1. :smile002:

:smile002:

اخوكم الدباسة يحيي كلاً بأسمه من أخوان وأخوات في هذة البوابة ويسعدني تقديم بعض الأرشادات للأخوان المستجدين على البلد الطيب المزيان المغرب, الاخوان الحقيقة في هذة البوابة ماقصروا وجزائهم الله على جهدهم في كتابة المواضيع والردود على مواضيع الآستفسارات, ويمكن اضافتي ما تشكل نقطة في بحر ماكتبوا الأخوان ,ولكن من سفراتي العديدة شاهدت جملة من الأخطاء البسيطة اللي يقع فية المزاعيط الله يهديهم في زيارتهم للمغرب وتكون سبب في ضيقة صدورهم وتنغيص رحلتهم ,استعين بالله في استعرض بعض النقاط وسامحوني اذا كان اسلوبي عامي :
1-قبل ماتسافر المغرب ونت قاعد في بيتكم حط رجل على رجل اسال نفسك, لية رايح المغرب وش تبي المناطق التراثية, الساحلية شواطي وسباحة ,طبيعة وجبال .استجمام (لان كل وجهة لها أجرة) قياسأً على كل حجرة لها أجرة ,اعمل بحث في البوابة عن المدن اللي تحقق هدفك وابحث عن كل معلومة عنها ولاتقعد تطامر من شي الى شي ركز على هدفك .
2-أسال معارفك اللي سبق وأن راحو للمغرب والأ اذا يعرفون احد راح قبل كذا واجمع اكبر كمية من المعلومات عن السكن والمواصلات,مالقيت احد راح مافي مشكلة لاتقلق (الحلول كثيرة نتركها لأخر)
3-احسب ميزانيتك على أساس ماجمعتة من معلومات من البوابة وماسمعت من الناس وتذكر القاعدة التالية (أذا كنت مسافر الى أي بلد للأول مرة وبدون أي معلومات راح تصرف دبل اللي يصرفة اللي عارف البلد ,وأذا كنت مجمع معلومات مزيانة وعناوين راح تصرف زيادة من عشرين الى اربعين في المائة زيادة عن الشخص العارف بالبلد ) وعشان كذا احنا نساعدك هنا على انك ماتزيد عن عشرين في المائة,فخذ هذا الشي في بالك عند وضع الميزانية .
4-تذكر انك تبي تسافر للسياحة والأستجمام موعشان تستعرض علي خلق الله جهز ملابس عملية ومحترمة بعيد عن التكلف ,وقدر الأمكان لاتأخذ الأ الشي الضروري (مو تشيل دولاب ملابسك معك ترى منت مهاجر)ولا تخاف انك بتنزعط تراك مزعوط مزعوط.
5-حاول تدور على رفيق درب واذا مالقيت دور في المنتدى يمكن تصادف احد ا الأعضاء رايح تخاويه
6-اذا كان معك خوي واول مرة تروحون استشير الأخوان في المنتدى عن التكاليف والفنادق اللي ينصح بالسكن فيها واسعارها المناسبة وموضوع الشقق اجله الى ماتوصل المغرب .
7-روح كذا وكالة سياحية وجيبها لة من الأخر انك تبي ارخص تذكرة لان فية فئات تذاكر حتى على السعودية كل فئة لها سعرها وماتفرق نفس المقعد والدرجة ,واحجز فندق من الفنادق اللي مدحوها لك الربع في المنتدى يوم والأ يومين.
8-رتبت امورك ورحت المطار وقصيت البوردنق شوف الأخوان المسافرين معك ودردش معهم في مواضيع المغرب (وعلى قولة اخوي تميم لصقة جونس ) وحاول تستفسر عن اموار السكن والناس وانا اخوك لبعضها .(بس عاد لا تصير نشبة حدك باب الطيارة ) .
