yamani_2002
الف حمدلله على السلامه و ان شاء الله تكون رحلتك
حلوه مع انه الموضوع و الكلام يقول غير كذا الا
نحن في انتظارك
تحياتى لك
:
:
:
:

الحمدلله على السلامه متابعين

الحمدالله على السلامه
والله باين على الرحله انها معقده
الله ييسر امورك انشالله وماتاكل غيرها بالمرات الثانيه وهاذي كبوة جواد

اكيد ولدك الله يحفضه معطيك عين يبي يروح معاكم.....بالتوفيق والحمد لله على السلامه

الحمدلله على السلامة اخوي
متابعينك والله يستر من القادم

أخي الكريم yamani_2002 ..
الحمد لله على السلامة ورغم هذه البداية التي تحمل
انطباعات بأن الرحلة كان فيها الكثير من المنغصات لكن
تبقى تجربة ورحلة لا يكتمل فيها كل شيء وكل ما نريد
ولكن اجعل اللحظات الجميلة التي مررت بها حتى ولو
كانت قليلة هي عنوان كبير لرحلتك وأكيد اللحظات الجميلة
تولد وتتواجد في عمق المنغصات والكبوات والمشاكل
,,
أخي الكريم بانتظار بقية الحلقات بعد هذه المقدمة
والتفاصيل المميزة جداً وواصل على هذا الأسلوب
من التفاصيل الدقيقة حتى نستمتع ونستفيد
,,
سجلني متابع لكل الحلقات إما بملاحظة أو استفسار
أو تعليق أو بصمت عندما يعجز القلم

اخونا yamani_2002
اولا نحمد الله علي سلامه وصولك لموطنك
ومتابعين معك في كل ملاحظاتك ومنغصات رحلتك او متعتها
بعد تقريرك الملخص عن باندونق اعتقدت شخصيا انك واجهت رحله موفقه باذن الله
لكن يبدو انها لم تكن كذلك من خلال ما اراه في بدايه التقرير وعنوانه
وكما اسلف استاذنا ابو غاده لكل رحله منغصات قد لا تخلو منها
قد تفيدنا هذه التجارب منك في تجنبها من قبلنا او من قبل غيرنا من القراء باذن الله
سجلني متابع ايضا ومشارك باذن الله

اشكركم يا اخوان على الردود الطيبة
يوم السفر الموافق 4-10-2009
تم الإستعداد على اكمل وجه والخروج من مدينة الجبيل العصر بعد توديع الأهل
الجسر وما ادراك ما الجسر ومفاجآته لكن كنت له بالمرصاد حيث اني طلعت قبل موعد الرحلة ب 7 ساعات تحسبا لأي طارئ ( زحمة - السستم عطلان - الجمرك )
المهم زانت المور وما اخذ الجسر الى حوالي ساعة
طيب وين نروح وين نروح السيف ولا السيتي سنتر لين يجي موعد الرحلة
قررنا بعد مناقشة الذهاب الى السيتي سنتر لين يجي موعد الرحلة
طبعا المجمع هو احدث مجمع بالبحرين لكن يبقى السيف هو الأفضل من وجه نظري
صور ماخوذة من الإنترنت
المهم تغدينا وتمشينا لين تقريبا على الساعة 7:30
لين يجي موعد فتح الرحلة البحرين - قطر
وصلت المطار ووقفت السيارة طبعا في مواقف الخليج ( يا حبي للبلاش
)
وصلنا وامسك سرا عند الكاونتر
المهم اعطي التذاكر الإلكترونية للكاونتر ويطالع بالسعر
يسالني عمي اشلون خذيت التذاكر بذا السعر سعرك وايد حلو
قلت له ما خذها من النت وحاجز قبل يوميين ولو حجزت قبل شهر كان طلع علي الواحد ب 180 دينار
اها حلو بس كل اللي قصيت لهم اسعارهم على 270 دينار وطالع
قلت له النت ارخص من اي مكتب سياحي وعلى ضمانتي
المهم شوي وحط جوازي بالكيبورد وقالي تمام ويطبع البوردنق
يجي يمسك جواز المدام ويدخله بالكيبورد
