اليوم الثاني:الجمعة 3/10/2008
1- الإفطار في الفندق صباحا لأن السعر شامل
2- شراء بطاقة باربس فيزت للمواصلات لمدة 5 ايام.
3- الاتجاه الى قصر فرساي بالرير الأصفر RER C الى محطة Versailles - Rive Gauche.
4-العودة الى الفندق للراحة وبعد ذلك الذهاب الى جامع باريس لصلاة الجمعة ان شاء الله.
5-الذهاب الى ساحة تروكاديرو وبعد ذلك جولة في نهر السين بالقارب وبعدها الاتجاه الى برج ايفل للقمة.
اليوم هذا مزدحم جداً .. ماراح يمديك ..
اليوم الرابع (ويك اند):الأحد 5/10/2008
1-المونمارت (يمدحونها في الويك اند)
2- سوق جاليريا لافاييه
3- الاوبرا
4-ساحة الفوندوم
5- شارع ريو دي ريفولي
يوم الاحد الاسواق تقفل كلها
خل الاسواق يوم الثلاثاء لان الشانز و مونتين مافيهم محلات كثير ..
رحله موفقه

برنامج مميز جداً أخي LAND أنا الآن موجود في باريس ، وأنصحك بالملابس الدافئه لأن الجو بارد وينزل مطر خفيف بعد الظهر ، وانصحك بالتجول في الحي اللاتيني وساحة سان ميشيل والشوارع الصغيره هناك خاصة في الفتره المسائيه والليل مميزه ورائعه وتستحق الزياره يوميا ، كذلك انصحك بالتسوق في اللادي فونس ففيها سوق كبير من ثلاث طوابق واسعارها متوسطه ، وانصحك كذلك بزيارة عمارة ممبرناس الشاهقه ومشاهدت باريس من أعلى مكان فيها .. وإذا احتجت لأي معلومات فأنا حاضر ..

السلام عليكم وعيدكم مبارك
اخوي انا اشوف سعرة التذكرة غالي واجد الا اذا كان هذا السعر داخل فيه سعر الفندق يكون ممتاز
ورحلة موفقه بأذن الله

اهلين اخوي لاند..........
اليوم الأول الخميس : أقترح عليك هاليوم وبعد اجهاد السفر ان يكون خفيف فتكتفي بشارع الشانز والأسواق الموجودة فية وقوس النصر وشارع مونتين .
اليوم الثاني الجمعة : ساحة الكونكورد + متحف اللوفر + ساحة التروكاديرو + برج ايفل + رحلة نهرية مع العشاء وتكون مع صلاة الجمعة اذا جاء وقتها وتكملون برنامجكم بعدها . كل هالأماكن قريبة من بعض والتنقل بينها يكون سيرا على الأقدام . (( رحلة قصر فرساي تحتاج لأكثر من 6 ساعات واتوقع ما يمديكم على صلاة الجمعة لأن موقع القصر خارج باريس ))
اليوم الثالث السبت : قرية التسوق لافيلاج + مول اوروبا .
اليوم الرابع الأحد : قصر فرساي + وممكن اذا رحتو الصباح ترجعون على العصر وتزورون هضبة مونمارت.
اليوم الخامس الأثنين : نفس جدولك . مع ان الأماكن متباعدة وتحتاج لوقت . فهاليوم بيكون مجهد ويحتاج انكم تقومون بدري .
اليوم السادس الثلاثاء : جاليري لافاييت + شارع هوسمان + ساحة الفنديوم + الأوبرا + شارع ريفولي .(( هالاماكن حول بعض ))
اليوم السابع الأربعاء : نفس جدولك .
اتمنى ان قدرت افيدك بهالعجالة والأخوان والأخوات ما راح يقصرون معك ان شاء الله
سفرة سعيدة وترجعون بالسلامة

mzoon
هلا والله بالمميز طير ....بصراحة شرفني تعقيبك
ومشيت على كلامك ليوم الخميس
بصراحة امس كنا متعبين بجد
سؤال لو سمحت تنصحني اشتري باريس فيزيت والا مالها داعي واكتفي بالتذاكر اليومية متى مااحتجت لها وهل باريس فيزت تغطي لافيلاج وقصر فرساي ام لا.
تحياتي للجميع

