكن علماً بأني أول مرة أسافر فيها لأمريكا :
أولاً : لا تحجز التذاكر والفنادق وخصوصاً اللي عليها عرووض وماتكون مستردة المبلغ الا بعد ماتطلع الفيزا.
ثانياُ : التخطيط للمقابلة وتجهيز نفسك ولازم تكون واثق من نفسك وإجابتك 100 % مو مثل أم لانا الله يحفظها قامت تتنافض وحنا تونا عند بوابة الدخول >>>>>> تراني ماتصفقت أبد المهم قلت ياولد لازم تجهز لك ملف مرتب وحلو واجهز ملف وورد سميته USA VISA DRAFT يعني مسودة الفيزا الأمريكية ولعيونكم تلقونه بالمرفقات هدية مني لكم حبايبي عبوه كامل قبل ماتقدمون على الفيزا, وبعد ماتعبونه توكلو على الله وعبو الأبليكيشن بنفس المعلومات اللي بالملف.
ثالثاً : وهذا أهم شي, لا تحرصون على الإجابات يعني هل لديك أقارب في امريكا؟ اذا تعرف واحد بس من بعيد اكتب لا وأمورك بتزين مايدققون عليك لأنك لو جاوبت بنعم على طول بيطلبون عنوانه و و و و .... ترى معظم اجاباتي كانت لا أو Not Applicable يعني غير مطابق.
رابعاً : دفع الرسوم للفيزا السياحية ومقدارها 608 ريال للجواز الواحد عن طريق بنك سامبا فقط مع اخذ الايصال.
خامساً : أنصح بأنكم تسددون رسوم حجز الموعد من بطاقة فيزا خاصة فيكم علشان ماتواجهكم اي مشاكل وأنا طلعت لي فيزا تسوق الراجحي (مسبقة الدفع) منتازة جداً جداً .
سادساً : الأسئلة الأمنية في الابليكيشن لو جاوبت اي واحد فيهم (نعم) افلقني ان دخلت أمريكا .
سابعاً : جاوب بصدق و على قد السؤال ولا تتفلسف لأنها بتسألك من نفس الأبليكيشن اللي انت عبيته وياويلك لو جاوبت اي جواب غلط لأنهم على طول بيحولونك على الإجراءات الإدارية.
ثامناً : جيب معاك للمقابلة (ورقة تاكيد الأبليكيشن, ورقة تأكيد الموعد, صور شخصية 5 × 5 , جوازاتكم القديمة, تعريف من العمل موضحاً فيه الراتب وتاريخ المباشرة والوظيفة وانك لازلت على رأس العمل مختوم وموقع فقط مايحتاج تصديق, كشف حساب 3 شهور تقدر تطبعه من النت عن طريق الخدمات الالكترونية, دراهم تقريباً 1000 ريال احتياط لأي مفاجأة).
والمقابلة الشخصية كانت كالتالي:الموظفة بالأزرق-أنا بالأحمر
ليش مسافرين امريكا؟
سياحة
اول مرة تسافرون امريكا؟
نعم
قد سافرتو أمريكا من قبل؟
لا
سافرت افغانستان أو العراق أو إيران؟
لا
لك أقارب في امريكا؟
لا
وين تشتغل؟
في شركة .........
وش وظيفتك؟
مسؤول نظام ...... - ملاحظة/ احنا اليمنيين مكتوب في جوازاتنا المهن فلازم تطابق مهنتك في الجواز مع مهنتك في الشركة.
من كفيلك؟
شركة ..........
ممكن الاقامة للتأكد؟
تفضلي - ملاحظة/ امريكا مايهمها الا جواز سفرك ولا تهتم بالاقامة الا فقط للتأكد من انك مقيم في المملكة بشكل نظامي فقط لاغير.
وش نشاط شركتكم؟
تجارة و اقتصاد
وين بتروح في امريكا؟
نيويورك, اورلاندو, لاس فيغاس, ميامي
كم بتقعد في امريكا؟
5يوم.
عملت حجوزات تذاكر او فنادق؟
نعم عملت حجز فندق مؤقت لكني لا استطيع تأكيده لأني لم أحصل على الفيزا وسأقوم بتأكيدة حال حصولي على الفيزا.
وين سافرت آخر خمس سنوات؟
اليمن, الإمارات, البحرين - ملاحظة/ لا تخافون قولو الصدق حتى لو رحتو ايران او العراق ترى الامور سهالات مره.
متى آخر مره سافرت اليمن؟
السنة الماضية
كل كم تسافر بلدك اليمن؟
كل سنة
عندك اطفال؟
عندي بنتين الله يحفظهم
اطفالك بيسافرون معاك؟
لا
وين بتترك اطفالك؟
ملاحظة قبل الإجابة/ ترى هذا السؤال مصيدة لازم تجاوب عليه وتقول عند امي وعند ام زوجتي. مو تقول عند ابوي والا عند اقاربي والا عند الجيران ثم يشوتونك مع الباب .
كم راتبك؟
(جاوبهم بالملي حتى الكسور قولها).
ممكن كشف حساب؟
تفضلي - طبعاً الموظفة طالعت في الكشف شوي بس ورجعته لي - ملاحظة/ مو لازم تحط مبلغ كبير يعني بس مبلغ يغطي تكاليف رحلتك.
بعدين قالت لي : طلبك للفيزا مقبول وبناءً على الإتفاقيات الدولية بين أمريكا واليمن فإنه يجب عليك دفع مبلغ من المال رسوم للفيزا لك ولزوجتك وذلك عند كاونتر الكاشير رقم (4).
المبلغ كان 60 دولار للإثنين 228 ريال - الواحد 30 دولار 114 ريال. أنا بصراحة ماكنت ادري ان فيه رسوم على اليمنيين غير 608 ريال الي في بنك سامبا (معلومة جديدة).
وبعد الدفع قالو لي : اذهب الى كاونتر فيديكس لدفع الرسوم 65 ريال ارسالية واحدة وستستلم جوازك في خلال اسبوع مع تاشيرة لمدة 5 سنوات متعددة, لكن في الحقيقة عطوني تأشيرة متعددة السفرات لمدة سنة واحدة فقط (خير وبركه ولله الحمد كافية بإذن الله).
سامحوني لو طولت عليكم لكن حبيت أفيدكم وأساعدكم باللي أقدر عليه وأشارككم تجربتي.
والسفر بإذن الله قريب وأبشروا بالتقرير اللي يبيض الوجه يالنشامى .
أخوكم : أبو لانا .
هلا أبو لانا منور البوابة
ألف مبروك حصولك على الفيزا
و شكراً عالملف المرفق
بس ترى هذي البداية
و ننتظر تقريرك بالبوابة هنا
اتمنى لكم رحلة موفقة