9-نزلت المطار وختموا الدخول وجيت للأخوان راعين التفتيش (ماعليك منهم ) اذا طلب أكرامية (ترى يطلب بشكل مؤدب) قلة معي (لا كرت ) احفظ الكلمة مزيان , خلصت منهم اقرب صرف اصرف حق يومين مواكثر واقرب محل تلفونات اشتر شريحة لك ولصاحبك دور خريطة لمدن المغرب ’وانزل الدور السفلي تلقى محطة القطار , وإلا اخرج ولاترد على على احد تلقي تكاسي (طكاسي) نوع مرسدس لونها بيج اسمها طاكسي كبير فاصل معة بروح مرحة (انت جاي تبسط ليش تعبس) لاتخاف أركب معة بعد الأتفاق ولو عرض عليك شقق والأ غيرة اشكرة واذا طلع نشبة خذ رقم تلفونة وكلة اكلم بعد ماريح واذا طلع نشبة وطلب رقم تلفونك قلة ماشريت شريحة مغربية , واذا فضلت تروح بالقطار وهو بالدور السفلي وماعرفت كيف توصل أسال اللى شريت من عندة الشريحة يوصف للك مكانة انزل قص تذكرة عل وسط المدينة واخرج من المحطة اذا كنت ناوي كازا و روح الشارع وقف طاكسي لونة احمر وغالبا هاتسباك فيات والأ رينو لونة احمر يسمونة سلمك الله (طاكسي صغير ) وقلة اسم الفندق .
10-سكنت الفندق وريحت اذاكان عندك عناوين شقق روح على طول شوفها وفاصل مولها
(صاحبها) علي اقل سعر واذا شفتة مشدد والشقة عاجبتك حاول تبين انكم هونتم وبتمشون واذا شفتوه مصم والشقة عجبتكم لاتاخذونها اكثر من ثلاث ايام (افضل عشان تعرف وضع الشقة )
11- بعد ماسكنتم روحوا المرجان وتسوقوا اغراضكم التموينة وبتكون نوعا ما غالية والأ الأسواق الشعبية وذي تحتاج هدرة مزيانة (تجيد اللهجة المغربية ) عشان تأخذ احسن سعر وحتى لو تكلمت عادي يتاخذ سعر افضل من المرجان بس انتبة للمحفظة –الجوال (ولا تخاف مهم ناطين عليك بس حرص )
12-احسب مشاويرك وتحركاتك كثيرة خذا سيارة ايجار وتلقي محلات الأيجار بوسط الدار البيضاء في شارع محمد الخامس ولاتسوي فيها يما هنا ويما هناك وتاخذ سيارة كبيرة (طبعا مو في اكس والأجمس كلها رينو والأ فيات ) دور سيارة اقتصادية بسعرها وتكون ديزل انحش عن البنزين الكيلو ترى مفتوح وتأكد من اوراق السيارة والعقد والتأمين بتلقها فرنسي خلة يكتب بيده فوق بند التامين على الصورة اللي معك ترجمة بالعربي (ترى حقك )
13- قسم وقتك اول النهار خلة للمشاوير البعيدة واخر النهار في المدينة عشان لو ضيعت النهار له عينين
14- دير بالك في سكنك انك ماتزعج جيرانك , انتبة من الليل سهراتة (راقب الله ).
15-يوم السبت ليلة الأحد مانصحك في كازا بالذات تطول بالسهر عشان يوم اجازة وشبابهم فالينها في الشوارع وتحصل خناقات بينهم ومشاكل انت في غنى عن انك تتواجد في هذة الأماكن .
16-البوليس ماعليك منة طالما متبع النظام لاتسوي فيها ان الشارع تبعك (ياغريب خلك اديب) واذا صادف وقفك احد الدرك الملكي خللك طبيعي لاتخاف عطة الأوراق اللي يطلبها واذا شفتة تعمد تاخيرك (موبالعادة) خذة على جنب وحط في يدة مية دراهم وقلة (باش تشرب قيهوه)
17-ابعد عن التكلف الزائد في اللبس والأستعراضات اللي مالها داعي ,بواب عمارتكم لاتنسى تعطية مرة خمسين درهم مرة اكل زائد مرة بكت دخان ,السيارة يحرسها في الليل (القرديان ) موظف زي العسة لاتنسى تكرمة عشان تأمن على السيارة واذا روحت وجيت يدبر للك موقف .
وهذي بعض من الأشياء اللي لازم الواحد يراعيها وان شاء الله الأخوان في البوابة مايقصرون يضيفون الأشياء اللي نسيتها ويصححون اللي يشوفونة , والسلام