بناءآ على طلب اخوي الكبير مره مره ( تميم ) , راح اذكر بعض التفاصيل عن رحلتي من طنجة الى اسبانيا و كيفية الحصول على الفيزا ,,
الفيزا تاخذها من السفاره الايطاليه ( شينقن ) , طبعآ تقدر تدخل فيها اي دولة ضمن الاتحاد الاوروبي , و اذا سالتوني ليش الايطاليه , لانها تقريبآ اسهل طلبات و اسرع وقت للإستلام. بعض السفارات تعقد الامور و تطلب كشف حساب من البنك و غيره , الايطالية تطلب صورتين و تعريف و 250 ريال تقريبآ , والنموذج الوكالة بتخليك توقع بس و هم يعبون البيانات المطلوبة. ( اسبوع الى 9 ايام والفيزا بوسط الجواز , انا عارف انها كثير بس بعد الاحداث الاخيرة صارت قليلة مقارنة بسفارات اخرى ).
من طنجة , اغلب الوكالات السياحيه تبيع تذاكر الفيري ( السفينه ), الشركة الناقلة اسمها اظن اظن اذا ماني غلطان( كوماريت ) , سعرها على ما اذكر حدود 50 او 60 دولار , يعني مبلغ بسيط مقابل الاستمتاع بالسفرعن طريق البحر و مشاهدة اسبانيا.
انا طلعت طنجة لهذا الغرض , جلست يوم واحد في طنجة , سكنت في فندق انتركونتيننتال , كان سعر الغرفة حول 500 درهم , الاوتيل قديم بصراحة , ما يبت بأي صلة لسلسلة فنادق انتركونتيننتال العالمية , بس نظيف ماشي حاله.
اليوم الثاني رحت للميناء علشان اركب السفينة , نزلني الطاكسي و نزل معي السواق , قال الا اشيل الشنطة , و الا في و جهنا واحد لابس مدني قال عطني التذكرة و انا اخلص لك الامور بدال ما تصف طابور , طبعآ انا على بالي ان الرجال موظف في المينا , و اعطيه التذكرة و الجواز ( من الغباء المستشري في راسي طبعآ والا مفروض اتاكد قبل ما اعطيه ) , و جا بيشيل الشنطة من السواق , و هي اللي تقب بين الاثنين :120: , تطاقوا على الشنطة ( عشان المقسوم ), وانا اللي اخذ التذكرة و الجواز من الرجال و اخلي الشنطة معهم :112: , المهم اللي فاز في المعركة جاب الشنطة :8888: ( مش سواق الطاكسي اكيد ) , جيت عند الجوازات , قال الموظف عندك فيزا دخول اسبانيا ؟ قلت عندك في الجواز , دورها و لقاها . جيت العسكري اللي بعده :11sted_co , قال الباسبورت لو سمحت , قلت تفضل , قلب في الجواز شوي , قال انت موظف ؟ ( قلت في خاطري بدينا الحين الحركات اللي ما لها داعي , خلني اقول طالب عشان اخلص ) , قلت له انا طالب , قال ما عندك دراسة ( كان وقتها سبتمبر و الاجازة خلصت من اسبوع او اسبوعين ), قلت لأ ما عندي ( هو بس يبغى يفتح اي موضوع عشان اللي بالي بالكم ) , قال ليش بلدكم ما تفتح جامعات عندنا ؟ ( اغرب سؤال يوجه لي في حياتي ) , قلت و الله ياخوي اسأل وزير التعليم , وبعدين الشباب عندنا ما لقوا قبول في الجامعات عشان يسوون جامعات في المغرب. المهم الرجال ما ارتاح لي مره .
و نطلع في السفينة , السفينه متوسطة الحجم , فيها عدد 2 مطاعم , 1 او 2 كوفي شوب , سوق حرة تقبل عملات اجنبية فقط ( يوجد صرافة عملات داخل السفينه ), حليوه بصراحه , اول ما مشت السفينه , حسيت اني ماني متوازن , بس بعد 5 دقايق يصير الوضع طبيعي و ممتاز , يعني ما تحس ان السفينه تمشي , تقدر تطلع لسطح السفينه اذا حبيت تتفرج , او تجلس في اي مكان داخل السفينه و تتفرج من النوافذ , كان يوم مطر :rain: , بس اروع تجربة ممكن تمر فيها . اخذنا تقريبآ,,, تقريبآ ساعتين و شوي مرت زي الهوى. السفينه كان اسمها ( بسم الله ) , و وحده ثانيه شفتها اسمها ( المنصور ).