السلام عليكم ورحمة الله
الحمدلله وصلنا الى باريس أمس الخميس بعد رحلة شاقة جدا
الاقلاع من الرياض الساعة 00:45 صباح الخميس
التوقف في جدة الساعة 2 صباحا والاقلاع منها تقيبا الساعة 4 فجرا
التوقف في روما الساعة 6 صباحا والاقلاع منها تقريبا 8 ونص صباحا
الصول الى باريس الساعة 10 صباحا

اهلين اخوي لاند والحمدلله على السلامة ..........
بخصوص تذاكر المترو باريس فيزت هالشيء يعتمد على عدد مرات استخدامكم للمترو يوميا وانا بصراحة ماكنت استخدامها وكنت اشتري تذاكر متى ما احتجت للمترو لأن فية مناطق تكون قريبة من بعض والمشي بينها متعة ......... بس بجميع الأحوال هي اوفر اذا كنتم راح تركبون المترو اكثر من ثلاث مرات يوميا.
وبخصوص المناطق الي تغطيها باريس فيزت هي فيها نوعين نوع يغطي من زون واحد الى ثلاثة وهذي ماتغطي المطار وقصر فرساي ولافيلاج والنوع الثاني من زون واحد الى سته وهذي تغطي جميع المناطق الي يوصلها الأندر قراوند وطبعا سعرها اغلى من الأولى وبصراحة ما اذكر سعرهم بالظبط بس الأولى لمدة خمس ايام في حدود 30 يورو والثانية لنفس المدة بحدود 55 يورو وانا اشور عليك تاخذ الأولى.
اتمنى اني افدتك وأعتذر عن اي تقصير

تعقيباً على كلام اخونا طير فانا شريت باريس فيزت الاسبوع الماضي وهي وتغطي المترو والباص لمدة اسبوع بسعر 19 يورو للكبار وللصغار ب 13 يورو واختها للزون 1-3 وتغطي باريس كلها وانصحك بها وتقدر تاخذ القطار لقصر فرساي ولافلاج لأنها زياره لمره واحده فقط ، المهم تطلب كارت المترو والباصات ..
تحياتي لك ..

1. دخلنا الغرفة ونوم على طول بعد التعب اللي شفناه من (نعتز بخدمتكم)


2. بعدها مرينا الهاجن داز (حبيب حبيبنا الطير) وحلينا ورجعنا للفندق.


3. الجمعة 3/10/2008


4. السبت 4/10/2008

السلام عليكم ورحمة الله وبركاته
اشكر الجميع على المداخلات واحب اكتب برنامجي الفعلي للأيام الماضية
الخميس 2/10/2008:
بعد الوصول الى مطار شارل ديقول تقريبا الساعة 10 صباحا وبعد تختيم الجوازات (ملاحظة انا مفيز من السفارة الايطالية وجوازات مطار باريس ما ساألوني ليش مافيزت من الفرنسية) هذا جواب للي متخوف من هذي الطريقة.
اتجهنا للحقائب وبعدها الى التاكسي خارج الصالة وكان فيه سرى نوعا ما وركبنا مع واحد طلع أخ مغربي عايش 37 سنه في باريس، وصلنا الى فندق كاليفورنيا وطلعت التكلفة للتاكسي 42 يورو.
بعد مادخلنا الفندق تقريبا الساعة 11 وربع اخبروني ان الغرفة مو جاهزة وتحتاج ساعة علشان تجهز، قلت طيب امري الى الله، قلنا خلينا ناخذ لفة في الشانز لحد الغرفة ماتجهز وطلعت لمدة 10 دقائق ورجعت بسرعه لأنه الجو بارد وماقدرنا نتحمل والملابس الثقيلة في الشنط وجلسنا في اللوبي لحد ماجهزوها.

دخلنا الغرفة ونوم على طول بعد التعب اللي شفناه من (نعتز بخدمتكم)

صحينا الساعة 4 العصر وبعد كذا رحنا للشانز نتمشى فيه، واحنا ماشين في شارع جورج سانك كانت السماء ملبدة بالغيوم وبدأت الغيوم تاخذ اللون الأسود وماشاء الله ثواني ويهل علينا ذاك المطر القوي وماكان معنا مظلات ووقتها كنا قريبين من قهوة الفوكيت ونجيك داخلين، قلنا اجل خل نتغدى عندهم مدام المطر شكلة مطول.

