1. :50055:


2. نبذه عن شقة انترلاكن:


3. اليوم الاول السبت21/7/2007 :


4. يوم الوصول:


5. اليوم الثاني الاحد 22/7/2007 :


6. جوله في انترلاكن:


7. COOP صغيره مفتوحه تابعه لسلسلة


8. اليوم الثالث 23/7/2007 الاثنين:


9. رحلة إلى الزحلاقية الجبليه heimwehfluh ، وجبل Aareschlucht :


10. ( الخبثاء أنا وعيالي )

:smile002:
(( كل عام وانتم بخير بمناسبة قرب حلول شهر رمضان المبارك أعاده الله علينا وعليكم ))

:50055:

السلام على زوار العرب المسافرون وعلى زوار مواضيعي بصوره خاصه ، اليوم جيتكم باحلى المواضيع ، اليوم بخبركم عن تفاصيل رحلتي لسويسرا وبالاخص لعروسة سويسرا انترلاكن ، آه على جمالك يا أنترلاكن :36_3_15:
في المنتدى اعضاء لما ينزلون مواضيعهم تكون في مواضيعهم الغالبيه صور اللي تتحدث عن نفسها وتكون تعليقات بسيطه على الصور ، وفي اعضاء ينزلون صور ويشرحون تفاصيل دقيقه ، وفي اعضاء واللي انا منهم ماعندهم خبره في تنزيل الصور ولا أعرف كيف ، وشاطره بس في الرمسه (الكلام) ، اتمنى اشدكم بموضوعي وبكلامي اللي يغنيكم عن الصور وعن خاطركم بحط روابط لاعضاء ماقصروا قاموا بالواجب في تنزيل الصور.
تفاصيل حجوزاتنا

• موعد رحلتنا السويسريه النمساويه وشوي الالمانيه وشوي الفرنسيه::36_1_41:

الذهاب يوم السبت 21/7/2007 من مطار دبي الى زيورخ في سويسرا والعوده يوم السبت 18/8/2007 من مطار ميونخ في المانيا الى دبي .

• تكاليف الرحله:

:36_1_36:
1- حجزالتذاكر فقط ( 4كبار و3 اطفال) = 25000 درهم تقريبا
2- حجز السياره:
السياره نوع مرسيدس 9راكب من شركة هيرتز للمدة كلها يعني نستلمها من مطار زيورخ ونسلمها في مطار ميونخ ( وزوجي يقول ندفع الف وخمسمئه درهم زياده لما نسلمها في بلد ثانيه) = 9000 درهم مع الزياده
3- حجز السكن :
أولا : السكن في انترلاكن :
هي عباره عن شقه مكونه من 3 غرف نوم وصاله و (عزكم الله) حمامين ومطبخ كامل من كل شئ لمدة 14 يوم = 11000 درهم
ثانيا : السكن في زيلامسي :
هي عباره عن شقتين الاولى غرفه نوم فيها سرير دبل مع سرير للبيبي وصاله صغيره ومطبخ في الصاله صغير ، وحمام وهذي فيها انا وزوجي ودودي
( ولدي الصغير ) والثانيه بعد غرفه نوم فيها سرير وهذي دبل وسرير اضافي فيها عيالي ال3 توتو وكوكي وكتكوت :bounce8:
( هاي اسماء دلعهم ، على فكره توتو ودودي انا مسميه 2 منهم وكوكي وكتكوت ابوهم مسمي 2 منهم )
نكمل مواصفات الشقه وفيها صاله اكبر من صالتنا والكنبه تتحول سرير دبل هذي كانت للخدامه ، اما المطبخ فهو منعزل عن الصاله وطبعا فيها حمام والشقتين في الدور الثالث وهم الوحيدات وبين الشقتين في ممر وباب يعني بالليل نسكر الباب الرئيسي ونترك الشقتين مفتوحات على بعض وكاننا في شقه وحده ، وهذا السكن له حكايه بس بتعرفونها في بوابة النمسا ، والمدة كانت 14 يوم و= 12100 درهم

• التكاليف الاجماليه للتذاكر والسياره والسكن = 57100 درهم

اما مصاريفنا ماأقدر اقولكم كم ، عموما هذا يفرق بين اسره واخرى حسب ميزانيتها وحسب صرفها.