مرة ومرتيين وثلاث ما نفع واسأله ايش صاير يا رجال
قال لا عادي بعض الجوازات السورية كذا ولازم ادخلها مانيول ( يدوي )
طيب الحمد لله
دخل البيانات الرجال وشوي يقلب الجواز
يقلب ويقلب ويقلب
يسالني عمي وين التاشيرة دخول اندونيسيا
عاد انا جايك ابو العريف اقوله باخذها من المطار اذا وصلت جاكرتا ب 25 دولار ( حتى السعر معطيه اياه ومسوي واثق من نفسي )
عاد الطامة جات
قالي عمي ما يصير لازم تاشيرة مسبقة
هاه كيف ما يصير
باخذها يا رجال من المطار ما يصير
قالي اسف عمي ما اقدر اسفرك لازم تاشيرة مسبقة
يا ولد غير بدل في مكتب بالمطار اقدر اخذها من هناك
قالي ما اقدر روح للمدير
يا فلان مشني الله يعافيك ما نبي روحة وجية
قالي نو وي ( ما في امل) ما بي انذار يجيني يكفني اللي جاني قبل اسبوعيين
المهم اخذ الجوازيين وعلى طول مكتب القطرية بالمطار عند المدير
يا فلان طول الله عمرك عندي مشكلة بالتاشيرة الرجال ما مشاني
طيب هات الجوازات وعلى وين رايح
قلت له جاكرتا
شاف جوازي قالي انت تاخذها من المطار لكن السوري لازم تاشيرة مسبقة ما اقدر اطلعك
شوف الكمبيوتر ايش يقول ( فيزا ريكوايرد )
اسف غير حجزك وروح طلع تاشيرة
في مكتب قنصلية بالبحرين روح له بكرة وطلع تاشيرة للمدام وتعال نسوي لك حجز جديد
يا اخي مايصير واخذ وعطا
الفنادق ورحلتي الداخلية كلها بتروح
قالي مو مشكلتي التاشيرة ومتعلقاتها تكون على المسافر مو علينا ليش ما كلمت السفارة وتاكدت
المهم الرحلة تنكسلت علي
النتائج ( ليلة في بالي راحت مع حجز الفندق - رحلة داخلية عبر اير اسيا كمان راحت )
حرق الأعصاب والروحة والجية من مكتب لمكتب بالمطار
سلمت امري لله وقلت خيرة
الساعة الحين 11 بالليل
يالله ايش اسوي
ارجع للسيارة و بدأ المارثون الصعب
وهو الحصول على شقة عائلية نظيفة بالبحرين واهل الشرقية عارفيين البحرين زين
شارع المعارض غاسل يدي منه
العادلية نفس الحركة
الجفير 90 % مايصلح واغلبها تاجير شهري
المهم خرجت نوته صغيرة مخبيها بالسيارة للأسماء بعض الشقق النظيفة بالجفير
شقق لؤلؤة الجفير وايضا شقق رامي سويت 4
رحت شقق لؤلؤة الجفير قالي 50 دينار الليلة ( 500 ريال ) بعد المكاسرة
غالي اخوي رخص شوي قال ما فيه
رحت لشقق رامي سويت 4 وعرفني الرسيبشن ( زبون عندهم ) وسوالي تخفيض من 50 دينار الى 35 دينار
شقق نظيفة وحلوة واهم شئ انهم ما يرحبون بالزائرات بتاتا
اخذت الشقة وهي عبارة عن غرفة وصالة
حطيت الأهل وانا دمي يغلي من القهر
قلت باروح للقنصلية الحين اعرف وين مكانها علشان بكرة الصباح من الساعة 7 انا محضر عند الباب
قعدت افتر وافتر واسال بالليل ( سعودي والساعة 1 بالليل يسال عن سفارة اندونيسيا ) هذا مهو صاحي وخذ تعليفات من الشعب ( ما الومهم والله لأن شبابانا بذا الوقت الطاسة عندهم فل )
وبدأت امتر البحرين ( واحد يقلي بالعادلية والثاني يقلي جنب السيف وبين الرتزكارلتون )
بعد فرارة لين تقريبا الساعة 3 الفجر حصلت السفارة وهي قريبة من السفارة الأمريكية وبجانب السفارة الفلبينية
