اولا: اتقدم بجزيل الشكر لجميع اعضاء هذا المنتدى الرائع والقريب من قلبي لما فيه من المتعه والفائدة والصحبه الطيبه وخصوصا ابو عزيز لأني استفدت كثيرا من مواضيعه الشيقه. بصراحه هذا اول تقرير لي فأرجوكم شجعوني انا وولدي الكبير لأنه طالع كربون مني ويعشق السفر مثلي.
وبعد بحث وتفكير طويل توصلت الى هذا القرار في 22 يوما يومين rust في المانيا
6 ايام زيلامسي في النمسا ثم
يومين انترلاكن في سويسرا
5 ايام انيسي في فرنسا وكان يوم لجنيف
5 ايام باريس
3 ايام فرانكفورت
اختيارنا للمدن كان جميل وموفق والحمدلله ولكنه متعب بعض الشيء لأننا عائله مكونه من اطفال اتعبهم كثرة التنقل عائلتنا هي انا وزوجي واربعة اطفال واترككم مع رحلتنا الرائعه

الجمعه 12/6/2009

الرحله عباره عن ثلاث اسابيع اليوم اول يوم لنا في المانيا الحمدلله وصلنا الظهر الى فرانكفورت ولدي الكبير نايم طول الطريق وهو في المطار كان نايم وجالس عالكرسي ففجأة فتح عيونه لقى طفل عمره سنتين داخل بين رجليه ولاصق بسم الله ..يمه وش ذا وش جابه انا ولدتههه
اول ما وصلنا على طول مسكنا خط الى رست ساعتين ونص والجو يجنن والدنيا سبحان الله شمس وفجأه غيوم وظلام يقول ولدي الصغير مين اللي صك اللمبه ياماما ؟؟؟؟؟
طبعا((سعوديين)) قاعدين نعلم عيالنا ربط الحزام في السياره صايرين ممصعين ما نطول شي مربطين..حاله
والبيبي شير((كرسي الاطفال))الزامي في النظام عندهم لكن ماتشوفه الا طاير بالسياره يتطاقون فيه
اخذنا من avis سياره فيكسويجن كادي 2009 فان مريح ولسبع اشخاص واتركم مع صوره
الشقه روعه مره حلوه وجلسه برا ترد الروح.. وفيها مطبخ مجهز وشرينا اغراضنا من السوبر ماركت وريحنا اليوم معلومه رحلات السعوديه على terminal2 يعني تحجز سيارتك من نفس المكان عشان ما تتبهذل واليكم صور الشقه

السبت 13/6/2009

اليوم الثاني في رست حددنا السبت والاحد في اوروبا بارك الشخص الكبير يومين 63 يورو والصغير 55 يورو كانت يومين كاملات كافيه لأوروبا بارك وكانت مره حلوه لكن توهقنا بالماء في الملاهي سعر المويه الصغيره 18 ريال فقررنا بكرا ناخذ معانا مويتنا لكن للأسف يوم قررنا نسير اذكياء صار اليوم الاحد يعني المحلات كلها مغلقه طوال اليوم ((يعني نصيحه خذ مؤنه قبل يوم الاحد)) الملاهي عباره عن اقسام دول اوروبا مثل اسبانيا ايطاليا فرنسا انجلتر الخ.. تغدينا في مطعم فينيسيا بالقسم الايطالي كان يم يمي والعشاء زوجي العزيز طبخ لنا كبسه بالدجاج وولدي يقطع البصل ويصيح وانا اغسل الملابس يا صعب الحياة بدون شغالات بس انا شارطه انهم يساعدوني اذا ما اخذت الشغاله وهذي بعض الصور لأوروبا بارك.

الاثنين 15/6/2009

نظفنا الشقه الحلوه وسلمناها صاحبتها الحبوبه وطلعنا ومسكنا الخط الى زيلامسي وضعينا شوي وحنا ضايعين فجأه اكتشفنا اننا طلعنا من المانيا ودخلنا فرنسا .... معقولهحنا في فرنسا وحنا ما ندري ما شاء الله امطار قويهاقول لزوجي ضيعتنا على مستوى ماهي ضيعة شوارع او ضيعة مدن ضيعة دول... يوء قويه تدرون شلون اكتشفت حنا بفرنسا دخلت بقاله اول ما دخلت قالت لي صاحبة البقاله ((بونجور)) وطلعت من البقاله واقول لزوجي حنا بفرنسى ولا شيكوا جوازات ولا يحزنون تذكرت جسر البحرين اللي ننلطع فيه بالساعات.

