بسم الله الرحمن الرحيم
قبل كل شي خلوني أشكر الله ربي اللي وفقنا لهالرحلة وسهل أمورنا ومن علينا من فضله ...
الحمد لله الخالق المبدع المصور ... الحمد لله مالك الملك ... مجري الفلك ... مسخر الرياح ... فالق الإصباح ...
ذي الجلال والإكرام ... والفضل والإنعام ... الذي بعد فلا يرى ... وقرب فشهد النجوى ... تبارك وتعالى ...
والصلاة والسلام على سيد الأنام ... وقاشع الظلام ... وباسط النور والسلام ... بإذن الملك العلام ...
محمد النبي الخاتم الهمام ... وآله الطيبين الكرام ... وصحبه المنتجبين الأخيار ...
والحين عاد :
سلام عليكم يالربع ... وش أخباركم وشلون عويلكم ومن يعز عليكم ...
ان شاء الله كلكم بخير وصحة وسلامة ...
ترى صار لي يومين ناوي أبدأ التقرير بس الصور ماهي راضية تتحمل على الألبوم هنا ...
واحنا الحين في جريندل فالد باقي لنا أربع أيام ونروح رست إن شاء الله ...
لكن ان شاء الله الأمور كل ما جالها تزين ...
خلونا في المفيد ومالكم بالطويلة ...
أنا من يوم كنت صغير وحلمي الأول كان "اليابان" ... ما تشوفوا اسمي "ساموراي" ... ما جبته من فراغ ...
إيه ... هين بس ... أقول (أوهايو جوزايماسو) وكمل سالفتك وعن الهياط ...
المهم ...
من منا ما يتذكر فارس الصغير ... ونادر شجاع ... وباسم النمر والسيد جلال ... والآنسة حنان ...
من منا ما يتذكر كبمارو وهايات ...
وجريندايزر وجنكر ... و و و و و ... الخ ...
اخلص ... وين بتودينا وياك ...
كنت حاجز طيران وسكن وخالص كل شغلي على اليابان بلاد التكنلوجيا والنظام ...
بس في نفس الأسبوع ... جاهم أمر الله وضربهم الزلزال وجتهم سالفة المفاعل النووي والتسرب الإشعاعي ...
قلت يا روح ما بعدك روح ... والنحشة نص المرجلة ...
فقام اخوكم ولف الدركسون على الحلم الثاني ...
حلم هايدي وبيتر ... وسوسن الزهرة الجميلة ... وساندي بل ...
جيت هنا على المنتدى طاير واشتغلت قرايه ليل ونهار في التقارير ... وأتعبت الأعضاء وياي ...
خصوصاً اختي الغالية "دموع الوجد" عسى الله لا يوريها دموع إلا في فرح وسرور ... قولوا آمين ...
وهنا أحب أشكر كل من ساعدني ومد لي ايده بمعلومه .. بفكره ... بتقرير ... أو حتى كلمة تشجيع ...
وهم ولله الحمد واجد ويصعب حصرهم ... وأخاف أنسى أحد ويتشره علي ...
شكراً للمنتدى كله وأعضاءه المميزين ... اللي لولا الله ثم مساعدتهم ما وصلنا ...
مشكورين بكل كلمات الشكر والعرفان بالجميل ...
جا دوري الحين أرد لكم جزء من جمايلكم علي ...
خلصنا الترتيبات والتخطيط على سويسرا - ألمانيا - النمسا ...
وتمت الحجوزات ولله الحمد من طيران وسيارة وسكن ل 26 يوم ...
الذهاب : الدمام - الدوحه - جنيف (5 - 6 - 2011)
العودة : ميونخ - الدوحه - الدمام (30 - 6 - 2011)
على الخطوط القطرية ...
عاد قالت لي وزارة الداخلية ... يا بعلي خلنا ناخذ عزبتنا كلها من البلد ونرتاح من همها في السفر ...
قمت أنا وقلت أبداً ... ومن يقول ... لا لا لا ... ما يصير ... السفر حلاته نعيش حياة أهل البلد اللي بنجيه ...
ناكل أكلهم ونجرب أسلوب حياتهم وناخذ من ثقافتهم ...
قالت : بكيفك ... أنا نصحتك وانت حر ... انت اللي بتدفع وبتاكل هوى ...
أقول لو انها كفختني بنص طابوقه على يافوخي يمكن عقلتني وطاوعتها ...
من جد الحياة هنا نار الله الموقده ... الأكل غالي ... استنزاف للميزانية بكل ما تحمل الكلمة من معنى ...
نصيحة لوجه الله لكل من هو ناوي يجي أوروبا ...
جيبوا عزبتكم كلها معكم إذا قادرين ... جيبوا كل شي حتى اللحم والبصل والطماط ...
لا تخلوا شي ... طيعوني يا جماعة ... (أنا لكم ناصح أمين) ... أقول كأنك طولت السالفه وهي قصيره ...
اخلص وعطنا الصافي ...
طيب عاد ... اخذوني بلطفكم وحنانكم ... يه ...
المهم ...
جهزنا أغراضنا الشخصية من ملابس وخلافه ...
