1. ليش اليابان ؟!..


2. أنا ما رحت لأوروبا ولا أمريكا ولا أحس بحماس كثير لهم..


3. درجة رجال الأعمال نفرين ب23 ألف (وش الي نفرين طالب بخاري أنت ؟!)


4. هل اليابان غالية ؟!..

حي الله الجميع و حي الله كلن باسمه..

رحت اليابان قبل فترة و حبيت أسوي لكم هالتقرير المختصر.. و اعذروني بكتبه بالعامي لن البساط أحمدي..
احترت كيف أرتب التقرير،، هل أسويه زي النظام العالمي بشكل جدول يومي أو معلومات عامة.. استخرت و قررت أخليه معلومات مرتبة بدون جدول زمني على طريقة سؤال و جواب بالصور مع الكلام عن أبرز الأشياء الي شفناها هناك.. ثم أحط باقي الصور و تعليقات..

ليش اليابان ؟!..

شرق آسيا عموماً، اليابان، كوريا، الفلبين، هونج كونج، بالنسبة لي أعتبره عالم جديد غير مطروق.. يمكن نستثني كوريا من تالي بسبب مسلسلاتها.. واليابان مسلسلاتها الي نتابعها إنمي و خيالية ما تعطيك أي فكرة عن البلد وأهلها..
يعني ممكن تسأل واحد ما معه جواز ولا تعدى الرياض أبد عن نيويورك و بيعلمك تفاصيل شوارعها و مطاعمها من كثر ما شاف من مسلسلات و أفلام و يعرف نمط حياتهم و أشياء كثيرة.. طبعاً الزيارة و السياحة على أرض الواقع غير لكن أحب أكتشف شي جديد تماماً علي ما عندي عنه ولا معلومة ولا أعرف عنه شي.. شي حلو إنك ما تحط آمال كبيرة من أشياء تعرفها ثم ممكن ما تعجبك لأن توقعاتك كانت عالية بزيادة..

أنا ما رحت لأوروبا ولا أمريكا ولا أحس بحماس كثير لهم..

اليابان أمنية قديمة.. من يومي بزر و أنا نفسي أروح (الله يذكر سنشيرو بالخير).. و أنا متأكد إن هالشعور جاكم كلكم.. وصدق الشقيري لما قال عنها كوكب اليابان.. و إن شاء الله في هالتقرير أقدر أوريكم قدر الإمكان شعوري و إحساسي.. حسيت إني رومانسي على الكلمتين الأخيرة..
موعد الرحلة:
2 سبتمبر 2012
مدتها:
5ليلة
المدن:
طوكيو (8 ليالي) – أوساكا (7 ليالي)
الخطوط:
الكاثي بيسفيك

مدة الرحلة:
الرياض – هونج كونج = 8 ساعات
ترانزيت هونج كونج و تغيير الطيارة = ساعة و ثلث
هونج كونج – طوكيو (مطار ناريتا) = تقريباً 5 ساعات
يعني الروحة كلها على بعضها تقريباً 16 ساعة كحد أقصى.
ليش الكاثي باسيفيك؟
أولاً أسعارها طبعاً..

درجة رجال الأعمال نفرين ب23 ألف (وش الي نفرين طالب بخاري أنت ؟!)

و أسعار السياحية النصف.. الرحلة طويلة ولازم تتمدد فيها، ماله داعي توصل و أنت محرول و ينزلونك من الطيارة يدفونك على كرسي..
ثانياً أنها الخطوط الوحيدة الي رحلاتها مرنة لليابان لأن لها رحلات يومية مباشرة من هونج كونج لطوكيو و لأوساكا و لناغويا ، و الخطوط هذي برضه لها رحلات شبه يومية من الرياض لهونج كونج مباشرة بدون توقف.. كل الخطوط الثانية تغث و الرحلة بتاخذ منك أقل شي 23 ساعة،، و الخطوط السعودية أصلاً إذا دخلت موقعهم وكتبت Tok ما يطلع الإكمال التلقائي ما يروحون لها..
إجراءات الهجرة و الفيزة:
موقع السفارة اليابانية بالسعودية:
كود PHP:
http://www.ksa.emb-japan.go.jp/sa/services.htm
مريت السفارة اليابانية في الرياض واستقبلني الأمبراطور بنفسه بس قلت له يا خالي ارتاح المسألة بسيطة (لحدد يدقق)..
وهذي خريطة لموقعهم في حي السفارات //