زيلامسي

الحمد الله وصلنا بالسلامه السبعه مساء واخذنا شقه في كابرن وليقنا صاحبة العماره غرقانه بالنهره ههه عمارتنا قدام النهر والحرمه لبقت سيارتها بالمواقف ودحدرت السياره وطاحت بالنهر والحمد لله الحرمه ما جاها شيء وجاء الرجال يسلمنا المفتاح مد يده يسلم علي وقلت له اسمح لي ((احراج)) لكن هو محترم فهم وقدر اليوم هو اول يوم في زيلامسي تمشينا على البحيره وتعشينا في مطعم تركي والجو ممطر وحلو ورجعنا البيت وغسلنا ملابسنا في البانيو مشكلة الشقه ما فيها غساله اسم الشقق ((kitz)) كانت حلوه ورايقه وسعرها حلو

الاربعاء 17/6/2009

اليوم وناسه طلعنا بالتلفريك عالي مره حتى وصلنا اعلى قمم جبال الالبوكلها ثلج ولعبوا العيال بالثلج وتزلجوا بالزلاجات وكانت رحله ممتعه لكن برد ملاحظه مهمه التذاكر خلها معاك عشان ترجعها لهم ويرجعون لك 2 يورو عن كل تذكره.
الرحله الثانيه الى الزحليقه الصيفيه في سلفيدلينوتزحلقنا على الجبل الطويل يجنن وكان مفاجأه حلوه للعيال لأن اول مره يشوفون ثلج .
وبعدين ذهبنا الى البحيره وركبنا السفينه اخر روقان ومرينا المحلات وشرينا تي شيرتات زيلامسي ومرينا billaسوبرماركت حلو وشرينا مقاضينا ورجعنا للبيت بعد يوم طويل طبخت سباغيتي ودجاجه محمره بالفرن وبعدين جلسنا على النهر شوي وذهبنا.
الخميس18/6/2009
اليوم قررنا الذهاب لميونخ تبعد عن زيلامسي ساعتين ونصف اول شيء ذهبنا الى اسكادا اوت ليت شريت بلوزه حلوه اسكادا ب300 ر.س وكملنا لميونخ ومحلات h&m c&a والان نحن عائدون الى البيت.

الجمعه 19/6/2009

ذهبنا اليوم في رحله جميله طبيعيه الى حديقه وايلد بارك هيا عباره عن غابه وفيها حيوانات ومطعم يطل على جبال الالب تغدينا فيه كان مره حلوو واكلهم يجنن ستيك وبطاطس وشوربه واو وحلى الايس كريم يا سلام... و الاولاد يلعبون بالالعاب اشتد المطر وقررنا الذهاب الى سالزبرغ

سالزبرغ الجميله

ذهبنا على طوو الى وسط المدينه وتدخل بالحارات مليان كشكات وناس تبيع وطبعا اغلبها تحف وشوكلاتات. موزارت وبيته ومتحفه كان مغلق ولدي الصغير كان ماسك شمسيه اكبر منه تطير فيه مع الهوا يجلس يصرخ ماما بطير موتني ضحك مره انبسطنا وشرينا البيقلز لكن للأسف الختام كان سيء زعل ومشكله زوجي الله يهديه راح للسياره وحنا وراه وضيعناه انا وولدي الكبير وندور مالقيناه ذبحنا البرد وسبحنا في المطر وقررنا نجلس عند اخر مكان ضيعناهم فيه واناا عصبت مرره واخيراا جاء اخذنا ورجعنا للبيت الشيء الغريب انه هذي ثاني مره نجي سالزبرغ وكل مانجي نتهاوش خلاص كرهتها موب جايتها مرره ثانيه لا وما قلت لكم ترك العيال الصغار بلحالهم بالسياره وراح يدورنا اف

السبت 20/6/2009

اليوم طلعنا من زيلامسي متهجين الى انترلاكن الطريق ست ساعات ونص الله يعين وفي الطريق مرينا على قرية zug الجميله ريحتها ورد وتغدينا فيها بمطعم مكسيكي كملنا حتى وصلنا بالسلامه انتر لاكن. تخيلو مطر شديد ومكتب الفندق مقفل لكن لقيناهم كاتبين اسمنا على ورقه معلقينها على الباب والحمد الله دخلنا غرفتنا الصراح الفندق حلو ورايق ويقع على بحيرة thun

الاحد 21/6 /2009

الصباح افطرنا في بوفيه الفندق على البحيره مره حلوو وطلعنا الى سنتر انترلاكن هادئه ورايقه تغدينا في ماك ثم ذهبنا في رحله الى قرية ballen berg بدائيه وريفيه تجول في الغابه مشي كثير وبقر وحيوانات وعدنا البيت والاستمتاع بالحديقه .

الاثنين 22/6/2009

اليوم طلعنا من انتر لاكن ونحن الان في الطريق الى مونتري قبل ما نوصل شفنا لوحات بروك وغرير وقررنا الذهاب اليها بروك فيها مصنع شوكلاتة نسلته وشبعنا شوكلاتة للتذوق اصلا اول ماتشوف المصنع تشم ريحة الشوكولاته تصرع الطير وشرينا شوكولاتات يم يمي اما غرير مصنع الجبن بصراحه كان بايخ احلى مافيه المطعم حقه لكن المصنع مقلب مافيه شيء اخذوا فلوس تذاكر عالفاضي عطونا هديه جبن معتق وصلنا الى مونتري فيه سوق اوتليت كان حلو.شريت بلوزه d&g 300 ر.س واخيرا متجهين الى انيسي