احنا أربعه ولله الحمد وكل واحد فينا له شنطته الخاصه ...
أما باقي الأغراض فشوفوها:
حبيب القلب والشعب العربي المناضل
لوازمه
البهارات
الأدوية وتوابعها
مرهم الحروق
تراه نفعنا اليوم ... المدام تعرضت لحادث خفيف وحرقت يدها وهي تجهز الغدا ... الله يسلم ايديها ...
حقيبة الإسعافات الأولية
ديتول
اللابتوب
الكاميرات
واللي حاب يعرف ... الكاميرا الكبيره ... كانون ريبل تي 3 آي ...
وأخيراً وأهم حاجة أول وتالي المصحف والسجادة وكتاب الأدعية ...
رعايةً للذوق والاتيكيت ... خلونا نعرفكم على طاقم رحلتنا ...
الإخراج :
1- وزارة الداخلية (حرمنا المصون) والمعرفة لديكم ب "درة العمران" ...
طبعاً كان لها الفضل في التصوير المتحرك أثناء القيادة ...
يعني كل صورة تحسوا انها اخرطي ... ترى منها ...
اص ... لا تقولوا لها اني علمتكم ... ترى بعدين يصير وجهي
الإزعاج :
2- بناتي الكبرى والوسطى ...
أكبر غلطة سويتها في هالرحلة اني جبتهم معي ...
هواش ودندره وعوار راس طول الوقت ... الوقت الوحيد اللي نرتاح فيه إذا ناموا ...
بس أحياناً أحس انهم معطين الرحلة طعم من نوع ثاني ... سبايسي شوي ... تابعوني واحكموا ...
البطولة :
3- طبعاً أنا ... ولا انتوا يعني متوقعين واحد ثاني ... ها ... ما سمعت ... ايه ...
مساعد المخرج :
4- (أم فاضل) ... وهذا الكود السري اللي اخترعناه للإشارة لصوت السيدة المحترمة في الجارمن تبع الآيفون ...
يالله يا حبايب ...
اجلسوا في كراسيكم وشدوا الأحزمة استعداداً للسفر والانتقال من الواهي والموت والعج والطفش ...
للعشق والجمال والبرد والخيال والإبداع في أبهى صوره ... وسبحان الخلاق المبدع المصور ...
الوصول إلى جنيف
هذي كم صورة لنا من مطار الدمام :
واحنا رايحين للطيارة
فطورنا ... تفضلوا بالعافية ...
نزلنا مطار الدوحة بالسلامة ولله الحمد ... لقينا هاللوحة في وجيهنا ..
قلنا وينها غرفة الراحة ... الحق ما تلحق ... أشوى لقيناها هنا :
قامت بنتي الله يحفظها ونامت بهالشكل :
باقي على رحلتنا ساعتين ونص تقريباً ... وأنا ما عرفت أنام ... قلت أقوم آخذ لي لفه في المطار أشوف ...
شفت هالمنظر وحسيت ان مطاراتنا مواقف تكاسي بالنسبه لمطاراتهم وربي :
حركة ما توقف
مواعيد الرحلات بما فيها رحلتنا
لحظة الإقلاع
سماء الدوحة
الوجبة في الطيارة
صورة من داخل الطيارة
الفلم اللي تابعته في الطيارة ... اللي ما شافه نصيحه يشوفه ... تحشيش ... اسمه (رانجو)
بانت سعاد فقلبي اليوم ... كملوا البيت ماني حافظه ...
بالهداوة يا كابتن ترى قلبي بط بط بط بط بط ...
طلعنا من المطار وركبنا تاكسي متوجهين للسكن في تواريه الفرنسية ...
فاصل ونواصل :
والله اني ما دريت ان اسمها تواريه الا من السواق ...
طول الوقت أقول (ثويري) بضم الثاء وتسكين الواو ...
لا وأزيدكم من الشعر بيت ... ما دريت انها في فرنسا الا من السواق بعد ...
كل علمي اننا رايحين سويسرا وألمانيا والنمسا وبس ... فرنسا لاهي على البال ولا على الخاطر ...
يالله ... نقدر نضيفها في دفترنا الحين ونقول رحنا فرنسا ... حد يئدر يؤول لأ ...
المهم ... نرجع لمحور حديثنا ... (أحلى يا محور) ... بلا محور بلا ارتكاز ... خلصنا يا عم ...
طيب ... وقفنا في طابور شطوله من هنا الى هناك ... يعني قلت شي مع وجهك ...
المهم ... شوفوا الصورة ...
والله ان ما فيهم واحد ضرب بوري ولا قال شي ... نظام يمشي زي السلام عليكم ...
والكل مستانس وراضي وقانع ...
لو عندنا كان ضربنا الصمم مبطي من كثر الازعاج وال بيب بيب ... واللي يصارخ واللي يشتم ...
الله المستعان ...
المهم ... قولوا مشينا ودخلنا الأراضي الفرنسية بلا جمارك بلا هم وعوار راس ...
وماحد يقول لك فين رايح ولا من وين جاي ...
صورة من الطريق إلى تواريه أو مثل ما ينطقها الفرنسي (تواغيه) ...