وقت دوامهم: من الساعة 8:30ص – 12 الظهر
رسوم الفيزة: 140 ريال لكل شخص و هي تتغير كل بداية شهر إبريل.. ممكن تزيد عشرة ريال و ممكن تقل.
متطلبات الفيزة: تعريف بالراتب من العمل (سواء حكومي أو خاص) و للطبقة المخملية الي مهوب موظفين كشف حساب حق ثلاث شهور + تسديد الرسوم + تعبية نموذج الطلب (في المرفقات مع الشرح)
تقدمه اليوم وتستلمه بعد أربع أيام عمل بالكثير..
مدة الفيزة: ثلاث شهور - دخول مرة واحدة لمدة شهر كحد أقصى
و هذي صور للفيزة كيف تعبونها /

• - - - - -

إجراءات الهجرة: أمسك سرا مع العالم وين ما يروحون خلك وراهم ، أول ما توصل يصورونك و يبصمونك و يلصقون ورقة في جوازك على الفيزة، أنتبه تتفلسف و تشقها لأنها ضرورية عند المغادرة ياخذونها مرة ثانية..

هل اليابان غالية ؟!..

ياخي حدد وش قصدك بغالية.. كنت أسمع أن الكوفي بميتين و التفاحة بسبعة آلاف و التكسي ما تركب معه إلا بضمان مالي و كفيل غارم و الفنادق ما تسكنك إلا بسندات بورصة ذهب ما تعترف بالفلوس من غليها الخ.. طلع كله كلام فاضي و غير صحيح..
الكولا بخمسة ريال و أنا أعتبر سعر قوطي الكولا هو المعيار العالمي للأسعار بلا نفط بلا دولار بلا هم.. طبعاً تاخذ كولا من مطعم خمس نجوم أو فندق غير لما تاخذه من بقالة أو تاخذه من مكينات البيع الي في الشوارع..
العيشة في اليابان بالنسبة للسعودي غالية جداً لأن العقار عندنا لعب عيال مقارنة بلي عندهم.. منطقة غينزا (بتكلم عنها بعدين في التقرير بالصور) مثلاً المتر فيها سعره أكثر من 400 ألف ريال.. و الأحياء السكنية غالية جداً.. تلقى شقة صغيرة بغرفتين و حمام و مطبخ و صالة صغيرة أجارها السنوي فوق ال35 ألف ريال في منطقة سكنية عادية بعيدة عن وسط البلد..
الفاكهة غالية عندهم.. و المأكولات بشكل عام غالية.. السيارات و الأدوات الكهربائية رخيصة طبعاً.. الملابس أسعارها وسط إلى غالية لأن مواصفات الجودة عندهم عالية جداً سواء الصنع المحلي أو المستورد.. لكن حنا ما نتكلم عن العيشة هناك.. أسعار الصرف للسياحة تختلف عن العيشة.. فبالنسبة لشخص أو حتى عائلة يبي يروحون تمشية و سياحة عشر أيام لأسبوعين ما راح يصرفون كثير لو حسبوها مضبوط..
لما أسأل شخص راح لأوروبا ألاحظ أن الأسعار الي يتكلم عنها غالية أكثر من اليابان كسائح.. لكن العيشة هناك أرخص لما نسوي مقارنة..
كيف المواصلات هناك ؟!..
التكاسي غالية و فتحة الباب في طوكيو ب40 ريال و في أوساكا ب37 ريال
الباصات ما جربناها إلا في القروب السياحي
كانت كل تنقلاتنا عن طريق الصبواي المترو
و طريقته سهلة فوق ما تتصورون..
تلاحق الألوان و الأرقام
أنت مثلاً تبي شيبويا.. لها ثلاث خطوط بأرقام و ألوان
G01 برتقالي
F16 بني
Z01 بنفسجي
خلاص تمسك أي خط منهم هالألوان و تنتقل من الأرقام لين توصل
أفادني تطبيق على الآيفون كثير اسمه
Tokyo Metro Subway by mxData Ltdhttps://itunes.apple.com/us/app/tokyo-metro-subway/id470842144?mt=8
الله يخلي الصبواي.. يفك أزمة.. سهل و رخيص و يوصلك لأي مكان..
أول مرة في حياتي أركب صبواي و مع ذلك ما ضعنا إلا مرة وحدة لني قريت رقم المحطة غلط..
و في بقية التقرير بشرح الصبواي و المترو زود و بالصور
يتبع