وعليكم السلام ورحمة الله وبركاته
الف مبروك وان شاء الله رحله موفقه
اول احجزوا الطيران لان التذاكر تصعد اسعارها وتنزل طبعا اذا ما حجزتوا
لحد الان والباقي سهل جدا مع وجود نحبه من الاعضاء المتميزين اللى ماراح
يقصرون معاك
وبالنسبه لتوزيع الايام والفنادق يتحدد بعد حجز التذاكر والشباب فيهم الخير والبركه
بالتوفيق

مبلغ 15 الف الى 20 الف كافيه ان شاء الله بحسب تكلفه الفنادق والطيران الدولي .. وعلى حسب صرفيتكم
اهم شي الان حجز الطيران الدولي وتكلفته
الطيران الدولي ممكن تحصلون ب 1500 ريال للشحص الواحد
وممكن تحصلونها ب 5000 ريال او اكثر للشخص الواحد
بالنسبه للفنادق : نفس الشي ... فيه فنادق اقل من 100 ريال .. وفيه فنادق اكثر من 1000 ريال
والفنادق المتوسطه السعر بتكون ما بين 300 الى 500 ريال
خلينا نقول 400 ريال
بالنسبه للصرفيات اليوميه لعدد شخصين : برضه نفس الشي ... فيه ناس تصرف باليوم اقل من 100ريال ... وفيه ناس تصرف باليوم اكثر من 500 ريال باليوم
لكن الغالب يصرف ما بين 250الى 550 ريال
خلينا نقول 400 ريال
المواصلات بين المده : على حسب الطريقه والمشوار وعدد المدن ..
خلينا نقول 1000 ريال
خلينا نحسب :
المعطيات: ( عدد الليالي هو 17 ليله/18 يوم + عدد الاشخاص 2 + معدل تكلفه الفنادق يوميا هو 400 ريال + معدل المصاريف اليوميه هو 400 ريال + تكلفه التنقلات بين المدن هو 1000 )

• تكلفه الفنادق : 400 * 17= 6800 ريال
• تكلفه المصاريف : 400* 18 = 7200 ريال
• تكلفه التنقلات بين المدن : 1000 ريال

نجمع :- ( 6800 + 7200 + 1000 ) = 15 الف
الان باقي تكاليف الطيران الدولي
وبتكون للشخصين ما بين 3000 ريال الى 10000 ريال
لكن مدام السفر بشهر خمسه فالسعر المناسب للشخصين هو ما بين 3000 ريال الى 6000 ريال
ومثل ما قلت بالبدايه ممكن تصرفون اقل من المبلغ المذكور وممكن اكثر
وكل هذا يعتمد عليكم انتم

عليكم السلام و رحمة الله و بركاته
مبروك الزواج مقدما و بارك الله لكما فيه
ما قصروا الاخوان الاعزاء ( مسألة وقت ) و المشرف الغالى بونايف ( النهر الجارى )
برامج العرسان 15 يوم ( 14 ) ليلة كالاتى :
2 سيلانجور فندق صنواى لاقون
3 لنكاوى فندق ويستن لنكاوى
3 بينانج فندق بارك رويال
2 مرتفعات الكاميرون فندق كاميرون هايلند او فندق اكواتريال
4 كوالالمبور فندق الماريوت
1 بورت ديكسون متتجع ليجند
الذهاب الى مرتفعات جنتق صباحا و العودة مساء.
الجدول المقترح 18 يوم ( 17 ليلة )
2 سيلانجور فندق امباير
4 لنكاوى منتجع برجايا شاليه على البحر
3 بينانج فندق قولدن ساندز
3 مرتفعات الكاميرون فندق هوس ليك
5 كوالالمبور تقسم على فندقين * 2 يوم فندق تريدرز بالقرب من البرجين * 3 يوم فندق رويال شولان
1 بورت ديكسون منتجع ليجند ووترهومز فيلا بمسبح خاص
او استبدال مرتفعات الكاميرون بمرتفعات جنتق حيث نفس الاجواء مع فارق و الملاهى و العاب
بالتوفيق

مسألة وقت..
إن شاء الله رآح نحجز بهالأسبوع والله يجزاك ألف خير ويبارك بعمرك

النهر الجاري
بالنسبه للتذاكر بحثت ولقيت سعر التذكره في الخطوط الجويه القطريه 3000 ريال
يعني شخصين ب 6000 ريال لكن طلعت لي رسوم ثانيه يمكن لأني أول مره أحجز عن طريق النت وماعرف شنو التفاصيل هذي ):
يخليك ربي على تقسيم المبلغ باقي الحين أعرف وين راح أسكن وشنو جدول الرحله حتى ماتكون عشوائيه وفيها لخبطه

الأسفار متعتى
الله يجزاك خير كفيت ووفيت وبإذن الله أعتمد جدول الرحله اللي زودتني فيه

ممكن تحصلون سعر ارخص من 3000 ريال للتذكره للشخص الواحد
من فين محل الاقلاع
ومتى تاريخ الذهاب والعوده

من قطر ..
تاريخ الذهاب 3/05/2011
العوده 20/05/2011

بالفعل تطلع على القطرية
السعر الكلي 3,000.00 qar
على الاتحاد على الدرجة السياحية
الإجمالي
qar 2,770.0
و مدة الاننتظار فى مطار دبى حوالى ساعتين و نصف
بالتوفيق