وقفت السيارة عند السفارة وقلت خلني استخدم التقنية الموجودة اللي بالسيارة اللي طالما دفعنا مبالغ للحصول على الإكسسوارات دون استخدامها
المهم وانا عند السفارة اشغل النافقيشن حق السيارة واطلع الإحداثية علشان اخزنها وبكرة الصباح على طول على السفارة
المهم يعلق النافقيشن ومو راضي يشتغل ( يرحم ابوك مو ذا وقتك تكفى اشتغل )
اشغل السيارة واطفي واشغل واطفي
اروح الشنطة افك السي دي واخله مرة ثانية
واخوكم بالله ما خذ راحته على الآخر محسب نفسي بحارة بالجبيل مو بحي دبلوماسي
شوي يطلع اثنين من العسكر من السفارة الفلبينة واشفهم بالمراية ومسلحين بل مدججين بكل انواع الأسلحة
طنشتهم ومسوي نفسي ما ادري
وافتر وافتر بالمنطقة يمكن يلقط النافقيشن الإشارة
واروح وارجع مافي فايدة واطفي واشغل السيارة ( طبعا اخوكم بالله حاط الأنوار اوتو وتولع وتطفي والزينون يطربك باللون حقه )
شوي وما الاقي الى 3 دوريات عندي محضرة ( افالون ودوج تشارجر وجيب باترول حق مكافحة الشغب )
عاد سعودي وبذا الوقت اكيد مشتبه فيه
المهم يصيح علي بالميكروفون انزل انزل
طيب نزلنا من السيارة
عاد السكان كلهم طلعوا يشوفوا ايش صاير ( ابد مثلنا في التجمهر اللي ماله داعي )
شيل المفتاح من السلف
شلناها وقطيناه على الكبوت
شنو عندك هني
يا اخوي لي ساعتيين افتر ابي السفارة الأندونيسية
ايش عندك بذي الحزة ويش تبي من السفارة ما تعرف انهم يسكرون بالليل ( يحسبني سكران الرجال وعيوني حمر من الخرعة )
اترنهم جاهم بلاغ بوجود مشتبه اللي هو انا بسيارة سعودية تفتر جنب السفارة الأمريكية
يا خوي المفروض رحلتي اليوم وتنكسلت الرحلة علشان الفيزا وقاعد افتر علشان اعرف مكانها عشان بكرة اجيهم افيز واسافر
قالي اركب بنروح المخفر
افا ليش ما عندي شئ غلط مسويه ما يصير
قالي قل ذا الكلام للضابط
طيب يالله انا بالحكم
قالي لا انت تركب واحنا بنحجز السيارة
اخوي يا معود ما يصير
قالي اركب المهم ركبت ويوديني المخفر واقابل ضابط الحمد لله انه محترم
واشرح له القصة من طقطق لسلام عليكم
الرجال تفهم الوضع وفكني وقالي روح الشقة وبكرة الصباح رحلهم والله يسر امرك
اه فكوني ماني مصدق
سؤال ( لو هذا اللي صار بالسعودية ايش بيسوون فيني ؟؟؟) الله لا يحدنا على موقف زي كذا
المهم ادخل الشقة على الساعة 6 وابي اريح ساعة والله ما جاني النوم ( هي من الخرعة ولا من السفارة ولا من طيران القطرية ما ادري والله صارت الرحلة هم )
الساعة 7 صباح وانا طالع واطيع بالزحمة الدوامات وكمان التحويلة الحلوة اللي عند سترة
وصلنا السفارة الساعة 8 ولا ما فتحوا
اتنتظرت عن باب السفارة وعلى الساعة 8:30 يفتح السكرتي الباب
وادخل وانتظر 10 دقائق ويشفني السكرتي ( باكستاني الجنسية ) ويسالني عمي شكلك وايد تعبان
ايه والله يا مدير ما نمت امس متمرمرط عندكم بالمخفر
ليش ؟؟ واشرح له القصة
قال انت اللي يدور هنا امس بالليل
قلت ايه
قال انت مسوي مشكلة كبيرة الحين قنصل اليوم ما يجي في خوف
ضحكت وشرحت له وضعي علشان التاشيرة
قال عمي انت تبي تاشيرة قلت ايه
