1. السلام عليكم ورحمه الله وبركاته


2. أولاً / التخطيط :


3. 3- البنزين هناك سعرة مرتفع جدا ، تقريبا حوالي 11 ريال


4. ثانياً / الوصول لتركيا :


5. خامساً / يوم العودة لاسطنبول :


6. الخلاصة /

السلام عليكم ورحمه الله وبركاته

أحبتي اخواني واخواتي اعضاء منتدى العرب المسافرون ، اليوم ومن باب رد الجميل لكم ولمنتدانا العريق حبيت أحكيلكم وبالتفصيل تجربتي (السيئة للأسف) ليس لغرض تشوية سمعة البلد ولا لاخافتكم ولكن لاخذ الحيطة والتعلم من الدرس القاسي. وسأسرد لكم تفاصيل رحلتي على شكل نقاط .

أولاً / التخطيط :

تبدأ الحكاية من سفري لاسطنبول بتاريخ 3 ابريل وكانت اول زيارة لي للدولة العثمانية ، كان سفري بغرض العمل وحضور معرض خاص بعملي من 4 ابريل وحتى 6 ابريل، فاستغليت السفر واخذت زوجتي معايا وحجزنا سفرنا على الخطوط التركية من 3 إلى 8 ابريل وحصلت سعر اعتبرة ممتاز جداً حيث وجدت سعر الفرد ذهاب وعودة ب 1545 ريال فقط ، وبالمناسبة لمن يسأل عن الخطوط التركية فهي تعتبر في رأي جيدة او عادية بل اعتقد ان مصر للطيران افضل منها ، فطيارة العودة من اسطنبول الى جدة كانت عبارة عن باص نقل جماعي وليست طائرة غير انه تم تأخير موعد الرحلة لمدة ساعة دون إخطاري ولكن علمت بالصدفة عندما دخلت على برنامج الخطوط التركية عالايفون.
نصيحة : قبل السفر سواء ذهاب او عودة اتصل بشركة الطيران المسافر عليها للتتاكد من موعد الرحلة تحسباً لاي تغيير ، وان كنت تملك جوال حديث مثل الايفون ممكن تنزل عليه برنامج الشركة مثل الخطوط التركية او السعودية او مصر للطيران ، وتقريباً كل الفنادق بها انترنت مجاني ولن يستغرق الامر منك اكثر من 5 دقائق للتأكد من ان الامور تسير على ما يرام.
نرجع تاني للتخطيط السفر ، بما اني سافرت من قبل لماليزيا واستأجرت سيارة وكانت ممتعة جدا بالنسبة لي وتجربة ممتازة فقررت في سفرتي هنا ان اعيد التجربة ولكن حدث مالم اتوقعة وسوف اسرد لكم التفاصيل لاحقاً.
إستأجرت السيارة من موقع economycarrentals.com لمدة ثلاثة ايام بحوالي 90 دولار ونوع السيارة صغيرة واتوماتيك وموفرة للوقود وقد رشح لي الموقع شركة Circular Car Hire .
وللمعلومات بأنه تم الحجز ببطاقة البنك الأهلي الائتمانية مسبقة الدفع وتم سؤالي عن رخصة القيادة فأظهرت الرخصة السعودية وتم قبولها.
نصيحة : لا انصح بإستأجار سيارة في تركيا لعدة اسباب :
1- لايوجد لوحات ارشادية باللغة الإنجليزية
2- نطقهم للحروف ليس مثلنا ولن تجد أحد يتحدث الانجليزية حتى الشرطة وبالتالي لن يفهمو العنوان الذي تود الوصول له.
3- إستخدمت جهاز جي بي اس توم توم وكاد يورطني لانه تقريبا غير محدث

3- البنزين هناك سعرة مرتفع جدا ، تقريبا حوالي 11 ريال

ثانياً / الوصول لتركيا :

