1. السلام عليكم ورحمة الله وبركاته


2. وكالعاده ننتظر الكل ينزل عقب احنا ننزل

السلام عليكم ورحمة الله وبركاته

فرنسا بالنسبة لي احد اجمل الدول الي زرتها والي لها مكانه خاصه في قلبي ... احب التنوع السياحي والثقافي فيها ... كل جزء فيها له ميزه وطعم ونكهه خاصه ... بختصر لكم تقريري هالمره .. وراح يكون سريع بالذات في الاماكن الي سبق وكتبت عنها ولكن التركيز راح يكون في منطقة كتبت عنها باختصار في زيارة لمدة نص يوم في اول تقرير لي لجنوب فرنسا ..
ندخل في صلب التقرير ...
ونبدأ كل رحلة بوصولنا لارض المطار ...

وكالعاده ننتظر الكل ينزل عقب احنا ننزل

واتجهنا للفندق .. بصراحه كنت ابحث عن فندق في مكان استراتيجي يكون وسط شارع المشاه ماسينا بالاصح يكون يطل على الشارع الي تمر فيه السيارات والي يفصل شارع المشاه و يكون قريب من البحر و مع البحث لقيت فندقين عجبوني ولكني لقيت حجز في هالفندق وكان سعره جيد جدا بس مااتذكر كم للاسف واسم الفندق hotel De Flore
وصلنا للفندق وهاي الغرفه

وهاي الحمام

الفندق تقيمي له 7 من 10
الغرف صغيره
حمام غرفتنا ريحته خايسه
هاي العيوب
اما المميزات
الموقع + الموقع + الموقع
بعد مادخلنا للفندق طلعنا نتمشى في نيس وكل الاماكن الجميله نوصلها مشي ..

طبعا نيس تعتبر منطقه مطله على البحر يعني الشمس الجميله والنسمه الرقيقه في كل مكان انصحكم بلبس الملابس الفاتحه الخفيفه

كنا جوعانين اقترحنا نروح ناكل في مطعم هندي اعرفه من زمان كنت اكل فيه

دخلنا المطعم وكلنا فيه

ماحبيت الاكل وشغفي بالاكل الهندي في فرنسا انعدم .. بصراحه من عقب ما كلت اكل هندي وتشبعت منه في الهند صرت بصراحه اكره الاكل الهندي ومااتقبله .

عقب الاكل رجعنا الفندق و هاي باب الفندق وعلى اليمين بقاله واليسار مطعم سوشي و جدامنا مخبز يبيع كرواسون حلو و بقالات و مطاعم وكفايه وجود شارع المشاه

رحنا شوي وطلعنا مره ثانيه عالمغرب نتمشى ونسهر في نيس .. وللعلم نيس مدينة تسهر في الصيف يعني الناس موجودين في الشارع لين بعد الساعة 1 بالليل

و طبعا المشي على الكورنيش احد اجمل الفعاليات واكثرها متعه في نيس .. في النهار تشوفون الناس بملابس البحر وملابس الصيف الخفيفه و بعد العصر تشوفون البنات بملابس السهره والكعوب العاليه والشباب متأنقين اناقه صيفيه خفيفه يمشون على الكورنيش

عقب مشينا صوب سوق الزهور الي بالليل يتحول الى ساحة للمطاعم

بعدها دخلنا القريه القديمة .. ولها طعم ثاني بالليل هادئه وكلشي مغلق والممرات ضيقه بإضائات خافته تختلف تماما عن النهار

بياع توابل

واحنا ماشيين شفنا فرقة اسبانيه فيها مغنين و موسيقيين وراقصه اسبانيه

وبعدها مشينا باتجاه ساحة ماسينا (( مكان مخصص للمشاه ))

والاستعراضيين في كل مكان يستعرضون طلبا للرزق

حسينا بالجوع وقمنا نمشي بين المطاعم المزدحمة ندور لنا مطعم يشدنا

واخيرا لقينا مطعم يدش مزاجنا وكان الاكل لذيذ والكميه كبيره تكفي لشخصين

وهاي اجواء المطعم وفيه قعده خارجه بصراحه مانحب نقعد في القعدات الخارجيه نخاف يمر فقير ويشوف لقمتنا ويجي يطر ولا يمر جنبنا جلب يعفس مزاجنا

ولين اهني انتهى اول يوم في نيس ...