قالي بابا تاشيرة هنا ياخذ واجد وقت ممكن اسبوع الى 10 يوم
كيف هاه ما يصير
قال شوف بابا انت الحين يعبي ابلكيشن حلو
ايه
قال بعدين يرسل دي اتش ال كويت ولا رياض علشان فيزا يمكن يعطي ويمكن لا
اخوي ابي تاشيرة الحين الحين
قال شوف عمي لي انا 5 سنة شغل هنا ما في تاشيرة قبل اسبوع هذا مكتب ما في سفارة
اخوي ما يصير دق على موظف التاشيرات
ويتصل عليه واكلمه وقالي نفس الكلام
قلت له الحل
قال روح رياض ولا كويت يمكن تاخذ تاشيرة في 2 يوم وممكن 1 يوم
يا رجال غير ذا الكلام قال ما فيه عمي
احس ان الدنيا ضاقت في وجهي
قلت اكنسل الرحلة ( حجز الطيران + حجز الفنادق ما بيرجع لي ) تقريبا 10 الاف ريال خسارة
لا والله ما تروح كذا
رجعت الفندق واسوي تشك اوت الساعة 9 الصباح ويالله على الرياض
ام العيال تقلي ريح شوي نام انت من امس مواصل
لا والله ماني مرتاح لين ركب الطيارة لجاكرتا
يا yamani_2002 خلاص مو لازم نروح بلاشي شكل الرحلة من اولها منحوسة
قلت لا والله الحين رايحيين وراكب راسي
المهم طلعنا واوصل الجسر وكالمعتاد السستم عطلان وما اشتغل الى الساعة 11 الظهر
شديت على الرياض حي السفارات ( الساعة 2 وانا عند نقطة التفتيش ) ( لآاحد يسال كم ماشي )
نقطة التفتيش
ايش عندك ؟؟
والله يالغالي ابي السفارة الأندونيسية
ليش ؟؟
ابي افيز الله يعافيك
مسوي الرجال فاهم تقدر تفيز بالمطار
قلت صحيح هذا انا لكن زوجتي لازم فيزا قبل السفر
طبعا الروتين من تفتيش السيارة والهوية لازم منه
من وين جاي
من البحرين
طيب السيارة وجهيتها رايحة حرام ما حطيت فيري
قلتله ما في وقت واذا رجعت من السفر المعها ولا اصبغ الصدام
يطالع فيني ويقول
ولد عز سعودي وساكن بالبحرين
لا يا خوي انا رحلتي من البحرين والحين افيز وارجع
يا فلان اذكر الله تراني راجع الحين لا صير بالموتر شئ
قالي صد رد
قلت ايه صد رد
تكفى قول ما شاء الله
طالع فيني وقلي 3 دورات بعدين يمين وبعدين دوار وتلاقي السفارة على ايدك اليسار
طيب وعلى طول السفارة
ادخل عندهم
يا خوي ابي فيزا
الكلمة المعتادة اللي اسمعها عند مراجعة اي دائرة حكومية وما الوم السفارة ( راجعنا بكرة التقديم من 8 لين 11 )
يا فلان يرحم والديك والله جاي من البحرين قاطع 500 كيلو علشان تاشيرة وماخليت كلمة ترجي علشان يقبل الجوازات
اخذها واعطاني الأبلكيشن وعبيته
ونقصت علي صور لأم العيال ( ياليل الليل ) وين الحين احصل استديو
ارجعله واترجاه انه ياخذ الأوراق بصورتيين شخصية بدل 3
شاف حالتي وانكسر خاطره وحن علي واخذ الأوراق و90 دولار ( 45 دولار للشخص )
قالي انا بادخل على القنصل بعد العصر لكن ما اوعدك اذا يوقع عليها ولا لأ
يا فلان انا وكلت امري لله ثم عليك سوي اللي تقدر عليه
انا ابي اسافر الليلة
قالي قول يا رب
يا رب
الساعة 4 الجوازات عندي
شوي واحب راسه
طول الوقت افكر وين اروح القطرية فرع الرياض ولا فرع الخبر
حسبتها
اذا مافي نقاط تفتيش ودعسة وحدة ان شاء الله الوصول المتوقع للخبر الساعة 6:30 الى 7 المساء
( يسكر المكتب الساعة 8 بالليل )
اشد على الخبر واول على الساعة 7:10 على اذان العشاء
