1. http://www.hotelscombined.com


2. وهاذي اسعار الفنادق :

بسم الله الرحمن الرحيم

• تجهيزات السفر *

في البداية احب اشكر كل من ساعدني ، وكل من افادني
90% من معلوماتي عن المكان اللي بروح له ، من هالمنتدى .. الله يعطيكم الف عافية
/
من حوالي سنة ، كنت ادور بالمنتديات لين طحت على هالمنتدى
وقمت اتصفح مواضيعه ، واعجبت بدول كثيرة .. لكن اكثر شي شدني النمسا
بالتحديد زيل ام سي ، كنت الاحظ تقريباً كل من راح لهالديرة يجي ويمدح فيها
واتفرج على صور الديرة اعجبتني مره
ف كان حلم من احلامي اني اروح النمسا.
قبل العطلة الصيفية ب شهر تقريباً تحمست لفكرة اني اروح للنمسا
بمان اني اعرف عنها اكثر من اي بلد ثاني ، صملت اني اروح للنمسا
خلاص .. حطيت في بالي ابي النمسا ، والله المعين .
/
أول شي سويته رحت لمكتب سياحة واستفسرت من عنده
وعطاني معلومات عامة عن التذاكر والفنادق
قالي التذكرة 3200 ريال الشخص
والفنادق تقريباً 12 الف ريال
وحذرني ، قالي اول شي واهم شي تسويه انك الحين تحجز طيران
وبعدها سو كل شي
بس انا ما اخذت بكلامه ، وخلاص اهم شي اخذت معلومات عامة
خلني اخلص دراسة واتفرغ للسفرة وطلباتها
اول ماخلصت ، رحت ادور حجز .. ماعاد فيه كل شي فل
او انتظار ، طبعاً هالكلام عن الخطوط السعودية
رحت ادور طيران ثاني .. زين لقيت طيران الامارات
بس طبعاً فرق السعر ،
يعني اخذت التذكرة ب 4339 ريال
يعني طلعت علي التذكرتين 8678 ريال
قلت اقول امسك قردك لايجيك اقرد منه
وحجزت بتاريخ 26/7/2008 ترانزيت من الرياض الى فيينا مروراً ب دبي ( 10 ساعات )
والعودة من فيينا ل دبي 11/8/2008
ومن دبي الى الرياض 13/8/2008
/
رحت مكتب الطيار ، ادور حجز فنادق كامل المدة
طلع علي تقريباً 15 ليلة ب 11 الف ريال
قلت بتهور وبتفلسف وبحجز بنفسي
رحت قريت عن طريقة حجز الفنادق وبصراحة اكتشفت انه شي سهل
ويعطيك خيارات اكثر ، وتتفرج لين تمل ، وتقرا في الفندق جميع ميزاته
ف صملت احجز بنفسي .. والحمدلله حجزت وتيسرت الامور
من موقع https://www.booking.com
وموقع http://www.hotelclub.com
وهذا موقع يبحث لك في اكثر من ثلاثين موقع حجز فنادق ، رهيب الموقع

http://www.hotelscombined.com

وهاذي اسعار الفنادق :

• فيينا 3 ليالي 1195 ريال فندق Airo Tower Hotel Vienna
• زيل ام سي 5 ليالي 3960 ريال فندق Living Max
• سالزبورغ 3 ليالي 966 ريال سكنت عند عجوز بيتها زي الفندق
• ميونخ 3 ليالي 1557 ريال فندق K+K am Harras Hotel Munich
• دبي ليلتين 600 ريال فندق Grand Moov Hotel

/
طبعاً سألت عن فيزا الشنغن
وهاذي طلباتهم :

• طلب معباء بالكامل بالانجليزي تحمله من موقع السفارة. ( ابلكيشن )
• صورتين ملونه مكشوفه الراس.
• جواز سفر وصورة له.
• خطاب تعرف عمل من الوالد مع صوره للخطاب

بدون تفويض وماتفويض ، مجرد خطاب عمل من جهة عمله
ان كان جهة حكومة كويس .. وان كان قطاع خاص
لازم تصديق من الغرفة التجارية.

• كشف حساب .. وبعد هذا كشف حساب الوالد بدون اي شي زيادة

كشف حساب لمدة 6 اشهر عطيتهم .. ويكون فيه اكثر من 30 الف ريال.

• تأمين صحي .. يغطي كافة مدة السفر ، لو نقص يوم رجعوك.
• حجز طيران .. صورة من التذاكر الالكترونيه بس .
• مبلغ 355 ريال للسفارة لكل طلب ( ابلكيشن ) كاش طبعاً

مافيه شبكة هناك خ.

• حجز فنادق .. لكامل المدة .. وطبعاً هالشرط

هو اللي اكثر الناس تنرفض طلباتهم بسبته ،
اول شي لازم تكون اكثر من نص المدة في النمسا
يعني فرضاً ناوي تروح للنمسا والمانيا .. ومدة رحلتك 15 يوم
لو كان في المانيا 10 ايام ، والنمسا 5 ايام
حتى لو تذاكر السفر ذهاب الى فيينا وعودة من فيينا
مايقبلون .. اهم شي .. اكثر من نص المدة في النمسا
اتمنى وصلت المعلومة.
طبعاً فيه واحد من المقدمين على الفيزا ، تذاكره على باريس
ذهاب وعودة .. وحجز فنادقه كلها بالنمسا .. رفضوه
يقولون لا انت تلعب علينا .. خ قافطينه ، فاهمين لعبته
هاذي طلباتهم كاملة .
نصائح شخصية :
1- انصح اي واحد ناوي يروح للسفارة ويبي يخلص بدري
حاول تكون عندهم 7 ونص الصباح ، عشان تسجل اسمك عند حق الامن
ورح افطر وتعال قبل الساعه 9 عشان تدخل بدري ، وتخلص بدري
طبعاً يبدا تقديم الطلبات من 9 - 11
2- ان دخلت ، فيه ثنين .. يماني ولبنانية
اليماني اسمه علي .. ويتساعد معك
عكس اللبنانية الله يهديها .. متشددة مره
قليل من تقبل اوراقه ، ف نصيحة تروحون للاخ علي
حتى يعني لو فيه نقص بسيط ، يمشيك رهيب
3- ان عطوك موعد ، تعال لهم بعد 10 ايام .. بدون ماتدق عليهم
لان فيه بعض الاخوان يدقون عليهم يقولون لا توها ماخلصت تأشيرتكم
مع انها خالصة من زمان .. ف نصيحة رح بنفسك وشف اريح لك
طبعاً انا قدمت اوراقي 29/6
وكل اوراقي كانت كاملة ، بس كان عندي التأمين
مايغطي كافة ايام السفر ، ف رجعت لهم 30/6
وقدمت اوراقي، واخذوها وعطاني وصل وقال تعال بعد 10 ايام
جيتهم يوم 12/7 يعني بعد 12 يوم من تقديم الفيزا ،
دخلت واستلمت الجوازات بسرعه . بدون سرا ولا اي شي
عشاني بستلم الجوازات ، مو بقدم طلب
يوم شفت الفيزا تم اصدارها تاريخ 8/7 يعني قبل اربعة ايام
يعني اخذت الفيزا .. 8 ايام بس