الصراحة اعجبت كثيرا بتلك البلد رغم اني لاحظت مدى التشابة الكبير بينها وبين بلدي الحبيب مصر ولكن بالطبع وبكل صراحة أكيد أنها الافضل جمالياً وتطوراً وعمرانياً ولكن من ذهب إلى مصر منذ عدة سنوات سيلاحظ ان بها بعض التشابة الكبير.
ولكن ملاحظاتي السريعة عنها :
1- وجدت في اهل اسطنبول نظرة غريبة للعرب وتحسها كلها حقد وماتدري ليش.
2- ما تلاحظ احد يبتسم في وجهك غير الاجانب السياح مثلك.
3-مظاهر التعري واضحة في البلد وذلك المنظر لن يسر العائلات المحافظة بالتأكيد
4-إنتشار عارضي المتعة الحرام وخصوصا في شارع الاستقالال ليلاً وطبعا اهل المنتدى كفو ووفوا من التحذير من هؤلاء الاشخاص.
المهم بأنني اتممت عملي على خير وانتهى المعرض يوم 6 ابريل ، وبما ان تاريخ العودة إلى بلدي الثاني السعودية بتاريخ 8 ابريل ، فبالتالي كان لابد من استغلال الفرصة والذهاب لبورصة ليوم واحد وقررت الذهاب يوم 6 والعودة يوم 7 ابريل.
فذهبت يوم 5 ابريل ليلاً لاستلام السيارة من مطار اتاتورك الساعة 11 ونص ليلاً ، وبالفعل جاء الرجل في الميعاد المتفق عليه بالدقيقة ولم يتأخر وتمت إجراءات استلام السيارة في نصف ساعة تقريباً ، كانت عبارة عن سيارة رينو جديدة وبحالة جيدة
أخذت السيارة وظبط الجي بي اس الي استأجرته من الشركة على مكان الفندق ، وفجأة لقيت نفسي داخل في شوارع ضلمة ومتاهات وزوجتي كانت معي في قمة الرعب ، المشكلة اني نسيت انا من فين مشيت وفين دخلت ولقيت الطريق مرعب وشكله مشبوة وكل سيارة راكنة على جنب والجي بي اس مضيعنا ، المهم ركنت السيارة وجلست افكر ايش اسوي وبعد عشر دقايق حصلت سيارة شرطة قلت الحمدله
وقفت الشرطي واحاول الكلمة والمشكلة مايفهم عليا ولما حصلني شكلي عربي طلب مني اوراقي وجواز السفر والحمدلله بانه كان معي ، وطلب ايضا جواز سفر زوجتي واعطيته هو وتأكد ان كل شيء سليم ، واعطيته كارت الفندق عشان يوصفلي فين امشي وماعرف الادمي
فضلت ماشي وراة لين وصلت لشارع منور وفيه حركة ووقفت تاكسي وعطيتة العنوان وقلتله امشي وانا همشي وراك لين الفندق وبالفعل وصلت الحمدلله بعد توتر دام ساعة تقريباً .
وصلت الفندق ونمت الساعة 3 الفجر وكان المفروض انزل من الفندق الساعة 5:30 الفجر عشان الحق العبارة الساعة 7 ونص ، وبالفعل صحيت ووضبت لغراضي وذهبت لميناء ياني كابي وكالعادة بسبب الجي بي اس ضيعت الطريق ووقفت تاكسي ومشيت وراة لين ميناء ياني كابي.
كان منتظرني صديقي وزوجته هناك وركبنا العبارة ووصلنا بورصا الساعة 9 ونص تقريبا وطلعنا على فندق كراون بلازا وهو بالمناسبة فندق روحة وفخم بكل ما تعنية الكلمة من معنى وان شاء الله سفرتي الجاية راح احجز فيه.
ثالثاً / الوصول لبورصا :
وصلت الفندق الساعة 10 صباحا ولكن الريسيبشن قالي انه الغرفة تستلمها الساعة 12 الظهر فاتفقنا نطلع جبل الولداغ وبعدين نرجع تاني عالفندق.
طبعا جلسنا ساعة نسأل انا وصديقي كيف نطلع الجبل وما احد يعرف ، وكل واحد يقولنا طريق غير التاني حتى اللوح الارشادية متناقضة. ولكن في الاخير وصلنا الحمدلله
بصراحة الطريق روحة ومناظر ترد الروح ولكنه مرعب شوية ولازم تمشي على مهلك لانه كله ملفات وذكرني بطريق الهدا مع اختلاف المناظر الطبيعية والخضرة طبعا .
طلعنا عند الشجرة وكانت جلسة ولا اروع وطلبنا شاهي واكلنا التوت والفراولة وكانت من اجمل ما اكلت في حياتي وبعدها طلعنا قمة الجبل وكان كله ثلوج وابيض وكان اول مرة في حياتي اشوف الثلج الابيض حسيت اني في سويسرا واجرنا الزلاجات وركبنا التلفريك وكان حقا من اجمل ايام حياتي بل واروعها على الطلاق حتى ذلك الوقت ، كان وقتها الساعة 2 ونص الظهر وقلنا نروح نتغدى مشويات عند مطعم ابو شنب الشهير عالجبل وبالفعل ذهبنا واخذنا اللحوم والدجاج انا وصديقي عشان نشويها علفحم وجلست زوجتي وزوجته يسولفون مع بعض. وجات زوجتي تصورني بالجوال وتصور الاكل لان بطارية الكاميرا كانت خلصت شحن تقريبا.