وقفت عند المكتب واشوف انواره وانا اقول يا رب يفتح بعد العشا يا رب يا رب
طفى نص الأنوار المحل واطمن قلت الحين يفتح بعد العشا
شوي الأنوار كلها طفت
قلت بس الليلة ما في رحلة الله يعوض هذي ثاني ليلة في اندونيسيا راحت
وقاعد اتناقش مع ام العيال ان نرجع الجبيل ولا نبيت الليلة بالخبر علشان بكرة اروح واقص التذاكر لبعد بكرة
شوي الى الصلاة تخلص واشوف المكتب يفتح
اه قد ايش ربني يحبني فتح المكتب
اول واحد انط وادخل
صديق رقم بليز
يا اخي ما في وقت الرحلة الساعة 10:30 بالليل بالبحرين وابي حجز الحين
بليز سير نمبر
يا صديق تفهم ولا لأ طيارة بعد 2 ساعة ابغى الروح الحبن دقيقة واحد ما ابي تاخير
هاو هاو واعطيه التذاكر وشيك عليها وقالي رحلة المفروض امس
انت يغير اليوم لازم ضريبة تغيير 800 ريال ( 400 للشخص )
ادفعها من غير نقاش وقالي جسر مشكلة وكنسل رحلة يدفع فلوس ثاني
صارت مغامرة قلت له خلاص الحين اروح بحين بس هات تذكرة
اعطاني اياها وعلى طول على الجسر وقلبي عند رجلي يدق يا رب فاضي الجسر يا رب فاضي الجسر
ام العيال قالت خلاص هلوست يوميين ما نمت ورايح جاي من الرياض
طبعا كالمعتاد الجسر زحمة وادخل عند الكاونتر قالي انت خارج الساعة 11 صباح صح
قلت ايه
والحين داخل الساعة 9 اقل من 12 ساعة عسى ما خلاف
قلت لا عادي رحت الرياض صد رد على شان فيزا
ويا ريتني ما قلت له
قالي على حنب لو سمحت
يا فلان ما ابي اتاخر هذي التذاكر والرحلة لا تفوتني تراكم طوفتوها علي امس واليوم كمان
قالي يا اخي ابي اشيك على دخولك وخروجك البحرين شوي الله يعافيك
وانا قاعد مو على نار على فوهة بركان اطبخ
شوي واعطاني الهوية والجواز وقالي درب السلامة
على طول على المطار
دخلت المطار ونزلت العفش وقطعت البوردنق
خلاص هم وانزاح
قلت للكاونتر باروح اوقف السيارة بالمواقف وبارجع لك
قاللي لا تتاخر باقي 20 دقيقة وتقفل باب الطيارة
قلت له 10 دقايق بالكثير وانا عندك استلم الجوازات
الحمد لله في خلال 10 دقائق وانا عنده وهوا على البوابة
وقفت السيارة بمواقف الخليج وتركت كل البطاقات اللي ما احتاجها وشرايح الجوال
عند الجوزات الخروج
يسالني الرجال عمي اشلون دشيت البحرين
قلت له بالبطاقة
قالي دشيت بالبطاقة لازم تخرج بالبطاقة
يا فلان يرحم ابوك يرحم امك انت سامع النداء النهائي والأخير للرحلة رقم ؟؟؟ على الدوحة
البطاقة بالسيارة ولا اقدر ارجع
قالي ما اقدر اطلعك روح للرئيس
يافلان يرحم والديك مشني
قالي رح للرئيس ويقط الجوازات على الكاونتر
رحت للرئيس وشرحت له وضعي قالي ما تقدر تروح للسيارة قالت ما في امل
الطيارة بتقفل الحين انت سامع النداء النهائي والأخير
الحمد لله مشاني وسلكت الأمور
طبعا جلست على الكرسي ونومة ( البحرين قطر ) والترانزيت ( قطر سنغافورة ) والترانزيت ( سنغافورة جاكرتا )
احلى والذ نومة نمتها بعد ارهاق واعياء وتعب ( سمومها اللي تسموها )
جميع الأحداث حصلت بواقعية بنسبة 100% وليست قصة من نسج الخيال
عقبة صعبة وعدت
تم بحمده
انتظروني وانا في بالي