السلام عليكم ورحمة الله وبركاته
قال تعالى {وَإِذْ تَأَذَّنَ رَبُّكُمْ لَئِنْ شَكَرْتُمْ لَأَزِيدَنَّكُمْ )
الحمد لله والشكر له وحده الذي من علينا بنعمه اللتي لا تحصى
كما وعدتكم اخواني واخواتي رواد منتدى العرب المسافرون يكون لي تقرير يحمل في طياته ولو جزء بسيط من الفائده,,,
اتمنى ان اقدم تقرير شي جديد او وجهة نظر يستفيد منها الاخرين
نبدا على طول
اقدم لكم اعضاء الرحله اولا ثم نبدأ في التفاصيل والتنقلات
1- من اليسار محدثكم اخوكم عبدالله (عاشق الرياض) مدير الرحله والمنسق العام للجدول واطول واحد فيهم
2- اللي في الوسط سعد الطباخ وفاكهة الرحله ومدير الميزانية وكل تفكيره في الرز ومدمن شاهي تلقيمه وهو صاحبي في سفرياتي لاندونيسيا ورحلتنا الاخيره مع بعض وهو صديق لي وابن عم ومشغلني الا يدخل باليوزر حقي واحيان يرد بنكي في المنتدى بس بلون كحلي ومفشلني دايم الاملاء عنده ميح
3- اللي يمين محمد..زيارته الاولى ولا له دخل لا في تنسيق ولا اي شي سوا انه مصور ومدمن قهوة تركيه وإذا ماشرب قهوه لا حد يكلمه
وقت الرحله 1/11/ 1431
المده 20 يوم
اول يوم جاكرتا
9 ايام في الجبل
6 ايام بالي
يومين جاكرتا
طبعا انا وسعد كانت زيارتنا الاخيره عام 2008 في نفس هذا الشهر لاننا لا نرغب في فترة الصيف لما فيها من زحمه وغلا في كل شي
كانت النية اننا في كل سنتين سفره لنا والاخره للعائله فكان تنسيقنا تقريبا قبل الرحله ب 6 شهر كلمني سعد وقال هاه وش وضعنا هالسنه
قلت والله من جد اشتقنا للعمه قال اجل نعتمد بعد رمضان ان شاء الله قلت توكل على الله
كلمنا محمد عشان يروح معنا ماعطانا اووكيه يقول يالله يلحقنا خير بعد 6 شهور فيه الف حلال
بدينا في التخطيط من شهر 6 تقريبا بس للاسف فشلت خطتنا
جمعنا بعض المعلومات زياده على خبرتنا السابقه
فانا كنت المسؤول الاول والخير عن التنسيق في الجدول والحجز...نظرت على جميع الخطوط وبديت في تجهيز الرحله تقريبا من شهر 8 هجري طبعا شايل الخطوط السعودية من بالي حتى لو مجانا ماروح عليها
قررت ان تكون خطوط الاتحاد هي الناقل الرسمي لنا وسبق وان جربتها في رحلتي لماليزيا وهي جدا ممتازة ودقيقه في مواعيدها وهذا المهم لدينا
قصيت التذاكر لشخصين انا وسعد محمد تعذر عنده ضروف وزواج اخوه وقال إذا زانت الامور قصيتها بعدين
وكان سعر التذكره 2490 ريال سعودي
وكانت الرحله بتاريخ 1/11/ 1431ه والعوده 20/ 11/ 1431ه
الموافق 9/10/2010م والعوده 28/10/2010م
كانت الايام تمر بصعوبه حتى حين حل شهر رمضان المبارك وجاني اتصال من الاخ محمد يفيد انه راح يخاوينا ويبيني احجز له
ماتصدقون كثر الفرحه اللي غمرتنا لاننا عارفين مدى تفاهمنا مع بعض وانسجامنا
حجزت له وقص التذكره واتصلت على الاتحاد والتأكد من الحجز وكلمت الموضف بخصوص المقاعد وطلبت منه تكون كلها في الصفوف الاولى وهذا ماتحقق لنا فالمقاعد كانت ضمن الصفوف الاربعه الاولى في كل تنقلاتنا
انتهى رمضان وكانت الايام تمر بصعوبه وننتظر وقت الانطلاق بشوق ولهفه
لحين تم وقت الانطلاق بدينا في ترتيب العفش والعزية وتقضينا بعض من الملابس الخفيفه
السبت 9/ 10/ 2010
كان موعد الرحله الساعه 4 العصر مريت سعد وانطلقنا للمطار ووصلنا الساعه 2 ونص وكان محمد قد تحرك وبعد وصولنا ب 10 دقايق قد وصل
لما جينا نقص البوردنق حملنا عفشنا وقام الموضف يهز راسه يقول الوزن زايد قلت ياصديق مشها بس قال ماقدر الوزن زايد 15 كيلو
يوم التفت على الاخ سعد حصلته متكي على الشناط الاخ في الله قلت من خف وزنك بعد متكي على الشنطه وخر انت ووجهك
قال يؤؤؤؤ ووخر يده تصدقون نزل الوزن تقريبا 9 كيلو انهبل الموضف قال اثاريه من هالدب ههه
هاتوا التذاكر عطيناه الجوازات معها وقص البوردنق وخذ ياتعليقات على الدب انا ومحمد وفاطسين ضحك قلنا من اولها ضحك واستهبال الله يستر بس
تم الاقلاع لمدينة ابوظبي بكل يسر وسهوله والوصول للمطار وكان وقت اقلاعنا تقريبا الساعه 2 ونص فجرا فكان وقت الانتظار 7 ساعات تقريبا
فاصل ونواصل معكم احداثنا المثيره في جاكرتا
تابعونا
وهذي صوره عربون صداقه لكم