رابعاً / الكارثة :
بعد خمس دقائق تقريبا جتني زوجتي مصدومة ومنفعلة وتقولي انسرقنا
عشان تشوفو احساسنا وتتخيلوة ، الشنطة كان بها حوالي عشرة الاف دولار ومفتاح السيارة الي مستأجرينها وجوال زوجتي وكاميرا والايباد وحوالي 500 ريال
طبعا نزل الخبر عليا كالصاعقة وسبنا اللحم والدجاج عالفحم ينحرقو وجلسنا ندور في المكان ومافي لا حس ولا خبر ، وكان فيه ناس عرب موجودين بيتكلمو تركي ففهمو الموضوع وفهمو العاملين في المطعم ايش الي صار
وجات الي في المطعم وقالت ان فيه كاميرا مراقبة كانت فوق الطاول تبعنا وشغلنا الفيديو وبالفعل ظهر ان فيه بنت ملامحها عربية وكان معاها اتنين معاونين لها اخذت شنطة زوجتي وجوال زوجة صديقي وشردت وللاسف الكاميرات خارج المطعم لا تعمل.
طلبنا الاتصال بالشرطة ولكن تقريبا هذه المنطقة لا يوجد بها شرطة فبعتولنا اشخاص في زي عسكري ومسلحين برشاشات مثل الجيش ويطلق عليهم اسم JANDARMA وانقلب ساعتها المطعم رأسا على عقب والصراحة كل الناس صارت تدور معانا عرب واتراك وكل الجنسيات. وبعدها جت اخبارية ان فيه بنت مشتبهين فيها وروحنا شفنها طلعت ماهي اشيائنا طبعا انا راسي تلفلف وزوجتي تبكي ومادري ويش اسوي
المشكلة الاساسية ماهي في الجوال ولا اليباد ولا حتى الفلوس ، ولكن في مفتاح السيارة الي مستأجرها من اسطنبول وكان رقم تليفونهم في شنطة زوجتي وبعدين اخاف اسيب السيارة لان الي سرق الشنطة معاة المفتاح ممكن يجي في اي وقت ياخد السيارة ويشرد وماندري عنه .
ومن حسن حظي الحمدلله انه ربنا الكريم رتبلنا الامور بحيث انه حصل موقف خلاني اشيل جوازات سفرنا وتأشيرات الخروج والعودة من شنطة زوجتي وخليتها في شنطة صديقي وسيبناها في السيارة.
المهم حصلنا رقم شركة الايجار موجود فوق رقم السيارة وبسرعة اتصلت عليهم مديرة المطعم وكلمتهم وفهمتهم ماذا تم بالتفصيل ، والصراحة الناس تفهمو الوضع وارسلو شخص من اسطنبول بسيارة اخرى ومفتاح احتياطي لسيارتي وكان هذا الشخص تقريبا الوحيد الي قابلتة الي بيتكلم انجليزي بطلاقة وعرفت السبب لان زوجتة اجنبية.
كان تقريبا الساعة 3 ونص او 4 العصر ، واتصل عليا الرجال وقالي لا تقلق انا جايك في الطريق .
احب افيدكم بأني وجدت اهل بورصة مختلفين تماما عن اهل اسطنبول في بساطتهم وتعاملهم معنا كعرب وبكرم ضيافتهم ، لدرجة انهم لم يأخذو منا ليرة واحدة مقابل الطعام الي انحرق وراح علينا بل على العكس جابولنا اكل ثاني على حسابهم وواحد منهم جاب سيارة خاصة من شركة سياحية ليوصل بها زوجتي الى الفندق لترتاح ولم يأخذ ليرة واحدة وصاحب المطعم ابو شنب ، كان جوالي خلص رصيد راح شحنلي ب30 ليرة ورفض يأخذ قيمتها
بصراحة أرفع قبعتي وانحني لهؤلاء الناس على احترامهم ورقيهم في التعامل معنا رغم بساطتهم.
نرجع لموضوعنا ، طبعا زوجتي راحت الفندق ولان الجوازات في السيارة وحجز الفندق انسرق مع الشنطة فخليت الشرطة تكلم الفندق والحمدلله تفهمو الوضع وشافو الحجز باسمي مسجل لديهم فاعطو زوجتي الغرفة وجلست انا وصديقي ننتظر السائق من الساعة 4 العصر لين الساعة 11 في الليل وكان الجو بارد وخلال هذا الوقت جلس عمال المطعم يجيبولنا قهوة وشاي ومية واكل.
وطبعا جا الرجال وقالي لولا اني عرفت ان زوجتك معاك وعرفت وضعكم ماكنت جيت وعطاني مفتاح السيارة واشتغلت الحمدلله وطبعا شكرتة وطلب مني 1050 ليرة يعني حوالي 2200 ريال تقريبا قيمة المشوار وقيمة عمل مفتاح بدل فاقد . والصراحة انا كنت في وقت ما احتمل فيه النقاش واعطيته المبلغ وذهبت للفندق.
وجدت زوجتي في حالة صدمة من الموقف وحاولت أهدء من روعها وخوفها وقلت خلاص الله يعوض علينا في الفلوس وكل شيء اهم شيء اننا بخير وان جوازتنا ربنا نجاها الحمدلله وعدى اليوم ونمنا.