نبذه عن شقة انترلاكن:

الله وفقنا بشقه في السنتر فيها 3 غرف نوم وعزكم الله حمامين وصاله كبيره ومطبخ كامل بكل اللي نحتاجه واللي مانحتاجه فيها ، وهذي أول مره نستاجر شقه بهذي المواصفات في اوروبا وحتى غسالة الصحون وغسالة الثياب والمسجل والمكنسه الكهربائيه و المظله فيها وبعد غرفة ستور وبلكونتين مفتوحات على بعض وكوايه وطاولة الكوي وتلفزيون ومطلع النا قناة الجزيره كل هذا متوفر فيها واكثر ، بصراحه كل اللي تحتاجونه واكثر فيها وجنبنا بالضبط سوبر ماركت كبير وبعد مسافه قليله المكدونالد وبعده تشوف السوق والمطاعم والمقاهي والحياه ، واحلى شئ في العماره انه فيها لفت ( المصعد)وتحت العماره في حويها ( حوشها )العاب مثل الزحلاقيه والمريحانه وكل يوم لما يجهزون عيالي احوشهم تحت يلاعبون اخوهم الصغير، وهذي الشقه اللي بالصدفه عرفناها هي ملك لشخص يعني خاصه وأجرناها منه وقررنا كل ما نفكر نزور انترلاكن مانسكن الا في هذي الشقه ، السؤال اللي الكل بيطرحه وين هذي الشقه وشو عنوانها وهنيه اقولكم ستوب ، يااخواني محد يسألني هذا السؤال لاني مابجاوب وهذي أول مره بكون فيها أنانيه ماأعطي معلومه والسبب انها شقه وحيده ولقطه وإذا نزلت عنوانها الكل بيحجز فيها ولما افكر اسير ما بحصل حجز فيها.
تفاصيل رحلتنا

اليوم الاول السبت21/7/2007 :

يوم الوصول:

وصلنا لمطار زيورخ الحمدالله كانت رحله سالمه ماتخلى من مشقة الرحله وتعبها الطبيعي ، بعد ماخلصنا اجراءات الدخول سرنا الى مكتب تأجير السيارات واستلمنا سيارتنا من شركة هيرتز ، وانطلقنا الى انترلاكن الحبيبه وبفضل الله والقارمن وصلنا بيسر وسهوله وكانت مدة الرحله ساعتين ونص تقريبا والبدايه كانت رائعه وتبشر بالخير طول الطريق السما مغيمه وامطار تنزل وتوقف وبروده حلوة ،واول ماوصلنا شفنا المكدونالد عدالنا اشترينا غدانا واستلمنا شقتنا من صاحبها اللي كان ينتظرنا ودخلنا ( مابا اقهركم بس الواقع ) لما دخلنا الشقه انبهرنا بكبرها واثاثها واسرتها اللي عددها اكثرمنا يعني خدامتي استرغدت حصلت غرفه بروحها فيها 4 اسرة و حتى البيبي حاطين له سرير خاص وطاوله يلعب عليها بكراسيها والعابها وحتى طاوله لتغيير الحفاظ فيها ياربي مابا اشوقكم وايد بس شو اسوي ماقدر اداري اعجابي فيها ، نكمل ... دخلنا ورتبنا اغراضنا وريحنا في هذا اليوم .

اليوم الثاني الاحد 22/7/2007 :

جوله في انترلاكن:

هو يوم اجازه عندهم وكل شئ تقريبا مسكر ، في هذا اليوم صحيت في الصباح الباكر واشوف من البلكونه الدنيا مغيمه والجو يخبل والكل نايم ، صحيت بوالعيال وقلتله شو رايك ننزل نتمشى ، وتشجع لما شاف الجو، تركنا العيال نايمين :36_1_50: ونزلنا نتمشى في السنتر صحيح كل شئ مسكر لكن المشي في هذا الجو المغيم مع زخات المطر :rain: ونحن نحتمي تحت المظله ونستنشق الهوا الصحي البارد شئ يخبل وتشم في طريقك ريحة الورود اللي تمر عليها ونمشي ونمشي ونوصل لمكان نسمع خرير الماي ترانا نعبر جسر من تحته نهر يجري والماي فيه صافي ونظيف ولونوصله كنا شربنا منه
( ياسلام ماي وخضرا وجو بارد ومطر شونبا اكثر من جذي ) ونشوف الناس في المقاهي يالسه ترتشف هاذيج القهوه اللي تشمها وانت على مسافه قريبه منهم ، وكملنا طريقنا ونحن نمشي ونمر على ساحه مفتوحه كبيره يغطيها العشب وهي ساحة البراشوت اللي ينزلون منها ، مشينا لحد ماتعبنا وفي طريج عودتنا صادفنا بقاله

