- ارجو مساعدتي واجركم عند الله..
السلام عليكم...بداية شهادة خير والحق يقال...من افضل المنتديات اللي مرت علي واعتبره كمرجع لي في كل اسفاري ولكنني فالمرات الماضيه كنت كقارئ فقط فاعجبني واحببت ان انظم اليكم واستفيد منكم...
ارجو مساعدتي واجركم عند الله..
بمشيئة الله ناوين نسافر انا وزووجتي الى امريكا وبيني وبينكم ابدا ما اعرف شي عن امريكا..قرات بعض التقرير والاجراءات لبعض الاعضاء جزاهم الله خير واريد الاستفادة اكثر منكم...
خطتي اسافر بتاريخ 17|2 وبتكون على طيران الاتحاد ان شاء الله(احد فيكم جرب الاتحاد وشو رايكم؟) وسابدا بنيويورك..مخطط اجلس فيها يومين او ثلاث بالكثير...طيب لما اوصل مطار جون اف كنيدي...وين فندق مناسب توصون به وكم تقريبا المسافه من والى المطار؟ وكيف ممكن اوصل له؟ والاهم من هذا ..لو مثلا رحلتكم كذا قصيره وين افضل الاماكن اللي ازورها في نيويورك؟؟؟؟ ونفس الشي قرات ممكن نطلع ف رحله بباص يلف بك حول المدينه فكيف احصل هذا العرض؟ كنت ناوي اروح شلالات نياجرا بس سمعت ثلج وما بنستمتع خلال هالفتره فكنسلتها:-(
طيب بعد نيويورك...ناوي اسافر الى اورلاندو وبحجز طيران دلتا او جت بلو...بس وين افضل احجز ف اورلاندو؟ وكيف بالنسبه للوصول الى ديزني وينفرسال وبقية الاماكن ؟؟ثانيا بالنسبه لدزني على حسب ما قرات فيه بعضها للصغار وما يحتاج ندخلها..ف اي حديقه ادخل ومناسبه للكبار؟؟ وكيف اسعارهن؟ والمده المناسبه؟ نفس الشي لينفرسال واتوقع قرات بعض الاعضاء ينصحوا بالذهاب الى سيرك او سينماء...فوين هذا؟ وكيف الطريقه؟ والحجوزات؟
وتقريبا ناوي اجلس هنا 5 اياموبعدها استاجر سياره واروح ولايات او اماكن قريبه من اورلاندو...فهل افضل استاجر السياره منذ البدايه او اسكن فالبدايه ف فندق ف ديزني لاند او قريب منها واقدر اروح لديزني ويونيفرسال والسرك من خلال الفندق ولما اخلص من اورلاندو استاجر سياره واروح بقية البلدان؟.فهل الفكره مناسبه وامنه خصوصا بكون انا وزوجتي فقط واول مره اسوق ف امريكا؟؟؟...فمن وجهة نظركم وين افضل؟ سمعت ميامي قريبه بس بعض الاعضاء صراحه تخوفت لما يقولوا يحتاج تنتبه فيها..اذا كان فيه اماكن اخرى وين؟ حاط تجوال بالسياره لمدة 3 الى 4 ايام.. وبعدها ارجع لاورلاندو وبهدا بالطياره لنيويورك...
وكيف الاجواء ف خلال هالفتره؟
مع العلم الانجليزيه تمام معي ولله الحمد..
كل الشكر والتحية:-)
ما شاء الله خطة سفرك تقريباً كانت نفس خطتي اللهم التغيير بالذهاب الى لوس انجلوس و حضرتك الى اورلاندو
في البداية حبيبي انا سافرت من الكويت على الاتحاد الاماراتيه بيوم 14-12-2009 (توه قريب) و كنت مع زوجتي و رايحين شهر عسل .. المهم حجزت على السياحية و يا ليتني ما حجزت فيها لأن الوضع يقول باص مواصلات في باكستان و لمدة 15 ساعة الى نيويورك .. كانت سعرها التذكرة 320 د.ك و البزنس 1300 د.ك فا قلت ادلع نفسي في الفنادق و السوق هناك بس فكرتي خطأ اساساً لأن لازم تكون مرتاح بهالمدة الطويله في الطيارة و على الاقل الرحلة تكون عالبزنس و تقلل جودة الفنادق هناك و تاخذ سيارة و تفر في اورلاندو على كيفك بس الاهم تاخذ معاك ليسن دولي و سهالة شوارعهم لا تخاف ..
بالنسبة للاماكن السياحية و الحجز فا كان عندي هالموقع ما شاء الله ما خلوا شي فيه
http://www.allnewyorktours.com/
حجزت الهيلوكوبتر و تشوف فيها نيويورك من فوق و رحلة بالباص تشوف فيها نيويورك من تحت و لله الحمد كانت رحلات موفقة و ممتعة و طبعاً لازم تطبع اوراق الحجز و ما حصلت لي فرصة اروح شلالات نياغرا لاني قعدت 4 ايام و سكنت في فندق سوفيتيل و مكانه حلو يم تايمز سكوير و fifth avenueو بالنسبة لأورلاندو فا ما حصلت لي فرصة ازورها و لكن هذا الموقع ايضا تقدر تحجز فيه كل رحلاتك و بكل بساطة نفس نيويورك
و عسى الله يوفقك في سفرتك القادمة
و اي استفسار او سؤال انا حاضر و بالخدمه