خامساً / يوم العودة لاسطنبول :

تاني يوم صحينا الظهر وكان المفروض بنطلع على يولوا لان كنا حاجزين العودة لاسطنبول من هناك ، وبعدين اتفقت انا وصاحب نروح كلنا نفطر في مجمع كبير اسمة على ما اعتقد KoruPark مشهور هناك مثل الريد سي مول بجدة كدة ، واحنا في المول لقيت اتصال من شخص بيتكلم تركي ومايعرف انجليزي فجلست ادور لين حصلت واحد بيتكلم انجليزي الى حد ما واعطيته الجوال وكلمه ، قالي انتو انسرق عليكم شنطة قولتله مظبوط قالي في عامل نظافة حصل الشنطة ولكن الشنطة فاضية ومافيها غير مفتاح سيارة فقط والمفتاح حاليا مع الشرطة عند الجبل.
الي حصل اني كنت شاري خط جديد من تورك سيل وسيت البطاقة حقته الي فيها البن كود في شنطة زوجتي ، الي سرقت الشنطة ربطت مفتاح السيارة في كارت الجوال وعشان كدة عامل النظافة عرف رقمي واتصل عليا وسلم المفتاح للشرطة.
روحت خليت زوجتي في المول التجاري هي وزوجة صديقي وطلعا انا وهو ثاني لقمة الجبل عند الشرطة العسكرية وجلسوا يسلمونا من واحد للتاني ومن مكتب للتاني لين وصلنا للقائد تبعهم وسلمنا المفتاح المسروق الحمدلله
واخذنا المفتاح وعلى طول رجعنا لبورصا والمجمع التجاري واخذنا زوجتي وزوجة صديقي وطلعنا بسرعة على مديانا عشان نلحق عبارة بورصة حقت الساعة 8 ونص وساعتها كلمت شركة الايجار وقولتله الي حصل بالتفصيل واني حصلت مفتاح السيارة واني الصراحة تعبت ومالي خلق اسوق السيارة وكان المفروض اسلمها لهم تاني يوم وهو يوم العودة لجدة ولكن ابغى اسلمها لهم في اسطنبول اول ما اوصل فقالي تم
وبالفعل وصلت ياني كابي وحصلت الرجال الي جابلي المفتاح منتظرني واستلم مني السيارة ورجعلي 200 يورو (حوالي 1000 ريال) وجالي الباقي ماهيرجعلك لانه عبارة عن خدمات ورسوم وسوالي فيلم بانه لازم يغيرو سيستم السيارة لانه ممكن الي سرق المفتاح عمل نسخة عليه وبصراحة ماتكلمت كثير معاة ووصلني الفندق واعطيته خمسين ليرة ليه هو شخصيا ووصلت الفندق ونمت لين الصباح وتاني يوم لفلفت في السلطان احمد لين معاد الطيارة ورجعنا جدة بالسلامة الحمدلله.

الخلاصة /

انا عارف اني ادوشتكم ودخلتكم في تفاصيل ولكن ربي يعلم بأنه الغرض منها اخذ الحيطة والتعلم من الدرس القاسي والتجربة المريرة الي مريت بيها لانه مثل هذه الامور كفيلة بان تقلب جو الرحلة كله إلى تعاسة ونكد نحن في غنى عنه فيجب الحذر من متعلقاتكم الشخصية في الاماكن العامة والمطاعم والمحلات التجارية ويجب وضع جوازات السفر ومتعلقاتكم الشخصية امام اعينكم او في مكان امين.
وشكراً لكم مرة أخرى