الغلطة التي لا تغتفر , واللي عانيت بسببها , هي اني ما عملت حجوزات سكن في اسبانبا , كان المفروض اني اسوي حجز سكن من الرياض او من طنجة على الاقل , طبعآ السفينه نزلتنا في الجزيره الخضراء او زي ما يسمونها الخزيراس ( تقريبآ ).اول ما طلعت من الميناء , مشيآ على الاقدام :097: , لقيت وكالات سياحية بالهبل , صافينهم جنب بعض , قلت ممتاز , الحين اضبط حجز اوتيل من هنا , و ادخل الاول , قلت لو سمحت ودي اسوي حجز اوتيل في ماربيا , قال ما فيه امكانية fully booked, يا راجل ! , طيب مالقا ,قال fully booked , قلت لا ذا ماهو بصاحي , وش ذا المدينتين اللي ما فيها متر في متر مرقد للفقير لله , و اروح الثاني و الثالث نفس الكلام , الرابع و القى واحد اسباني شباب , و شرحت له الموضوع , قال شوف انا باحاول اساعدك , اخذ كتيب الفنادق , و قام يتصل عليهم واحد واحد , و انا قاعد اتأمل الناس اللي رايحه و اللي جايه من الميناء , ما لكم علي يمين ان المسكين قعد حوالي 3 ساعات و هو يدور , قال لقيت لك في ماربيا غرفه اربع اسره ( جمع سرير ) و بتطلع عليك الليله بحوالي 500 دولار , !!!! اربع سراير وانا لحالي و 500 دولار !!!! ( قلت في خاطري هذا عنبر سجن ذا ماهوب غرفة فندق ). قلت له و غير ذا الحل , قال فيه غرفة في توريمولينوس ( مدينة او قرية تقع بين ملقا و ماربيا , تبعد نص ساعة عن ماربيا و نص ساعة عن ملقا بالباص , يعني في النص بينهم ), لكن الغرفة بتفضى بكره , قلت طيب و اليوم وش اسوي بعمري , قال تنام اليوم في الخزيراس , احجز لك غرفة في اوتيل اسمه المار قريب من هنا تقدر تروح له مشي , قلت بكم الليله ؟ قال 40 دولار ( نجمتين يمكن ) , قلت تدري ! الله المستعان , اتفقنا , طيب و الفندق اللي في توريمولينوس بكم ؟ قال اسمه جورجيو المار - 3 نجوم و باعطيك 3 ليالي 140 دولار ( زين اللي ما دفعني قيمة المكالمات , مسكين شاغل التليفون عشاني ساعتين يدور لي سكن , والله انه نشمي ذاك الاسباني ) , قلت والله اسعار طيبة ذي بس خوفي من توريمولينوس وش تطلع !! يمكن تطلع كأيبه و الا مش سياحيه , قال لا , هي سياحيه بس اصغر من ملقا و ماربيا . اخذت الشنطه و رحت فندق المار , فندق اقل من عادي , الغرفه اذا تمططت حكت اكواعي في الجدران من ضيقها . طلعت اتمشى في الخزيراس , مدينة موحشة في الليل , فيها كثير من الهومليس ( homeless ) يعني مشردين في الشوارع من جنسية عربية !!! ما ارتحت للتمشية و رجعت للفندق . في النهار البلد حلوة يعني البحر و الطبيعة , بس الهومليس حتى في النهار موجودين و بكثرة !!!
في الصباح الباكر , الساعه 8 , رحت محطة الباصات, قريبة من فندق المار 200 متر , اخذت تذكرة الباص بحوالي 10 دولار تقريبآ او اقل يمكن , و نمشي على طريق ساحلي , على يمينك البحر , و على يسارك جبال خضرا و طبيعه مرة حلوه , لون الشمس كان غير اللي نشوفها في الخليج , يعني كان الوقت صبح و تحس انك عصر. الباص كان يوقف عند كل مدينه دقايق و يمشي , مرينا على ماربيا , و وصلنا توريمولينوس , اخذت تاكسي و على الفندق , احسن شوي من المار بس ما يبعد عنه في الصغر , بس الفندق فيه حركة عالم , اوروبيين بالهبل و عدد الغرف الظاهر كبير مرة , يعني تحس ان معك ناس , في اللوبي و المطعم . التلفزيون اللي في الغرفة ما يشتغل الا بهلل, يعني فلوس معدن ( coins ) , يعني اللي بيروح هالفندق ياخذ معه كيس هلل . ( كل 45 دقيقة لازم تحط فيه هلل حوالي 1 ريال او ما شابه.
باختصار المدينه سياحيه من الطراز الاول , شواطىء نظيفة و مليانه عالم , مطاعم اكلها حلو , محلات هدايا و ماركات عالمية , امان امان امان امان مرة , يعني تمشي الساعة 4 او 5 الصبح ما عندك اي اشكال ( اروح مشي من الفندق الى البحر و المطاعم و اماكن السهر , يعني موقع الفندق كان ممتاز حقيقة ) . الناس طيبة بس مشكلة اللغه شوي كانت عائق , يعني مره شفت اعلانات لمصارعة الثيران في مكان يبعد عن توريمولينوس حوالي 25 دقيقة بالباص , و رحت الكشك اللي يبيع تذاكر الباص عشان اسأل عن الباص اللي يروح لمكان المصارعة متى يطلع و اخر باص يرجع من هناك خفت ابلش و ماقدر ارجع من هناك , اللي تبيع ما تتكلم الا اسباني , حاولت افهمها بالانجليزي لكن عصبت و قالت بالاسباني ( اللي بعده - طابور طبعآ ) . ما قدرت اروح اشوف مصارعة الثيران وقلت اعوضها في الرياض , اشوف مصارعة اخواني
انا طولت عليكم صح ( والله اسف ) , المهم رابع يوم و اخذ الباص و عليك يا الجزيرة الخضراء , و اخذ السفينه على طنجة ديرة ابن بطوطة ,,,,,
يا رب تكون تجربتي مفيدة للي يحب يطلع من طنجة الى اسبانيا , و سامحوني على الإطالة ,,,,
أفوكادو ,,,,,,