انيسي فرنسا

وهي مدينة صغيره بين جبال طول الطريق نقول وش ذا التوم توم يخوف يدل كل شيء ويعرف كل الاماكن وفجأة خبط التوم وضعنا وصكينا التوم بعين وخرب في وقت غلط وقمنا نطلع الجبال وصلنا قمة الجبل وهذي انا وصاكتني ام الركب وجاني غثيان وحامت كبدي وخفت مره قلت لزوجي مانبي شي نبي الارض وبس المهم دواران دواران وبالخير الحمد الله وصلنا بالسلامه وبل طقاق وصلنا الفندق ولقينا المفاجاة انتهىالدوام وسكر المكتب يعني بعد كل هذا بنام بالشارع لا ليس في اوروبا لقينا كالعاده ظرف معلق على الباب مكتوب عليها اسماء ولقينا رقم الشقه وجلسنا ندور العماره وجلسنا ندور الشقه وش السالفه وشفينا ما نلقى شي الشقه كانت حلوه فيها جلسه خارجيه رائعه والصباح قابلنا صاحبة الفندق ام ضروس لها سالفه اقولها لكم

الثلاثاء 23/6/2009

افطرنا الصباح والجلسه برى ترد الروح العيال مره فرحانين قي مسبحين داخلي وخارجي ولدي الوسطاني بعد دورة السباحه الي اخذها مجهز لنا مفاجأه وهي انه صار يعرف يسبح ياحبيبي ودايما يسألني متى نروح فندق فيه مسبح واخيرا مسبحين حسبي الله عليها ام ضروس ما خلت العيال يسبحون تقول ملابسكم ما تصلح لازم سراويل قصيره ((كلوت)) وقهرت عيالي قلت لها حنا نسكن في خمس نجوم بدون مشاكل وانتي تتفلسفين علينا. المهم قررنا القديمه عباره عن فينيسيا فرنسا مرره حلوه واكلنا بوظه الايس كرم المشهور عندهم يجنن والجهه الثانيه منها فيها حديقه حلوه عالبحيره فيها ايجار قوارب 27 يورو نصف ساعه ثم ذهبنا الى سوق غاليري لابييت ورجعنا للبيت وطبخنا كبستنا

الاربعاء 24/6/2009

اليوم قررنا يصير لجنيف 45 كيلو عن انيسي وصلنا جنيف وشفنا النافوره وصورنا مع الساعه المشهوره دخلنا سوق المانور كان 5 ادوار ثم ذهبنا للغداء في مطعم بيتزا عند الساعه بعدين لقينا ساحه حلوه في محلات وعدنا لبيتنا في اخر اليوم
الخميس25/6/2009
اليوم الصباح بدأت بترتيب الشقه لأنه لازم نسلمها لهم نظيفه والا ياخذون علينا فلوس رتبنا الشناط واستعدينا للذهاب الى باريس طبعا قبل ما نطلع رحنا نودع ام ضروس

باريس

الطريق الى باريس خمس ساعات ونصف وصلنا الحمدلله الشقه مره حلوه عشر دقايق عن دزني اسمها cietea marne la vallee عباره عن بيت دورين تبعد عن باريس نص ساعه ممتازه للي عنده سياره سعرها حلو ومجهزه بالكامل وسكنا باريس خمس ايام وزعنهاها يومين دزني يوم شانزلزيه ويوم سوق الاوتليت واليوم الخامسنروح فراكفورت اليوم توجهنا الى دزني بارك عروض حلوه ووناسه
السبت 31/6/2009
قضينا هذا اليوم في دزني ستوديو صغيره وبصراحه ما تسوى تذاكرها وفيها عروض حلوه واكلنا في المطاعم السوق القريب من دزني.

الاحد1/7/2009

اليوم قررنا الذهاب الى الشانزلزيه وطلعنا الى اعلى برج ايفل الي عنده كانت زحمه بس حلوه كان فيه ناس يرقصون رقصات مايكل وحاطين اغانيه ذكرى لوفاته ((هذا العزى حقهم)) طبعا اكلنا ايس كريم في هاجن داز هذا اهم شيء وتغدينا في كويك
الاثنين 2/7/2009
اليوم مخصص للتسوق يا سلام ماركات اوتليت كينزو بربري وغيرها وكملنا في اوشان والسوق الداخلي رجعنا للبيت وطبخنا كبستنا
الثلاثاء 3/7/2009
اليوم طلعنا من الفندق مسكنا خط 5 ساعات لفرانكفورت
فرانكفورت
الاربعاء - الخميس- ثم الجمعه العوده الى الرياض احسن مافيها شارع zeil مغطناه رايح جاي شارع جوت فيه ماركات كان تسوق وجو رائع ممطر على خفيف وعلى النهر فيه جلسات وحدايق حلوه
الجمعه
وختاما رجعنا للوطن الحبيب وكلنا حنين وشوق لكن بصراحه يوم ذبحنا الحر والغبار قلنا ياليتنا مارجعنا كانت رحله جميله وشيقه اتمنى انكم استمتعوا واستفدتوا منها.
والى اللقاء مع رحله اخرى

رحلتي الى فرنسا

التعليقات (9)