بعدها مرينا الهاجن داز (حبيب حبيبنا الطير) وحلينا ورجعنا للفندق.

الجمعة 3/10/2008

بعد الافطار طلعنا نمشى حتى متحف اللوفر مشوار بعيد بس الجو كان روعه وحرام نركب المترو ، وقبل مانوصل دوار الكونكورد كان فيه معرض للطيران والصواريخ والرادار وتشوف على يمينك ويسارك انواع الطائرات الهليكوبتر ومحركات الطائرات، وذلك بمناسبة الاحتفال بمرور 100 عام على صناعة الطيران في فرنسا.
وصلنا المتحف وماكان زحمة ودخلنا وقصينا تكت للشخص بسعر 9 يورو (اللي اعمارهم من 18 واقل فالدخول لهم مجانا) جلسنا فيه تقريبا ساعتين ولما جينا نطلع لقينا الجو ماطر بس هذي المرة كان معي مظلات وتونا مسمين بالله وفاتحينها يوم وقف المطر .
اخذنا المترو من جنب اللوفر على الخط رقم واحد ونزلنا في محطة جورج سانك ورجعنا للفندق للراحة والخروج مرة ثانية.
بعد كذا ذهبنا الى ساحة التروكاديرو بالمترو (مليانة من الأفارقة اللي يبيعون نمادج برج ايفل) وبعدها مشيا الى النهر لركوب القارب لمدة ساعو ونص تقريبا وبعد ذلك برج ايفل مشيا بس ماطلعناه لأنه زحمة والجو بارد اصابعي تجمدت من البرد.
ركبنا المترو ودايركت على بيتزا بينو محطة فرانكلين روزفلت وبعد العشاء فيه مرينا على قهوة الفوكت وريحنا فيها وتقهوينا فيها تحت الدفايات ويازين الدفى زيناه وبعدين على الفندق معلنين نهاية يوم الجمعة

السبت 4/10/2008

الذهاب الى لافيلاج على طريق الديزني ، مشينا من الفندق حتى محطة قوس النصر وهناك طلبت تكت ذهاب وعوده الى لافيلاج وطلعت اربع تذاكر بسعر 23 يورو وركبنا الرير الأحمر المتجة الى دزني ونزلنا في المحطة اللي قبلها واسمها فالدي يورب، بعد ماتطلع من المحطة لف يمين تلاقي فيه البوابة حقت المول ادخلها وتمشي شوي ولف يسار وروح على طول حتى آخر المول (طويل جدا) في آخر المول راح تشوف منطقة المطاعم على يمينك ويسارك وقدامك مخرج يوديك الى اللافيلاج.
السوق كبير جدا يحتوي على مول وخلفة يوجد اللافيلاج، بصراحة انا رحت متأخر وصلت هناك الساعة 12 ظهرا لكن اللي يبي يروح احسن له يطلع من فندقه الساعة حدود الساعه 9 علشان يستمتع ومايصير الوقت ضيق والطريق ياخذ 40 دقيقة من الشانز يعني اول ماتوصل يفتحون، السوق يقفل الساعة 7مساء كل يوم ويفتح الساعة 10 صباحا ماعدا الأحد يفتح الساعة 11 صباحا، يوم السبت يقفل الساعة 8 في الصيف بس لأني رحت اليوم السبت وقفل الساعة 7 مثل الأيام الثانية، بعد ماقفل دخلنا المول اللي جنبه وهذا المول مايقفل الا الساعة 9 مساء ماهو مثل اللافيلاج وتغدينا في مطعم بيتزا.
انا مشيت من هناك بعد 9 مساء(متأخر)، الرير مخيف نوعا ما لأن 90% من الركاب من اصحاب البشرة السمراء ويوقف في 14 محطة قبل مايوصل الشانز وكل توقيفه يركبون ناس وينزلون ناس غيرهم من نفس النوعية كذالك الرير كان مليان سكيورتي خاص فيهم ومعهم كلاب بوليسية وماادري هل الموضوع طبيعي ودايما كذا في الليل والا فيه شيء غير طبيعي واحنا موعارفين.
المهم وصلنا بالسلامة ودايركت على الفندق لأن رجولي معد تقدر تشيلني.
انتظرو البقية قريبا مع الصور