COOP صغيره مفتوحه تابعه لسلسلة

اشترينا بعض البقاله ورجعنا وهذا اليوم كان من الايام المميزه في رحلتي لاني شعرت فيها بسعاده ما توصف وكأني في شهر العسل :36_3_13: ، الجو وايد له دور في نفسيت الانسان يمكن عشان جذي دايما نفسيتنا خايسه في بلادنا من الشمس والحر اللي عندنا وتينا الامراض بسرعه ونموت بسرعه وهم تشوفون عندهم الكبار في العمرعددهم كبير وبصحه وعافيه ونشاط والله احيانا انا كنت احس بالعجز يوم اشوف العيايز بهذا النشاط ( مره دخلت سوبر ماركت واخذت عربه ولما رحت برجعها اشوف وحده عجوز يمكن عمرها 80 سنه واقفه تنتظر اللي جدامها تمشي عشان تاخذ العربانه
(انا فكرت جذي) فقلت في خاطري حرام بساعدها وبعطيها عربانتي فناديتها لو سمحتي طبعا بالانجليزي بس ما ردت يمكن ماسمعتني فقلت بحاول مره ثانيه وفجأه خازت اللي جدامها وماوعيت الا وهي تاخذ سله مش عربناه ،بصراحه استحيت من نفسي لاني اجر عربانه عشان ... تدرون شو كان فيها .... ديايتين ( دجاجتين ) .. بالله عليكم منو العيوز فينا ( هذا الموقف كان في زيلامسي ).
نكمل بعد ماخلصنا جولتنا انا وزوجي رجعنا البيت وفطرنا ، طلعنا مع العيال في جوله ثانيه مشي واستأجرنا الركشه ( وهي العربه اللي تجرها الخيول ) وكلفتنا 70 يورو وانا ما انصح فيها كانت بايخه وغاليه وعقب كملنا جولتنا حول انترلاكن بالسياره .
رابط جوله في انترلاكن http://www.interlaken.ch/ferienorte/interlaken-matten-unterseen.html?L=3

اليوم الثالث 23/7/2007 الاثنين:

رحلة إلى الزحلاقية الجبليه heimwehfluh ، وجبل Aareschlucht :

قررنا نسير الزحلاقيه الجبليه واللي بالصدفه كانت قريبه منا واسمها heimwehfluh وهو مكان جميل ونصعدله بقطار معلق والجبل ممرتفع وايد وفيها منطقة العاب للاطفال حلوه وننزل بالزحلاقيه وكانت ممتعه ، وصار لنا موقف طريف فيها ، لما صعدنا فوق خبرونا ننتظر لان الزحلاقيه فيها مشكله وبعد فتره فتحوها فوقفنا طابور وتجدم بوالعيال :m9: ويادودي اللي حطاه في حضنه ( ولدي عمره سنتين و7 شهور ) نرجع لابو العيال ( ان شاء الله مايحرج عليه :112: لما اخبركم شو سوى ) قبل ما يركب كلمته الموظفه ونبهته انه لما يوصل قبل النهايه بيشوف حاجز احمر لازم قبلها يضرب بريك ويوقف فرد عليها اوكي ، وانطلق الحبيب بالزحلاقيه والموظفه واقفه تراقبه من شاشة الكاميرا وفجأه صرخت وحرجت وتمت تتحرطم وصدت صوبي وقالتي زوجك مايفهم الانجليش فرديت نعم نعم يفهم ( وهو انجليزيته قويه ) الظاهر انه هو ماركز في كلامها وقاللها اوكي بس جذي ولما نزل بالزحلاقيه ماضرب بريك فصفك راسه الحاجز والله سلمه وسلم ولدي لكن انا وعيالي لما فهمنا شو صار صرنا نضحك عليه وقلت في خاطري لو ادري كنت قلتلها مايعرف انجليش خشيم ولا الفشله ، طبعا خرب اللعبه وتعطلت فتره بسيطه ، وبعدين ركبنا نحن الزحلاقيه وحب يشطر علينا فمسكين ظل ينتظرنا تحت وكل مايشوف حد منا نازل ينبه عليه بالبريك ونحن نضحك عليه

( الخبثاء أنا وعيالي )

و خلصنا رحلتنا هذي بسرعه ففكرنا نكمل اليوم برحله ثانيه فأخترنا نسير إلى جبل Aareschlucht
ولما وصلنا قطعنا التذاكر ودخلنا الجبل ،والمكان أو الرحله هذي هي مشي على جسور خشبيه بمحاذات الجبل يعني لاصقه في الجبل واحيانا ندخل داخل الجبل وهو ممر جسري طويل وعلى الجهه الثانيه وانت تمشي تشوف نهر طويل والماي فيه يجري بشده بصراحه هو شوي يخوف بس المكان فيه امان ومناظر روعه ورياضه حلوه وانصح اللي بيسير يلبس جاكيت لان المكان بارد ويلبس جوتي رياضه لان بتمشون وايد واللي عنده طفل يركبه عربانه ، استمتعنا وايد بالرحلتين ورجعنا البيت مبجر.
http://www.aareschlucht.ch/english/bilder_e.htm
تابعونا في الحلقات القادمه من مسلسلنا المثير ( دودي وكوكي وتوتو وكتكوت )
:bounce8: